روزا رىمباەۆا، قازاقستاننىڭ حالىق ءارتىسى:

روزا رىمباەۆا، قازاقستاننىڭ حالىق ءارتىسى:

- روزا قۋانىشقىزى، ءسىز قارشادايىڭىزدان بويىڭىز­داعى دارىنىڭىزبەن قازاق حالقىن الەمگە تانىتىپ كەلەسىز. مىنە، وسىدان 36 جىل بۇرىن العاش رەت ساحناعا شىققان 17 جاسار تالدىرماش قىز بۇگىندە قازاق ەسترادا ونەرىندەگى جوعارعى بۋىننىڭ وكىلىنە اينالدى. ادام ءوزىنىڭ سوڭىندا­عىلارعا قاراپ، ۋاقىتتىڭ جۇيرىكتىگىن مويىندايدى عوي. بۇگىندە ەستراداداعى جاس بۋىن - ءوزىڭىزدىڭ ۇلىڭىز ءاليدىڭ تۇستاستارى. ونەردە ءوز ەنشىسىن العان ءانشى رەتىندە بۇگىنگى قازاق ەستراداسىنا قانداي باعا بەرەر ەدىڭىز؟

- قازىرگى قازاق ەستراداسىنا باعا بەرۋ مەن ءۇشىن قيىنداۋ. ويتكەنى ونەرگە قاتىستى قانداي دا ءبىر وي ايتۋ، نەگىزىنەن، ونەرتانۋشى ماماندارعا، سىنشىلارعا، بەلگىلى اقىن-سازگەرلەرگە لايىق. «سىرت كوز - سىنشى» دەمەي مە؟ ال مەن ءوزىمنىڭ جەكە شىعارماشىلىعىممەن، ورىنداۋ­شىلىق ونەرىممەن ەڭبەك ەتىپ جۇرگەن اداممىن. ساحنادا جۇرگەن 36 جىلدىڭ ىشىندە ءوز باسىم ەشكىمگە ەلىكتەگەن ەمەس­پىن.

- دەگەنمەن ءسىزدى اندا-ساندا بولسا دا ساحنادا جاس انشىلەر­مەن بىرلەسىپ ءان سالعانىڭىزدى بايقاپ قالامىز. وزىڭىزگە بەلگىلى، بۇگىندە جاستاردىڭ ەستراداعا دەگەن قۇلشىنىسى ەرەكشە...

- مەن جاستارمەن جاقسى بايلا­نىستامىن دەپ ايتا المايمىن، بىراق سيرەك بولسا دا شىعارماشىلىقتا كەيبىر جاستارمەن بىرلەسىپ جۇمىس ىستەگەن ساتتەر بولدى. الايدا قازىرگى ەسترادادا جۇرگەن جاس بۋىننىڭ ىشىندە مەنىڭ كوڭىلىمنەن شىعاتىن، ونىڭ شىعارماشالىعى تۋرالى اۋىز تولتىرىپ ايتاتىن جاستاردى بايقاي الماي ءجۇرمىن. ويتكەنى مەن قازىرگى «ءانشىمىن» دەپ جۇرگەن جاستاردى تىڭداي المايمىن. ماعان ۇنايتىن جاس انشىلەر­دىڭ قاتارىندا باۋىرجان يساەۆ، التىناي جوراباەۆا، جۇبانىش جەكسەنوۆ، مۇرات قوجا سىندى بىرەن-ساران ءانشىنى اتار ەدىم. كاسىبي مۋزىكانت بولۋ ءۇشىن دارىن مەن ديپلومنان وزگە نە قاجەت؟

