Wall Street Journal (WSJ) басылымының дереккөзіне сүйенсек, Иран АҚШ-пен ықтимал келіссөздер алдында бірқатар талаптар қойған.

Иранның негізгі талаптары:

• Парсы шығанағы елдеріндегі барлық американдық базаларды жабу;

• Жасалған соққылар үшін өтемақы төлеу;

• Ормуз бұғазында жаңа тәртіп орнату (бұл Иранға Мысырдың Суэц каналындағыдай өтетін кемелерден ақы алуға мүмкіндік беруі тиіс);

• Соғыстың қайта басталмайтынына кепілдік беру;

• Израильдің ливандық «Хезболлаға» жасаған соққыларын тоқтату;

• Иранға салынған барлық санкцияларды алып тастау;

• Иранның зымыран бағдарламасын ешқандай шектеусіз сақтап қалу.

Басылым американдық шенеуніктің сөзін келтіре отырып, Иранның талаптарын «күлкілі әрі шындыққа жанаспайды» деп атады. Сонымен қатар, араб және американдық лауазымды тұлғалар Иранның бұл ұстанымы мәмілеге келу мүмкіндігін соғысқа дейінгі кезеңнен де алыстатып жібергенін алға тартуда.

Бұған дейін БАҚ беттерінде АҚШ-тың Иранға өз талаптарын жолдағаны туралы ақпарат тараған болатын. Ол 15 тармақтан тұратын жоспар болып, ядролық әлеуетті толық жоюды және Ормуз бұғазын бұғаттаудан босатуды көздейді.

WSJ дереккөздері Иран мен АҚШ арасындағы хабарламалар делдалдар арқылы берілгенін растап отыр.

Abai.kz