تاناكوز تولقىنقىزى ت.ايبەرگەنوۆ اتىنداعى سىيلىقتىڭ يەگەرى: ءبىزدىڭ ءۇيىمىز- كىشكەنتاي جازۋشىلار وداعى سياقتى

- جاقىندا «ايتقىم كە­لە­دى» اتتى جاڭا كىتابىڭىز جارىققا شىقتى. بۇل استاناعا كوشكەننەن كەيىن جازىلعان ولەڭدەر مە؟
- جوق، بۇل كىتاپقا استانا­عا كوشپەي تۇرىپ جازىلعان ولەڭ­دەرىم ەندى. ال استاناعا كەلىسى­مەن مەنىڭ ومىرىمدە مۇلدە ءبىر ءبو­لەك، جاڭا كەزەڭ باستالدى. اس­تانانى قاتتى ۇناتتىم. ەرەك­شە جاقسى كوردىم. كوشەسىندە ءوزىمدى شەكسىز باقىتتى سەزىندىم. مەن ونىڭ ايازىن دا، جەلىن دە، باتپاعىن دا، ماساسىن دا جاقسى كورەمىن. يمانداي شىنىم. «سە­­­نىڭ كوزىڭ بۇلتسىز اسپان ەدى!» دەپ جىرلاۋشى ەدى عوي باۋىرجان ۇسەنوۆ. بۇلتى جوق كوكپەڭبەك اسپاندى وسى استا­نادا كوردىم. ەكىنشى تىنىسىمدى اشىپ، شابىتىما شوق تاستاعان استانانى نەگە جەك كورەيىن؟ قولىما قالام ۇستاعالى كۇنىنە ءۇش ولەڭنەن جازعان كەزىم ەسىمدە جوق. سونداي شابىتتى كۇيدى مەن ارقا جەرىنە كەلگەندە باس­تان كەشىردىم. وسى قالادا جا­زىلعان ولەڭدەرىمدى بولەك كىتاپ ەتىپ شىعارۋدى جوسپارلاپ ءجۇر­مىن.
- جاڭا كىتابىڭىزدى قاي­دان تابۋعا بولادى؟
- «ايتقىم كەلەدى» اتتى سوڭ­عى شىققان جيناعىمدى رەس­پۋبليكانىڭ بارلىق تۇكپى­رىنەن، «مەلومان» ساۋدا دۇكەن­دەرىنەن ساتىپ الۋىڭىزعا بو­لا­دى. جانە وزىممەن قاتارلاس شىققان، قالعان بەس اۆتوردىڭ دا كىتابىن سول جەردەن تابا الاسىزدار.
- وزىڭىزبەن بىرگە «التىن قىران» حالىقارالىق قايىرىم­دىلىق قورى شىعارعان قالعان بەس اۆتورعا اسىلزات ارىس­تان­بەككە، سەرىك ساعىنتايعا، ەرلان جۇنىسكە، ميراس اسانعا، قۇل­تولەۋ مۇقاشقا كوزقاراسىڭىز قانداي؟
- وتە جوعارى. ولاردىڭ كەي­ىن قازاق ادەبيەتىنە قاداۋ-قاداۋ قازىق بولىپ قاعىلاتى­نىنا سەنىمىم مول. ەكپىنى كۇش­تى، ۇلكەن سەرپىلىس اكەلگەن اۆتورلار. ءتىپتى، ولار ادەبيەتتى بەلگىلى ءبىر ءولارا كەزەڭىندەگى دەپرەسسيادان قۇتقارىپ قال­عانداي اسەرگە بولەيدى. اۆتور­لاردىڭ ولەڭگە دەگەن تالعامى زور. جىر جازۋعا ەرەكشە ما­شىق­تانعان، جاڭالىققا قۇمار، ەكسپەريمەنت جاساۋدان قو­رىق­پايتىن جاڭاشىلدىعىمەن تاڭ­­عالدىرادى. بۇل اۆتورلار ين­تەر­نەت پورتالداردا رەزو­نانس تۋدىردى، ۇلكەن سۇرانىس­قا يە بولدى. ارينە، بۇل مەنىڭ جەكە پىكىرىم. وسى كىتاپتاردىڭ تۇ­ساۋكەسەرىنە وراي ۇيىمدا­ستى­رىل­عان تۇساۋكەسەردە فاريزا وڭعارسىنوۆا مەن مىرزاتاي جول­­داسبەكوۆ تە اۆتورلارعا ءجۇ­رەك­جاردى لەبىزىن ءبىلدىرىپ، ءادىل باعاسىن بەردى.
