ەلباسىنىڭ «تاۋەلسىزدىك تاعىلىمى» اتتى ماقالاسىن وقىپ وتىرىپ، ەڭ الدىمەن قازاق ءتىلىنىڭ ۇلىلىعىنا، سوزدىك قورىنىڭ بايلىعىنا، قۋاتى مەن قارىمىنا سۇيسىنەسىڭ. تۇڭعىش پرەزيدەنتىمىز ماقالاسىنىڭ ونە-بويى ونەگەلى، ۇلاعاتتى، قاناتتى سوزدەرگە تولى. «ىنتىماعى جاراسقان ەلدىڭ تابىسى تاسىپ، ابىرويى اسادى. بەرەكەسى قاشقان ەلدىڭ قۋاتى كەمىپ، قۇتى قاشادى» دەيدى ن.نازارباەۆ.

«ارعىدا ساق، عۇن بابالارىمىز، بەرىدە قاھارمان تۇرىك اتالارىمىز الاساپىران زاماندارداعى الاقۇيىن داۋىلدارعا توتەپ بەرىپ، ۇلى دالادا ۇلىق ۇلىس قۇردى. تالاي جۇرت الاپات سوعىستار مەن ارپالىسقان ايقاستاردا ۇدەرە كوشىپ، بورداي توزىپ، تاستاي ۇگىلىپ، قۇمداي شايىلىپ كەتكەن زامانداردا قازاقتار تۇرىك جۇرتىنىڭ اتا قونىسىن، قارا شاڭىراعىن ساقتاپ قالدى» دەپ تولعايدى ەلباسى.

«مەن بويىمداعى قۋات، قىزمەتىمدەگى تاجىريبە، ويىمداعى ءنار – ءبارى-ءبارىن حالقىما قىزمەت ەتۋگە جۇمساپ كەلەمىن» دەيدى ول. «ەڭبەك ەت، وتباسىڭدى اسىرا، ەلىڭە قىزمەت قىل: ءوزىڭ دە تابىستى بولاسىڭ، وتانىڭنىڭ دا قۋاتى ارتادى» دەپ جاستارعا ۇندەۋ جاسادى نۇرسۇلتان نازارباەۆ.

«تاۋەلسىزدىك تە باقىت سياقتى، باعالاعان ادامنىڭ، ايالاعان قوعامنىڭ قولىنا تۇراقتايدى» دەپ حالقىنا وسيەت ەتەدى ەلباسى. ەستىر قۇلاق، تۇسىنەر سانا ءۇشىن ناعىز اتالى سوزدەر.

وسى ءبىر ماقالادا قازاق ەلىنىڭ ازاتتىق جولىنداعى كۇرەسى، تاۋەلسىزدىكتىڭ وتىز جىلىنداعى جەڭىستەرى مەن جەتىستىكتەرى، ماڭگىلىك ەل قۇرۋ جولىنداعى بولاشاق مىندەت-مۇراتتارىمىز كورىنىس تاپقان.

مەملەكەتتىلىگىن جاڭادان قۇرعان قازاق ەلىنىڭ باعى بارىن مويىنداۋىمىز كەرەك. ونىڭ تۇڭعىش پرەزيدەنتى – حالقىمىزدىڭ رۋحاني قۇندىلىقتارىن بويىنا سىڭىرگەن، ۇلتىمىزدىڭ ىزگى قاسيەتتەرى دارىعان ۇلى دالانىڭ ءتول ۇلانى. ول «ۇلكەننەن اقىل توس، كىشىدەن ىزەت كۇت، اداسقانعا – جول، كەمتارعا – قول، سۇرىنگەنگە – سۇيەۋ، دەمىككەنگە دەمەۋ بول» دەيتىن قازاقى تاربيەمەن ءوستى، ءىس-ارەكەتىندە سونى باسشىلىققا الدى. تاۋقىمەتتى سونشاما كوپ تارتقان تاعدىرى ايانىشتى حالقىنا قالقان، جان دۇنيەسى دارحان بولىپ قالىپتاستى. ەگەر باسقاشا، بىلىكسىز كوشباسشى بولعاندا، بۇگىن قازاق ەڭسەسىن تىكتەي الماي، ءتىپتى ازاتتىعىنا قايتا زار بولىپ وتىرۋى مۇمكىن ەدى.

مەنى تاعى ءبىر جايت سۇيسىندىرەدى. الەمدەگى ءتۇرلى مەملەكەتتە بيلىكتى باسقاعا بەرمەۋ ءۇشىن وعان كەنەدەي جابىسىپ، كورشىلەرىنە دە، ءوز حالقىنا دا قيساپسىز قىساستىق جاساپ، لاڭ سالعان بيلەۋشىلەر بار. ال نۇرسۇلتان ءابىشۇلى قازاققا ءتان دانالىق، كورەگەندىك پەن قاناعاتشىلدىق تانىتتى.

«وسىدان ەكى جارىم جىل بۇرىن ەلىمىزدە پرەزيدەنتتىك بيلىك اۋىستى. ماعان: «اتا زاڭىمىزدا سىزگە ەشقانداي شەكتەۋ جوق. سوڭعى سايلاۋدا حالىقتىڭ 98%-عا جۋىعىنىڭ قولداۋىنا يە بولدىڭىز. قىزمەتىڭىزدى اتقارا بەرىڭىز» دەۋشىلەر از بولعان جوق. بىراق ءار نارسە ءوز رەتىمەن بولۋى كەرەك»، – دەيدى ن.نازارباەۆ.

بۇگىن ەلباسىمىز كەزەكتى رەت ەلدىكتىڭ باستى قاعيداتىن تۇجىرىمداپ بەردى: «پرەزيدەنت اۋىسادى، بىراق تاۋەلسىزدىك ماڭگىلىك بولۋى كەرەك!».

قازاقستاننىڭ ءاربىر ازاماتى الداعى ۋاقىتتا ونىڭ تۇعىرىن بەكەمدەپ، مەرەيىن تاسىتىپ، ابىرويىن اسىرۋعا قىزمەت ەتۋگە ءتيىس. ماڭگىلىك ەل يدەياسىنىڭ تۇپكى ماقساتى دا وسىندا.

باقىتبەك سماعۇل،

Nur Otan فراكتسياسىنىڭ مۇشەسى، ءماجىلىس دەپۋتاتى

Abai.kz