ەلباسى، قازاقستان  رەسپۋبليكاسى قاۋىپسىزدىك كەڭەسىنىڭ،
«نۇر وتان» پارتياسىنىڭ توراعاسى ن.ءا. نازارباەۆقا،

شىعىس قازاقستان وبلىسىنىڭ اكىمى د.ك. احمەتوۆكە;

وسكەمەن قالاسىنىڭ زيالى قاۋىم وكىلدەرىنەن

اشىق حات

قۇرمەتتى نۇرسۇلتان ءابىشۇلى!

بۇل حاتتا ايتىلاتىن ءوتىنىش-تالاپتاردىڭ بارشاسى شىعىس قازاقستان وبلىسىنىڭ اكىمى د.ك. احمەتوۆكە قاراتىلىپ ايتىلعانىمەن، قۇرساۋ-قۇرساقتا جاتقان قازاقستاندى پەرىشتە كۇيىندە تاۋەلسىزدىككە وراپ، مۇباراك قولىمەن تەربەتكەن ءوزىڭىز ەدىڭىز. سوندىقتان، ەلىمىزدىڭ بۇگىنگى تاڭداعى جاقسىلىقتارى مەن قۋانىشتارى، رەنىشتەرى مەن كۇيىنىشتەرى، ەڭ باستىسى - ءسىزدىڭ قولىڭىزداعى تاۋەلسىزدىك تۋىنىڭ، ەگەمەندىك جالاۋىنىڭ ارقاشان بيىكتەردە جەلبىرەۋى - ەڭ ءبىرىنشى ءسىز ءۇشىن اسا ماڭىزدى ەكەندىگى بارشاعا ايان. الايدا، ءبىزدىڭ وبلىس اكىمىنە قويار تالاپتارىمىزدىڭ باستى وزەگى – قازاقستانداعى مەملەكەتتىڭ نەگىزىن قۇراۋشى ۇلت – قازاقتىڭ ۇلتتىق قۇندىلىقتارىنىڭ، رۋحاني قازىنالارىنىڭ وڭىردەگى جاي-كۇيىن، وسىدان ءۇش جىل بۇرىن ءتۇن ۇيقىڭىزدى توقسان ءبولىپ قاعازعا تۇسىرگەن، جارىققا شىعارىپ، ءوڭىر-وڭىردەگى باسشىلارعا: «مۇلتىكسىز ورىندالسىن!» دەپ شەگەلەپ تاپسىرعان «رۋحاني جاڭعىرۋ» اتتى باعدارلامالىق قۇجاتىڭىزدىڭ، «ۇلى دالانىڭ جەتى قىرى» اتتى قۇجاتتىق تاپسىرمالارىڭىزدىڭ توڭىرەگىن قاۋزايتىن بولعاندىقتان، ءبىزدىڭ تالاپ-تىلەكتەرىمىزدەن ءسىزدىڭ دە حاباردار بولۋىڭىزدى، نازارىڭىزدا ۇستاۋىڭىزدى دۇرىس دەپ تاپتىق.

قۇرمەتتى دانيال كەنجەتايۇلى!

قازاقتا: «ايتا-ايتا التايدى، جامال اپاي قارتايدى» دەيتىن قاناتتى ءسوز راۋەشتى تىركەس بار. بۇل جەردەگى «ايتا-ايتا» دەپ تۇرعان قوس ءسوز – «جاۋىر بولدى، سىلىكپەسى شىقتى» دەگەن ماعىنانى بىلدىرەدى. سوندىقتان، بۇگىنگى جازبالارىمىز سىزگە تىم تاڭسىق ەمەس، ءبىزدىڭ قايتا-قايتا وزىڭىزگە جولداپ جۇرگەن تالاپ-تىلەكتەرىمىز. شىعىستاعى مەملەكەت قۇراۋشى ۇلت – قازاقتاردىڭ رۋحاني جانايقايىن ءبىرىنشى رەت ەستىپ وتىرمىن دەپ تە وتىرىك ايتا المايسىز.

