مەملەكەت باسشىسى قاسىم-جومارت توقاەۆ قازاقستانداعى ءتۋريزمدى دامىتۋ ءۇشىن ەلىمىزدەگى تابيعاتى تارتىمدى جەرلەردى قالىپتاستىرۋ، سونىمەن قاتار ەتنوتۋريزمدى دامىتۋ جونىندە ايتقان بولاتىن. بۇل باعىتتا ەلىمىزدە بىرقاتار ىرگەلى ىستەر اتقارىلىپ جاتىر. سولاردىڭ ءبىرى تۇركىستان قالاسىندا جاڭادان قۇرىلعان حالىقارالىق تۋريزم جانە مەيماندوستىق ۋنيۆەرسيتەتى.

تۇركىستان وبلىسىنىڭ وڭىرلىك كوممۋنيكاتسيالار قىزمەتىنىڭ مالىمەتىنشە، جۋىردا عانا قر مادەنيەت جانە سپورت مينيسترلىگىنىڭ جانىنان قۇرىلعان اتالعان ۋنيۆەرسيتەت ەلباسى نۇرسۇلتان نازارباەۆتىڭ باستاماسىمەن پرەزيدەنت قاسىم-جومارت كەمەلۇلىنىڭ تاپسىرماسىمەن اشىلعان.

بۇل ۋنيۆەرسيتەت تۋريزم سالاسىنداعى الەمدىك دەڭگەيدەگى ماماندار دايارلايتىن ەلىمىزدەگى حالىقارالىق دەڭگەيدەگى تۇڭعىش جوعارى وقۋ ورنى. مۇنداعى تالاپكەرلەر تۋريستىك بيزنەستىڭ ناقتى قاجەتتىلىگىن ەسكەرە وتىرىپ، 4 جىلدىق ءبىلىم بەرۋ باعدارلاماسىنىڭ نەگىزىندە حالىقارالىق ۇلگىدەگى ەكى ديپلوم الاتىن بولادى. بۇل مۇمكىندىك تۇلەكتەردىڭ ءوز ماماندىعى بويىنشا الەمنىڭ كەز-كەلگەن ەلىندە ەش كەدەرگىسىز جۇمىس ىستەۋىنە مۇمكىندىك بەرەدى. جوعارى وقۋ ورنىندا وتاندىق پروفەسسورلارمەن قاتار شەتەلدىك پروفەسسورلار، تۋريزم جانە سەرۆيس سالاسىنداعى الدىڭعى قاتارلى ءىرى كومپانيالاردىڭ توپ مەنەدجەرلەرىمەن قاتار وسى سالانىڭ عىلىم دوكتورلارى ءدارىس وقىماق. سونىمەن قاتار، بۇل ۋنيۆەرسيتەتتىڭ تۇلەكتەرى ءوز تاجىريبەسىن بىرىككەن  ۇلتتار ۇيىمىنىڭ حالىقارالىق تۋريستىك ۇيىمىندا (UNWTO) جەتىلدىرەتىن بولادى.

ۋنيۆەرسيتەت بازاسىندا تۋريزم فاكۋلتەتتەرىنەن بولەك سپورتتىق كافەدرالار دا قۇرىلعان. سونىمەن قاتار، اتالعان وقۋ ورنىندا بىلىكتىلىكتى ارتتىرۋ ورتالىعىمەن قوسا IELTS, TOEFL سياقتى حالىقارالىق ەمتيحانداردى تاپسىرۋ، شەت تىلدەرىن تەرەڭدەتىپ وقىتاتىن ءتىل ورتالىعى دا جۇمىس ىستەيدى.

حالىقارالىق تۋريزم ۋنيۆەرسيتەتى بيىلدان باستاپ تالاپكەرلەر قابىلداۋدى باستاعان. ۋنيۆەرسيتەتكە 2020-2021 وقۋ جىلىندا 800 گرانت ءبولىنىپتى. ال، تۇلەكتەر تۋريزم ماماندىعىنا ءتۇسى ءۇشىن شەت ءتىلى مەن گەوگرافيا پاندەرىن تاڭداۋى ءتيىس. ال، ۇلتتىق بىرىڭعاي تەستىلەۋدەگى شەكتىك بالى 50 بالدان تومەن بولماۋى كەرەك. ۋنيۆەرسيتەتكە قۇجاتتار قابىلداۋ 20 ماۋسىم مەن 7 شىلدە ارالىعىندا بولادى. ال، شىعارماشىلىق ەمتيحان 8 شىلدە مەن 13 شىلدە ارالىعىندا جۇرگىزىلەدى.

