ۋكراينا تمد-دان شىعۋدى قالاسا ۇيىمنان شىعا الادى. بۇل تۋرالى ۇيىمنىڭ اتقارۋشى كوميتەتىنىڭ باسشىسى سەرگەي لەبەدەۆ مالىمدەدى. 

"ۋكراينا قازىر ۇيىم اياسىنداعى كوپتەگەن ءىس-شارالارعا قاتىسپايدى. فورۋمدارعا كەلمەيدى، بىرقاتار كەلىسىمدەردەن دە شىعىپ كەتتى", - دەدى ول. ۋكراينا قازىر تمد-دان تولىق شىققان جوق. بىرقاتار شارالارعا قاتىسۋدى دا جالعاستىرۋدا. الايدا 2013 جىلدان باستاپ جارنا تولەۋدى توقتاتقان.

"جارنا تولەمەۋ ۇيىمنان ەلدى شىعارىپ تاستاۋعا نەگىز بولادى. بىراق ءبىز ولاي ەتكىمىز كەلمەيدى. ءبىز بۇل ماسەلە بويىنشا ۇيىمعا مۇشە ەلدەرمەن سويلەستىك، ولار شىعارىپ تاستاۋدى قالامايدى", - دەدى لەبەدەۆ.

ۋكراينا بيلىگى تمد-دان تولىق شىعىپ كەتۋدى بىرنەشە مارتە كوتەرگەن بولاتىن. سول ماقساتتا ۇيىم اياسىندا قويىلعان كەلىسىمدەردەن باس تارتىپ جاتىر.

Abai.kz