انە-مىنە، دەگەنشە توكيودا ءوتىپ جاتقان جازعى وليمپيادا ويىندارى دا اياقتالادى. ەرتەڭ، 8 تامىز – وليمپيادانىڭ جابىلۋى ءراسىمى وتەدى.

قازاقستان بيىل 27 سپورت تۇرىنەن 96 وليمپيادالىق ليتسەنزيا ۇتىپ العان ەدى. ال مەدال العان 83 ەلدىڭ ىشىندە 79 ورىندا تۇرمىز. قورجىنىمىزدا 7 قولا.

قازاق سپورتىنداعى بۇل «جەڭىلىسكە» (ساتسىزدىككە) جاۋاپتى دەگەن تۇلعالاردىڭ ءبىرسىپىراسىنىڭ اتتارىن اتاپ جازدىق، كەشە.

ال الەۋمەتتىك جەلى قولدانۋشىلارى ءھام قازاق قوعامى، سپورت سالاسىنىڭ ساراپشىلارى قازاقستاننىڭ وليمپيادالىق قۇراماسىنىڭ بۇل ناتيجەسىنە كوڭىلتولماستىق ايتۋدا. قازاق جۇرتى جولىن توسقان، جۇلدە كۇتكەن جۇزگە تاياۋ سپورتشىنىڭ ەڭ ازى ءبىر-ەكەۋى التىن الۋى كەرەك-ءتى. وكىنىشكە وراي، قورجىنىمىزعا التىن تۇگىلى، كۇمىس تە تۇسپەدى. سەگىز سپورتشىمىز قولا جۇلدەمەن شەكتەلدى. راس، ءبىرىنىڭ - بابى كەلمەدى، ءبىرى - مىنەزسىزدىك كورسەتتى، ۇشىنشىسىنە - ساتتىلىك سەرىك بولماسا، ءتورتىنشىسىن - تورەشى جىعىپ بەرگەن ساتتەر كوپ بولدى. بارلىعىن وزدەرىڭىز دە كوردىڭىزدەر. حالىقتىڭ قالتاسىنان شىققان قارجىنىڭ كۇشىمەن عانا كۇن كورەتىن قازاقستان سپورتىنا ايتىلار سىن كوپ. ال كىنالى كىم؟..

قازاق سپورتىنداعى جابىق ساياسات سپورت سالاسىنداعى سىبايلاس جەمقورلىقتى ءورشىتىپ، كاسىپقوي سپورت كلۋبتارى شەندىلەردىڭ قالتاسىن قامپيتاتىن قامباعا اينالعانىن باق بۇرىننان جازىپ كەلەدى. ونى وتكەن جىلى پرەزيدەنت توقاەۆتىڭ ءوزى دە ايتتى. كاسىپقوي سپورت كلۋبتارىن بيۋدجەت ەسەبىنەن قارجىلاندىرۋدى توقتاتۋ كەرەكتىگىن ايتتى. ۇكىمەتكە تاپسىرما بەردى. ونىڭ ۇستىنە، ءبىزدىڭ ەلدە سپورت فەدەراتسيالارىن كاسىبي ماماندار ەمەس، اكىم-قارالار باسقارادى. دەمەك، كەي سپورت تۇرلەرى، كەيبىر باسشىنىڭ جەكە مەنشىگىنە اينالىپ كەتكەن دەسەك تە بولادى. قىسقاسى، قارجىسى مول قازاق سپورتىنا ۇلكەن رەفورما كەرەك.

وسى جولعى توكيو وليمپياداسىنان كەيىن بيۋدجەتتىڭ ءبۇيرىن سورىپ وتىرعان سپورت فەدەراتسيالارى مەن ۇلتتىق وليمپيادالىق كوميتەت جانە قر مادەنيەت جانە سپورت مينيسترلىگى ەلدىڭ، ەل باسشىلىعىنىڭ نازارىنا جاعىمسىز ناتيجەسىمەن ىلىنگەنى انىق. ەندەشە، وسىدان كەيىن قازاق سپورتىنىڭ كولەڭكەلى تۇسىنا ماي شامنىڭ جارىعى تۇسە مە، الدە قالىپتاسقان جۇيە ءوز دەگەنىن جاساي بەرە مە؟..

قازاقستاننىڭ سپورت سالاسىنا ايتارلىقتاي وزگەرىس كەرەكتىگىن ساياساتشىلار مەن سپورت ساراپشىلارى دا ايتىپ جاتىر. مىسالى، ساياساتكەر مۇرات ابەنوۆ: «مەنىڭ ويىم - پرەزيدەنت توقاەۆ توكيوداعى وليمپيادادان كەيىن داۋلەت تۇرلىحانوۆ سياقتى حالىق قۇرمەتتەيتىن ازامماتاردى سپورتتى باسقارۋعا قايتارۋ كەرەك. ارينە، مىنەزى بار، اناۋ-مىناۋ ساياسي ويىندارعا كونبەيدى، بىراق جۇرەگى تازا، مەملەكەتشىل تۇلعا! تەك قازاقستان ەمەس، بۇكىل الەمنىڭ سپورت سالاسى مويىنداعان تالانتتى مامان. وليگارحتار سياقتى سپورتتان اقشا تابۋ ءۇشىن ەمەس، قازاق ەلىنىڭ نامىسىن قورعايتىن باتىرىمىز»، - دەپ جازىپتى.

