("اجە ارمانى" اڭگىمەسى جانە "داريعا-اي، سول قىز..." كينوستسەناريىندەگى ۇقساستىقتار جونىندە)

وقىرمان قاۋىمعا بۇل ماقالانى ۇسىنۋداعى باستى ماقسات:  ءبىر كوركەم اڭگىمە مەن ءبىر كوركەم تەلەفيلمنىڭ اراسىنداعى وقيعا سيۋجەتى مەن دەتالداردىڭۇقساستىعى سەبەپ بولىپ وتىر.
قىتايداعى بەلگىلى جاس قالامگەر تۇرىمبەك قاسەنۇلىنىڭ ء"ۇش بوزداق" اتتى اڭگىمەلەر جيناعىنداعى (ۇلتتار باسپاسى) "اجە ارمانى" اتتى اڭگىمەسىمەن رەجيسسەر سەرىك ىبىرايىم تاسپالاعان قاسىم امانجولوۆتىڭ "داريعا-اي، سول قىز" ولەڭىنىڭ جەلىسى بويىنشا تۇسىرىلگەن كوركەم ءفيلمنىڭ اراسىنداعى ۇقساستىقتار ءبىزدى وسى ويلارعا ەرىكسىز جەتەلەپ وتىر (بۇل ءفيلمنىڭ ستسەناريىن بولاتبەك بايانحانۇلى مەن قاناعات ابىلقايىر دەگەن ەكى ازامات بىرلەسىپ جازىپتى) .
"اجە ارمانىندا" - قىز كەزىندە "مارالبايدىڭ مارقاسى-اي!" دەپ اتانىپ كەتكەن ءانشى، ايتىسكەر قىز، ال كەيىن "مارقا اجە" اتانعان اجەنىڭ داۋىلپاز اقىن قاسىم امانجولوۆتىڭ "داريعا-اي، سول قىز" ءانىن راديودان ەستىپ، وتكەنىن - ءوز تاعدىرىن ەسكە الىپ، ونى نەمەرە قىزىنا ايتىپ بەرۋىنەن باستالادى.... "كەزىندە سەنىڭ ۇلى اكەڭ ارىپبايعا ءوز ەركىمنەن تىس اتاستىرىلعان ەدىم. بىراق مەن عانا ەمەس،ول تۇستاعى قىزداردىڭ ءبارى دە سول. سونداعى ماعان ارمان بولىپ قالعان نارسەنىڭ بەلگىسىن ساعان كورسەتەيىن، - دەپ، قولىمەن جەر تىرەي بۇكشەڭدەپ تۇرەگەلدى دە توردەگى جۇگىن ءبىر-بىردەن ءتۇسىرىپ، جۇك استىنداعى كونەتوز قىزىل سىرلى ساندىقتى اشىپ، بۇكتەلگەن كەستەلى ورامالدى ماعان الىپ كورسەتتى" ء("ۇش بوزداق" 22-بەت)
سونان مارقا اجە نەمەرە قىزىنا جاس كەزىندە سۇيگەن جىگىتى مانات جايلى اڭگىمەنىڭ تيەگىن اعىتادى. ماحابباتتارىنىڭ وتتان ىستىق الاۋلى شاقتارىن، شىن بەرىلگەن جۇرەكتىڭ مۇڭىن شەبەر سۋرەتتەيدى. ماناتتىڭ جىلقىشى عانا ەمەس، قىز جۇرەگىنىڭ پەرنەسىن شەرتكەن كۇيشى،تىڭداۋشىسىن تەربەتە بىلگەن ءانشى وبرازى شەبەر بەينەلەنەدى. مارقانى ساقابەكتىڭ وزبىرلىعىنان اراشالاعان مانات تۇلعاسى سومدالادى. ءاۋ باستا مارقانىڭ اكەسى "جيەنىمدى مەن قولقانات ەتىپ الايىن" دەپ ماناتتىڭ اكەسىن ماقۇلعا كوندىرەدى.ماناتتى ەلىنە الدىرادى.ونىڭ يكەمىن بايقاعان ناعاشى جيەنگە جىلقىسىن باقتىرادى.كەيىن ونىڭ جۇرەگىندە جيەنى ماناتقا دەگەن باقاستىق باس كوتەرەدى. مۇنىڭ سەبەبى،ءبىر «شىلدەحانا» تويىنان باستاپ قىز جۇرەگىنە تۇسكەن ماحاببات ۇشقىنىنان مارقا مەن مانات ورتاسىنداعى باستالعان ۇياڭ سەزىمنىڭ بىرتىندەپ مازداعان شوققا،بوگەت شاق كەلتىرمەس تاسقىنعا اينالعاندىعى ەدى...
