قازاقستاندا جەدەل جاردەم قىزمەتىنە اقشا تولەنەدى
قر دەنساۋلىق ساقتاۋ ۆيتسە-ءمينيسترى اجار عينيات جەدەل جاردەمدى ءموبيلدى بريگادالار ارقىلى شاقىرتۋ قۇنى مەن ولار قانداي قىزمەت كورسەتەتىنىن ايتتى.
«مينيستر ايتقانداي، اۋرۋحانالار مەن جەدەل جاردەم قىزمەتتەرىندە ءموبيلدى بريگادالار پايدا بولادى. بۇگىننەن باستاپ جۇمىسقا كىرىستى. ولاردىڭ قىزمەتىندەگى تاريف قۇنى دا بەلگىلى. باعاسى - 5 400 تەڭگە. بريگادالار كوروناۆيرۋسقا كۇدىگى بار نەمەسە تۇماۋ جۇقتىرعانداردى قاراپ، ولاردان تەست الۋ ءۇشىن بارادى. ءبىر شاقىرعان ادامعا ەكىنشى رەت بارمايدى. تەست ءبىر رەت الىنادى جانە ونىڭ ناتيجەسى ۋچاسكەلىك دارىگەرگە بەرىلەدى», - دەيدى اجار عينيات.
ايتا كەتەيىك، بۇعان دەيىن دەنساۋلىق ساقتاۋ ءمينيسترى الەكسەي تسوي قازاقستاننىڭ جەدەل-جاردەم قىزمەتى شاقىرتۋلارعا ۇلگەرمەي جاتقانىن، سوندىقتان، قوسىمشا 3000 ءموبيلدى بريگادالار قۇرىلعانىن ايتقان. ولاردىڭ ءتاريفى 2020 جىلدىڭ 1 شىلدەسىندە بەكىتىلگەنمەن، مينيستر ءموبيلدى بريگادالاردىڭ شاقىرۋ باعاسىن ايتپاعان ەدى.
Abai.kz
