Ақмолла облысының Атбасар ауданына Қытайдан 40 отбасы көшіп келіп қоныстанып жатқан көрінеді. Бұл туралы өз блогында Серік Мұратхан мырза «Атбасарға қытайдан «тың игеруге» 40 отбасы келді!» деп жазып отыр. «Солтүстік обылыстарды Қытайға жалға береді!» деген хабар тарағаннан кейін осы жайлы аңысқа құлақ түріп жүр едім. Дәл кеше кеште Қарағандыда тұратын бір жерлес бауырым телефон шалды. -Сенің айтқаның шынға айналып жатыр ғой! Кеше Атбасарға барған бір қарағандылық досым «наурыз мерекесін тойлап, қаражорға билеп жатқан жаңадан көшіп келген қытай қазақтарының тойының үстінен түстім» деп жатыр- деді. Мен жалғасты сұрастыра келе білгенім мынау болды: Атбасарға ат басын тіреген қырыққа тарта отбасы Қытайдың Алтай аймағынан келген «тың игерушілер» болып шықты. «Тың игерушілер» қытайдың ауыл-шаруашылық компанияларымен келісім-шарт негізінде келген көрінеді. Келісім-шарт бойынша Қытай жақ ауыл-шаруашылық техникасын шығарады. Ал келген еңбек күші 5 жыл бойы Қытайға жалданып жұмыс істейді. 5 жыл ішінде Қытай салған ақшасын қайтарып алып, келген қазақтарға техникаларын тастап, шартты үзеді екен. Осы хабарды естіген соң ол бауырыма қайтсеңде «Атбасарға келген 40 отбасының бірінің телефон номерін тауып бер» деп тапсырма беріп едім,тәңертеңнен бері бауырымнан да хабар жоқ. Осы хабардың нақтылығын мүмкіндігі бар ақпарат құралдары анықтап жіберсе деген үмітпен жариялап отырмын» дейді өзінің блогында.

Абай-ақпарат