ءبىر باسىلىمعا بەرگەن سۇحباتىندا ۇلكەن جازۋشىلارىمىزدىڭ ءبىرى: «قازاقادەبيەتىنىڭ التىن عاسىرى ەندى تۋمايدى»، - دەپ قىنجىلدى. ءبىراز وتكەسىن بەكسۇلتان نۇرجەكەۇلى:بۇلاي دەپ كەسىپ ايتۋدىڭ استارىندا «ءبىز قازاق ادەبيەتىن جاسادىق، بيىككە كوتەردىك، بىزدەن كەيىن جازۋشى تۋمايدى» دەگەن ۇعىم جاتقان سەكىلدى. مەنىڭ مۇنداي سوزدەن دەنەم تىتىركەنەدى. جاستار اعا بۋىن مەن الەم ادەبيەتىن تەرەڭ مەڭگەرىپ، قازاقتىڭ شۇرايلى ءتىلىن يگەرىپ، بالكىم، بىزدەن ارتىق دۇنيە جازاتىن شىعار؟!» دەپ جۇباتقانداي بولدى. كوپ وتپەي مەرەكە قۇلكەنوۆ سۇحبات بەرىپ: «قازاق ادەبيەتىندە توقىراۋ بار» دەپ ماڭدايدان ۇرعانداي تاعى تارس ەتكىزدى. ادەبيەتكە كوڭىل تولماۋشىلىقتان وسىنداي اڭگىمەلەر ءار-ءار جەردە ايتىلىپ قالىپ ءجۇر. دۋلات يسابەكوۆتىڭ دە «جاس جازۋشى اسقار التايدىڭ...» دەگەنىن وقىپ، ويپىرىم-اي دەدىك. ارينە، ءوزىنىڭ وكشە باسار ءىنىسى رەتىندە اسقار التاي دۋلات اعامىزدىڭ كوزقاراسىندا جاس. جالعىز دۋلات يسابەكوۆ ەمەس، اعا بۋىن وكىلدەرىنىڭ كوپشىلىگىنەن كەيىنگى پروزا وكىلدەرى تۋرالى سۇراعاندا، اسقار التاي مەن نۇرعالي ورازدى اتايتىنىن بايقايمىز. ولاردىڭ ءوزى ەلۋدىڭ ەسىگىن اشتى. ۇلكەندەرگە جاس كورىنگەنىمەن، ولار ورتا بۋىنعا ويىستى، مويىنداۋىمىز كەرەك. ويتكەنى، جوعارىداعى جازۋشىلاردىڭ سوڭىندا «وزدەرىنشە جازىپ-سىزىپ جۇرگەن» بەيبىت سارىباي، دارحان بەيسەنبەكۇلى، ماقسات مالىك سىندى جيىرما بەس-وتىزدىڭ اراسىنداعى جىگىتتەر بار.

