Михаил Саакашвили драмасы – сәттілік пен сәтсіздіктің, ақ пен қараның күресі секілді. Ол жұлдызы жанып туған адам. Зиялы отбасында дүниеге келді, кейіннен білімді, текті голландиялық Сандра Руловспен кездесіп, шаңырақ көтерді. Жас, жігерлі Михаил 1990 жылдары Грузия билігіне араласып, қатардағы партия белсендісінен парламенттік фракция жетекшісіне дейін көтерілді.

Оппозицияға кетті, бұл Саакашвили беделін тез көтерді. Грузияда қылмыстық топтар жүздеп көбейіп, көшеде қару-жарақпен жүретін кезеңде ұстараның жүзінде жүріп, билікке жетті. Содан кейін Саакашвили түбегейлі реформалар жүргізді. Ол Украина тәжірибесіне сүйене отырып, Грузияға он төрт жыл бұрын Ресейдің басып кіруі сөзсіз қателік болғанын түсінді. 2011 жылы 11 қарашада саясаткер өмірінің қара жолағы басталды.

Дәл осы күні Грузияның барлық бұқаралық ақпарат құралдары грузин қоғамында шынайы сілкініс пен үрей тудырған сенсациялық ақпаратты жариялады. Грузин елінің ең бай өкілі, миллиардер және меценат Бидзина Иванишвили 2012 жылы өтетін парламенттік сайлауда жеңіске жетіп, Саакашвилиді ауыстырмақ. Билікке жету үшін оппозициялық партия құрады.

Саакашвилидің билеуші ​​партиясы Иванишвилиге қарсы нағыз қарсы үгіт-насихат соғысын жариялады. 2012 жылы Саакашвилидің партиясы сайлауда жеңіліске ұшырады.

Жаңа үкімет тарапынан қабылданбаған, пікірлестердің сынынан көңілі қалған, халқына ренжіген Саакашвили елден кетіп, табысты реформатор атағын пайдаланып, Украинаның жетекші саясаткері болуға тырысады.

Одесса облысының губернаторы болған Саакашвили Киевке жету үшін байсалды, жай әрекет етуі керек еді. Әуелі Одесса халқының көңілінен шығып, іскер басшы екенін дәлелдеу керек болатын. Бірақ Саакашвили байсалды қимылдайтын адам емес. Ол көп дүниенің тез орындалғанын қалады. Рас, Зеленскийдің тұсында ол билікпен қарым-қатынасын біршама жақсартты, бірақ ешқашан нақты өкілеттіктерге ие болмады. Саясат бокс спорты сияқты. Басынан бірнеше рет соққы алған спортшыға, бапкері «демал, күшіңді жиып барып, рингке шық, асықпа» дейді. Саясатта да асқан сабырлылық керек. Михаил шыдамсыздық танытып Грузияға қайтып оралды. Нәтижесінде, Саакашвилиді күтіп отырған дұшпандары оған қарсы бірнеше қылмыстық іс қозғады.

Саакашвилидің батыстағы ықпалды меценат достары «Грузияға бармай тұра тұр, сотталасың, біз көмектесе алмай қаламыз» деп ескерткен.

Саакашвилидің Грузияға оралуы үлкен қателік болды. Елде революциялық көңіл-күй болмағанын, тіпті оның партиясына дауыс бергендердің арасында бүгінгі Иранда болып жатқандай көшеге шығып, жүйемен төбелесуге дайын болғандар өте аз екенін түсіну керек.

Нәтижесінде күткен нәрсе болды: мемлекеттік шекарадан өткеннен кейін Саакашвили тұтқындалып, түрмеге жабылды.

Керімсал Жұбатқанов

Abai.kz