Биыл жылдың соңына дейін елімізде құны 700 млрд. теңге болатын 120 жобаның құрылысы аяқталады. Бұл туралы Елбасының қатысуымен өткен «Қазақстан: Жаңа индустрияландыру. 2014 жылғы бірінші жартыжылдықтың нәтижелері» атты жиында ҚР Премьер-Министрінің орынбасары, Индустрия және жаңа технологиялар министрі Әсет Исекешев мәлімдеді. Министрдің айтуынша, 4 жыл ішінде мемлекеттік бағдарлама аясында 672 жоба жүзеге асып, 70 мыңға жуық жұмыс орны ашылған. Жұмысын дөңгелетіп әкеткен бұл кәсіпорындардың 80%-ы жоспарды толық орындап отыр.

- Индустрияландыру картасы бойынша жүзеге асқан жобалар Үкіметтің бақылауында. Нәтижесінде аталған жобалардың 80%-ы жоспар бойынша жұмыс жасағанын көріп отырмыз. Сонымен қатар қазірде теміржол, машина құрастыру саласының жұмысы 20 есеге артқан. Бұл машина жасау саласына қарқын берді. Айтар болсақ, бүгінде сатылымдағы әрбір төртінші жаңа автокөлік Қазақстанда жасалған деген атауға ие,- деді министр Әсет Исекешев.

Абай-ақпарат