ءبىر باسىلىمعا بەرگەن سۇحباتىندا ۇلكەن جازۋشىلارىمىزدىڭ ءبىرى: «قازاقادەبيەتىنىڭ التىن عاسىرى ەندى تۋمايدى»، - دەپ قىنجىلدى. ءبىراز وتكەسىن بەكسۇلتان نۇرجەكەۇلى:بۇلاي دەپ كەسىپ ايتۋدىڭ استارىندا «ءبىز قازاق ادەبيەتىن جاسادىق، بيىككە كوتەردىك، بىزدەن كەيىن جازۋشى تۋمايدى» دەگەن ۇعىم جاتقان سەكىلدى. مەنىڭ مۇنداي سوزدەن دەنەم تىتىركەنەدى. جاستار اعا بۋىن مەن الەم ادەبيەتىن تەرەڭ مەڭگەرىپ، قازاقتىڭ شۇرايلى ءتىلىن يگەرىپ، بالكىم، بىزدەن ارتىق دۇنيە جازاتىن شىعار؟!» دەپ جۇباتقانداي بولدى. كوپ وتپەي مەرەكە قۇلكەنوۆ سۇحبات بەرىپ: «قازاق ادەبيەتىندە توقىراۋ بار» دەپ ماڭدايدان ۇرعانداي تاعى تارس ەتكىزدى. ادەبيەتكە كوڭىل تولماۋشىلىقتان وسىنداي اڭگىمەلەر ءار-ءار جەردە ايتىلىپ قالىپ ءجۇر. دۋلات يسابەكوۆتىڭ دە «جاس جازۋشى اسقار التايدىڭ...» دەگەنىن وقىپ، ويپىرىم-اي دەدىك. ارينە، ءوزىنىڭ وكشە باسار ءىنىسى رەتىندە اسقار التاي دۋلات اعامىزدىڭ كوزقاراسىندا جاس. جالعىز دۋلات يسابەكوۆ ەمەس، اعا بۋىن وكىلدەرىنىڭ كوپشىلىگىنەن كەيىنگى پروزا وكىلدەرى تۋرالى سۇراعاندا، اسقار التاي مەن نۇرعالي ورازدى اتايتىنىن بايقايمىز. ولاردىڭ ءوزى ەلۋدىڭ ەسىگىن اشتى. ۇلكەندەرگە جاس كورىنگەنىمەن، ولار ورتا بۋىنعا ويىستى، مويىنداۋىمىز كەرەك. ويتكەنى، جوعارىداعى جازۋشىلاردىڭ سوڭىندا «وزدەرىنشە جازىپ-سىزىپ جۇرگەن» بەيبىت سارىباي، دارحان بەيسەنبەكۇلى، ماقسات مالىك سىندى جيىرما بەس-وتىزدىڭ اراسىنداعى جىگىتتەر بار. اسقار التاي مەن نۇرعالي ورازدى اعا بۋىننىڭ جاس جازۋشى دەپ جۇرگەنى جاڭادان قالام تارتىپ جۇرگەن جاستاردىڭ «جاڭالىق بولار»، «قۇبىلىس بولار» دۇنيە تۋدىرماي جۇرگەنىنەن بولار، بالكىم؟! اعا بۋىننىڭ وزىنەن كەيىنگى بۋىنعا كوڭىلى تولماي ما، قالاي؟ ءۇمىت ارتپايتىن سىندى ما ءوزى؟ ايتپەسە «ادەبيەتتىڭ التىن عاسىرى ەندى تۋمايدى» دەگەن اڭگىمە ايتىلماس ەدى عوي...

ۇلكەن جازۋشىلار قابدەش ءجۇمادىلوۆ، قاليحان ىسقاقتار وزىنەن كەيىنگىلەردىڭ اياق الىسىنا رازى ەمەس. مۇنى سۇحباتتارىندا، اڭگىمەلەرىندە ايتىپ ءجۇر. الايدا «التايدىڭ القىزىل موداعايىن» جازعان اسقار التاي وسال جازۋشى ەمەس ەدى عوي؟! «ءتالتۇستى» جازعان تالاسبەكتى قايدا قويامىز؟ دۋمان رامازاننىڭ «كوشىن» كۇنى كەشە ۇزدىك شىعارما دەپ شۇرقىراماپ پا ەدىك؟ نۇرعالي ورازدىڭ «بيiكتەگi سۇلۋلىق»، «تۇنگi جالعىزدىق»، «دالادان قالاعا كەلگەندەر»، «اياقتالماعان ەرتەگi» اتتى بىرىنەن كەيىن ءبىرى شىققان جيناقتارىن ءبىر جاققا جيىپ قويماقپىز با؟ ۇلكەندەردىڭ كوڭىلى تولسا دا، تولماسا دا ولار جازىپ جاتىر، ادەبيەت جاساپ جاتىر. تەك ولاردىڭ ءوز ورتاسىندا ءوزارا شىعارماشىلىق باسەكە جوق سەكىلدى. وسى ويمەن كەيىنگى ورتا بۋىن مەن جاس

جازۋشىلاردىڭ اراسىنداعى ءوندىرىپ، جاندىرىپ جازىپ جۇرگەن جازۋشىنى انىقتاماق بولدىق.