وسىدان بەس جىل بۇرىن بەردىبەك ساپارباەۆ استاناعا قىزمەتكە كەتىپ، ورنىنا ماسكەۋدە جۇرگەن ءسىز اكىم بوپ تاعايىندالعان كەزدە ءوڭىر قازاقتارىنىڭ ءبىراز تومسىرايىپ، توسىرقاپ قارسى العانى راس. دەگەنمەن، الدىندا بەس جىلداي ۇكىمەت باسقارعان، وبلىستاردا اكىم بولىپ ابدەن ىسىلعان، تاجىريبەسى مولىققان ازامات قوي، جەرگە قاراتپاس دەپ سابىر ساقتاعانبىز. جالپى، شىعىس قازاقتارىنىڭ تىم كومپىس، تىم جۋاس، تىم موماقان ەكەندىگىنە وسى بەس جىل ىشىندە ابدەن كوزىڭىز جەتكەن دە شىعار. مىنەزدى جۇرت ەدىك، مىنەز كورسەتكەن جوقپىز. ايتقانىڭىزعا - كوندىك، ايداعانىڭىزعا – جۇردىك. قورىققاندىقتان ەمەس. مادەنيەتتىلىكتەن! مادەنيەتتىلىك - پەندەنىڭ قالتاسىنداعى بايلىقپەن، الدىنا ساپ قايىرعان قورا-قورا مالىمەن ەمەس، سىيلاسىممەن، سابىرلىلىقپەن، يماندىلىق، ىزگىلىك، ادىلەتتىلىكپەن كورىنىس تاباتىنى شىندىق. شىعىس قازاقتارى سىزگە سونى بايقاتتى. بۇگىنگى اڭگىمە - ءوز كەزەگىڭىزدە ءبىزدىڭ قۇرمەتتەۋ مادەنيەتىمىزدى ءسىزدىڭ قالاي قابىلداعانىڭىز، قالاي باعالاعانىڭىز جايلى بولماق.

2017 جىلى ەلباسىنىڭ «رۋحاني جاڭعىرۋ» اتتى باعدارلامالىق قۇجاتى جارىق كوردى. ەلباسى قازاق حالقىنىڭ سان عاسىرلاردان بەرگى ارمان-تىلەگىن ءدوپ باستى. قازاق - قازانىنىڭ قاسپاعى بەس ەلى مايدان كىلكىپ، كەكىرىپ تۇرعانىن ەمەس، رۋحانياتىنىڭ جالاۋى جەلبىرەپ تۇرۋىن ءبىرىنشى ورىنعا قوياتىن ەپيكالىق جۇرت قوي، شىن قۋاندىق. الايدا، وكىنىشكە وراي، ءبىزدىڭ وبلىس ورتالىعى وسكەمەندە رۋحاني جاڭعىرۋدىڭ پارودياسى سىندى وتكىنشى شارالار بولماسا، كوزگە تۇسە قويارلىقتاي ەشتەڭە ايتا الماي، قور بولىپ وتىرمىز. «رۋحاني جاڭعىرۋ» باعدارلاماسىنىڭ تۇپكى ءمان-ماعاناسىنىڭ ءوزى تاريحتى تۇگەندەپ، تاريحي تۇلعالاردى ۇلىقتاۋ بولسا، شىعىستا ءالى ايتارلىقتاي ەشتەڭە كورە الماي وتىرمىز. مۇنى ءبىز ەلباسىنىڭ كەلەلى باعدارلاماسىنىڭ جالاڭ ۇرانعا اينالۋى دەپ تۇسىنەمىز.