مارقانىڭ اكەسى مۇنى سەزگەن سوڭ بۇرىنعى اتاستىرىپ قويعان قۇداسىنىڭ الدىندا ۇياتتى بولمايىن دەپ، جىلقى باعىپ جۇرگەن جيەنى ماناتتى ادەيى اسكەرلىككە تىزىمگە الدىرادى.ءسويتىپ ول، ءارى قۇدا قىسىمىنان قۇتىلسا، ءارى ءوز ۇلىن اسكەرگە الۋدىڭ الدىن العان-دى.
سول ساتتە قىز: "و،سورلى بەيباق، پەشەنەڭە نە جازىپ تۇر ەكەن مىنا تاعدىر.ەرىكسىز مەنەن ايىرىلعانىڭمەن قويماي، ەل-جۇرتىڭنان، تۋعان توپىراعىڭنان قول ءۇزىپ، قاراڭدى وشىرەتىن بولدىڭ با؟!" - دەيتىندەي كۇيدە قالادى."قايدا جۇرسەڭ امان بول، ماناتاي! ساعان ازىرلەگەن ەستەلىگىم مىناۋ، ساعىنعاندا بەتىڭدى ءسۇرتىپ ءجۇر،-دەپ ءتورت بۇكتەۋلى وسى شىتتى ۇسىنعام سوندا، وتارعا كەتەردە "مانات" دەپ ءوز اتىن سيالى قارىنداشپەن اتەي وسى شىتقا تىگەم دەپ جازدىرىپ الىپ قالعان بولاتىنمىن. سول ەسىمدى كوبەلەكتىڭ قاناتىنا وسى بويىنشا ءتۇسىردىم" (36-بەت) .
.......................
مانات سوعىستا جارالانىپ،اۋىر قينالىس ۇستىندە: "ەل-جۇرتقا سالەم ايتقايسىڭ، ناعاشىمنىڭ قىزى مارقاشقا (ۇزاتىلىپ كەتكەن بولۋ كەرەك) قايدان بولسا دا تاۋىپ مىنا ماعان بەرگەن ەستەلىك ورامالىن ءوز قولىڭمەن ەبىن تاۋىپ تابىس ەتەرسىڭ.بۇعان قان-تەرىم سىڭگەن ەدى. يىسكەپ بولسا دا ماۋقىن باسسىن. بەرمەسەڭ اقىرەتتىك موينىڭا قارىز. ارماندا كەتىپ بارامىن.... - دەپ اعىل-تەگىل جىلاعان ول، قۇتقارۋعا ۇلگىرمەي قانسىراپ جان ءۇزىپتى" (38-بەت) .
..........
"و، شىراعىم، سونى ويلاۋ، ارمان ەتىپ اڭساۋ مەنىڭ ولمەي ءتىرى جۇرۋىمە سۇيەنىش سياقتانادى. اتتەڭ قاناتىم بولسا سول قيىرداعى قالعان ماناتتىڭ قابىرىن تاۋىپ باسىنا قۇران وقىپ قايتار ما ەدىم دەپ تە كوكسەيمىن. توپىراعىڭ تورقا بولعىر جامەن مارقۇم ء"وز قولىممەن جەرلەپ،باسىنا بەلگى قىزىل تاستى قۇلىپتاس قىلىپ كەتكەن ەم، ىزدەسەم جازباي تابامىن....." دەپ وتىرۋشى ەدى. (37-بەت) .
"اجەم اڭگىمەسىن اياقتاپ، ء"ۇھ" دەپ كوكىرەگىن كەرە ءبىر كۇرسىنىپ الىپ الگى توزىعى جەتىپ، كىر باسىپ تۇرعان ورامالدى ەپتەپ بۇكتەپ ماڭدايىنا، ەكى بەتىنە كەزەك-كەزەك باسىپ، قۇشىرلانا ءبىر يسكەپ قويىپ، ورنىنان سوزىلا تۇرەگەلىپ ساندىعىنا قايتا سالىپ قويدى" - دەپ اڭگىمە اياقتالادى.