وتكەن ساندا «بۇگىنگى كۇننىڭ ەڭ مىقتى اقىنى كىم؟» دەگەن ساۋالناما ۇيىمداستىرىپ، مىقتى اقىندى انىقتاعانبىز. بۇل جولى پروزاداعى مىقتىنى تابۋعا تالاپتاندىق. تاعى دا ساۋالناما جۇرگىزدىك. كىلەڭ جۋرناليستەر مەن جازۋ-سىزۋدىڭ، ادەبيەتتىڭ اۋىلىنان الىستاماعان كوزى قاراقتى جانداردىڭ اراسىندا. بۇگىنگى كۇنگى ەڭ مىقتى پروزايك كىم؟ مۇنى 22 مەن 55 جاس ارالىعىنداعى 100 ادامنان سۇراپ شىقتىق.

كەيىنگى ورتا بۋىننان تالاسبەك اسەمقۇلوۆ، نۇرعالي وراز، اسقار التاي، جاڭابەك شاعاتاي، دۋمان رامازان، روزا مۇقانوۆا، زاريا جۇمانوۆا، ديدار امانتاي، ايگۇل كەمەلباەۆا سىندى توعىز جازۋشىنىڭ، جاستاردان اياگۇل مانتاەۆا، بەيبىت سارىباي، ليرا قونىس، دارحان بەيسەنبەكۇلى، ءمادينا ومار، قانات ابىلقايىر، ماقسات مالىكتەن تۇراتىن جەتى جازۋشىنىڭ شىعارماشىلىعىن وقىرماننىڭ تالقىسىنا سالدىق. ودان بولەك رەسپوندەنتتەردىڭ ءوز جازۋشىسىن ۇسىنۋىنا دا مۇمكىندىك بەردىك. سونىمەن...

كىم قانداي پىكىردە؟

«اق جەلكەننىڭ» بۇل ساۋالناماسى مەنى قۋانتىپ وتىر. جازۋشىلار جايلى ءجيى ايتىلىپ، لايىقتى باعا بەرىلىپ تۇرسا، ولاردىڭ شابىتىنا قامشىسالار ما ەدى؟ مەن ورتا بۋىننان اسقار التاي مەن نۇرعالي ورازدى جوعارى باعالايمىن. جاس بۋىننان ليرا قونىستىڭ جازعاندارى تەز باۋراپ الادى. ليراعا داۋىس بەرەمىن. «عاسىردىڭ سوڭعى كوكتەمى» دەگەن ءبىر اڭگىمەسىمەن-اق وقىرمانىن باۋراپ العان قاناعات ابىلقايىر تىزىمدە جوق ەكەن. مەن قاناعاتتى ۇسىنامىن. اۋىلدى جەرلەردە كورىنە الماي جۇرگەن جاس تالانتتار جايلى دا ءجيى ءسوز قوزعالىپ تۇرسا قۇبا-قۇپ بولار ەدى»، - دەيدى شىمكەنتتەگى جەرگىلىكتى گازەتتەردىڭ بىرىندەگى جۋرناليست امان جايىمبەتوۆ. ال جومارت ايتقازى ەسىمدى ءجۋرناليستىڭ پىكىرى بۇعان قاراما-قايشى. «بۇل تىزىمگە قاراپ مىقتى مىناۋ دەپ كورسەتۋ مۇمكىن ەمەس. اركىم وزىنشە مىقتى. اركىم وزىنە ۇناعان، جانىنا جاقىن اۆتوردى وقيدى. سوندىقتان ەڭ مىقتى دەپ ساۋال قويۋ جانە وعان جاۋاپ بەرۋ ىڭعايسىزداۋ سياقتى»، - دەيدى ول. وقىرمان بولعاسىن ونىڭ ويى دا ورىندى. «تالاسبەك اسەمقۇلوۆ پەن اسقار التايدى مويىندايمىن، بەرەرى كوپ دەپ. جاستاردان بەيبىت سارىباي مىقتى. جاقسى جازادى دەپ كەز كەلگەنىن ايتۋعا بولادى. تازى مەن توبەتتى جۇيرىكتىگىنە قاراي سالىستىرساڭ، تازى مىقتى. ال قارا كۇشكە سالساڭ توبەت مىقتى. شىعارماشىلىق تا سونداي». بۇل - «الماتى اقشامى» گازەتىندەگى جۋرناليست جاندوس سمايلوۆتىڭ جاۋابى. «وي، قالقام، بۇلاردىڭ بارلىعى كلاسسيكتەر عوي، «سەن تۇر، مەن اتايىن» شەتىنەن. ولاردى قاتارعا ءتىزىپ نە قىلاسىڭدار، وزدەرى-اق رەتىمەن تۇر ەكەن عوي...»، - دەپ كەيىدى مىقتى جازۋشىنى سۇراعانىمىزدا قويشىبەك مۇباراك.

