جاقىندا عانا ەلىمىزدەگى جالعىز سپورتتىق تەلەارنا «Qazsport» ارناسىنىڭ باسشىسى اۋىستى. ارنانى 5 جىلدان اسا باسقارعان پاۆەل تسىبۋلين قىزمەتىنەن كەتىپ، جاس مامان ناعي باقىتبەكوۆ ديرەكتور بولىپ تاعايىندالدى.  

تسىبۋلين باسقارعان تۇستا، اسىرەسە سوڭعى بىرنەشە جىلدا Qazsport-تى سىناماعان ادام كەمدە-كەم. ءبىرى «ارنا ەلىمىز سپورتشىلارى قاتىسقان ءىرى جارىستاردى تىكەلەي ەفيردە كورسەتە المادى» دەسە، تاعى ءبىرى «ارنا ءاۋباستا ۇلتتىق جوبا رەتىندە جۇمىس باستاعانىمەن، ۇلتتىق سپورتقا مۇلدە مويىن بۇرمايتىنىن» ايتادى.

بۇدان دا ماڭىزدىسى تەلەارنانىڭ يدەولوگيالىق جانە تىلدىك ۇستانىمى دا ءجيى سىنعا ۇشىرايدى. ماسەلەن Qazsport وزگە شەتەلدەرمەن سالىستىرعاندا رەسەيلىك سپورتشىلار مەن كوماندالارعا باسىمدىلىق بەرەتىنى بايقالادى. ونىڭ ۇستىنە Qazsport تازا مەملەكەتتىك تىلدە وتكەن سپورتتىق شارالاردا ورىس ءتىلىن تىقپالاۋدان جالىققان ەمەس. بۇل جايلى ءبىز دە سىن ايتقان ەدىك: «Qazsport» قازاققا نە كورسەتىپ ءجۇر؟

سويتكەن تەلەارناعا جاڭا باسشى كەلگەندە قۋانىشتان بوركىمىزدى اسپانعا اتپاساق تا، ىشتەي قۋانعانىمىز راس. ءسۇيىنشى سۇراپ سايتىمىزدا حابارلادىق. ءبىز عانا ەمەس، سپورت جانكۇيەرلەرىنىڭ ءبارى Qazsport-تىڭ كوشى ەندى تۇزەلەدى دەستى.

ارينە جاڭا باسشىنىڭ كەلگەنى «كەشە» عانا. ءبىر ايدا ءبارى جاقسارىپ كەتپەسى ءسوزسىز. سوندا دا بىرنەشە جوبا جۇزەگە اسا باستادى. ەڭ الدىمەن فۋتبول جانكۇيەرلەرى بىرنەشە جىل بويى زار بولىپ جۇرگەن قپل (قازاقستان پرەمەر ليگاسى) تىكەلەي ەفيرگە شىقتى. 1 شىلدە كۇنى ەل چەمپيوناتىنىڭ بارلىق ماتچىن Qazsport كورسەتتى. مۇنى اتاپ وتپەۋ مۇمكىن ەمەس.

ەكىنشىدەن، ارنادا فۋتبول جايلى ستۋديالىق باعدارلاما كورسەتىلە باستادى. فۋتبول شەنەۋنىكتەرى، ساراپشىلار مەن جانكۇيەرلەر قاتىساتىن باعدارلامانىڭ ەكى سانى جارىق كورىپ ۇلگەردى. جاقسى باستاما دەپ ەسەپتەيمىز...

بىراق باعدارلاما ارالاس تىلدە (مەملەكەتتىك تىلدە جانە ورىس تىلىندە) ەكەن. قاتتىراق ايتقاندا قويىرتپاق ءتىلدى بولىپ وتىر. كەلگەن قوناقتارعا ءبىر قازاق ءتىلدى، ءبىر ورىس ءتىلدى جۋرناليست سۇراق قويادى. ەكى تىلدە بولعاندىقتان سپيكەرلەردىڭ ءسوزى ءبىر-بىرىمەن بايلانىسپاي، اركىم ءوز الدىنا سويلەپ تۇرعانداي اسەر ەتەدى.

ونىڭ ۇستىنە ون قازاقتىڭ ورتاسىنا ءبىر ورىس كەلسە، سول ورتا تۇتاستاي ورىسشا سويلەيتىن جامان ءداستۇر بار بىزدە. سول ادەتتىڭ اسەرى شىعار، بۇل باعدارلامانىڭ ەكى سانىنىندا دا ورىس تىلىنە باسىمدىلىق بەرىلگەن.

ەندى جەكە-جەكە توقتالىپ كورەيىك. ءبىرىنشى باعدارلاما «قازاقستان چەمپيوناتى. 3 تۋر. ماتچتارعا شولۋ» دەپ اتالادى. باعدارلاماعا قازاقستان فۋتبول فەدەراتسياسىنىڭ باس حاتشىسى ازامات ايتقوجين، تانىمال جۋرناليست امانگەلدى سەيتحان، بۇرىنعى فۋتبولشى الي اليەۆ قاتىستى.