- بىزدە قازىر كىم كورىنگەن ساحنادا ءجۇر. ءان ايتىپ جۇرگەندەردىڭ ءبارىن جا­مان دەسەم، كوپكە توپىراق شاشقانداي بولارمىن، بىراق ساحنادا انشىلەردىڭ سانىن كوبەيتىپ جۇرگەندەردىڭ تەڭ جارتى­سى مۋزىكاعا قاتىسى جوق ادامدار. ءتىپتى جارتىسىنىڭ مۋزىكاعا قاتىسى بار بولعان كۇننىڭ وزىندە ولاردىڭ تىكەلەي ەستراداعا قاتىسى بار ما، جوق پا، مەنىڭ وسىعان ۇلكەن كۇمانىم بار. ەستراداعا قاتىسى بار بولۋ دەگەنىمىز - ول ءارى ءانشى، ءارى مۋزىكانت، ءارى اكتەر بولۋى كەرەك. وسى ءۇش ونەردى بىردەي الىپ جۇرگەندە عانا ول ەسترادانىڭ جارىق جۇلدىزى بولا الادى. ويتكەنى ناعىز ەسترادا ءانشىسى ءان سالا الادى، مۋزىكالىق اسپاپتا ويناي الادى، ول اكتەر-رەجيسسەر رەتىندە ءوز ءانىنىڭ وبرازىن اشىپ، وزىنە عانا ءتان جەكە ستيلىمەن ەرەكشەلەنەدى. ال ءبىزدىڭ قازىرگى انشىلەرىمىز قازاندا ءپىسىپ جاتقان تاعام­نىڭ بىرەسە تۇزى، بىرەسە بۇرىشى جەتپەي قالاتىنى سەكىلدى ءدام-تۇزسىز بولىپ كەتتى. مۇنىڭ سەبەبى - كاسىبي ءبىلىمنىڭ جوقتىعى. بۇگىندە ساحناعا شىعىپ جۇرگەندەردىڭ 99 پايىزى ءاندى فونوگراممامەن ايتادى. مەن ولاردى قالاي ءانشى دەپ ايتا الا­مىن؟ مۇندايلار ساحناعا حالىقتى الداۋ ءۇشىن شىعادى دەپ تۇسىنەمىن. ساحنادا ونىڭ ءوزى ايتىپ تۇر ما، جوق الدە باسقا بىرەۋدىڭ فونوگرامماسىن قوسىپ، جاي اۋزىن اشىپ تۇر ما، بەلگىسىز. قازىرگى تاڭدا انشىلەردىڭ دياپازونى بار ما، جوق پا، بىلە المايسىڭ. سەبەبى قازىر كومپيۋتەر دەگەن بالە پايدا بولدى. تەحنيكانىڭ مۇمكىندىگى سونشالىق - داۋىسى جوق ادام­دى ءبىر وكتاۆا جوعارى شىرقاتىپ جىبەرەدى. فونوگرامماعا سەنىپ العاندىق­تىڭ سالدارىنان قازىر ءان ايتۋعا اكۋستيكا­سى مۇلدە سايكەس كەلمەيتىن ۇلكەن زالدار­دا، سپورت كەشەندەرىندە كونتسەرت بەرۋ بەلەڭ الىپ كەتتى.

- قوعامنىڭ قاي سالاسىن الساڭىز دا، قارجىعا كەلىپ تىرەلەتىن نارىق زامانىنىڭ تالابىنان بولار، ونەر دە بيزنەسكە اينالدى ەمەس پە؟ بۇگىندە باتىستىڭ جەتەگىنە ەرگەن شوۋ-بيزنەس ەستراداعا ساۋلەسىنەن گورى كولەڭكەسىن كوبىرەك تۇسىرگەندەي مە؟