«ورتا بۋىننان مەنىڭشە، ءبارى دە دەڭگەيلەس. ەرلەردەن: تالاسبەك اسەمقۇلوۆ، ايەلدەردەن: روزا مۇقانوۆا كوبىرەك ۇنايدى. ال جاستاردان: بەيبىت سارىباي،

ليرا قونىس جاقسى. جاڭادان قانات قاعىپ كەلە جاتقان الماس ءنۇسىپ بار سوسىن»، - دەيدى قازۇۋ-دىڭ فيلولوگيا فاكۋلتەتىنىڭ ماگيسترانتى نۇرداۋلەت ءنۇرادىل. ال انكارا ۋنيۆەرسيتەتىنىڭ دوكتورانتى دىنمۇحامەت كەلەسباي ديدار امانتاي مەن ليرا قونىستى تاڭدادى. جاستاردىڭ اراسىندا جاقسى كورىنىپ جۇرگەن اياگۇل مانتاەۆانىڭ ەسىمى ءجيى اتالاتىن شىعار دەپ ويلاعانبىز و باستا. الايدا ليرا قونىس پەن بەيبىت سارىباي جايلى جاعىمدى پىكىردى كوپ ەستىدىك.

بۇگىنگىنىڭ مىقتى جازۋشىسىن ىزدەپ، شارق ۇرىپ جۇرسەك، اقىن باۋىرجان قاراعىزۇلى: «ەشقايسىسى مىقتى ەمەس! بۇگىنگى كۇنگىلەردىڭ ءبارىن وقىپ شىقتىم، ورتاشا ءبارى»، - دەپ توبەدەن ءبىر-اق ۇرعانداي بولدى. تالعامعا تالاس جوق دەگەن وسى.

ال اقىن اعامىز نۇرتاس يساباەۆ ۇلكەندەردەن تالاسبەك اسەمقۇلوۆتى، جاستاردان مادينا وماردى اتادى. «شىنىمدى ايتسام قازىرگى پروزادان تولىق حابارىم جوق. شىڭعىس ايتماتوۆ مەنىڭ ەڭ جاقسى كورەتىن جازۋشىم. ونىڭ شىن مانىندە دارىندى جازۋشى ەكەنىنە ەشكىم كۇمان كەلتىرمەيتىن شىعار. ادامزاتتىڭ ايتماتوۆى عوي. نۇرعالي وراز، ديدار امانتايدىڭ بىرەن-ساران انگىمەلەرىن وقىعام. ليرا قونىستان حابارىم بار. قازىر كوبىنە مارحابات بايعۇتتى وقىپ ءجۇرمىن، ونىڭ جازۋ ءستيلى ەرەكشە. نۇرعالي ورازعا داۋىس بەرەيىن. ەڭ ۇزدىك جازۋشى مەن ءۇشىن ش.ايتماتوۆ، م.بايعۇت. جاستاردان مىناۋ مىقتى دەي المايمىن، سەبەبى شىعارمالارىمەن تولىق تانىس ەمەسپىن»، - دەپ شىنىن ايتتى نۇرلان دەگەن مۇعالىم. بىرەۋدىڭ ءسوزى جاقسى، بىرەۋدىڭ كوزى جاقسىعا سالماي، وقىعاندارىن عانا اتاپ، شىنىن ايتىپ اقتارىلعان وقىتۋشىعا ريزا بولدىق. ال «جۇلدىزدار وتباسىنداعى» جۋرناليست مارفۋعا شاپيان نۇرعالي وراز، ايگۇل كەمەلباەۆا، قانات ابىلقايىردى ۇسىندى دا: «اسقار التايدى جاقسى دەپ ايتادى، بىراق ونشا كوپ وقىماعام. ليرانىڭ شىعارمالارى دا العاشىندا جاقسى ەدى. كەيىن ۇناماي كەتتى»، - دەپ كەسىمدى ءسوزىن ايتتى. سالامات وماش بولسا، نۇرعالي وراز بەن بەيبىت سارىبايدى مىقتى دەدى دە، «المات جالباعايدى مىقتى جازۋشى دەپ ەسەپتەيمىن. بىراق سوڭعى كەزدە مۇلدەم كورىنبەي كەتتى. ورتا بۋىننىڭ باستى كەمشىلىگى - شىعارمالارىندا شىنايىلىقتىڭ جوقتىعىندا. كىشى بۋىننىڭ كەمشىلىگى - پروزاعا تاتىمايتىن كۇيكى دۇنيەلەردى جازۋىندا»، - دەپ وزىندىك ويىن ايتتى.