ال سپورت كوممەنتاتورى جاندوس ايتبايۇلى: «ءبىزدىڭ بالۋاندار مەن بوكسشىلار مادەنيەتتى، سابىرلى. كەيدە تىم مادەنيەتتى بولىپ كەتەتىن سەكىلدى. بۇل سپورت قوي. بالكىم مادەنيەت پەن سپورت مينيسترلىگىن ەكىگە ءبولۋ كەرەك شىعار»، - دەپ وي تاستايدى.

«Chinovnik_kz» تەلەگرام ارناسى  وسى جولعى وليمپيادا اياقتالعان سوڭ قر مادەنيەت جانە سپورت ءمينيسترى اقتوتى رايىمقۇلوۆا دوعارىسقا كەتەتىنىن جازىپتى. ءتىپتى، ونىڭ ورنىنا مينيسترلىكتى باسقارۋى مۇمكىن دەگەن پوتەنتسيالدى ۇمىتكەرلەردىڭ دە اتتارىن اتاعان ەكەن. سونىمەن، اقتوتى رايىمقۇلوۆا «وتستاۆكاعا» كەتسە، ونىڭ ورنىنا مادەنيەت جانە سپورت مينيسترلىگىن كىم تىزگىندەۋى مۇمكىن؟

«وليمپيادالىق قۇرامانىڭ ناتيجەلەرىنە جاۋاپتى تۇلعالاردى قىزمەتىنەن الۋ تۋرالى شەشىم توكيو وليمپياداسىنىڭ جابىلۋىنان كەيىن عانا قابىلدانادى. قازىرگى تاڭدا، قر مادەنيەت جانە سپورت ءمينيسترى لاۋازىمىنا ءۇش كانديداتۋرا قارالىپ جاتىر. ولار: ەرلان قوجاعاپانوۆ، ارىستانبەك مۇامەديۇلى جانە سەرىك ساپيەۆ»، - دەپ جازادى «Chinovnik_kz».

اقپارات ءۇشىن:

اقتوتى رايىمقۇلوۆا

جاسى – 57-دە. 2019 جىلدىڭ 17 ماۋسىمىندا قر مادەنيەت جانە سپورت ءمينيسترى بولىپ تاعايىندالعان. 2014 جىلدان باستاپ اتالعان مينيسترلىكتە قىزمەت ىستەگەن. ال 2016 جىلدان باستاپ ۆيتسە-مينيستر قىزمەتىن اتقارعان.

ۇمىتكەرلەر:

ەرلان قوجاعاپانوۆ

جاسى – 52-دە. قازىر قر مادەنيەت جانە سپورت ۆيتسە-ءمينيسترى. كەدەن قىزمەتىنىڭ پولكوۆنيگى. اتالعان سالادا ءبىراز ۋاقىت قىزمەت اتقارعان. «استانا» پرەزيدەنتتىك كاسىپقوي كلۋبىن، قازاقستاننىڭ فۋتبول فەدەراتسياسىن باسقارعان. قر پرەمەر-ءمينيسترىنىڭ كەڭەسشىسى بولعان. الماتىدا اكىمنىڭ ءبىرىنشى ورىنباسارى بولىپ ءجۇرىپ، بيىل ساۋىردە مينيستر اقتوتى رايىمقۇلوۆانىڭ قاسىنا اۋىسقان.

ارىستانبەك مۇحامەديۇلى

جاسى – 58-دە. 2014 جىلدان 2019 جىلعا دەيىن قر مادەنيەت جانە سپورت ءمينيسترى بولعان. قازىر قر ۇلتتىق مۋزەيىنىڭ ديرەكتورى.

سەرىك ساپيەۆ

جاسى – 37-دە. بوكستان وليمپيادا چەمپيونى. ءۇش مارتە الەم، ەكى مارتە ازيا چەمپيونى بولعان. بەل باركەر كۋبوگىنىڭ 2012 جىلعى يەگەرى. 2017 جىلى ماجىلىسكە دەپۋتات بولعان. ءبىر جىلدان كەيىن وتستاۆكاعا كەتىپ، قر مادەنيەت جانە سپورت مينيسترلىگىنىڭ سپورت ىستەرى كوميتەتى باسشىلىعىنا اۋىسقان.

سونىمەن، قر مادەنيەت جانە سپورت ءمينيسترى اۋىسا ما؟ اۋىساتىن جاعداي بولسا، ول قىزمەتكە كىم لايىق؟ تالقىلايىق، مارتەبەلى وقىرمان...

نۇرگەلدى ابدىعانيۇلى

Abai.kz