«مەن تاتار ءتىلى ءۇشىن كەز-كەلگەننىڭ كەڭىردەگىن قيۋعا دايىنمىن»
ەلميرا يسرافيلوۆا اقتالىپ شىقتى!
ەلميرا يسرافيلوۆا اقتالىپ شىقتى!
بىلتىر قازان قالاسىنداعى قالالىق كەڭەستىڭ الدىندا ءورىستىلدى وقۋشىلاردىڭ اتا-انالارى مەكتەپتە تاتار ءتىلىن وقىتۋعا قارسى پيكەت ۇيىمداستىرعان بولاتىن. بۇنى جەرگىلىكتى تنۆ تەلەارناسىنىڭ جۋرناليستەرى كەلىپ تۇسىرەدى. ولار تاتار جاستارىنىڭ «ازاتلىق» دەپ اتالاتىن ۇيىمىنىڭ جەتەكشىسى نايليا نابيۋللينا مەن دەپۋتات-دراماتۋرگ تۋفان ميننيۋلليننەن وقيعا ورنىندا سۇحبات الادى. بىراق وسى كەزدە «تنۆ» ارناسىنىڭ ءتىلشىسى ءارى جۇرگىزۋشى بولىپ ىستەيتىن ەلميرا يسرافيلوۆا پيكەتكە شىققان شوۆينيستەردىڭ ارانداتۋىنا ۇشىرايدى. تىلشىگە ءجونسىز ايىپ تاققانداردىڭ ايتۋىنشا، ەلميرا ولارعا «ەگەر الدەكىمگە تاتار ءتىلى ۇناماسا، تاتارستاننان كەتە بەرۋىنە بولادى» دەگەن كورىنەدى. پيكەتشىلەر بولسا: «ءبىز وسىندا تۋدىق، اتا-بابالارىمىزدى وسىندا جاتىر، قايدا كەتەمىز؟» دەپ جاۋاپ قاتقان. تاتار تىلىنە قارسىلىق جاساعانداردىڭ وسى سوزىنە ءتىلشى قىز «بۇنداعى ورىستاردىڭ بارلىعى باسقىنشىلار» دەگەن سىڭايدا جاۋاپ بەرگەن. الاڭعا شىققان ارانداتۋشىلار كەيىن ءتىلشىنىڭ اۋزىنان «مەن تاتار ءتىلى ءۇشىن كەز-كەلگەننىڭ كەڭىردەگىن قيۋعا دايىنمىن» ءسوزدى ەستىگەندەرىن ايتقان. وسى وقيعادان كەيىن ولار «ەلميرا يسرافيلوۆانىڭ ەكسترەميستىك سيپاتتاعى سوزدەرىنە قارسى» قىلمىستىق ءىس قوزعاۋ تۋرالى پوليتسياعا ارىز جازادى. الايدا، جەرگىلىكتى قۇقىق قورعاۋ ورگاندارى ءتىلشىنىڭ سوزدەرىنەن زاڭعا قايشى كەلەتىن ىلىك تاپپاي، قىلمىستىق ءىس قوزعاۋدان باس تارتقان. ال يسرافيلوۆانىڭ ءوزى الدىن-الا تەرگەۋ بارىسىندا پيكەتكە شىققانداردىڭ وزىنە جالا جاپقانىن جەتكىزگەن بولاتىن. «مەن ونداي سوزدەر ايتقان جوقپىن. داۋلاسپادىم، ولاردىڭ ماقساتىن عانا بىلگىم كەلدى. بىراق ولارعا مەنىڭ سۇراعىم ۇنامادى. ءتىپتى پيكەتشىلەردىڭ بىرەۋى «تاتارسكايا موردا» دەپ نامىسىما تيەتىن ءسوز ايتتى. بۇل سوزگە جاعامدى ۇستاپ قايتىپ بارا جاتقانىمدا ولار ارتىمنان ءار نارسەنى ايتىپ ايعايلاۋمەن بولدى» دەگەن ەدى ەلميرا يسرافيلوۆا.
دەگەنمەن ءجۋرناليستىڭ مۇنداي سوزدەردى ماجبۇرلىكپەن ايتقانىن مالىمدەگەن تاتار ۇلتشىلدارى بۇل ىسكە جۇمىلا كىرىسىپ قىزدارىن قورعاپ قالدى. ماسەلەن، تاتار جاستار ۇيىمىنىڭ بەلسەندىسى رۋشان گايفۋللين وسى وقيعاعا بەرگەن باعاسىندا «ونى تۋعان ءتىلىن قورعاعانى ءۇشىن قارالاماق بولدى» دەگەن پىكىر بىلدىرگەن...
ءسوز سوڭىندا ايتارىمىز، انا ءتىلى ءۇشىن ءبىر توپ شوۆينيستەرگە قارسى شىققان سۇيىنبيكەنىڭ ءسىڭىلىسىنىڭ ەرلىگى تالاي تاتاردىڭ نامىسىن جانىپ جىبەرگەن سياقتى. ءتىپتى بۇل وقيعا تاتاردىڭ عانا ەمەس، ءيسى تۇركىنىڭ ورتاق رۋحىنا دا قوزعاۋ سالدى. سەبەبى، تاتار قىزىنىڭ باتىلدىعىنا تامسانعان باسقا باۋىرلاس ۇلتتىڭ وكىلدەرىدە وسى جانجالدىڭ باس-اياعىندا ەلميرا يسرافيلوۆاعا جان-جاقتى قولداۋ كورسەتكەندىگىن ايتا كەتۋ كەرەك.
جولىمبەت ماكىشەۆ
«اباي-اقپارات»