ساكەن سىبانباي: «ورتا بۋىننان نۇرعالي وراز. جاستاردان ەشقايسىسىن اتاي المايمىن، ءبارى دە «مىقتى» دەۋگە ازىرگە لايىق ەمەس»، - دەپ قايىردى. «ۇلكەندەردەن جاڭابەك شاعاتاي، جاستاردان دارحان بەيسەنبەكۇلى. دۋمان رامازاننىڭ دا شوقتىعى بيىك. قازىرگى ءبىراز پروزايكتەردە شۇرايلى ءتىل جوق. تاعى ءبىر ءابىش كەكىلباەۆ كەرەك بوپ تۇر قازىر بىزگە. الىبەك بايبول دەگەن جاس جازۋشىدان ۇلكەن ءۇمىت كۇتەم، ىزدەنىسى مول، كوپ وقىعان جىگىت. جاستاردان ءۇمىتتى ءبىر اقتاسا، سول اقتايدى»، - دەيدى «دارابوز» جۋرنالىنداعى ولجاس قاسىم. «حالىق ءسوزى» گازەتىنىڭ ساراپشىسى ءدۇرالى دۇيسەبايدىڭ پىكىرىن ەستىپ، قازىرگى ادەبيەتتىڭ جايىن اڭعارعانداي بولدىق. «تىزىمدەگىلەردىڭ ەڭ ۇزدىگى نۇرعالي وراز. نازىك، سەزىمتال جان. سوڭعى كەزدە شىقپاي ءجۇر. اڭگىمەلەرى سەزىمگە تولى. بىزدەن ءبىر كۋرس كەيىن وقىدى. ستۋدەنت كەزدەن جازاتىن. مولدىرەتىپ. كەزىندە مۇقان يمانجانوۆ، ءۇمىت توقماعامبەتوۆا دەگەن جازۋشىلار بولعان. «اقبىلەكتى» جازعان جۇسىپبەك ايماۋىتوۆ سەكىلدى. سول باعىتتاعى ازامات قوي. سولاردىڭ جاڭارعان،

تەرەڭ ورىلگەن رۋحاني شاكىرتى ىسپەتتى. اسقاردىڭ قۇلاشى كەڭدەۋ. رومانيست. دۋمان كەيىن قوسىلدى عوي. قازىرگى اڭگىمەلەردى وقىساڭ تىق-تىق، سەزىم از. مولدىرەمەيدى، ەلجىرەتپەيدى. وي بار، ءبىلىم بار، تەرەڭدىك تە جەتەدى، بىراق سەزىم، ءمولدىر سەزىم جوق. روبوتتار سەكىلدى. مۇمكىن مەن وقىماي جۇرگەن بىرەۋلەر بار شىعار. بىراق كورىپ جۇرگەنىم وسى. سوندىقتان نۇرعاليلاردى ساعىنام. جاستاردان بەيبىت تۋرالى كوپ ايتادى. بىراق تولىق وقىمادىم. ليرانى، قاناتتى وقىپ ءجۇرمىن. ەكەۋى جاقسى جازادى. ءمادينا تۋرالى دا جاقسى پىكىر بار. بىراق بۇل ۇزدىك دەگەنگە كەلە مە؟ جاستاردان كەشىر، «مىناۋ كەرەمەت» دەپ ايتا المايمىن!»، - دەيدى ول.