ونوماستيكالىق كوميسسيادا تىزە كۇشكە سالىپ وتىرىپ قالا كوشەلەرىنىڭ ونشاقتىسىن قازاقشالاعان بولدىق. ونى دا قالا اكىمدىگى كىشىگىرىم ازامات «سوعىسىنا» اينالدىرىپ جىبەرە جازدادى:، قازاقتى اياقتان شالۋ ءۇشىن «قوعامدىق تىڭداۋ» دەگەن پالەكەت كىرگىزدى. ءبىر زالعا توعىتىلعان ءجۇز ورىس پەن ءجۇز قازاق شاپىلداستى. ەكى ۇلت جاۋلاسۋعا اينالدى. جاڭا-جاڭا ءبىر-بىرلەرىنە باۋىر باسىپ كەلە جاتقان ەكى ۇلتتى قاراما-قارسى وتىرعىزىپ قويىپ، تىڭداۋ ۇيىمداستىرىپ، ۋشىقتىرماي-اق سول ماسەلەنى شەشە سالۋعا بولۋشى ەدى عوي. نەگە ويتپەدى قالا اكىمدىگى؟ وعان دا كونگەنىمىزدى بىلەسىز.

شىعىستاعى قازاق ۇلتىنىڭ سانى ارتىپ كەلە جاتقانىن نازارعا دا ىلمەي، «رۋحاني جاڭعىرۋ» باعدارلاماسىمەن ساناسپاي، ءىشىنارا وبلىستىق دەڭگەيدەگى باسقارما، مەكەمەلەردى مەملەكەتتىك ءتىلدى مۇلدەم بىلمەيتىن باسشىلارمەن تولىقتىرا باستادىڭىز. ماسەلەن، 2018 جىلى وبلىس اكىمدىگىنىڭ تىكەلەي قارجىلىق كومەگىمەن  شىعاتىن، وڭىردەگى قازاق-ورىس ءتىلدى گازەتتەردىڭ باستارىن توقايلاستىرىپ وتىرعان «شىعىس اقپارات» اتتى سەرىكتەستىككە بۇرىن-سوڭدى گازەتتە مۇلدەم قىزمەت ىستەمەگەن، ۇلكەن ۇجىمدى قويىپ، بەس ادامعا ءجون سىلتەۋدى بىلمەيتىن، قازاق ءتىلىن، قازاقتاردى مويىنداۋدى ار سانايتىن سلاۆيان تەكتەس ازاماتشانى باسشىلىققا تاعايىندادىڭىز. كۇڭكىلدەدىك، كورپە استىندا كۇبىرلەدىك تە قويدىق. الايدا، شاتاقتى الگى شالاپۇت  باسشىڭىز شىعاردى: وبلىستىق قازاق گازەتىندە جۇمىس جاسايتىن جاس جۋرناليسكە: «سەن قازاقتاردىڭ جىرتىسىن جىرتاتىن ماقالانى نەگە جازاسىڭ؟» دەپ قۋدالاپ، سوگىس بەردى. بىزدەر ارالاستىق. ول جولى دا «باس جارىلسا بورىك ىشىندە...»، اڭگىمەنى وبلىس شەكاراسىنان شىعارعامىز جوق. ەسىڭىزدە بولسىن: ءسىزدىڭ ابىرويىڭىز ءۇشىن!

قاي مەملەكەتتە بولسىن، ەڭ اۋىر ءارى جاۋاپكەرشىلىگى ماڭىزدى سالا – يدەولوگيا. بۇل سالانى باسقارۋ – قيامەت شىعار. ازاماتتىڭ ءىس-تاجىريبەسى، زەردەسىنىڭ تەرەڭدىگى ءبىر توبە، ءبىز سەكىلدى كوپۇلتتى مەملەكەتتە ەڭ الدىمەن مەملەكەتتىك ءتىلدى، ونان سوڭ ءبىزدى ءۇش عاسىر وتارلاعان رەسەيدىڭ ءتىلىن وتە جاقسى ءبىلۋى شارت. ونسىز بولمايدى. بۇل زاڭدىلىق! الايدا، وسى ءبىر زاڭدىلىقتىڭ سىزگە ەش ىقپالىن كورە المادىق. سىزگە، ءسىز باسقارىپ وتىرعان وبلىسقا ەش قاتىسى جوق سەكىلدى: وبلىستىق ىشكى ساياسات باسقارماسىنا ءسىز مەملەكەتتىك ءتىلدى مۇلدەم بىلمەيتىن سلاۆيان تەكتەس ازاماتشانى تاعايىندادىڭىز. تاعى دا كۇڭكىلدەدىك. ءالى كۇبىرلەپ ءجۇرمىز. الايدا، «قول سىنسا – جەڭ ىشىندە...»، شۋىلدامادىق. شۋىلداتپادىق. زەردەلەپ كورىڭىزشى:

بۇل – شىعىستاعى قازاق زيالىلارىنىڭ جۋاستىعى ەمەس! جوعارى مادەنيەتى!

ۇندەمەي جۇرە بەرەر مە ەدىك... جۋىردا، 22-قازان كۇنى ءسىزدىڭ وسكەمەننىڭ توقىماشىلار قالاشىعى اتتى تەلىمدە، جاڭا مولتەك اۋداندى ارالاپ جۇرگەن  جۇمىس ساپارىڭىز تۋرالى الەۋمەتتىك جەلىلەر مەن سايتتار دا جەلدەي ەسكەن اقپاراتتار شىقتى. سول اۋداننىڭ ەسەنبەرلين – قازىبەك بي كوشەلەرىنىڭ قيىلىسقان تۇسىنا كەلگەندە ءسىز جانىڭىزدا ەرىپ جۇرگەن قالا اكىمى جاقسىلىق ومارعا قاراتىپ:

- مىنا جەردە سكۆەر، انەۋ جەردە پۋشكين ەسكەرتكىشى بولادى،- دەپ نۇسقاۋ بەرگەنىڭىزدى ەستىپ قالدىق. قاتە ەستىگەن بولارمىز دەپ ءبىر-بىرىمىزگە تەلەفون شالىستىق. راس بولىپ شىقتى. ءسىزدىڭ ۇيعارىمىڭىز سولاي ەكەن.

ەندىگى اڭگىمە مىنادا: نەگە پۋشكين؟ وبلىستىق ورتالىق كىتاپحانا پۋشكين اتىندا، سول كىتاپحانانىڭ قارسى الدىندا - وسكەمەننىڭ قاق تورىندە پۋشكينگە قويىلعان ەسكەرتكىش بار. قازاق ەلىنە، ونىڭ ىشىندە شىعىس قازاقستانعا پۋشكين ارۋاعى ريزا شىعار. قازاقتىڭ قالاسى مەن دالاسى پۋشكين اتاۋىنان كەكىرىپ تۇر! پۋشكيننەن ۇشقىن شىعىپ كەتۋى مۇمكىن ەكەندىگىن نەگە ويلامايسىز؟ داۋ جوق، پۋشكين – رەسەيدىڭ ماقتاۋلى اقىنى. ونى ناسيحاتتامادىق پا: قالامىز دا، دالامىز دا، حات تانيتىن بالامىز دا ابايدى، الاش ارىستارىن بىلمەۋى مۇمكىن، الايدا پۋشكيندى جاتقا سوعادى، پۋشكين جايلى ورىسشا ءتۇس كورەدى. نەگە دەسەڭىز، شارانا اناسىنىڭ قۇرساعىنان شىعا ونىڭ ساناسىنا ورىستىڭ «مىقتىلارىن»، ولاردىڭ ءتىلىن، ءدىلىن ءسىڭىرىپ تاستاعانبىز. دەسەك تە ءوزىمىزدى ءوزىمىز جارلىقاي الماي جاتقانىمىزدى بىلە تۇرا، سىرت جۇرتتى ناسيحاتتاۋدى قايدان شىعاردىڭىز؟ كىممەن اقىلداستىڭىز؟ الدە، جوعارىدان كەلگەن نۇسقاۋ ما؟ الدە، شىعىس قازاقستان وبلىسى ءسىزدىڭ بابالارىڭىزدان قالعان تەلىم بە ەدى؟؟

جوق، وسكەمەندە پۋشكينگە ەكىنشى ەسكەرتكىش قويىلمايدى. قويعىزبايمىز! حالىقپەن ويناماڭىز!