- تمد مەملەكەتتەرىنىڭ جاس اقىن-جازۋشىلارىنىڭ اراسىندا ادەبي بايلانىس بار ما؟ قانداي شەتەلدىك قالامداس ارىپتەستەرىڭ­مەن ارالاسىپ تۇراسىڭ؟
- سوڭعى جيىرما جىلدا، را­سىن­دا تمد مەملەكەتتەرىنىڭ جاس اقىن-جازۋشىلارىنىڭ اراسىندا قارىم-قاتىناس كۇرت ءۇزىلىپ قال­عان ەدى. تەك سوڭعى ءتورت-بەس جىل­دا عانا سول قارىم-قاتىناستى قاي­تا تىرىلتكىسى كەلەتىن باستاما­لار پاي­دا بولا باستادى. جاقىندا ال­مات ءيسادىل، داۋرەن بەرىك­قا­جىۇلى جانە مەن ماسكەۋدە وتكەن تمد مەملكەتتەرىنىڭ جاس اقىن-جازۋشىلارى مەن ينتەللەگەن­تسيا­­سىنىڭ باسىن قوسقان فورۋم­عا قاتىسىپ قايتتىق. فورۋم ون كۇن­گە سوزىلدى. بۇل جاس اقىن-جازۋشىلار ءبىرىن-ءبىرى تانىپ بىلۋگە جەتكىلىكتى ۋاقىت. بۇل سا­پاردا ەرەكشە ەسىمدە قالعانى - ەسەنين تۇرعان ريازانعا قاراستى كونستانتينوۆا اۋىلىنا بارعا­نىمىز. ەسەنين وتىرعان پارتاعا وتىرىپ، سول ءداۋىردىڭ سياسىمەن حات جازدىق. ەسەنين ولەڭ جازعان امباردا بولدىق. ءوزى تۇرعان ۇيىنە كىرىپ، ءوزى جىرلاعان قايىڭداردىڭ قاسىندا سۋرەتكە تۇستىك. گيد بىزگە بارعاننان قايتقانشا ەسەنيننىڭ بارلىق ولەڭدەرىن جاتقا وقىپ، قايران قالدىردى. ال ەكىنشى گيد ەسەنيننىڭ كۇندەلىكتەرى مەن حات­تارىن جاتقا وقيدى ەكەن. اسەرىن اۋىزبەن ايتىپ جەتكىزۋ مۇمكىن ەمەس. وسى جولى ءبىز ارميان، ءازىر­بايجان اقىندارىمەن دوستاسىپ كەتتىك. ال فرانتسيادا وقىپ ءجۇر­گەندە، ۋكراينالىق ۆيكتوريا چەر­­نيچۋك دەگەن اقىنمەن ارالاس­تىم. قىرعىز، وزبەك، تاجىك اقىن­دارىمەن دە بايلانىسىمىز بار. تۇركياعا دا پوەزيا فەستيۆالىنە بارعاندا، ءبىرشاما تۇركىتىلدەس اقىندارمەن دوس بولىپ قايتتىم. قازىر سول تانىستارىمىزبەن ءبىر­لەسىپ ۇلكەن جوبالاردى ىسكە اسى­رۋ­دى جوسپارلاپ وتىرمىز. ونىڭ قانشالىقتى جۇزەگە اساتىنىن الداعى ۋاقىت كورسەتەدى.
- ءوز قاتارلاستارىڭىزدىڭ ارا­سىن­دا حالىقارالىق پوەزيا بايقاۋلارىنىڭ جەڭىمپازى بولۋعا العاش قول جەتكىزگەن اقىننىڭ ءبىرى­سىز...
