مەملەكەتتىڭ ەڭ قىمبات قازىناسى – ادام جانە ادامنىڭ ءومىرى، قۇقىقتارى مەن بوستاندىقتارى. زايىرلى ەلىمىزدە ادام قۇقىعى زاڭمەن قورعالىپ، ونىڭ ومىرىنە قولسۇعۋشىلىققا جول بەرىلمەيدى. مەملەكەت باسشىسى ق.توقاەۆ جىل سايىنعى جولداۋىندا وسىعان ەرەكشە ءمان بەرىپ كەلەدى. بيىلعى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى جولداۋىندا دا ساياسي جاڭعىرۋ مەن ادام قۇقىعىن قورعاۋعا ەرەكشە باسىمدىق بەردى.

پرەزيدەنت ساياسي رەفورمالاردى وزگەرتىپ، «حالىق ۇنىنە قۇلاق اساتىن مەملەكەت» تۇجىرىمداماسى بويىنشا جۇيەلى جۇمىس جۇرگىزگەلى بەرى ەلەۋلى وزگەرىستەر ورىن الۋدا. اتاپ ايتار بولساق، ميتينگ وتكىزۋ ءۇشىن الدىن-الا ەسكەرتۋ قاعيداتى جازىلعان جاڭا زاڭ قابىلداندى، پارتيالاردىڭ ماجىلىسكە ءوتۋ شەگى 5 پايىزعا دەيىن تومەندەدى، سايلاۋ بيۋللەتەندەرىنە «بارىنە قارسىمىن» دەگەن باعان قوسىلدى. ونىڭ قاتارىندا اۋىل اكىمدەرىن سايلاۋ دا بار. بۇل ماڭىزدى قادام بولىپ، سونىڭ ناتيجەسىندە اۋىل حالقىنىڭ، ياعني قازاقستاندىقتاردىڭ 40 پايىزدان استامىنىڭ مۇددەسىنە تىكەلەي ىقپال ەتپەك. ەندىگى جەردە اتالعان جۇيە جالعاسىن تاۋىپ، 2024 جىلدان باستاپ اۋدان اكىمىن جەرگىلىكتى حالىق سايلاپ الاتىن بولادى.

بۇل تۋرالى: «مەملەكەتتىلىگىمىزدى نىعايتا ءتۇسۋ ءۇشىن بارلىق وزگەرىستى ەلىمىزدىڭ وزىنە ءتان ەرەكشەلىگىن ەسكەرە وتىرىپ، بىرتىندەپ جۇزەگە اسىرامىز. بۇل – مىقتى، ءادىل ءارى وزىق مەملەكەت قۇرۋدىڭ بىردەن-ءبىر دۇرىس جولى. ازاماتتارىمىز بۇل ۇستانىمدى قولداپ وتىر»، - دەيدى مەملەكەت باسشىسى.

مەملەكەت باسشىسى قاسىم-جومارت توقاەۆ: «مەن ادام قۇقىعىن قورعاۋ سالاسىن ءاردايىم جەكە-دارا ءبولىپ قارايتىنىمدى بىلەسىزدەر. ءبىز سوڭعى ەكى جىلدا بۇل باعىتتا ەداۋىر ىلگەرى باستىق»، - دەپ اتاپ، قۇقىق قورعاۋ جۇيەسىندەگى ەلەۋلى وزگەرىستەرگە توقتالدى. ەڭ الدىمەن، بيىل قاڭتار ايىندا ءولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى ەكىنشى فاكۋلتاتيۆتىك حاتتامانى راتيفيكاتسيالاۋ تۋرالى زاڭعا قول قويعانىن، ەندى قىلمىستىق كودەكستىڭ نورمالارىن ەكىنشى فاكۋلتاتيۆتىك حاتتامانىڭ ەرەجەلەرىمەن ۇيلەستىرۋ كەرەكتىگىن العا تارتتى. بۇعان قاتىستى ءتيىستى زاڭ جىلدىڭ سوڭىنا دەيىن قابىلدانباقشى.

ال جاقىندا ادام قۇقىعىن قورعاۋ جونىندەگى كەشەندى جوسپار بەكىتىلىپ، وندا گەندەرلىك تەڭدىكتى قامتاماسىز ەتۋگە باسىمدىق بەرىلگەن. ودان بولەك، سوت قىزمەتىنىڭ زاماناۋي ۇلگىسى ەنگىزىلىپ، ارتىق سوت ۇدەرىستەرى قىسقارتىلۋدا. وعان قوسا، بالالارعا، ونىڭ ىشىندە اتا-انا قامقورلىعىنسىز قالعان بالالارعا قارسى جىنىستىق قىلمىستىڭ الدىن الۋ، وسكەلەڭ ۇرپاقتى ەسىرتكى زاتتارىنان ساقتاۋ، سىبايلاستىققا جول بەرمەۋ، ادۆوكاتتاردىڭ قۇقىعىن قورعاۋعا قاتىستى پارمەندى تاپسىرمالاردى جۇكتەدى. سول ارقىلى ادامدار قۇقىعى قورعالىپ، قاۋىپسىزدىك قامتاماسىز ەتىلمەك.

جالپى، ساياسي رەفورمالارعا ەلەۋلى وزگەرىستەر ەنگىزۋ حالىقتى مەملەكەت باسقارۋ ىسىنە بارىنشا تارتۋعا وڭ ىقپال ەتسە، ادام قۇقىقتارىن قورعاۋ سالاسىن جەتىلدىرۋ قاۋىپسىز قوعام قالىپتاستىرۋدىڭ العىشارتى بولماق.

ساقبەكوۆا ادەمى، ساياساتتانۋشى

Abai.kz