ءسىزدىڭ «ارقاڭىزدا» - قازاقتىڭ ەرتەڭى ءۇشىن قىزىل يمپەريا جەندەتتەرىنە جۇمىردىقپەن سەس كورسەتكەن، باستارىن ساداقالاعان الاش ارىستارىنا ەسكەرتكىش قويىلعاندى قويىپ، ەسىمدەرى وسكەمەنگە كىرە الماي ءجۇر، «رۋحاني جاڭعىرۋ» مەن «ۇلى دالانىڭ جەتى قىرى"قايدا؟ ويىمىز بەن قىرىمىزدى ورمەكشىنىڭ تورىنداي شىرماپ جاتقان بوداندىق شىنجىرىن جاڭا-جاڭا ۇزدىك پە دەپ، ەركىن تىنىستاي باستاعان تاۋەلسىز تىرلىگىمىزگە نۇكتە قويماقسىز با؟! ول قۇقىقتى سىزگە كىم بەردى؟!

كەشە عانا كۇركىرەپ وتكەن بوداندىقتىڭ بوقسىعى مەن قوقسىعىنان اۋلامىزدى تازارتا الماي ءيتىس-تارتىس بوپ جاتقان شاقتا، پۋشكينىڭىز نە؟ قابانباي باتىرعا بوساعا كۇزەتتىرىپ قويدىق. حالىق قاھارمانى قاسىم قايسەنوۆ كوكەمىز ءوزىنىڭ اتىنداعى ساياباقتىڭ ءبىر كورتام قۋىسىندا، ءبىر شوق شىلىكتىڭ تاساسىندا تىعىلىپ ول وتىر. ال، ساياباقتىڭ تۋرا ورتاسىندا، وتكەن-كەتكەن قازاقتارعا سەس كورسەتىپ تالتايىپ، كەرزى ەتىك كيگەن كيروۆ ءالى تۇر. وبلىس اۋماعىنداعى التاي قالاسىنىڭ قاق ورتاسىندا، قازاقتىڭ ەرتەڭىنە «نۇرلى جول» كورسەتىپ ۆلاديمير يليچ لەنيننىڭ قوس ەسكەرتكىشى ءالى كۇنگى اسقاقتايدى. رۋحاني جاڭعىرعانىمىز، ءوڭىردى رۋحاني جاڭعىرتقانىڭىز وسىلار ما؟ حالىقتىڭ رۋحىن جانىعاندى قويىپ، جانىشتاۋىمىز قالاي؟

قۇرمەتتى دانيال كەنجەتايۇلى!

كەلەر جىلى – قازاقستان تاۋەلسىزدىگىنىڭ 30 جىلدىعى! سول اتاۋلى مەرەكەگە وراي شىعىس قازاقستاننىڭ تاۋەلسىز جۇرتىنا نەندەي ءسۇيىنشى-سارقىت ۇسىنباقسىز؟ جاڭاعى پۋشكيننىڭ ءمۇسىنى تۇرادى دەگەن تەلىمگە قازاقتىڭ ءۇش ابىزى، ءۇش ءبيى – تولە، قازىبەك، ايتەكەگە نەگە كومپوزيتسيا قويماسقا؟! ءبىر ەسكەرتكىشتىڭ قۇنى قازاقستانداعى كەز كەلگەن ورتا بۋىن شەنەۋنىكتىڭ بيۋدجەتتەن جىمقىرىپ كەتەر ميلليوندارىنان قىمباتقا تۇسپەس. وسكەمەننىڭ باق-گۇلزارلارىندا الاش ارىستارى – ءاليحان، احمەت، شاكارىم، مىرجاقىپ، ماعجاندار تۇرسا، قازىردە تاۋەلسىزدىگىمىزدىڭ ەرتەڭىنە كۇدىكپەن قاراپ، ورىس تىلىندە سايراپ جۇرگەن ۇل-قىزدارىمىز قازاقستاننىڭ ەرتەڭىنە كامىل سەنەر ەدى عوي. بۇگىندە ءبىز كۇندىز شاممەن ىزدەپ تابا الماي جۇرگەن - يدەولوگيا دەگەنىمىز سول ەمەس پە ەدى!؟ نەگە اداسامىز؟ جەر استى، جەر ءۇستىنىڭ تابيعات بايلىعى ۇشان-تەڭىز شىعىس قازاقستاندا رۋحاني جوقشىلىق، رۋحاني بەيشارالىق نەدەن تۋىنداپ وتىر؟ قولدان، سانالى تۇردە جاساپ وتىرعان جوقپىز با؟