- ءيا، قازىر دۇنيەنىڭ بارلىعى قار­جىعا ساتىلعان زامان عوي. شوۋ-بيزنەس­تەن بايىپ جاتقان باتىسپەن دە، مىنا تۇرعان رەسەيمەن دە قازاق ەستراداسىن سالىستىرۋعا كەلمەيدى. ويتكەنى ءبىزدىڭ ەسترادا باسقالارعا باسەكەلەس ەمەس، تەك ولارعا ەلىكتەيدى. جالپى، ءبىز، قازاق حال­قى، باسقالارعا ەلىكتەۋدەن ەشكىمگە جول بەرمەيمىز. ونەردەن پايدا تابامىن دەپ پروديۋسەرلىكپەن اينالىسىپ جۇرگەندەر بار. بىراق وسىلاردىڭ ىشىنەن ناعىز ونەر ادامدارىن تاربيەلەۋگە، انشىلەردىڭ دەڭ­گەيىن كوتەرۋگە قارجى سالىپ، كۇش جۇمساپ جاتقان ءبىر پروديۋسەر كوردىڭىز بە؟ قازىرگى ءبىزدىڭ پروديۋسەرلەرىمىزدىڭ ەڭ باستى ماقساتى - تويدىڭ باعدارلاماسىن جاساپ، ءارتىستى تويعا ساتۋ. ويتكەنى ولاردىڭ كوكەيىن تەسكەن - اقشا. قاي پروديۋسەر وركەسترمەن باعدارلاما جاساپ، ءوز قامقورلىعىنداعى ءانشىنىڭ ءتىرى داۋىسپەن جەكە كونتسەرتىن ۇيىمداستىرىپ ءجۇر؟ پروديۋسەرلەردىڭ ءبارى كاستينگ جاريالاي­دى، وندا كەلبەتتى دەگەن قىز-جىگىتتەردى قابىلدايدى. بىراق ولاردى بايقاۋدان وتكىزگەندە سول جاستاردىڭ داۋىسى بار ما، جوق پا، وعان باسىن قاتىرمايدى. سوندىقتان قازىرگى ۋاقىتتا بىزدە شوۋ-بيزنەس بار دەپ ايتۋدىڭ ءوزى ارتىق، شوۋ-بيزنەس ەمەس، بىزدە تەك توي-بيزنەس قار­قىن العان. سوندىقتان دا بولار، مەن وسى كۇنى ءوزىنىڭ ونەرگە دەگەن جەكە كوزقارا­سىمەن، مۋزىكالىق جوعارى دەڭگەيىمەن ەرەكشەلەنىپ تۇرعان ءانشىنى كورە الما­دىم. كەيىنگى 10 جىلدا ءوز كاسىبي دەڭگە­يىم­دى كورسەتەيىن، مەن ناعىز ءانشىمىن دەيتىن قىز-جىگىتتەر وركەسترمەن، ءتىرى داۋىستا ساحناعا شىققان ەمەس.

- جاستاردان كاسىبي مۋزىكانت شىعا قويمادى دەپ ولاردى كىنالاۋدىڭ دا ءجونى جوق شىعار. ويتكەنى جاستىڭ اتى - جاس، ولارعا ءجون سىلتەپ، دۇرىس باعىت بەرىلۋى كەرەك قوي. ءسىز دە ۇستاز­سىز. ءوزىڭىزدىڭ شاكىرتتەرى­ڭىزگە قانداي تالاپتار قوياسىز؟