- بۇل «تمد مەملەكەتتەرىنىڭ جاس اقىن-جازۋشىلارىنىڭ» ارا­­سىندا وتكەن «دەبيۋتتەر دوس­­تاس­تىعى» اتتى حالىقارالىق پوە­زيا بايقاۋى بولاتىن. ءبىز ولەڭ­دەرىمىزدى ورىسشاعا اۋدارتىپ، ماسكەۋدىڭ جازۋشىلار وداعىنا جىبەردىك. بىرنەشە كۇننەن سوڭ، قۋا­نىشتى حابار جەتتى. «جەڭىم­پاز­داردىڭ قاتارىنداسىز. ءسىزدى رەسەي پرەزيدەنتى مەدۆەدەۆ كا­بىل­دايدى. ءارى رەسەي پرەزيدەن­تى­نىڭ ادەبيەت نوميناتسياسى بوي­ىنشا بەرىلەتىن ستيپەندياسىنا يە بولدىڭىز» دەپ توبەمىزدى كوك­كە ءبىر-اق جەتكىزدى. الايدا سول جىلى رەسەي مەن گرۋزيانىڭ ور­تا­سىندا بولعان سوعىستىڭ سال­دا­رىنان رەسەي پرەزيدەنتى بۇل يگى شاراعا قاتىسا المادى. ەسە­سىنە، تاجىكستاننىڭ پرەزيدەنتى ە.راح­مونوۆ وسى سىيلىقتى تا­بىستاۋ قۇرمەتىنە يە بولدى. قۇت­تىقتاۋ شاراسى دۋشانبەدە ە.راح­مو­نوۆ­تىڭ رەزيدەنتسياسىندا ءوتتى.
- ولەڭدەرىڭىزدى ورىس تىلىنە كىم اۋداردى؟
- ولەڭدەرىمدى كەزىندە ارون اتابەك دەگەن اقىن اۋدارعان. مەن ارون اتابەك جايلى مارقۇم عا­لىم­جان مۇقانوۆ اعامىزدىڭ اۋ­زىنان كوپ ەستۋشى ەدىم. ءبىر كۇنى اروننىڭ كەشى كيمەپ-ءتىڭ عي­ماراتىندا وتەيىن دەپ جاتىر دە­گەندى ەستىپ، داۋرەن ەكەۋمىز ىزدەپ باردىق. ول كەزدە پوەزيانىڭ جاع­دايى وتە اۋىر ەدى. اقىن­دار­دىڭ شىعار-شىقپاس جانى بار. كەش وتكىزۋ مۇلدە سيرەگەن زامان بولاتىن. كەشتەن ەرەكشە ءلاززات الىپ قايتتىم. ءارى قاتتى تاڭعال­­دىم. ارون بىرنەشە سۇلۋ قىز­داردى ءوزىنىڭ مۋزاسى دەپ جاريا­لاپ، ساحناعا الىپ شىعىپ، ولەڭ وقىدى. ومىرلىك جارى بار ادام­نىڭ شىعارماشىلىقتا بۇ­رىن-سوڭدى مۇنداي ەركىندىگىن كور­گەن ەمەسپىن. تۋرا ماعىنا­سىن­دا ءما­دە­ني شوك الىپ قايت­تىم. كەيىن وزىمەن جەكە تانىسىپ، ءوزىمنىڭ اۆتورلىق كەشىمە قوناق رەتىندە شاقىردىم. كەشكە ول ويلاماعان جەردەن مەنىڭ ەكى-ءۇش ولەڭىمدى اۋدارىپ اكەلىپتى. ارون­نىڭ سول اۋدارمالارىنىڭ ارقا­سىن­دا مەن حالىقارالىق باي­قاۋ­دىڭ جەڭىم­پازى بولدىم. ارالاسا كەلە، ارون اتابەكتى جانى نازىك، ليريك اقىن رەتىندە تانىدىم. كىشى­پەيىل، ادامعا ءىلتيپاتى زور، ءجۇ­رەگى جۇمساق اقىن رەتىندە ەسىم­دە قالدى. ال قازىر رۋحىن ەش­كىم سىندىرا الماعان باتىر، ءارى قا­زاقتىڭ عاسىرلار بويى گەنوفونى ارقىلى ولمەي كەلە جاتقان قاي­سارلىعى مەن وجەت­تى­گىن وسى ادام­نىڭ بويىنان كورە­مىن.