ايتا كەتەيىك، بۇعان دەيىن مەملەكەت باسشىسى قاسىم-جومارت توقاەۆ قازاقستاننىڭ تۋريستىك الەۋەتىن دامىتۋدا كاسىبي مامانداردى دايىنداۋ اسا ماڭىزدى ەكەنىن اتاپ وتكەن بولاتىن.

-تۋريزم – كۇردەلى سالالاردىڭ ءبىرى. سوندىقتان بۇل سالادا ءتيىستى مامانداردى دايارلاۋىمىز كەرەك.  سول سەبەپتى تۋريزم ۋنيۆەرسيتەتىن اشۋ تۋرالى شەشىم قابىلدادىق. الداعى ۋاقىتتا اتالعان ۋنيۆەرسيتەتتە تۋريزم سالاسىندا جۇمىس ىستەي الاتىن بىلىكتى كادرلار دايىنداۋ كەرەك،- دەگەن بولاتىن.

سونىمەن قاتار پرەزيدەنت وتاندىق ءتۋريزمدى دامىتۋ اياسىندا وڭىرلەردەگى كولىك-لوگيستيكالىق ينفراقۇرىلىمدى قالىپتاستىرۋ مەن ەلىمىزدىڭ بارلىق رەكرەاتسيالىق ايماعىندا دەمالاتىن جانە تاماقتاناتىن ورىندار مەن قوناقۇيلەردىڭ قۇرىلىسىنا كاسىپكەرلەردى تارتۋ قاجەتتىگىن دە ەسكەرتكەن بولاتىن. سونداي-اق، پرەزيدەنت يننوۆاتسيالىق جانە كرەاتيۆتى شەشىمدەر ارقىلى قازاقستاننىڭ تۋريستىك الەۋەتىنىڭ اقپاراتتىق جاعىنان قولجەتىمدى بولۋىن دا اتاپ وتكەن ەدى.

جالپى، بۇگىندە شەت ەلدىك تۋريستەردى كۋرورتتار مەن بەس جۇلدىزدى قوناقۇيلەردەن گورى، ءارتۇرلى حالىقتاردىڭ مادەنيەتى مەن ادەت-عۇرپى، بارعان ەلدىڭ تاريحى،سالت-ءداستۇرى قىزىقتىراتىنى راس. سوندىقتاندا، الەمدە وزىندىك ەرەكشەلىگى بار جەرلەرگە بارۋ، كونە ءارى قايتا قالپىنا كەلتىرىلگەن ماڭىزدى وقيعالارعا قاتىسۋ، تاريحي فەستيۆالەرگە دەگەن سۇرانىس ارتىپ كەلەدى. دەمەك، قازاقستاندا تۋريزم سالاسىندا وسى باعىتتى ۇستانۋى قاجەت. ال، قازاقستاننىڭ الەمگە ۇسىناتىن بىرەگەي ورىندارى از ەمەس.

ودان بولەك، (2012 جىلعى مالىمەكە سايكەس) قازاقستاننىڭ 3 نىسانى يۋنەسكو-نىڭ الەمدىك مۇرالارى تىزىمىنە ەنگەن. ولار: قوجا-احمەت ياساۋي كەسەنەسى، تامعالى پەتروگليف تاس كەشەنى، سارىارقا – سولتۇستىك قازاقستان دالاسى مەن كولدەرى. بۇل ءۇش نىساننىڭ ەكەۋى تىزىمگە مادەني تالاپتار بويىنشا ەنگىزىلسە، بىرەۋى تابيعي تالاپتار نەگىزىندە ەنگەن.

سونىمەن قاتار قازاقستان اۋماعىنداعى 12 نىسان الەمدىك مۇرا تىزىمىنە ۇمىتكەر رەتىندە تىركەلگەن.

Abai.kz