بالانىڭ باقىتى اتا-اناسىنىڭ ماحابباتىنا تويعانى. بالا وتباسىن بۇزىلماس قورعانىنداي كورەدى. «باقىتتى وتباسى» دەگەندە ونىڭ كوز الدىنا اكە-شەشەسىنىڭ ەركەلەتكەنى، بوتام دەپ باۋىرىنا باسقانى كەلەدى. الايدا، «باقىتتى وتباسى» روليگىنىڭ ايتپاعى باسقا.

ەلىمىزدە ۋشىققان ماسەلەنىڭ ءبىرى – بالاعا اليمەنت تولەۋدەن جالتارۋ. 2021 جىلدىڭ 1 مامىرىنداعى ستاتيستيكا بويىنشا اليمەنت تولەمەي جۇرگەندەر سانى 220 785 ادامعا جەتكەن. ونىڭ 97% ەر ادامدار ەكەن.

ءبىر شاڭىراق استىندا ءومىر سۇرۋگە بەل بۋىپ، ومىرگە ءسابي اكەلگەن ءار وتباسى بالا الدىندا ۇلكەن جاۋاپكەرشىلىك ارقالايدى. وكىنىشكە قاراي، ەلىمىزدە ءار ءۇشىنشى وتباسى اجىراسىپ تىنادى. اكە-شەشەسى ەكى جاققا كەتكەن بالا كوبىنە اناسىمەن قالادى. ال، اكەسى اليمەنت تولەۋ مىندەتىن موينىنا الادى. بالا اكەسىمەن قالعان جاعدايدا، اناسى اليمەنت تولەۋى ءتيىس.

«اليمەنت تولەۋدەن جالتارۋشى جاق» كوبىنە اليمەنت تولەمەۋ ءۇشىن كاسىبىن تۋىستارىنىڭ اتىنا جازدىرىپ، كىرىسىن جاسىرادى ءارى بالا ومىرىنە مۇلدە ارالاسپايدى.

زاڭ بويىنشا اليمەنت تولەۋدەن جالتارعاندارعا ءار ءتۇرلى قاتال شارالار قولدانىلادى. شەتەلگە شىعۋ قۇقىعىنان ايىرىلادى، دۇنيە-مۇلكى مەن شوتتارى بۇعاتتالادى، كولىك جۇرگىزۋ قۇقىعى دا شەكتەلەدى. ەڭ قاتتى دەگەنى قازاقستان رەسپۋبليكاسى قىلمىستىق كودەكسىنىڭ 139-بابىنا سايكەس، سوت 600 ساعاتقا قوعامدىق جۇمىسقا، ەكى جىلعا باس بوستاندىعىنان ايىرۋعا جازا تاعايىندالۋى مۇمكىن.

Abai.kz