ورامال دەگەننەن تۋادى. "داريعا-اي، سول قىز" كوركەم ءفيلىمىنىڭ سيۋجەتىندە دە ۇزبەي جەلى تارتاتىن ءبىر دەتال بار دەسەك، ول ءدال وسى - كەستەلى ورامال ەدى.
ايىرماشىلىق سول،كينوداعى اجەنىڭ قاسىنداعىسى - كەلىنى بولسا، اڭگىمەدە - نەمەرە قىزى.
كينودا اجەسىن الىپ كەلىنى ۇزاق ساپارعا بارادى، كولىك - وت اربا.
- اپا، جولدى كوتەرە الماي قينالىپ قالار ما ەكەنسىز؟
- ەشتەڭە ەتپەس،بۇل ساپاردى كۇتكەلى قانشاما جىلدار بولدى.
مىنا ديالوگتە (نەمەسە كورىنىستە) سوناۋ جارىم عاسىر بۇرىنعى سوعىستا ولگەن، سۇيەگى قاھارماندار زيراتىندا قالعان سۇيگەن جىگىتىنىڭ قابىرىنىڭ باسىنا بارىپ ءبىر قۇران وقۋ ارمانىن ىسكە اسىرۋ ءۇشىن جولعا شىققان - كيەلى ساپارعا اتتانعان اجە بەينەسى بەينەلەنەدى.
كينوداعى اجە سان جىلداردان سوڭ سۇيگەن جىگىتى - بوزداعىنىڭ توپىراعىن يسكەپ،قۇران باعىشتاۋعا بارادى. ءارى بۇل ونىڭ - ۇزاق جىلدار بويى جۇرەگىن كەمىرىپ جەپ كەلگەن ءبىر ارمانى .

"اجە ارمانىندا" - مارقا اجە، "اتتەڭ قاناتىم بولسا سول قيىرداعى قالعان ماناتتىڭ قابىرىن تاۋىپ باسىنا قۇران وقىپ قايتار ما ەدىم" دەپ كوكسەيدى.

كينودا: جىگىت سوعىسقا اتتانار تۇستا كەستەلى ورامال سىيلايدى:
- قورقام...........
- ءالى-اق جەڭىس تويى مەن ەكەۋمىزدىڭ ۇيلەنۋ تويىمىزدى بىرگە وتكىزەتىن بولامىز.
بۇل كينوداعى جىگىت پەن قىزدىڭ ديالوگى.
اڭگىمەدە جىگىتتىڭ سوعىستاعى جاعىدايى جازىلمايدى. كينودا ايىرىم كورىنىس رەتىندە قاراستىرادى.اڭگىمەدەگى مارقانىڭ نامىسىن تاپتاماق بولعان ساقابەك سىندى وبرىز كينوفيلمدە كالحوز مانساپتىسى رەتىندە كورىنەدى. ول قىزدىڭ سوعىسقا اتتانعان جىگىتىنە دەگەن شىنايى سۇيىسپەنشىلىكتەن تۋعان سەزىمىن كورسە-اق قورلانىپ، ارتىندا قالعان جىگىتتىڭ كەرقۇلاسىن باسى-كوزگە سابايدى...
كوركەم فيلمدە جىگىتتىڭ جاۋىنگەر سەرىگى سوعىستان كەلىپ:
- ءسىز داريعاسىز عوي...
- .......................
- مەن امانات ارقالاپ جۇرگەن اداممىن،- دەپ قىزعا كەستەلى ورامالدى تابىستايدى.
كينوداعى اجە كەلىنىن ەرتىپ سۇيگەن جىگىتىنىڭ باسىنا قۇران وقىپ قايتقانىمەن كينو اياقتالادى.

ال كينوداعى اجەنىڭ جاس كەزىندەگى قىزىققا تولى كۇندەرى جارىستىرا بايانداۋ ارقىلى قىسقا ۋاقىتتىڭ ىشىندە جۇگىرتپە كورىنىستەر ارقىلى عانا كورىنىس تابادى.ەندى ءبىز "اجە ارمانى" اڭگىمەسىنىڭ اۆتورىنىڭ وزىنە ءسوز كەزەگىن بەرەلىك.