- اقىن، اۋدارماشى داۋرەن بە­رىك­قاجىۇلىنا تۇرمىسقا شىق­قانىڭىزعا ون بەس جىل بولىپتى.داۋرەنگە جار بولۋ قيىن با؟ جوق، الدە، اقىن تاناكوزگە جار بولۋ قيىن با؟
- تاناكوزگە جار بولۋ - ءمار­تە­بە، داۋرەنگە جار بولۋ - باقىت دەپ جاۋاپ بەرگەن بولار ەدىم. جۇرت ويلاعانداي اقىننىڭ اق­ىن­­­عا جار بولۋى قورقىنىشتى ءارى ازاپتى دۇنيە ەمەس. كەرىسىنشە، وزىڭمەن ءوزىڭ ۇيلەسىم تابۋدىڭ، باقىتتى بولۋدىڭ ءبىر جولى دەپ قاراعان ءجون. ايەل ادام اكەسىنىڭ تاربيەسىنەن كەيىن كۇيەۋىنىڭ ءتار­بيەسىنە وتەدى. ايەلدىڭ تۇتاس تاع­دىرى تەك ەر-ازاماتتىڭ شەشىمىنە بايلانىستى بولادى. ءبىزدىڭ جۇپ­تاعى قارىم-قاتىناس ەركىندىگى قازاقي قارىم-قاتىناستان كورى، ەۋروپالىق قارىم-قاتىناستى ەسكە تۇسىرەتىندىكتەن كوبى ءتۇسىن­بەي، اڭتارىلىپ قالىپ جاتاتىنى وتىرىك ەمەس. «داۋرەنگە جار بولۋ - باقىت دەگەن ءسوز» - مەنىڭ ءومى­رىم تۇتاس قۋانىشتاردان عانا تۇر­دى دەگەندى بىلدىرمەيدى. مەنىڭ ءومى­رىمدە دە كوڭىلسىز، قايعىلى ءسات­تەر ءبىر ادامنىڭ باسىنا جە­تەر­لىكتەي بولدى. «السىزدەر كەك قاي­تارادى. مىقتىلار كەشىرەدى. باقىتتىلار ۇمىتادى» دەگەن قا­ناتتى ءسوز بار عوي. مەنىڭ ءومىرىم­دە بولعان كوڭىلسىز كۇندەر تەز ۇمى­تىلادى. سوعان قاراعاندا مەن باقىتتىلاردىڭ قاتارىن­دامىن. شۇكىر. داۋرەننىڭ ەڭ ءۇل­كەن قاسيەتى بار - ول بارلىق نارسەگە كەڭ تۇرعىدان، ۇلكەن ءجۇ­رەكپەن قارايدى. ادىلەتتى. ۇساق-تۇيەكتەن جوعارى، ازاماتتىعى بيىك. جانە ماعان قارىشتاپ قا­نات سەرمەۋگە شىعارماشىلىق ەركىندىك بەرگەن ادام. ءبىز ءبىر-بىرىمىزدەن ۇيرەنىپ، ءبىر-ءبىرىمىزدى تولىقتىرىپ كەلە جاتقان ادام­دار­مىز دەپ تۇسىنەمىن. ءبىز ءوز ءۇيى­مىزدى كىشكەنتاي جازۋشىلار ودا­عى سياقتى سەزىنەمىز. ويتكەنى كۇن­دە داستارقان باسىنداعى ءاڭ­گىمە ادەبيەت توڭىرەگىندە بولادى. داۋرەن، ءتىپتى، تاماق ءىشىپ وتىر­عاندا، پوەزيانىڭ اۋديوديسكى­لەرىن قويىپ قويعاندى ۇناتادى. ال مۋزىكا تىنداۋداعى