سوندىقتان، بىزدەر – مەملەكەت قۇراۋشى حالىقتىڭ وكىلدەرى اتىنان سىزگە مىناداي تالاپ-تىلەكتەر قويامىز:

1.توقىماشىلار قالاشىعىنداعى گۇلزاردىڭ ورتاسىنا تاۋەلسىزدىگىمىزدىڭ 30 جىلدىعىنا وراي قازاقتىڭ ءۇش بيىنە كومپوزيتسيا قويىلسىن!

2.ق.قايسەنوۆ اتىنداعى ساياباقتاعى كيروۆتىڭ ەسكەرتكىشى الىنىپ تاستالىپ، ورنىنا زاڭدى تۇردە حالىق قاھارمانى، پارتيزان-جازۋشى، جەرلەسىمىز قاسىم قايسەنوۆتىڭ ەسكەرتكىشى تۇرعىزىلسىن!

قۇرمەتتى نۇرسۇلتان ءابىشۇلى!

اندا-ساندا بولسىن شىعىستا دا ەل بار، الاش ۇرپاقتارى بار ەدى-اۋ دەپ كوز قىرىڭىزدى سالا جۇرگەنىڭىزگە ءزارۋمىز. ىشىمىزگە سىيماعان سوڭ اڭگىمەگە ءسىزدى ارالاستىرىپ قويعانىمىزعا كەشىرىم وتىنەمىز! بۇل ارىز-شاعىم، نەمەسە دانيال كەنجەتايۇلى سەكىلدى ءىس-تاجىريبەسى تولىققان، مولىققان باسشىنى كورسەتۋ، كوزگە شۇقۋ ەمەس. دەگەنمەن، تاۋەلسىزدىك اتتى تۇتاس ۇعىمعا سىنا قاعىلماۋىنا ەلىمىزدەگى ەڭ مۇددەلى ادام – ءسىزسىز، قۇرمەتتى نۇرسۇلتان ءابىشۇلى! سوندىقتان، مىنا جازبالارىمىزدى بارىمىزگە ورتاق قازاقستاننىڭ شىعىسىندا دا ۇلتتىق قۇندىلىقتارىمىز، بارشا رۋحانياتىمىز جارقىلداپ تۇرسا دەگەن، تازا نيەت پەن ورتاق ماقساتتان تۋعان تالاپ-تىلەكتەر دەپ قابىلداڭىز!

ىزگى نيەتپەن:

الىبەك قاڭتارباەۆ، قازاقستان جازۋشىلار وداعى شقو فيليالىنىڭ ديرەكتورى، كاتونقاراعاي اۋدانى مەن وسكەمەن قالاسىنىڭ قۇرمەتتى ازاماتى;

ءتۇسىپحان تۇسىپبەكوۆ, «التاي اسۋ» قب-ءنىڭ توراعاسى، تارباعاتاي اۋدانىنىڭ قۇرمەتتى ازاماتى، قوعام قايراتكەرى، «قۇرمەت» وردەنىنىڭ يەگەرى;

ءجۇمادىل ادىلباەۆ، جازۋشى، قازاقستان جۋرناليستەر وداعىنىڭ شقو فيليالىنىڭ جەتەكشىسى;

