10-تامىز كۇنى ل.ن.گۋميلەۆ اتىنداعى نۇر-سۇلتان قالاسىنداعى ەۋرازيا ۇلتتىق ۋنيۆەرسيتەتىنىڭ جانىنان قۇرىلعان «اباي اكادەمياسى» عىلىمي-زەرتتەۋ ينستيتۋتىنىڭ ارنايى باعدارلاماسى – «اباي اكادەمياسى» سەرياسىمەن جارىق كورگەن 12 كىتاپتىڭ تانىستىرىلىمى بولدى.

مودەراتورلىق تىزگىنىن قولىنا العان  ل.ن.گۋميلەۆ اتىن­داعى ەۋرازيا ۇلتتىق ۋنيۆەرسيتەتىنىڭ رەكتورى، قر ۇعا اكادەميگى، تاريح عىلىمدارىنىڭ دوكتورى، پروفەسسور ە.ب.سىدىقوۆ پرەزيدەنت قاسىم-جومارت كەمەلۇلى توقاەۆتىڭ ۇيعارۋىمەن قازاق­ستان رەسپۋبليكاسى ۇكىمەتىنىڭ قاۋلىسىنا سايكەس بيىلعى  2020 جىلدان باستاپ 10 تامىز – اباي كۇنى بولىپ رەسمي تۇردە بەلگىلەنگەنى تاريحي وقيعا ەكەنىن ەرەكشە اتاپ ءوتتى. وسى ۋاقىتقا دەيىن «اباي اكادەمياسى» سەرياسىمەن زاڭ عىلىمدارىنىڭ دوكتورى ن.دۋلاتبەكوۆتىڭ جەتەكشىلىگىمەن «قۇنانباي وسكەنباەۆ ءىسى» اتتى دەرەكنامالىق زەرتتەۋ كىتابى، فيلولوگيا عىلىمدارىنىڭ دوكتورى، پروفەسسور، بەلگىلى ابايتانۋشى ت.جۇرتبايدىڭ «بىلمەي مۇنى جازعان جوق...» اتتى ەكى كىتاپتان تۇراتىن اباي ولەڭدەرىنىڭ قولجازبالارىنا ماتىندىك سالىستىرۋلار جاساعان ەڭبەگى مەن جاڭا مازمۇنداعى «كەشەگى وتكەن بي قۇنانباي» مونوگرافياسى جارىق كورگەن بولاتىن.

اباي كۇنى مەرەكەسىندە ۇيىم­داستى­رىلعان ءىس-شارادا اتالمىش سەريانىڭ جالعاسى رەتىندە جارىق كورگەن ون ەكى زەرتتەۋ كىتابى جۇرتشىلىق نازارىنا ۇسىنىلدى.  ولار:

1. ابايدىڭ عۇمىرناماسى. ەكى كىتاپتان تۇراتىن عىلىمي-تانىمدىق دەرەكناما جيناعى، جوبا جەتەكشىسى – ە.ب.سىدىقوۆ;
2. اباي جانە قازاق سوتسيۋمى ( ءتورت كىتاپتان تۇراتىن ۇجىمدىق ماقالالار جيناعى). جوبا ۇيلەستىرۋشىلەرى – اكادەميك د.قامزابەكۇلى، دوتسەنت د.ر.ايتماعامبەتوۆ، دوتسەنت ە.ە.سايلاۋباي;
3. «ابايدىڭ ءپالساپاسى» (اۆتورلىق وي-تولعاۋلار). جوبا اۆتورلارى – اكادەميك ع.ەسىم، رھD ر.كەمەرباي;
4. «سوقتىقپالى، سوقپاقسىز زاماندا ءوستى» (مونوگرافيا). اۆتورى – پروفەسسور ت.ق.جۇرتباي;
5. «ابايدىڭ كوركەمدىك جانە عىلىمي ءدۇ­نيەتانىمى» (عىلىمي ىزدەنىستى مونوگرافيا). اۆتورى – پروفەسسور س.نەگيموۆ;
6. «اباي جانە الاش ساباقتاستىعى: تاريحي-في­لوسو­فيالىق، ادەبي-لينگ­ۆيس­تيكالىق اسپەكت اباي­دىڭ كوركەمدىك جانە عىلىمي دۇنيە­تانى­مى» (ۇجىمدىق مونوگرافيا). جوبا جەتەك­شىلەرى – اكادەميك د.قامزابەكۇلى، الاشتانۋ­شى عالىم س.اققۇلۇلى;
7. «بەس اسىل ءىس». بالالارعا ارنالعان تانىمدىق جيناق. جاڭا تەحنولوگيالارعا نەگىزدەلگەن جوبا جەتەكشىلەرى – پروفەسسور ج.ءا. ايمۇحامبەت، ماگيسترانت ب.احمەر;
8. «ابايدىڭ پەداگوگي­كالىق دۇنيە­تانىمى» (ۇجىمدىق مونوگرا­فيا), جوبا جەتەكشىسى – پروفەسسور ر.تولەۋبەكوۆا.

بۇل اتالعان كىتاپ­تاردىڭ بارلى­عى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قارجىلىق قول­داۋىمەن ەۇۋ باسپاحاناسىنان جارىق كوردى.

جيىن بارىسىندا حالىقارالىق تۇركى اكادەمياسىنىڭ پرەزيدەنتى، «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ باسقارما توراعاسى دارحان قىدىرالى، اكادەميك ع.ەسىم، پروفەسسور سەرىك نەگيموۆ، پروفەسسور، بەل­گىلى ابايتانۋشى عالىم تۇر­سىن جۇرتباي، قر ۇعا اكادەميگى، پروفەسسور ديحان قامزابەكۇلى، عالىم سۇلتان-حان اققۇلۇلى جانە پروفەسسور جانات اسكەربەكقىزى ءسوز سويلەپ، جارىق كورگەن ەڭبەكتەردىڭ ماڭىزى تۋرالى ايتىپ ءوتتى.

Abai.kz