«Дизель экспорты осы жылдың наурызынан бастап тоқтады. Ал бензинді экспорттау қаңтардан бері тоқтаған. Ішкі сұраныс жоғары болғандықтан, осындай қадамға баруға мәжбүр болдық», - деді вице-министр.

Энергетика министрлігі дерегінше, сұраныстың өсуіне ішкі нарықтағы бағаның төмен болуы әсер еткен.

«Қазір ірі жанармай құю бекеттерінде баға 207-208 теңгенің аралығында. Ал кейбір желілер дизельдің литрін 230-240 теңгемен сатып жатыр. Шынын айту керек, біраз уақыт жанармай құнын 200 теңгеден асырмадық. Сол кезде Ресеймен айырмашылық литріне 100 теңгеге жетті. Өзбекстан 70-80 теңге, ал Қырғызстанда дизель отыны 61 теңгеге қымбат сатылды. Баға арзан болғандықтан, транзиттік көліктер Қазақстанға кірер жолда жанармай құйып алуға тырысатын. Осыдан кейін шекарадағы аймақтарда сұраныс күрт өсіп кетті», - деді Мағауов.

Вице-министр былтырғы жылмен салыстырғанда, биыл дизель отынын тұтыну 480 мың тоннаға өскенін айтады.

«Елімізде тамыз айында 508 мың тонна дизель өндірілді. Ал сол айдағы сұраныс 519 мың тоннаны құраған. Бұл - бұрын-соңды болмаған көрсеткіш».

Министрлік дерегінше, қазір қорда 210 мың тонна жанармай қалған. Бұл кемі 11-12 күнге жетеді. Әсет Мағауов елде дизель тапшылығын болдырмас үшін Ресеймен келіссөздер жүргізілгенін, 100 мың тонна сатып алынатынын мәлімдеді.

Бұған дейін 1 қазаннан Павлодар мұнай өндіру зауыты күрделі жөндеуге тоқтайтыны хабарланған еді.

Қазақстанда кейінгі күндері жүргізушілердің наразылыққа шығып, жанар-жағар май бағасын қымбаттатпауды талап ететіні жайлы ақпарат тараған. Осы аптада Шымкентте жүргізушілер белсендісі ұсталып, оларды қолдағандардан полиция түсініктеме алған.

Abai.kz