ەلباسىنىڭ استانانى دامىتۋعا قاتىستى ۇلكەندى-كىشىلى وتىرىستاردا ۇزبەي ايتىپ كەلە جاتقان ماسەلەسىنىڭ ءبىرى - ەلوردانى ساسىق ءھام قولاڭسا يىستەن قۇتقارۋ جايى ءالى كۇنگە شەشىلەر ەمەس.
التى الەمگە تانىلعان ايبىندى استانامىزدىڭ ابىرويىنا داق ءتۇسىرىپ تۇرعان بۇل ماسەلەنىڭ توركىنىنە ءۇڭىلىپ كورەيىك. جۋىردا ەلباسى الدىندا ەسەپ بەرگەن استانا قالاسىنىڭ اكىمى يمانعالي تاسماعامبەتوۆ: «بيىلعى جىلى تالدىكول قالدىق سۋلار قويماسىن تازالاۋدىڭ قۇرىلىس جۇمىستارىن باستايمىز. جوبا ەكى كەزەڭنەن تۇرادى. ءبىرىنشى كەزەڭىندە سوڭعى تەحنولوگيا بويىنشا ەسىل وزەنىنە قۇيىپ جاتقان سۋ جۇيەسى تازالانىپ، سانيتارلىق نورماعا كەلتىرىلەدى. ەكىنشى كەزەڭىندە تالدىكول قالدىق سۋ قويماسىن جويۋ، ونىڭ تابانىن قورىس باتپاقتان تازالاۋ، سول ارقىلى 2 مىڭ گەكتاردان باستاپقى قالپى - 400 گەكتارعا دەيىن جەتكىزۋ كوزدەلۋدە. سۋ قويماسى تابانىن تازالاۋعا جۇمساق گەوتەكستيل ءفيلترلى كونتەينەرى قولدانىلادى. جوبا جۇمىسى 2011-2015 جىلدارعا جوسپارلانعان» دەدى.

ەلباسىنىڭ استانانى دامىتۋعا قاتىستى ۇلكەندى-كىشىلى وتىرىستاردا ۇزبەي ايتىپ كەلە جاتقان ماسەلەسىنىڭ ءبىرى - ەلوردانى ساسىق ءھام قولاڭسا يىستەن قۇتقارۋ جايى ءالى كۇنگە شەشىلەر ەمەس.
التى الەمگە تانىلعان ايبىندى استانامىزدىڭ ابىرويىنا داق ءتۇسىرىپ تۇرعان بۇل ماسەلەنىڭ توركىنىنە ءۇڭىلىپ كورەيىك. جۋىردا ەلباسى الدىندا ەسەپ بەرگەن استانا قالاسىنىڭ اكىمى يمانعالي تاسماعامبەتوۆ: «بيىلعى جىلى تالدىكول قالدىق سۋلار قويماسىن تازالاۋدىڭ قۇرىلىس جۇمىستارىن باستايمىز. جوبا ەكى كەزەڭنەن تۇرادى. ءبىرىنشى كەزەڭىندە سوڭعى تەحنولوگيا بويىنشا ەسىل وزەنىنە قۇيىپ جاتقان سۋ جۇيەسى تازالانىپ، سانيتارلىق نورماعا كەلتىرىلەدى. ەكىنشى كەزەڭىندە تالدىكول قالدىق سۋ قويماسىن جويۋ، ونىڭ تابانىن قورىس باتپاقتان تازالاۋ، سول ارقىلى 2 مىڭ گەكتاردان باستاپقى قالپى - 400 گەكتارعا دەيىن جەتكىزۋ كوزدەلۋدە. سۋ قويماسى تابانىن تازالاۋعا جۇمساق گەوتەكستيل ءفيلترلى كونتەينەرى قولدانىلادى. جوبا جۇمىسى 2011-2015 جىلدارعا جوسپارلانعان» دەدى.
قالا اكىمشىلىگىنىڭ ەنەرگەتيكا جانە تۇرمىستىق شارۋاشىلىق باسقارماسى باستىعىنىڭ ورىنباسارى يسلامبەك بيسەنباەۆتىڭ ايتۋىنشا، تالدىكول قالدىق سۋلار قويماسىنىڭ اۋماعى 90 ميلليون تەكشە مەترگە تەڭ ەكەن. وعان تاۋلىگىنە 254 مىڭ تەكشە مەتر قالدىق سۋلار تۇسەتىن كورىنەدى. ال بۇدان شىققان جىلعالار قورعالجىن مەملەكەتتىك تابيعي قورىعىنا بارىپ قۇيادى. وسىدان بەس جىلداي بۇرىن پارلامەنت سەناتىنىڭ دەپۋتاتى سۆەتلانا جالماعامبەتوۆا ماسەلە كوتەرىپ: «تالدىكولدىڭ سۋى قورعالجىندى لاستاپ قانا قويماي، ونداعى فلورانى بۇزادى ەكەن. ياعني قوقيقازداردىڭ اۋا كوشۋىنە اسەر ەتۋى مۇمكىن كورىنەدى. ونداي جاعدايدا وڭىردەگى تابيعي تەپە-تەڭدىك بۇزىلادى» دەگەن بولاتىن. بىراق سول دەپۋتاتتىق ساۋالدىڭ سوڭى سيىرقۇيىمشاقتانىپ بارىپ، جاۋاپسىز قالدى.