ءبىر بايقاعانىمىز رەسپوندەنتتەردىڭ كوبى جاستاردىڭ شىعارماشىلىعىنا رازى ەمەس. «جاستاردان ەشقايسىسىن اتاي المايمىن، ءبارى دە «مىقتى» دەۋگە ازىرگە لايىق ەمەس»،- دەگەن ساكەن سىبانبايدىڭ پىكىرىن كوپ ادامنان ەستىدىك.

سىنشىلاردى سويلەتكەندە...

ەڭ مىقتى پروزايك كىم ەكەنىن كاسىبي سىنشىلاردان دا سۇراپ ەدىك، ءاليا بوپەجانوۆا: «سەن ايتىپ وتىرعان جازۋشىلاردىڭ شىعارمالارىن قاداعالاپ وقىپ جۇرگەنىم جوق. ادەبي پروتسەستى باقىلاپ وتىرمىن دەي المايمىن. ويتكەنى قازىر مەن ادەبيەت سىنىنا ەمەس، تەاتر سىنىنا كوشىپ كەتتىم. تىزىمدەگى جازۋشىلاردىڭ ءبىرىنىڭ شىعارماسىن وقىسام، ءبىرىن مۇلدە پاراقتاپ جۇرگەنىم جوق. ءوزىمنىڭ وقىپ جۇرگەن جازۋشىمدى ايتا سالىپ، سول مىقتى دەسەم، وبەكتيۆتى پىكىر بولىپ كەتەدى. سوندىقتان بىردەڭە دەي المايمىن» - دەدى. ودان سوڭ امانگەلدى كەڭشىلىكۇلىنا حابارلاسقانبىز. سىنشىمىز سالعان جەردەن: «مەن «كىم مىقتى؟» دەگەن ساۋالعا جاۋاپ بەرمەيمىن. باسقا سۇراقتارىڭ بولسا جاۋاپ ايتاتىن ەدىم، كەشىر، اينالايىن»، - دەپ ات-تونىن الا قاشتى...

جازۋشىلاردىڭ وزدەرى نە دەيدى؟

بۇگىنگى كۇننىڭ مىقتى جازۋشىسىن تىزىمدە بار جازۋشىلاردىڭ وزدەرىنەن سۇرادىق. تالاسبەك اعامىز اسقار التاي مەن دۋمان رامازاندى، ديدار امانتايدى اتادى. م-اگەنتتەن كورە قالىپ، ساۋالنامامىزدى دۋمان رامازانعا جىبەرىپ ەدىك، ول كىسى جاۋاپ بەرمەي، ءۇنسىز قويا سالدى. ءمادينا ومار ورتا بۋىننان نۇرعالي وراز بەن ديدار امانتايدى، جاستاردان بەيبىت سارىبايدى مىقتى دەدى. ليرا قونىس: «روزا مۇقانوۆا اپاما «سىنامىن» دەيدى. دارحان بەيسەنبەكۇلى بولسا: «ورتا بۋىنداعىلاردىڭ بارلىعى مىقتى. ال ىشكى پوتەنتسيال، تالانت تۇرعىسىنان العاندا، ولار دا وزدەرىنىڭ مۇمكىندىكتەرىن، ءبىر - بىرىنەن ارتىقشىلىعى مەن كەمشىلىگىن سەزىنەدى، بىلەدى دەپ ويلايمىن. ال جاستاردا مەنەن باسقالارىنىڭ بارلىعى دا «سەن تۇر، مەن اتايىندار» عوي. ءبارى دە مىقتى، مەنىڭشە»، - دەگەن جاۋاپ ايتتى. قالاي ويلاساڭىز دا، ءوزىڭىز بىلەسىز ەندى.

ورتا بۋىننان نۇرعالي وراز،

جاستاردان - بەيبىت سارىباي مىقتى!!!

