قىرعىزستاننىڭ ورىنبورداعى قۇرمەتتى كونسۋلى جاندار ۋلۋ تاالايبەك كورشى ەلدىڭ بيلىك وكىلدەرىمەن ترانزيت ءدالىزى جونىندە كەلىسسوز ءجۇرىپ جاتقانىن ايتتى. "ديپلوماتيالىق كەلىسسوز كەمىندە 20-30 كۇنگە سوزىلادى" دەگەن ول.

"ميگرانتتارعا كومەكتەسىپ جاتقان مەيىرىمدى جاندار تابىلىپ جاتىر. ولارعا قازىر جەرگىلىكتى تۇرعىندار، ۆولونتەرلار مەن قايىرىمدىلىق قورلارى كومەكتەسىپ جاتىر", – دەپ كونسۋل ورىنبورلىق باسىلىمعا پىكىر بىلدىرگەن.

باسىلىم مالىمەتىنشە، ميگرانتتار قازىر تىگىلگەن شاتىردا تۇرىپ جاتىر. اراسىندا اياعى اۋىر ايەلدەر، زەينەت جاسىنداعى قاريالار مەن بالالار دا بار.

بۇل وسىمەن ورىس-قازاق شەكاراسىنا جينالعان ءۇشىنشى توپ. ءبىرىنشى توپتاعى 541 ادام 7 مامىردا شەكارادان وتكەن. قىرعىزستانعا بارعاندا، ولاردىڭ جۇزدەن استامىنان كوروناۆيرۋس انىقتالعان. ەكىنشى توپتاعى 500 ادام مامىر ايىنىڭ ورتاسىندا شەكارادان ءوتىپ، ەلىنە ورالعان.

Abai.kz