- ارينە، دارىنسىز بالادان كاسىبي ءانشىنى ازىرلەپ شىعارۋ مۇمكىن ەمەستىگى ايدان انىق. ال ناعىز تالانتتى مىندەتتى تۇردە قولداۋ كەرەك. ونەرپاز بولام دە­گەن جاستىڭ ونەرگە يكەمدىلىگىمەن قاتار، تەرەڭ ءبىلىمى بولۋى شارت. كاسىبي مۋزىكانت بولۋ ءۇشىن ءانشى بالا كەزىنەن مۋزىكا مەكتەبىندە وقۋى كەرەك. ارنايى مۋزىكا مەكتەبىن تامامداعاننان كەيىن ۋچيليششەنى (قازىر كوللەدج دەپ ءجۇرمىز عوي), ودان كەيىن كونسەرۆاتوريانى ءبىتىرۋى كەرەك. سونداي-اق ەسترادا انشىسىنە تەاتر ينس­تيتۋ­تىنىڭ مۋزىكا-دراما، اكتەرلىك فاكۋلتەتىن بىتىرسە دە ارتىقتىق ەتپەيدى. ءانشى بولعىم كەلدى ەكەن دەپ بەلگىلى ءبىر وقۋ ورنىنىڭ ەسترادا فاكۋلتەتىنە وقۋعا ءتۇسىپ، ونى بىتىرە سالا كاسىبي ءانشى بولىپ كەتۋ مۇمكىن ەمەس. ونەرگە جەڭىل-جەلپى قارايتىن جاستاردان نوتانىڭ، پورتسيتۋ­رانىڭ، وركەستردىڭ، ارانجيروۆكانىڭ، ديريجەردىڭ نە ەكەنىن بىلمەيتىن ساۋاتسىز ءانشى شىعادى. مەن قازىر ت.جۇرگەنوۆ اتىن­داعى ونەر اكادەمياسىنىڭ پروفەس­سورىمىن. مەنەن ءدارىس الاتىن ستۋدەنتتەر بيىل 3-كۋرستا وقىپ ءجۇر. كەلەسى جىلى ستۋدەنتتەرىم وزدەرىنىڭ ديپلومدىق جۇ­مىس­تارىندا الەمدىك جانە ءتول قالام­گەرلەرىمىزدىڭ كلاسسيكالىق شىعارمالا­رىنان سپەكتاكلدەر قويماق. مەن ءشا­كىرت­تەرىمە بارىنشا كاسىبي ءبىلىم بەرۋگە تىرىسامىن. ءار شىعارمانى بالالارمەن بىرلەسىپ تەرەڭ تالدايمىز. ولارعا قويار تالابىم دا - ونەرگە سالعىرت قاراماي، كاسىبيلىككە ۇمتىلۋ. مەن شاكىرتتەرىمنىڭ وقۋلارىن ويداعىداي اياقتاپ، قازاقستاننىڭ ءار وبلىسىنداعى، قالالارىنداعى دراما تەاترلارىنا، وپەرا تەاترلارىنا، قۋىرشاق تەاترلا­رىنا اكتەر بولىپ بارادى دەپ ويلايمىن. تەاتر - ۇلكەن ۇجىم، وندا بارعان جاستار ارى قاراي زور تاجىريبە مەكتەبىنەن وتەدى.

- ءسىز سوناۋ كەڭەس زامانىنان باستاپ قازىرگى تاڭدا دا شەتەلدەرگە، رەسەيگە ءجيى بارىپ تۇراسىز. ول جاقتا ءسىزدى قازاق ەستراداسىنىڭ وكىلى رەتىندە قابىلدايدى. جالپى، ەسترادا جانرىندا ءار ۇلتتىڭ ءوز بوياۋى بولۋى كەرەك پە؟

- ەسترادادا قازاق باعىتى دەگەن جەكە باعىت جوق. ەسترادالىق اندەردە مىندەتتى تۇردە قازاقتىڭ نەمەسە امەريكانىڭ بوياۋى بولۋى كەرەك دەگەن دۇرىس ەمەس. كاسىبي مۋزىكانتتىڭ ءوز دەڭگەيىنە بايلا­نىستى تالعامى بولادى. قازاق اندەرىنىڭ بارىنە دومبىرانىڭ ءۇنى قوسىلىپ، ءمىن­دەتتى تۇردە «مۋزارتتىڭ» ستيلىندە بولۋى شارت ەمەس. مەن رەسەيگە بارعاندا تەك قازاق اندەرىن ورىنداپ جۇرگەن جوقپىن، جاستايىمنان كەڭەس اندەرىن ورىنداعان ءانشىمىن. سول ءۇشىن دە مەنى ول جاققا ءجيى شاقىرادى، مەن رەسەيگە بارعاندا قازاق اندەرىن سيرەك ايتامىن. جۇرەكتەن شىق­قان ءان قاشاندا ءوز تىڭدارمانىن تابا­دى.