بۇگىنگىنىڭ مىقتى پروزايگىن انىقتايمىز دەپ تابانىمىزدان تاۋسىلدىق. قويشى ايتەۋىر، ءجۇز ادامنىڭ پىكىرى جۇزگە جارىلىپ، ەڭ سوڭىندا ءبىز ۇسىنعان ءتىزىمنىڭ ۇزدىگى بىلاي ءتۇزىلدى. ساۋالناماعا 100 ادام تارتىلعانىمەن، ورتا بۋىنعا بەرىلگەن داۋىس سانى - 116. ويتكەنى ءبىر ەمەس، بىرنەشە جازۋشىنى قاتار ۇسىنىپ، مىقتى دەگەندەر بولدى. ال جاستارعا بەرىلگەن داۋىس سانى - 77. ءجۇز رەسپوندەنتتىڭ 23-ءى جاستاردىڭ شىعارماشىلىعىن جاراتپاي، قالىس قالدى. سونىمەن ورتا بۋىننان نۇرعالي ورازدىڭ ەسىمى وتىز رەت اتالىپ، توپ جارسا، جاستاردان بەيبىت سارىباي مىقتى جازۋشى سانالدى. ءبىز ۇسىنعان ورتا بۋىنداعى 9 جازۋشىنىڭ ءتىزىمى بىلايشا ءتۇزىلدى (جاقشاداعى ساندار جازۋشىنىڭ ەسىمى قانشا رەت اتالعانىن بىلدىرەدى):

1. نۇرعالي وراز (30)

2. اسقار التاي (16)

3. تالاسبەك اسەمقۇلوۆ (14), روزا مۇقانوۆا (14)

4. دۋمان رامازان (12)

5. ديدار امانتاي (10)

6. ايگۇل كەمەلباەۆا (9)

7. جاڭابەك شاعاتاي (8)

8. زاريا جۇمانوۆا (3)

جاستاردان مىقتى جازۋشىلاردىڭ ءتىزىمى بىلايشا ءتىزىلدى:

1. بەيبىت سارىباي (17)

2. ليرا قونىس (16)

3. قانات ابىلقايىر (13)

4. دارحان بەيسەنبەكۇلى (11)

5. ءمادينا ومار (8), ماقسات مالىك (8)

6. اياگۇل مانتاەۆا (4)

رەسپوندەنتتەر ۇسىنعان جازۋشىلاردىڭ ەسىمىن دە جاريالاۋدى ءجون كوردىك. قويشىبەك مۇباراك (2), ەسەي جەڭىسۇلى (2), الىبەك بايبول (2), ءمادي الجانباي (1), المات جالباعاي (1), تالعات كەڭەسباەۆ (1), سەرىك نۇعىمان (1), قاناعات ابىلقايىر (1), باعدات ءماجيتۇلى (1), ءومىرجان ابدىقالىق (1), بانۋ داۋلەتباەۆا (1), الماس ءنۇسىپ (1).

ساۋالناما جۇرگىزىپ، جۇرتتى دۇرلىكتىرۋدەگى ءبىزدىڭ ماقسات بىرەۋدى - بىرەۋمەن جارىستىرۋ، شاعىستىرۋ ەمەس. وقىرماننىڭ قۇلاعىن قايشىلاۋ، كوركەم شىعارمانى قانشالىقتى وقىپ جۇرگەنىن بايقاۋ، قالا بەردى كۇيكى تىرلىكتىڭ قامىمەن ۇمىتىلىپ بارا جاتقان جازۋشىعا نازار اۋدارتۋ بولاتىن. ءارى جازۋشىلاردىڭ ءوز اراسىنداعى شىعارماشىلىق باسەكەنى قوزدىرۋ ەدى. قانشالىقتى ءادىل شەشىم شىعاردىق، ونى پاتشا كوڭىلدى وقىرمان، ءوزىڭىز باعامدارسىز. ءبىزدىڭ تىزىممەن كەلىسپەسەڭىز، ءسىز مىقتى ساناعان جازۋشى ءوز كوڭىلىڭىزدە مىقتى بوپ قالادى. وعان تالاس جوق!

«اق جەلكەن» جۋرنالىنان الىندى