تۇرىمبەك قاسەنۇلى:

سىزدەرگە تۇسىنىكتى بولۋ ءۇشىن الدىمەن بۇل اڭگىمەنىڭ قالاي تۋعانىن ەسكەرتە كەتەيىن. مەن وقۋ بىتىرگەن العاش جىلدارى (1997-2004-جىلعا دەيىن) تەكەس اۋداندىق قارادالا اۋىلىندا وقۋ-اعارتۋ سالاسىندا قىزمەت ىستەدىم. بۇل جىلدارى نەگىزگى ساتىدا قىزمەت وتەپ، حالىق ىشىندە بولدىم. كوپتى كورگەن قازىلى قاريالارمەن سىرلاس بولدىم. وندا ۇشقۇشتاي دەگەن جەردە تۇراتىن كەزىندە ءۇش ايماق توڭكەرىسىنە قاتىناسىپ، جارالى بولىپ قايتقان ساقا جاۋىنگەر قۇيقالاق دەگەن قارت بولعان ەدى. ول كىسى جاسىندا ولەڭشى، قارتايعاندا باتاگوي، اڭگىمەشىل اقساقال بولدى. ءبىر جولى وسى ادام اڭگىمەسىندە: "مەن قولى قىسقا جاي شارۋانىڭ بالاسى ەدىم. اسكەرگە بالا العاندا ءبىر باي تۋىسقاننىڭ بالاسىنىڭ ورنىنا كەتىپ قالدىم. بايلار پارا بەرىپ بالالارىن اسكەرلىككە جىبەرمەي الىپ قالىپ وتىردى. اسكەرگە كوبىنەسە جارلىنىڭ بالالارى باردى. جاس كەزىمىزدە كىشى قۇشتايدا كورشىلەس وتىرعان قۇرمان اۋىلىنا بارىپ، قۇداشا قىزدارمەن ايتىسۋشى ەدىك. كەيىن اسكەردەن قايتىپ كەلسەم، سولاردىڭ ءبارى ۇزاتىلىپ كەتىپتى" دەپ اڭگىمەلەيتىن. سودان بەيىمبەتتىڭ "شۇعاسىنا" ەلىكتەپ ماحاببات تاقىرىبىندا ءبىر اڭگىمە جازعىم كەلدى.2000-جىلدىڭ كوكتەمىندە ءۇش-ءتورت كۇن وتىرىپ، بۇل شىعارمانى جازىپ شىقتىم. اتىن «اجە ارمانى» دەپ قويدىم. قاسىمنىڭ اندەرىن ۇناتۋشى ەدىم.سوندىقتان اڭگىمەنىڭ باسىندا "داريعا، سول قىز.."- دىڭ ءبىر شۋماق تەكسىن كىرگىزدىم. العاشقى وقىرمانىم جاتاقتاسىم توقتار دەگەن بالا بولدى(مال دارىگەرلىك پۇنكىتىنىڭ كۇزەتشىسى ەدى). ودان كەيىنگى وقىرمانىم - ادەبيەتكە جانى قۇشتار سىمايىل بەيسەنبەكۇلى دەگەن ازامات ەدى. ول كەزدە كومپيۋتەردە جازۋدى بىلمەيمىز. قولجازبا كۇيىندە "ىلە ايدىنعا" جولدادىم. سودان جارىم جىل جاتىپ، زارىقتىرىپ جىل سوڭىندا جارىق كوردى. رەداكتسيياسىن نىعىمەت قامىزايۇلى دەگەن اقىن اعامىز قاراپتى. بۇل مەنىڭ باسىلىمداعى ەڭ العاشقى جارىق كورگەن شىعارمام ەدى. قاتتى قۋاندىم. ول كەزدە "ىلە ايدىنى" جۋرنالىنىڭ تارالىمى جاقسى ەدى. اۋىلداعى جۇمىسشى-قىزمەتشى، وقىتۋشى، قىستاق كادرلارىنا دەيىن جازىلاتىن. بۇل اڭگىمە شىعا سالا ەلدى ەلەڭ ەتكىزدى.جاقسى پىكىر قالىپتاستى.كوپتەگەن ۇلكەن كىسىلەر "اڭگىمەدەگى مارقا مەن مانات كىمدەر ەدى؟" دەپ سۇراپ كەلگەندەرى دە بولدى.