تالعامى قازىرگى كاسىبي مۋزىكانتتاردان ارتىق شىعار دەپ ويلايمىن. ول ۇيدە جۇرگەندە ادام ەستىمەگەن تاڭعاجايىپ مۋزىكالاردى ينتەر­نەتتەن تاۋىپ الادى. سوندا سەنىڭ ءومىرىڭنىڭ كەيبىر بولشەكتەرى مۋ­زىكا ويناعان سايىن ەسىڭە ءتۇسىپ وتىرادى ەكەن. جالپى، تۇرمىسقا وزىمنەن بيىك، وزىمنەن اقىلدى، وزىمنەن تەرەڭ ادامعا شىققا­نىم­دى بىلەمىن. «گاۋھارتاس بات­پاقتا جاتسا دا گاۋھارتاس. شاڭ اسپانعا كوتەرىلسە دە شاڭ بولىپ قالادى» دەگەن قاناتتى ءسوز بار عوي. ول ءوزىنىڭ باعاسىن بىلەدى. الدەكىمدەر سياقتى وڭمەڭ­دەمەي­دى، جانتالاسپايدى. ءىستىڭ ادامى. اللا تاعالانىڭ ەكەۋمىزدىڭ با­سىمىزعا بەرگەنىن قيىندىق دەپ قاراساق، وندا ول ۇلكەن كۇپىرلىك بولار ەدى. مەن وسى كۇنگە دەيىن باسىمىزعا بەرىلگەن قيىندىقتىڭ ءوزىن باعىم دەپ قابىلدايمىن. ويتكەنى ول شىڭىراۋعا قاراي قۇل­ديلاۋعا ەمەس، بيىككە قارىش­تاپ كوتەرىلۋگە سەرپىن بەردى.
- سپورتپەن اينالىساسىز با؟
- مەكتەپتە تاەكۆاندو، كا­را­تە­مەن اينالىسقانمىن. انام مەن تاربيەشى اپايىم قىز بالاعا قول ەمەس دەپ قارسى بولىپ، بۇل ۇيىرمەدەن شىعارىپ الدى. سوسىن باسكەتبولعا قاتىستىم. مەكتەپتە وقىپ جۇرگەندە، اقبوتا كەرىم­بەكوۆا ەكەۋمىز ۇنەمى قارسىلاس كوماندادا وينايتىنبىز. ءبىز ءبىر مەكتەپتە پاراللەل كلاستا وقى­دىق. مەن ۇيلەنىپ، كىشكەنتايلى بولعان سوڭ دا سپورتتان قول ۇزگەن جوقپىن. ءتۇرلى فيتنەس- كلۋبتارعا جازىلىپ، جاتتىعۋلارعا قاتىسا­مىن، باسسەينگە بارىپ تۇرامىن. قازىر اپتاسىنا ءۇش رەت شەيپينگكە قاتىسامىن. سپورتتى ەرەكشە جاق­سى كورەمىن. ول دا ءبىر ءدىن سياقتى. جاتتىعۋ ۋاقىتى تايا­عان­دا مۇسىلمان بالاسىنىڭ نامازعا اسىققانىنداي جۇگىرەمىن. دەنە سىمباتى دا ۇلكەن ەڭبەكتىڭ جە­مىسى. مەن داۋرەننىڭ قاسىندا ەڭ­سەم بيىك بولىپ، جارقىراپ جۇرگەندى قالايمىن. الدەكىمدەر مىنا جىگىتتىڭ تالعامى قانداي ناشار دەپ ايتپاسا ەكەن دەپ ويلايمىن. ويتكەنى ايەل - ەر ازاماتتىڭ ايناسى.