 سەرىك قۇسانباەۆ، ايتىسكەر اقىن، قر جازۋشىلار وداعىنىڭ مۇشەسى، وبلىستىق «ديدار» گازەتىنىڭ ارناۋلى ءتىلشىسى، زايسان اۋدانىنىڭ قۇرمەتتى ازاماتى;

اباش كاكەنوۆ، ايتىسكەر اقىن، قازاقستان جاستار وداعى سىيلىعىنىڭ لاۋرەاتى، تارباعاتاي اۋدانىنىڭ قۇرمەتتى ازاماتى;

زەينوللا قابدىشۇلى سۇلتانبەكوۆ، پروفەسسور، مەديتسينا عىلىمدارىنىڭ دوكتورى، ەكولوگيا، ادام جانە تابيعات قاۋىپسىزدىگى حالىقارالىق عىلىم اكادەمياسىنىڭ اكادەميگى;

ولجاس كەرەيحان, جۋرناليست، «حابار» اگەنتتىگىنىڭ شقو بويىنشا مەنشىكتى ءتىلشىسى;

جاڭاباي ءاشىموۆ، وبلىستىق اقساقالدار القاسىنىڭ باسقارما مۇشەسى;

ساحان اكەلەەۆ، قر  مادەنيەت قايراتكەرى، شق وبلىستىق دراما تەترىنىڭ كوركەمدىك جەتەكشىسى;

ازامات قاسىم, پۋبليتسيست, وبلىستىق «التاي» تەلەارناسىنىڭ شەف-رەداكتورى;

ءادىل سايلاۋبەك، وسكەمەندەگى № 1 مەكتەپتىڭ ديرەكتورى;

مەرەي قايناروۆ، جۋرناليست «ەگەمەن قازاقستان» گازەتىنىڭ وبلىستاعى مەنشىكتى ءتىلشىسى;

مۇراتحان كەنجەحان، اقىن، جەكە كاسىپكەر;

باقىتجان رايىسوۆا، اقىن، قر جازۋشىلار وداعىنىڭ باسقارما مۇشەسى;

ايتمۇحامبەت قاسىموۆ، قر جازۋشىلار وداعىنىڭ مۇشەسى، فيلولوگيا عىلىمىنىڭ  كانديداتى;

وڭداسىن ەلۋباي، قر جازۋشىلار وداعىنىڭ باسقارما مۇشەسى،  زايسان اۋدانى مەن وسكەمەن قالاسىنىڭ قۇرمەتتى ازاماتى، «قۇرمەت» وردەنىنىڭ يەگەرى;

عافۋرا سارسەنبايقىزى، جۋرناليست، قازاقستان جۋرناليستەر وداعىنىڭ  مۇشەسى;

جانبولات سانياز، جۋرناليست، «31 ارنا» شقو-داعى مەنشىكتى ءتىلشىسى;

ايجان قارتاەۆا، فيلولوگيا عىلىمدارىنىڭ دوكتورى، پروفەسسور، شقمۋ-داعى اباي عىلىمي-زەرتتەۋ ورتالىعىنىڭ ديرەكتورى;

گۇلجان قازىموۆا، وبلىستىق مادەنيەت، ارحيۆتەر باسقارماسىنىڭ باس مامانى;

قىزىربەك دۇرگەنبايۇلى، اقىن-پۋبليتسيست وبلىستىق «ديدار» گازەتىنىڭ ءتىلشىسى;

دارىن نۇرساپار  اقىن، «التاينيۋس» سايتىنىڭ رەداكتورى;

ورازاي جەڭىس, اقىن «التاينيۋس» سايتىنىڭ ءتىلشىسى;

نازەركە قايرولدانوۆا، جۋرناليست، «التاينيۋس» سايتىنىڭ ءتىلشىسى;

ايان قالىمبەك، ايتىسكەر اقىن.  ايماقتىق «الداسپان» گازەتىنىڭ ءتىلشىسى;

ەرتاي قاسەنوۆ,  اقىن-اكتەر، «شابىت» ستۋدەنتتەر تەاترىنىڭ جەتەكشىسى.

Abai.kz