2007-جىلى شىلدەدە قازاقستانعا بارعاندا، بۇل اڭگىمەنىڭ كوشىرمە نۇسقاسىن توتە جازۋدى تانيتىن جۋرناليست تۋىسقانىم باعداگۇل كوككوزوۆاعا بەردىم. ول كەيىن كيريلل جازۋىندا كوشىرىپ باسىلىمدارعا بەرگەنىن ايتتى. 2008-جىلى ءوزىمىزدىڭ «پاراسات» سايتىنا شىعاردىم. 2009-جىلى 1-ايدىڭ سوڭىندا قازاقستانعا ەكىنشى رەت بارعاندا «جۇلدىز» جۋرنالىنا ءوز قولىممەن اپارىپ بەردىم. شىققان-شىقپاعانىنان حابارسىزبىن. 2009-جىلى كۇزدە قازاقستاندا تۇراتىن جيەنىم ارقىلى ءبىر توپ اڭگىمەلەرمەن قوسا الماتىدا ء"ىنجۋ-مارجان" باسپاسىنىڭ ديرەكتورى تولەۋقان مىرزاعا ء(تۇپ ناعاشىمىز ەدى) تابىس ەتتىم. بۇل اڭگىمەنى كەيىن ەلىمىزدەگى كۇلتەگىن، ەلارىس قاتارلى ادەبي سۇحباتتارعا شىعاردىم. 2011-جىلى ۇلتتار باسپاسىنان ء"ۇش بوزداق" اتتى اڭگىمە-پوۆەستەر جيناعىما ەندى.
ال جاقىندا 2011-جىلعى جاسالعان "داريعا-اي، سول قىز..." اتتى كوركەم ءفيلمدى كورىپ تاڭعاجايىپ كۇي كەشتىم. ۋاقيعا جەلىسى ءبىر-بىرىنەن اۋماي تۇر. قانشا ەن-تاڭباسىن وزگەرتسە دە، جوعالتقان مالدى يەسى كورگەن جەردەن تاني قوياتىن ادەت بار عوي. بۇل ماسەلە قازىر وقىرمانداردىڭ نازارىنا دا ىلىگىپتى. قازاقستانداعى تانىستارىمنان سۇراسام،ستسەناريي اۆتورىنىڭ بىرەۋى بولاتبەك بايانحانۇلى دەگەن جىگىتتىڭ ءبىزدىڭ جاقتان بارعان ورالمان ەكەنىن ايتتى. بۇل كينو قاسىم امانجولوۆتىڭ «داريعا، سول قىز...» ءانى نەگىزىندە جاسالدى دەپ تۇسىنىك بەرىپتى ول. قاسىمنىڭ بۇل ءانى ليركالىق ولەڭنەن انگە اينالعان تۋىندى ەمەس پە ەدى. وندا فيلمدەگى نەگىزگى ۋاقيعا جەلىسى قالاي پايدا بولدى؟ مۇنداعى ۇقساستىقتاردى سۇحباتتاعى توردوستار (پىكىر بىلدىرۋشىلەر) ايتقان ەكەن. سول ءۇشىن توقتالمادىم. بابالارىمىزدىڭ "تاس - تارازى، ءتاڭىر-قازى" دەگەن ناقىلى بار عوي. ەگەر، مەنەن بۇرىن باسقا بىرەۋدىڭ وسى نەگىزدە جازىلعان شىعارماسى بولسا، وكپەم جوق. بالكىم، جاسامپازدىق جولىندا ورتاق تۇيسىككە يە بولعان بولارمىز دەپ تە ويلايمىن ؟..

