Астындағы тағынан түссе де, басынандағы бағынан айырылмаған Нұрсұлтан Назарбаевтың «көзін ашып көрген, аузын ашып үрген» тұңғышы Дариға Дубай мен Астананың арасында саяхаттап жүргенін әлемдік, отандық БАҚ жіті қадағалайтын қазақтың көз алдындағы тірлікке айналды.

Дариғаның көзінен Түркіменстан мен Әзербайжандағыдай биліктің тізгін әкеден балаға мұра етеушілік бұлбұлдай ұшып, арты қазақтың арыстандай айбаттылығын танытқан «Қасіретті Қаңтар» оқиғасынан кейін бүкіл жоспары күрт бүлінген Дариға Назарбаева осы жолы жүрісінен жаңылып, Астана әуежайында көзге түсіп қалды.

Бұл орайда айтпағымыз, амалсыз аяқ астынан папарацци болған әлдекім «құланның қасынуына мылтықтың басылуы» дегендей, экс-президенттің қызы екі немересінің ортасында Дубайға ұшып бара жатқан кезін ұялысына сәтінмен түсіріп алыпты. Кейін кездейсоқ папараццидің суреті блогер Сырым Итқұловтың парақшасында пайда бола кетіп, қазақ қоғамын түрлі-түрлі ойға жетелеп, жұрт арасына кеңінен тарады.

Сурет: Сырым Итқұловтың желідегі парақшасынан алынды.

Біздің түрлі ойға жетеледі дегеніміздің мәнісі: бұған дейін депутат Бапи «Ескі Қазақстанның» кезінде жалғанды жалпағынан басқан «50-дің ар жақ-бер жағындағы» өкілдері жоспар құрып жатыр» деген мәлімдемесіне орай туындап отыр.

Елтұқа ағамыз одан ары өз мәлімдемесінде: «Бұл күштің әлеуеті де, қаржылық-материалды жағдайы да, адами ресурсы да күшті, қазіргі технологияны, интернет ресурстарды пайдалану мүмкіндігі де жоғары», - деп сақтансаң жау алмайды деген сөзді қаперімізге салады.

Ұзынқұлаққа сенетін болсақ: «Дариға Қазақстанға келуге қаймығады» деген қауесеттер де тарағанын жоққа шығармаймыз. Алашқа әйкәпір болған әулеттің кезінде істегені мен тістегені әшкере болған кезінде «Қазақстанды уысында ұстаған отбасының былықтары туралы» аз жазған жоқ.

Осы орайда тағы бір айта кетерлігі: Тәуелсіз журналистердің халықаралық бірлестігі (ICIJ) таратқан ақпарат бойынша Дариға пен Болат Назарбаев, Болат Өтемұратов, Қайрат Сатыбалды, Тимур Құлыбаев, Владимир Ким секілді «Назарбаев кланының»... елімізден сыртқа астыртын алып шыққан ақшасы 130 млрд $-дан асып жығылады екен.

Бұл арада ICIJ таратқан ақпарат олардың тек соңғы 7 жылдың көлеміндегі ел-жұртың аузынан жырып жымқырған ақшасы. Ал, оған дейінгі іс-әрекеттері әлі зерттелу үстінде екенін оқырмандарымыз есіне салғымыз келеді. Егер осы ақша елге қайтарылса, қазақтың иығына ауыр жүк болып отырған сыртқы қарыздан біржола құтылар едік-ау!

Әбіл-Серік Әліакбар

Abai.kz