ۋكراينا سوعىسىنا جارتى ايدان استى. رەسەي قولباسشىلارىنىڭ باستاپقىداعى جوسپارى ىسكە اسپادى. 48 ساعاتتا كيەۆتى الامىز دەگەن ماسكەۋ اسكەرى دونەتسك پەن لۋگانسك وبلىسىتارىندا، وڭتۇستىكتە حەرسون مەن ودەسسا بويىندا تۇرىپ قالدى.

24-اقپاندا ۋكراينا قالالارىن بومبالاپ، زىمىرانمەن اتقىلاپ، ارتىنشى جىلدام بليتسكريگ جاساۋ جوسپارىن ىسكە اسىرماق بولعان ەدى. الايدا بۇل تۇرعىدان ماسكەۋ بىرنەشە قاتەلىك جىبەرگەنى ايتىلۋدا. ول قارسىلاستىڭ كۇشى مەن سانىن باعامداي الماۋ، قارسىلاستىڭ رۋحى مەن پسيحولوگيالىق كوڭىل-كۇيىن تولىق بىلمەۋ، قارسىلاس  قىرىمداعىداي ءوز ەركىمەن بەرىلەدى دەپ ەسەپتەۋ، ءوز اسكەرىنىڭ كۇشىن تىم جوعارى دەپ ساناۋ جانە ۋكرايناعا باتىستىق تاراپتان تىم جوعارى قولداۋ بولادى دەگەنگە سەنىم ارتپاۋ. ارينە، بۇل سوعىستان كەيىن پۋتين بيلىگى ءىرى اسكەري شەندەگى قىزمەتكەرلەردى قىزمەتىنەن بوساتىپ، كەيبىرىن سوتتاۋى دا مۇمكىن. سەبەبى تەلەديداردان قانشا ماقتاسا دا، شىندىق باسقاشا سايراپ تۇر. مىڭداعان رەسەي اسكەرى قىرىلعان جانە جۇزدەگەن تەحنيكاسى جويىلدى. وسىنىڭ بارلىعى "الەمدەگى ەكىنشى قۋاتتى اسكەر" اتتى ءيميدجدىڭ تاس-تالقانىن شىعارۋدا. ەندىگى تاڭدا "راسىمەن دە قۋاتتى ما" دەگەن زاڭدى سۇراق تۋىنداۋدا.

رەسەي اسكەرى تىكەلەي شابۋىل ادام شىعىنىن كوبەيتكەندىكتەن، تاكتيكاسىن وزگەرتە باستادى. ناقتىلاپ ايتقاندا ەندىگى تاڭدا زىمىراندىق سوققىلار سانىن ارتتىردى جانە اۋە شابۋىلىن كوبەيتتى. وسى ارقىلى ماسكەۋ ۋكراينا قالالارىنىڭ قارسىلاسۋ رۋحىن سىندىرۋدى كوزدەپ وتىر. سوققىلار جىلۋ قازاندىقتارىنا، سۋ قۇبىرلارىنا جانە ەلەكتر جارىعىن باسقارۋ ورتالىقتارىنا جاسالۋدا. سۋسىز-جارىقسىز قالعان حالىق ەلدى-مەكەندى تاستاپ، بوسىپ كەتەدى دەگەن تاكتيكانى ىسكە اسىرىپ جاتىر.

ساراپشىلار رەسەي ۋكراينانىڭ ءبىر قالاسىن تۇتاس اتقىلاپ، جويىپ جىبەرۋ مۇمكىن ەكەندىگىن جوققا شىعارمايدى. سول ارقىلى وزگە قالالاردىڭ ءوز ەركىمەن بەرىلۋىن جىلدامداتادى دەپ ەسەپتەيدى. ول حاركوۆ قالاسى بولۋى ابدەن مۇمكىن.

بۇۇ مالىمەتى بويىنشا بۇگىنگى ۋاقىتتا ۋكراينادان 2.3 ملن ادام بوسقىن بولىپ، وزگە ەلدەرگە كەتكەن. ونىڭ ىشىندە پولشا مەن مولدوۆا ەلدەرى كوش باستاپ تۇر. ال ىشكى بوسقىندار سانى 4 ملن ادامعا جەتەدى. ۇرىس ءجۇرىپ جاتقان ايماقتاردان ەلدىڭ باتىسىنا كەتۋشىلەر سانى ارتقان. اسىرەسە لۆوۆ قالاسىنا بوسقىندار اعىلىپ كەلۋدە.

وتكەن اپتادا رەسەي مەن ۋكراينا ءسىم تۇركيادا كەلىسسوزدەر وتكىزدى. كەلىسسوزدەر ايتارلىقتاي ناتيجە بەرمەدى، ال بۇگىن 4 مارتە كەلىسسوزدەر وتەدى. ماماندار ەكى تاراپ تا كەلىسسوزگە مۇددەلى ەكەنىن ايتۋدا، كرەمل ۋلتيماتۋم پوزيتسياسىنان كەلىسىم پوزيتسياسىنا وتۋگە نيەتتى.

Abai.kz