- كەزىندە ءوزىڭىز «بولاشاق» باع­دارلاماسىمەن فرانتسياعا ءبىر جىل وقۋعا كەتىپ ەدىڭىز. ەندى جول­داسىڭىز داۋرەن تۋركياعا وقۋعا كەتتى دەپ ەستىدىك. ەكى بولەك ءومىر ءسۇرۋ قيىن ەمەس پە؟
- يا، داۋرەن تۇركسوي-دىڭ شاقىرتۋىمەن ءۇش ايعا تۇرىك ءتىلىن وقۋعا كەتتى. تۇركىتىلدەس ال­تى مەملەكەتتەن بىرنەشە اقىنى ارنايى انكاراعا شاقىرتىلدى. ولار اتاقتى گازي ۋنيۆەرسيتەتىندە تۇرىك ءتىلىن ۇيرەنگەن سوڭ، ەكى ەل اراسىندا ادەبي كوپىر ورناتادى. تۇرىك اقىندارىن قازاقشاعا اۋ­دارۋ ءىسى جوسپارلانۋدا. قازىر ين­تەرنەتتىڭ ارقاسىندا بۇكىل جەر شارى كىشكەنتاي عانا اۋىل سياق­تى بولىپ قالدى عوي. سكايپپەن كۇندە سويلەسەمىز. مەن فرانتسيا­عا كەتكەن 1999 جىلدارى قازاق­ستاندا ينتەرنەت ءالى دۇرىس دامي قويعان جوق ەدى. سول كەزدە، قاتتى قينالدىق. ەكى بولەك ءومىر ءسۇرۋ قيىن. بىراق ارتىقشىلىعى دا بار. ءبىر-ءبىرىڭنىڭ قادىرىڭدى تە­رەڭ­ى­رەك ۇعۋعا ارانى ءبولىپ تۇرعان قا­شىقتىق كومەكتەسەدى ەكەن.
- ءسىز ءۇشىن قازىر پوەزيانىڭ قان­داي ءداۋىرى ءوتىپ جاتىر؟
- قازىر قازاق پوەزياسىندا رە­نەس­سانس ءداۋىرى باستالعانداي اسەر قالدىرادى. ارتىمدا كەلە جاتقان الاپات اقىنداردى كور­دىم. وزىندىك داۋىسىمەن، سويقان ەكپىنىمەن كەلە جاتقان وسى ءبىر اقىنداردى ءتاڭىرىم ءتىل كوزدەن ساق­تاسا ەكەن دەپ تىلەيمىن. اسىرە­سە، قاراعاندىدا سەرىك اقسۇڭ­قارۇلىنىڭ مەكتەبىنەن شىققان تۇتاس جاس اقىنداردىڭ قاعاناتى پايدا بولدى. بۇرىن-سوڭدى كور­مەگەن بەكزادا جىرلاردى وقىپ وتىرىپ، قايتا تىرىلگەندەي بول­دىم. بىردە داۋرەن: «مىنا ءبىر جيىرماعا ەندى تولعان جاس اقىنعا روللان سەيسەنباەۆ «گەني» دەپ باعا بەرىپتى. وقىپ شىقشى» دەپ ءبىر كىتاپتى ۇستاتا سالدى. مەن جازۋشى اعامىزدىڭ ەشكىم تانى­مايتىن جاس بالاعا بۇلاي تىم ءۇل­­كەن سوزدەر ايتقانىنا العا­شىن­دا سەنىمسىزدىك ءبىلدىردىم. ءبىر-ەكى ولەڭىن وقىپ كورەيىن دەپ كىتابىن اشقانىم ەسىمدە. ءبىر قا­راسام، ءتۇننىڭ ورتاسى بولىپ كە­تىپتى. مەن كىتاپتىڭ اياعىنا جەتىپ، ءبىر-اق توقتادىم. بۇ­رىن-سوڭدى بۇلايشا ەسىم كەتىپ كىتاپ وقىعانىم ەسىمدە جوق. جاس شايىرعا باعا وتە ءادىل بەرىلگەن ەكەن. جيىرما جاستا پوەزياعا مۇنداي ەكپىنمەن كەلۋ - بۇرىن-سوڭ­دى بولماعان. تاڭعاجايىپ اقىن!