بۇل كوركەم اڭگىمەمەن كوركەم كينوفيلم باسقا دا كوپتەگەن تaراپتاستاردىڭ نازارىن وزىنە اۋدارعان. مىناۋ جۇڭگو-قازاق سايىتتارىندا باسقارۋشى بولىپ جۇرگەن كەنجەقارا اتتى اسابانىڭ كوزقاراسى:

ء"بىرىنشى،تۇرىمبەك قاسەنۇلىنىڭ اڭگىمەسىندە داۋىلپاز اقىننىڭ "داريعا، سول قىز" ءانى تىلگە تيەك ەتىلىپ، ۋاقيعانىڭ باستالۋىنا وسى ءاننىڭ تەكىسى سەبەپشى بولادى. ال ءفيلمنىڭ باستى تاقىرىبىنا دا - قاسىمنىڭ وسى ءانى ارقاۋ ەتىلگەن.ەكىنشى، اڭگىمەدە ۋاقيعانىڭ باستالۋى مارقا اجەمەن نەمەرە قىزى قۇندىز ورتاسىندا بولسا،فيلمدە داريعا اجەمەن كەلىنى ەكەۋىنىڭ ساپار ۇستىندە ايتىلعان اڭگىمە،ەستەلىكتەرى ارقىلى ءوربيدى.ءۇشىنشى، اڭگىمەدە باس كەيىپكەر مارقا مەن ماناتتىڭ ماحاببات حيكاياسى بولىپ،مارقا عاشىعى ماناتقا كەستەلى ورامال سىيلاسا،فيلىمدە دە سونداي، داريعا دا عاشىعىنا كەستەلى ورامال ۇسىنادى.ءتورتىنشى، اڭگىمەدە مانات ءۇش ايماق سوعىسىنىڭ اسكەرىنە قابىلدانسا، فيلمدە داريعانىڭ سۇيگەن جىگىتى وتان قورعاۋ سوعىسىنا اتتانادى.بەسىنشى، اڭگىمەدە مارقا سۇيگەن جىگىتىن اسكەرگە ۇزاتقاندا،مانات ات ۇستىندە قوشتاسسا،فيلمدە داريعانىڭ سۇيگەن جىگىتى پويىز ۇستىندە قوش ايتىسىپ قالا بەرەدى.التىنشى، اڭگىمەدە مارقا سۇيگەن جىگىتى مانات اسكەرگە كەتىپ قالعاندا، اتا-اناسى ونى ىقتيارسىز قۇدالاسقان جەرى ارىپبايعا ۇزاتسا، فيلمدە داريعانى سوعىستان قايتىپ كەلگەن مۇگەدەك بريگادىر تالىپكە ەرىكسىز ۇيلەندىرەدى.جەتىنشى، اڭگىمەدە مارقانىڭ عاشىعى مانات ءور التايدا باندىلارمەن بولعان ءبىر شايقاستا جارالانىپ قازا تاپسا، فيلمدەگى داريعانىڭ سۇيگەن جىگىتى وتان سوعىسى كەزىندە ورىس دالاسىندا جارالانىپ قۇربان بولادى.سەگىزىنشى، اڭگىمەدە مارقانىڭ عاشىعى مانات كوز جۇمار الدىندا عاشىعىنىڭ كەستەلى ورامالىن جولداسى جامەنگە امانات ەتسە، فيلمدە داريعانىڭ سۇيگەن جىگىتى دە عاشىعىنىڭ كەستەلى ورمالىن جولداسى ارقىلى امانات ەتىپ قالدىرادى(تەك ۇقسامايتىنى-ورمالمەن قوسا قىز بەن جىگىتتىڭ بىرگە تۇسكەن سۋرەتى بار).ەڭ سوڭىندا كەستەلى ورمالدار سول امانات بويىنشا يەلەرىن تابادى.
ال ۇقسامايتىن جەرى: اڭگىمەدە مارقا اجە ماناتتىڭ قابىرىنا بارا الماعاندىعىنا وكىنىپ ارمان قىلسا، فيلمدە داريعا اجە جاسىنىڭ ەگدە تارتقانىنا قاراماي ورىس جەرىنە كەلىنىمەن بىرگە بارىپ، سۇيگەن جىگىتىنىڭ قابىر باسىنا بارعانى ايتىلادى.
قىسقاسى، وسى ەكى ەلدە جازىلعان اڭگىمە مەن ءفيلىمنىڭ كەيىپكەر اتتارى مەن ورىن، ۋاقىتى،سونداي-اق ءىشىنارا قوسالقى ۋاقيعالار ۇقساماعانمەن شىعارمانىڭ كوتەرگەن تاقىرىبى، مازمۇنى، ۋاقيعا جۇلگەسى (سيۋجەتى) نەگىزىنەن ۇقساس". بۇل قانداي كەزدەيسوق سايكەستىك بولىپ تۇر؟.. قاسىم اعامىزدىڭ مەرەيتويى قارساڭىندا مۇنداي ءفيلمنىڭ جارىق كورۋى، ارينە، قۋانتادى.بىراق وسى كەزدەيسوق ۇقساستىق كوڭىلگە كۇدىك تە ۇيالاتپاي قويمايدى...

قۇرمەتتى وقىرمان قاۋىم! سوندا «داريعا-اي سول قىزدىڭ» كينو ستسەناريى شىندىعىندا قايسى اڭگىمەنى ارقاۋ ەتىپ جازىلعان؟
نۇربەك تالەنۇلى قحر،ىلە وبلىسى،كۇنەس اۋداندىق قازاق ورتا مەكتەبى.

«اباي-اقپارات»