- بۇگىندە كورەرمەننىڭ سۇرا­نىسى وسى ەكەن دەپ تەلەۆي­زيالىق باعدارلامالار­دىڭ كوبى شوۋعا اينالىپ كەتتى. سىزدىڭشە، كورەرمەننىڭ تالعامىن تاربيەلەۋگە بولا ما؟

- كورەرمەننىڭ تالعامىمەن ساناسپاي-اق ساحنادان دا، ەفيردەن دە نە بولسا سونى تىقپالاي بەرۋ ەتەك الىپ كەتكەنى راس. ءوز باسىم تەلەۆيزيادا ءوتىپ جاتاتىن شوۋ-باعدارلامالارعا قاتى­سۋدان باس تارتامىن، سەبەبى، بىرىنشىدەن، قولىم تيمەيدى. ەكىنشىدەن، تەلەارنالاردا ۇيىمداستىرىلىپ جاتقان دۇنيەلەرگە كۇلكىم كەلەدى. باعدارلامالاردىڭ دەڭ­گەيىن ايتپاعاندا، ويلاپ تابىلعان شوۋلاردىڭ، بايقاۋلاردىڭ شارتتارى دا كوڭىلگە قونىمسىز. وتكەندە مەنى ءبىر باعدارلاماعا ساراپشى بولۋعا شاقىردى. سول باعدارلامانىڭ قانداي ماقساتتى كوزدەيتىنىن تۇسىنە المادىم. قالاي ءومىر بويى دومبىرادا حالىق اندەرىن ورىنداپ جۇرگەن ءانشى اياقاستى ەسترادالىق ءاندى ايتادى؟ مىسالى، مەن دومبىرانى ۇستاۋ­دى دا بىلمەيمىن، قالاي ءداستۇرلى ءاندى ايتامىن؟ ءداستۇرلى ءانشى بالا كەزىنەن وسى باعىتقا بەيىمدەلگەندىكتەن، ءومىر بويى ءوز جولىمەن جۇرەدى. كەرەك دەسەڭىز، ولار­دىڭ ءتىپتى ءريتمى دە جوق. ويتكەنى ءداستۇرلى اندەردىڭ كوبى ءريتمسىز ايتىلادى. سوندا ءومىر بويى ءداستۇرلى ءاندى ناقىشىنا كەلتى­رىپ ورىنداپ جۇرگەن رامازان ستامعازيەۆ قالاي ەسترادا ءانشىسى بولا قالادى؟ ال كوشىرمە باعدارلامالاردىڭ قاپتاپ كەتۋى ءبىزدىڭ تەلەۆيزيا ماماندارىنىڭ ورەسىنىڭ تومەندىگىنەن دەپ ەسەپتەيمىن. باسقاعا ميلارى جەتپەگەندىكتەن دە دايىن جوبا­لاردى الا سالادى.

بارلىق كورەرمەننىڭ تالعامى، دەڭگەيى بىردەي جوعارى بولا بەرمەيدى. ويتكەنى ولاردىڭ ءبارى مۋزىكا ماماندارى ەمەس. مىسالى، مەنىڭ كونتسەرتىمە العاش كەلگەن كورەرمەن «روزا دەگەن كىم ەكەن، قانداي ءانشى ەكەن؟» دەپ الدىمەن قىزىق ءۇشىن كەلەدى. ەگەر كورەرمەنگە كونتسەرتىم ۇناپ جاتسا، ول ودان كەيىن دە كونتسەرتىمە تۇراقتى كەلىپ تۇرۋعا تىرىسادى. ال وعان مەنىڭ ءانىم ۇناماسا، وندا ول كورەرمەن ءوز تالعامىنا ساي، ايتالىق، قايرات نۇرتاستىڭ نەمەسە قۇدايبەرگەن بەكىشەۆ­تىڭ كونتسەرتىنە بارادى. سوندىقتان كورەرمەندە تاڭداۋ بار. دەگەنمەن ەگەر كاسىبي ونەر ادامدارى كوپ بولسا، كورەر­مەننىڭ تالعامى دا وسەر ەدى دەپ ويلاي­مىن.

