رەسەي حالىقارالىق قارجى نارىقتارىنان «ءىس جۇزىندە قۋىلدى». ورتالىق بانك قاتاڭ شارالار ارقىلى كاپيتالدىڭ كەتۋىن بولدىرماۋعا تىرىسۋدا. كوپتەگەن ساراپشىلار "رەسەي ەكونوميكاسىن مۇناي مەن گازدىڭ ءوزى قۇتقارا المايتىنىنا" سەنىمدى.

دۇيسەنبىدە ازيا قارجى نارىقتارى ساۋدانى باستاعاندا رەسەي ءرۋبلى قۇلدىرادى. وعان باتىستىڭ دەمالىس كۇندەرى ەنگىزىلگەن قاتاڭ سانكتسيالارى سەبەپ بولدى. ءىس جۇزىندە رەسەيدىڭ ۆاليۋتالىق رەزەرۆتەرى توقتاتىلدى، ال رەسەيلىك بانكتەردى حالىقارالىق وپەراتسيالاردى ۇيىمداستىرۋ كەزىندە SWIFT جۇيەسىنەن اجىراتا باستادى. رەسەي رۋبلىنە شاققانداعى دوللار باعامى 40 پايىزعا قىمباتتادى. جۇما كۇنى كەشكە ءبىر دوللار 84 رۋبل بولسا، قازىر ول 118 رۋبلگە دەيىن كوتەرىلىپ، جاڭا رەكورد ورناتتى.

بۇل رەسەي دەفولتقا ۇشىراعان 1998 جىلعى قارجىلىق داعدارىستىڭ ەڭ ناشار ساتتەرىنە ۇقساس رەسەيلىك ۆاليۋتانىڭ قازىرگى تاريحتاعى ەڭ ۇلكەن قۇلدىراۋىنىڭ ءبىرى بولدى. تاڭەرتەڭ رەسەيدىڭ ورتالىق بانكى ءرۋبلدىڭ قۇلدىراۋىن تەجەۋ ء​​ۇشىن ءوزىنىڭ نەگىزگى پايىزدىق مولشەرلەمەسىن 9,5%-دان 20%-عا كوتەردى، ال قارجى مينيسترلىگى ۆاليۋتالىق تۇسىمدەرى بار كومپانيالارعا كىرىستەرىنىڭ 80%-ىن رۋبلگە ايىرباستاۋدى بۇيىردى.

ءرۋبلدىڭ قۇلدىراۋى مەملەكەتتىڭ قانشالىقتى وقشاۋلانعانىن كورسەتەدى. ءرۋبلدىڭ قۇنسىزدانۋىنا بايلانىستى بارلىق يمپورتتىق تاۋارلار كولىكتەن باستاپ، ءدارى-دارمەككە دەيىن ايتارلىقتاي قىمباتتايدى. كوبىسى دوللارمەن ەسەپتەلگەن سىرتقى قارىزعا قىزمەت كورسەتۋ قيىنىراق بولادى.

ال مۇناي باعاسى جەتكىزۋدىڭ قيىنداۋى مەن ەمبارگو تۋرالى تالقىلاۋ تۋدىرعاندىقتان، ودان دا جوعارى كوتەرىلدى. دۇيسەنبى كۇنى تاڭەرتەڭ ازياداعى اۋكتسيونداردا مۇناي باررەلىنە 100 دوللارعا جۋىق كوتەرىلدى. بۇل وتكەن اپتانىڭ سوڭىمەن سالىستىرعاندا بەس پايىزعا ارتىق. ءىرى مۇناي مەن گاز ەكسپورتتاۋشى ەل رەتىندە رەسەي ادەتتە ەنەرگيا باعاسىنىڭ قىمباتتاۋىنان پايدا كورەدى. دەگەنمەن جاڭا سانكتسيالار ول پايدانىڭ اسەرىن نولگە تەڭەستىرىپ وتىر.

رەسەيدىڭ قارجى جۇيەسى مەن الەمنىڭ قالعان بولىگى اراسىنداعى تىكەلەي بايلانىس وتە ءالسىز. رەسەيدە جۇمىس ىستەيتىن بانكتەر شەتەلدىك مەكەمەلەرگە جالپى سوماسى 134 ميلليارد دوللار نەمەسە دۇنيەجۇزىلىك جيىنتىقتان 0,4% قارىز. مۇنداي مالىمەتتەردى حالىقارالىق ەسەپ ايىرىسۋ بانكى بەرەدى. رۋبلدىك مەملەكەتتىك وبليگاتسيالاردىڭ 80%-ى (ولاردىڭ جالپى سوماسى 15,5 ترلن. رۋبل) ەل ىشىندە ساقتالعان.

رەسەي ەكونوميكاسىن شيكىزاتتىق تاۋەلدىلىكتەن ارىلتۋ بىرنەشە جىلدارعا كەيىنگە قالدىرىلۋى مۇمكىن. رەسەي پرەزيدەنتى ۆلاديمير پۋتين الەمدىك ساياساتتان شەتتەتىلگەن ادامعا اينالدى. سول سياقتى رەسەي ەكونوميكاسى دا وقشاۋلانۋ ۇستىندە.

Abai.kz