"اق جول پارتياسى" نۇر-سۇلتان قالاسى اكىمدىگىنىڭ قارسىلىعىنا قاراماستان، 31 مامىر كۇنى ساعات 8:30-دا ساياسي قۋعىن-سۇرگىن جانە اشارشىلىق قۇرباندارىن ەسكە الۋعا ارنالعان الاش شەرۋىنە شىقتى. بۇعان دەيىن پارتيا وكىلدەرى اكىمدىككە شەرۋ وتكىزۋگە قاتىستى رۇقسات حات جازىپ، وعان رۇقسات بەرمەگەنىن مالىمدەگەن بولاتىن. 

ەلورداداعى سەيفۋللين-اۋەزوۆ كوشەلەرى قيىلىسىنان باستالعان “اق جول” پارتياسىنىڭ الاش شەرۋى ءۇش كوشە ءجۇرىپ ءوتىپ، ساياسي قۋعىن-سۇرگىن جانە اشارشىلىق قۇرباندارىنا ارنالعان ەسكەرتكىش مەموريالعا كەلىپ، تاعزىم ەتىپ، گۇل شوقتارىن قويدى. زۇلمات پەن زوبالاڭ قۇرباندارىنىڭ ارۋاقتارىنا دۇعا باعىشتالىپ، قۇران وقىلدى.

اقجولدىقتار بىلتىر ءبىر كوشە ءجۇرىپ بارىپ، ساياسي قۋعىن-سۇرگىن مەن اشارشىلىق قۇرباندارىنا تاعزىم ەتكەن ەدى. ەندى بيىل ءۇش كوشە ءجۇرىپ ءوتتى.“اق جولدىڭ” تاعزىم ەتۋ شەرۋى جىل سايىن داستۇرگە اينالعانىنداي، الجير قاسىرەت مەموريالىندا جالعاcپاق.

Abai.kz