- ءسىزدىڭ كاسىبي اقىن-سازگەر­لەرمەن جۇمىس ىستەيتىنىڭىزدى بىلەمىز. بۇگىندە جاستاردىڭ اراسىندا دا دارىندى اقىندار مەن سازگەرلەر توبە كورسەتىپ ءجۇر. وسىنداي جاستاردىڭ شىعارما­شى­لىعىمەن تانىسۋدىڭ ءساتى تۇسپەدى مە؟

- وزدەرىڭىزگە بەلگىلى مەن تۇمانباي مولداعاليەۆ، مۇقاعالي ماقاتەۆ، يران-عايىپ، ءشومىشباي ساريەۆ، يبراگيم يساەۆ سىندى كاسىبي اقىنداردىڭ سوزىنە جازىلعان اندەردى ورىندايمىن. سونداي-اق مەن الەكساندر بەلياكوۆ، قانات احمە­توۆ سىندى كاسىبي ديريجەرلەرمەن جۇمىس ىستەيمىن. اندەرىمدى وڭدەگەندە دە كاسىبي ماماندارمەن بىرلەسىپ وتىرىپ وڭدەيمىن. ازىرگە جاستاردىڭ اراسىندا كاسىبي دەڭ­گەيى جوعارى ماماندار از. جاس اقىن-ساز­گەرلەر ماعان وزدەرىنىڭ ولەڭدەرىن، اندەرىن وتە سيرەك اكەلەدى. سوندىقتان بۇل تۋرالى پالەندەي ەشتەڭە ايتا الماي­مىن. ارينە، ەگەر جاستاردىڭ شىعارما­لارىنىڭ اراسىندا مەنىڭ ستيلىمە، تالعامىما ساي كەلەتىندەرى بولسا، باس تارتپاس ەدىم. بىراق ازىرگە ونداي اندەر قولىما تۇسە قويمادى.

- حالىق ارتىستەرىنە مەملەكەت تاراپىنان قانداي دا ءبىر قامقورلىق قاجەت پە؟

- مەن مادەنيەت جانە اقپارات مينيسترلىگىنە قاراستى «قازاقكونتسەرت» بىرلەستىگىندەگى «قازاق اۋەندەرى» دەگەن مەكەمەنىڭ ءانشىسىمىن. مەنىڭ ايلىق تابى­سىم 70 مىڭ تەڭگەنىڭ اينالاسى. «قازاق­كونتسەرت» قانداي كونتسەرتكە قاتىس دەيدى، مەن سونى ىستەيمىن. ال «قازاقكونتسەرت» مەن ءۇشىن نە ىستەپ جاتىر دەسەڭىز، مەن ەشتەڭە دە ايتا المايمىن. بۇل مەكەمە تاراپىنان ارتىستەرگە ەشقانداي كومەك جوق. وزدەرىڭىزگە ءمالىم، مەن جىلدا «كوكتەم شاقىرادى» اتتى ۇلكەن كونتسەرت بەرەمىن. مۇنداي كونتسەرتتى رەسپۋبليكا سارايىندا وتكىزۋ ءۇشىن بارلىق شىعىن­دار­دى ساناسام، ەڭ كەمىندە 150 مىڭ اقش دوللارى كەرەك. ونداي قارجىنى ماعان كىم بەرەدى؟ ال كورەرمەن «روزانىڭ كونتسەرتى قاشان بولادى ەكەن» دەپ جىلدا كۇتەدى. مەن قازىرگى جالاقىممەن 150 مىڭ دوللاردى ءومىر بويى جۇمىس ىستەسەم دە تاپپايتىن شىعارمىن. ول ءۇشىن ونەرگە جاناشىر مەتسەناتتار بولۋى كەرەك، اكىمشىلىك تاراپىنان كومەك كەرەك.

سونداي-اق، مۋزىكا، تەاتر، كينو سە­كىل­دى ءتۇرلى سالالاردى ءوز سالالارىنىڭ قاس شەبەرلەرى باسقارعانى دۇرىس.

- ءبىر سوزىڭىزدەن ءسىزدىڭ باق وكىلدەرىنە دەگەن وكپەڭىزدىڭ بارى بايقالادى...