يسلامبەك بيسەنباەۆ 2012-2015 جىلدارعا ارنالعان قالانىڭ دامۋ باعدارلاماسىندا تالدىكول قالدىق سۋلار قويماسىن تازالاپ، قۇرعاتۋعا 60 ميلليارد تەڭگە قاراستىرىلىپ جاتقاندىعىن ايتادى. قازىر ونىڭ تەحنيكالىق-ەكونوميكالىق نەگىزدەمەسى جاسالىپ جاتىر ەكەن. وسىعان وراي پارلامەنت سەناتىنىڭ دەپۋتاتى ورالباي ابدىكارىموۆتىڭ قابىلداۋىندا بولعان «باتىس كوممەرتس ستروي سەرۆيس» جشس ديرەكتورىنىڭ ورىنباسارى بولات مۇقىشەۆ استانا اكىمدىگى جوسپارلاپ وتىرعان فوتومەن ادىسىمەن تالدىكولدى تازالاۋدى جۇزەگە اسىرۋعا قىرۋار قارجى مەن ءۇش جىل ۋاقىت جۇمساۋدىڭ تىم ءتيىمسىز ەكەندىگىن ايتادى.
«بىزدىڭشە، بۇل ءادىس - ءتيىمسىز. سەبەبى ونىڭ ەكولوگيالىق زيانى كوپ. بىرىنشىدەن، بۇل ءادىستىڭ توزىعى جەتكەن. ەكىنشىدەن، ءۇش جىل تىم ۇزاق مەرزىم. ۇشىنشىدەن، الەمدىك قارجى داعدارىسى جاعدايىندا وسىنشا قارجىنى جۇمساماي-اق، «باتىس كوممەرتس ستروي سەرۆيس» جشس مەمبرانالىق ادىسپەن ءبىر جىلدا ەكى ەسە از قارجىعا تالدىكول سۋ قويماسىن تازالاپ بەرە الادى. قۇرىلىس كومپانياسىنىڭ وسى قۇرال-جابدىقتاردى مەڭگەرگەن ماماندارى بار. مامانداردىڭ حالىقارالىق تالاپتارعا ساي جۇمىس ىستەۋگە نەگىزدەلگەن سەرتيفيكاتتارى، كەلىسىمشارتتارى بار. تەحنيكالىق، ماتەريالدىق بازاسى جەتكىلىكتى» دەيدى مامان.
بۇل كومپانيانىڭ ۇسىنىپ وتىرعان جاڭا تەحنولوگياعا نەگىزدەلگەن مەمبرانالىق ءادىسىن قازىرگى تاڭدا بىرىككەن اراب امىرلىگى، رەسەي، اقش سۋ قويمالارىن تازالاۋعا قولدانىپ جاتىر ەكەن. مەمبرانالىق سۋ تازالاۋ ءادىسىنىڭ ەرەكشەلىگى: 99 پايىزعا دەيىن تازالانعان سۋدى اۋىل شارۋاشىلىعى ماقساتىنا (بالىق وسىرۋگە، داقىلدار وسىرۋگە) پايدالانۋعا بولاتىن كورىنەدى. نەگىزگى ەرەكشەلىگى - سۋدان بيوماسسانى ايىرادى. «باسقا وڭىرلەردە سىناق رەتىندە قالدىق قويماسىن تازالاۋ جۇمىسىن اتقارۋعا بولار. ال استانادا ونى جاساۋعا بولمايدى. سەبەبى فوتومەن ادىسىمەن سۋدى كەپتىرۋ كەزىندە بۇدان دا ساسىق ءيىس اۋاعا جايىلادى دا، قالا تۇرعىندارىنىڭ اشۋ-ىزاسىن تۋعىزارى انىق» دەيدى بولات مۇقىشەۆ.
ەندەشە، ەلباسىنىڭ ءوزى الدەنەشە رەت ەسكەرتكەن ماسەلەنى جەدەل دە ۇتىمدى شەشۋ ءۇشىن قالا اكىمدىگى بارىنشا ءتيىمدى ءارى وڭتايلى جوباعا نەگە بايقاۋ جاريالاپ، ونى اشىق تۇردە وتكىزبەسكە دەگەن ورىندى سۇراق تۋادى. اشىق اۋاعا تارالىپ جاتقان نارسەگە قاتىستى جايدىڭ اشىق قارالعانى دۇرىس ەمەس پە؟ جالپى، ەل كولەمىندەگى كەلەڭسىزدىكتەر سول باياعى جابىق، جاسىرىن شەشىلەتىندىكتەن دە ازايماي تۇرعان سىڭايلى.

قۇتماعامبەت قونىسباي
«ايقىن» گازەتى