- استانادا ادەبي ورتا قان­داي؟
- استانادا ادەبي ورتا قالىپ­تاسىپ­تى. ءتىپتى، بۇكىل الماتى كو­شىپ كەلىپ العانداي اسەرگە بولەي­دى. الماتىدا سوڭعى جىلدارى اقىنداردىڭ باسى قوسىلمايتىن بولعان. قوسىلعان جاعدايدا ولەڭ وقىلمايتىن. استانادا كەرىسىشە، اقىنداردىڭ باسى ءجيى قوسىلادى جانە بارعان جەردە ولەڭ وقىلادى. كەرەمەت ەمەس پە؟
- «ماسساعان» سايتىنا جاريا­لانگان «ولگىم كەلەدى» ولەڭىڭىز وتە ۇلكەن داۋ تۋدىردى. وقىرماندار پىكىرى ەكىگە جارىلدى. ءبىر اپتاعا جەتەر-جەتپەس ۋاقىت ىشىندە ولەڭ 1003 رەت وقىلىپ، وعان 53 پىكىر ايتىلعان ەكەن. پىكىر ءالى تولاستار ەمەس. وزىڭىزگە ايتىلعان سىنعا قالاي قارايسىز؟
- ءادىل سىنعا قاشان دا جاقسى قارايمىن. سىن ەستۋ وڭاي ەمەس. اسىرەسە، العاش ەستىپ، ونى قورىت­قانشا، كەز كەلگەن ادامنىڭ ءبىر تۋلاپ الاتىنى وتىرىك ەمەس. «ءول­گىم كەلدى» ولەڭىندە مۇلدەم سۋي­تسيد تۋرالى اڭگىمە ايتىلعان جوق. ول بىرەۋگە ولەردەي عاشىق ادام­نىڭ ىشكى مونولوگى عانا. بۇل ولەڭدى وقىعان جاسوسپىرىمدەر ءوزى­نە قول سالۋى مۇمكىن دەگەن بولجامعا دەيىن ايتىلىپ ۇلگەردى. مەن سايتتا جاريالانعان ولەڭ­دەرىمە بەي-جاي قاراماعان ادام­داردىڭ بارىنە شەكسىز العىسىمدى ايتامىن. بىرەۋ مەنى جانىن سا­لىپ اقتادى. مەن ءۇشىن ولاردىڭ جۇرەگى ەكى ەسە اۋىرىپ وتىرعانىن تۇسىنگەندە، كوڭىلىڭ مارقايادى ەكەن. بىرەۋ ولەڭنىڭ مۇلدە ۇنا­ماي­تىنىن ايتتى. ولەڭىم ۇنا­ما­عان ادامدارعا دا العىس ايتامىن. اسىرەسە، ءوزىنىڭ پىكىرىن بەتپەر­دە­سىز اشىق ايتاتىن ادامداردى قۇر­مەتتەيمىن. ەڭ باستىسى، ەش­كىم ونى نازاردان تىس قالدىرعان جوق.
- بۇرىن كەڭەستىك داۋىردە اقىندار ەل ارالاپ، حالىقپەن ءجيى كەزدەسۋ ۇيىمداستىرىپ تۇرۋشى ەدى. قازىر سول ءداستۇر ءولدى. سىزدەرگە ەل ارالاپ كەش وتكىزىپ، حالىقپەن ديدارلاسۋعا مۇمكىندىك جوق پا؟
- ءسىز وتە ءبىر ورىندى ماسەلەنى كوتەردىڭىز. راسىندا دا، بۇل ءداس­تۇر جوعالدى. بىراق ءبىز جاقىندا عانا شىققان التى كىتاپتىڭ تۇ­ساۋكەسەرىن رەسپۋبليكالاردىڭ ءىرى قالالارىندا وتكىزۋدىڭ جوباسىن دايىنداپ جاتىرمىز. ول قولداۋ تاپسا، مىندەتتى تۇردە ەل ارالاپ كەش وتكىزىپ، كىتاپتارىمىزدىڭ تۇساۋىن ءار وبلىستا، ءار قالادا كەسەتىن بولامىز. حالىق سول كەز­دە اقىنداردىڭ ولەڭىن ءوز اۋزىنان تىڭداپ، قولتاڭبا الا الادى. شى­نىمدى ايتسام، سول كەزدەسۋ­لەرگە كەرەمەتتەي اسىعىپ ءجۇر­مىن.
-شىعارماشىلىعىڭىزعا تابىس تىلەيمىز!
- سىزگە دە كوپ راقمەت!

اڭگىمەلەسكەن سەيسەن امىربەكۇلى

"ايقىن" گازەتى