- قازىر ەكىنىڭ ءبىرى گازەت-جۋرنال شىعارا بەرەتىن بولدى عوي. مەن كەيدە دۇڭگىرشەكتەردەن ادەيى قازاق گازەت-جۋرنالدارىن ساتىپ الىپ وقيمىن. قاپتاعان وسەك-اياڭ. قازاق باق وكىلدەرىنىڭ اراسىندا كاسىبي جۋرناليستەر وتە سيرەك. كەيدە ءتىپتى مۇرنىنا جۋرناليستيكانىڭ ءيىسى بارمايتىندار كەلىپ، مەنەن سۇحبات الىپ وتىرادى. وندايلارعا ءسوزىمدى قور قىلماي، قۋىپ تا جىبەرگەن كەزدەرىم بول­دى. مادەنيەت، ونەر تۋرالى جازاتىن جۋرناليست ءوز سالاسى تۋرالى زەرتتەپ ءجۇرۋى ءتيىس ەمەس پە؟ ءبىزدىڭ جۋرناليستەرىمىز وركەسترلەرمەن بولاتىن ءتىرى داۋىستاعى كونتسەرتتەرگە، وپەرا جانە بالەت تەاتر­لارىنا بارمايدى. سيمفونيالىق وركەستر، ەسترادالىق-سيمفونيالىق ور­كەستر دەگەندەردى اجىراتا بىلمەيدى. وكىنىشكە قاراي، وسى ۋاقىتقا دەيىن ناعىز ونەردى ناسيحاتتاپ جۇرگەن بىلىكتى جۋرنا­ليست كەزدەستىرە المادىم. قايتا وزگەلەر «مىنا ءانشى نە ىستەپ ءجۇر ەكەن، شىعارما­شىلىعىندا قانداي جاڭالىق بولىپ جاتىر ەكەن» دەپ از دا بولسا ىزدەنەدى. جاقىندا مەن «تاليسمان» توبىمەن كون­تسەرت بەردىم، وسى كونتسەرتكە بىردە-ءبىر قازاق ءجۋرناليسى كەلگەن جوق. ال فونو­گراممامەن بولاتىن كونتسەرتتەردە جۋرناليستەر تولىپ جۇرەدى. مەن وسىدان ءبىراز ۋاقىت بۇرىن ماسكەۋدەن «جۇلدىز­دار اللەياسى» جوباسىنان ورالعانىمدا ورىس گازەت-جۋرنالدارىنىڭ جۋرناليس­تەرى ەلەپ-ەسكەرىپ، بۇل تۋرالى قىسقاشا بولسا دا اقپارات بەرىپ، شاعىن قۇتتىقتاۋ­لار جازدى. ال بىردە-ءبىر قازاق گازەت-جۋرنالدارى ءتىپتى بۇل جاڭالىقتى ەسكەر­گەن دە جوق.

- اڭگىمەڭىزگە راقمەت. شىعار­ما­شى­­لىق تابىستار تىلەيمىز!

الاشقا ايتار داتىم بار...

مەن العاش ساحناعا شىققان كەزىمدە قازاق ساحناسىندا بار بولعانى ءتورت-بەس ءانشى جۇرەتىنبىز. ولاردىڭ بارلىعى بىرنەشە حالىقارالىق بايقاۋلاردى جەڭىپ العان، قازاقستاننىڭ ونەرىن تالاي رەت دۇنيەجۇزىنە تانىتقان انشىلەر بولاتىن. حالىق وسىنداي جوعارى دەڭگەيلى انشىلەردىڭ كونتسەرتىنە جاپپاي كەلەتىن. قازىر ءبىر ساحناعا 99 ءانشى شىعادى، ولاردىڭ ءبارى - شەتىنەن جۇلدىز. سانى كوپ، ساپاسى جوق. وسىعان قاتتى قىنجىلامىن. سوندىقتان ونەرىمىز ساپاعا كوشسە ەكەن دەيمىن. ساحناعا بەس ءانشى شىقسا دا، ءجونى ءتۇزۋ، ساحنا مادەنيەتىن مەڭگەرگەن، كاسىبي ماماندىعى بار، تەك ءتىرى داۋىستا عانا ءان شىرقايتىن جۇلدىزدار بولسا ەكەن.

اينۇر سەنباەۆا

«الاش ايناسى» گازەتى