باعدارلامانىڭ ۋاقىتى 30 مينۋت 10 سەكۋند. مۇنىڭ 11,6 مينۋتى قازاق تىلىندە، 16,7 مينۋتى ورىس تىلىندە بولدى. تاعى 1,4 مينۋتىندا ماتچتارعا ۆيدەوشولۋ كورسەتىلدى. بايقاپ وتىرعاندارىڭىزداي باعدارلامانىڭ 55,6%-ى ورىس تىلىندە ءوتتى.

ال باعدارلامانىڭ «كارانتيندەگى قازاق فۋتبولى» دەپ اتالاتىن ەكىنشى سانىنا قازاقستان كاسىپقوي فۋتبول ليگاسىنىڭ پرەزيدەنتى ولجاس ابراەۆ، قازاقستان ۇلتتىق قۇرامالار دەپارتامەنتىنىڭ باسشىسى قايرات نۇرداۋلەتوۆ، سپورت ءجۋرناليسى ايدىن قوجاحمەت، جانكۇيەر ەسەن ەلەۋكەن قاتىستى.

باعدارلاما 45 مينۋت 40 سەكۋندقا سوزىلدى. مۇنىڭ 21,4 مينۋتى قازاق تىلىندە، 19,8 مينۋتى ورىس تىلىندە بولدى. سونداي-اق 4,2 مينۋتتان تۇراتىن ارنايى ۆيدەوسيۋجەت تولىقتاي ورىس تىلىندە. دەمەك باعدارلامانىڭ 24 مينۋتى (53%-ى) ورىسشا دەگەن ءسوز.

ونىڭ ۇستىنە ماڭىزدى ماسەلەگە ناقتى جاۋاپ بەرە الاتىن، جاۋاپتى سپيكەر ولجاس ابراەۆقا تەك قانا ورىس تىلىندە سۇراقتار قويىلدى. قكفل-نىڭ پرەزيدەنتى 45 مينۋتتىق باعدارلامادا بار بولعانى 20 سەكۋند مەملەكەتتىك تىلدە سويلەدى. ونىڭ ۇستىنە باعدارلاما بارىسىنداعى 3 بەينەسيۋجەتتىڭ ءبارى تەك ورىس تىلىندە تۇسىرىلگەن.

بايقاپ وتىرعاندارىڭىزداي، باعدارلامانىڭ ەكى سانىندا دا مەملەكەتتىك ءتىل ەكىنشى ورىندا قالدى. وسىدان-اق ارالاس ءتىلدى باعدارلامانىڭ مەملەكەتتىك تىلگە تيىمسىزدىگىن بايقاۋعا بولادى. ونىڭ ۇستىنە جوعارىدا ايتقانىمىزداي سپيكەرلەر ەكى تىلدە ەكى ءتۇرلى سويلەپ تۇرعاندىقتان، باعدارلامانىڭ ايتار ويى شاشىراپ، ءبىر جەرگە باسى قوسىلمايدى.

تەلەارنا باسشىلىعى بۇل سىنىمىزعا «كوپۇلتتى مەملەكەتپىز»، «ءتىل تۋرالى زاڭ بار»، «ورىس ءتىلدى كورەرمەندەرىمىز بار» دەپ جاتتاندى جاۋاپ بەرەتىن شىعار. بىردەن ايتايىق، بۇلاي قانشا تىراشتانساڭىزدار دا Qazsport-تى قازاقتان باسقا ەشكىم كورمەيدى. ەلىمىزدەگى وزگە ۇلت وكىلدەرى قازاقستاندىق تەلەارنالارعا پىسقىرىپ تا قارامايدى. سەبەبى، ەلىمىزدە حابار تاراتاتىن رەسەيلىك ارنالار وزىمىزدىكىنەن كوپ.

سوزىمىزگە دالەل، «كارانتيندەگى قازاق فۋتبولى» باعدارلاماسى تەلەارنانىڭ رەسمي youtube-ارناسىنا 10 شىلدەدە جۇكتەلگەن ەكەن. سودان بەرى 27 پىكىر جازىلىپتى. ءبارى قازاق تىلىندە. ونىڭ 17-ءسى باعدارلامانىڭ ەكى تىلدە بولعانىنا نارازىلىق بىلدىرگەن. وسىدان-اق، Qazsport-تى كىمدەر كورەتىنىن، ولارعا نە كەرەك ەكەنىن باعامداي بەرسەڭىزدەر بولاتىن شىعار.

قۇرمەتتى تەلەارنا باسشىلىعى، ەلدەگى قازاق ۇلتىنىڭ سانى 70 پايىزدان اسقانىن، مەملەكەتتىك تىلگە سۇرانىستىڭ وتە جوعارى ەكەنىن ەسكەرۋلەرىڭىز كەرەك. Qazsport-تىڭ حابار تاراتۋدا ورىس تىلىنە باسىمدىلىق بەرۋى ۇلكەن قاتەلىك. سىزدەر تىم قۇرىعاندا مەملەكەت قۇراۋشى ۇلتتىڭ مۇددەسىن بەلدەن باسا وتىرىپ، ويدان شىعارىلعان 50/50 قاعيداسىن دا ۇستانباي وتىرسىزدار...

قۋانىش قاپپاس

Abai.kz