قۋانىشالين بيلىك بۇل پارتيانى وڭايشىلىقپەن تىركەي قويمايدى دەپ سانايدى، بىراق ايتىلعان قۇجاتتاردى تولىقتىرىپ، قايتا تالاپتاناتىنىن ايتادى.

– ساياسي پارتيالار دەپ "اق جول", "قازاقستان حالىق پارتياسى" دەگەندەردى اتاعانىمەن، ولاردىڭ بيلىكپەن كەلىسىپ جۇمىس ىستەيتىنىن ەلدىڭ ءبارى بىلەدى. بىراق ناقتى ساياسي پارتيا جوق. مارقۇم سەرىكبولسىن ءابدىلديننىڭ پارتياسىن ءىرىتىپ، ءبولىپ ءبىتىردى. سوندىقتان قازىر ناعىز وپپوزيتسيالىق پارتيا اۋاداي قاجەت. جاعدايىمىز بەلگىلى، تىركەلە المايمىز دەگەن كۇدىك تە جوق ەمەس. بىراق "قدت", "كوشە" دەگەن تاۋەلسىز ساياسي قوزعالىستاردى دالەلسىز ەكسترەميست دەۋ سياقتى زاڭسىزدىقتارمەن كۇرەسىپ، ونى تۇزەتۋگە قالاي قول جەتكىزۋگە بولادى؟ ولار كوشەگە شىقسا، بىردەن قامالادى، – دەيدى ول.

قۋانىشالين اتاعان "قازاقستاننىڭ دەموكراتيالىق تاڭداۋى" (قدت) مەن "كوشە" قوزعالىستارىن قازاقستان سوتى ەكسترەميستىك توپ تانىپ، بۇل ەكى قوزعالىستىڭ بەلسەندىلەرى قىلمىستىق قۋدالاۋعا دۋشار بولعان. ەۋروپارلامەنت ءوز قارارلارىندا بۇل ەكى قوزعالىستى بەيبىت ۇيىم دەپ اتاعان. قدت-نىڭ نەگىزىن قالاعان – قۋعىنداعى ەكس-بانكير مۇحتار ءابليازوۆ.

جاسارال قۋانىشالين "العا، قازاقستان" وپپوزيتسيالىق پارتياسى قۇجاتتارىن الىپ كەلگەنىمەن، ونىڭ ۇيىمداستىرۋ كوميتەتى حاتتاماسى مەن مىڭ ادامنان تۇراتىن ىنتالى توپتىڭ قولدارى جەتپەگەنىن ايتادى. ول بىرنەشە كۇن ىشىندە بۇل ولقىلىقتاردى تولتىرىپ، پارتيا قۇجاتىن قايتا وتكىزۋگە تالپىنامىز دەيدى.

سۋپەرپرەزيدەنتتىك بيلىك ورناعان قازاقستاندا تاۋەلسىز ساياسي پارتيا تىركەۋ قيىن سانالادى. كەيىنگى جىلدارى بيلىك تىركەۋگە قاجەت قول سانىن ازايتقانىمەن، پارتيانى تىركەۋ ءالى دە قيىن دەيدى ساراپشىلار. ماسەلەن، 2019 جىلى ساياسي بەلسەندىلەر جانبولات ماماي مەن ينگا يمانباي باستاعان توپ "قازاقستاننىڭ دەموكراتيالىق پارتياسى" دەيتىن ۇيىمدى تىركەۋگە ءوتىنىش بەرگەن، بىراق تىركەۋگە جاۋاپتى ادىلەت مينيسترلىگى ءوتىنىشتى قاناعاتتاندىرماعان. يمانباي پارتيا تىركەۋ تۋرالى ءوتىنىش بەرگەن سوڭ جەرگىلىكتى اتقارۋشى بيلىكتەن قىسىم كورگەنىن مالىمدەگەن.

ادىلەت مينيسترلىگىنىڭ مالىمەتىنشە، 2019 جىلدان بەرى 10 باستاماشىل توپ ساياسي پارتيا قۇرۋعا نيەت بىلدىرگەن.

– ءۇش پارتيا ءبىرىنشى كەزەڭنەن ءوتىپ، حابارلاما الدى. ەكى پارتيا حابارلاما العانىمەن ارى قاراي قۇجاتتارىن تاپسىرعان جوق. بۇگىندە ءتورت پارتيانىڭ قۇجاتتارى قارالىپ جاتىر. ولار "ەل تىرەگى", "حالىق دەربەستىگى", "نامىس", "بايتاق". "حالىق دەربەسىگى" ەكىنشى كەزەڭگە ءوتتى، سەزىن وتكىزدى. ەندى 20 مىڭ ادام ءتىزىمىن وتكىزۋى كەرەك. قالعان پارتيالاردا قازىر ءبىرىنشى كەزەڭنىڭ جۇمىستارى ءجۇرىپ جاتىر. ولارعا تەكسەرۋ جاساعاندا ولگەن ادامدار مەن باسقا پارتياعا مۇشەلەر انىقتالدى. بۇل زاڭسىزدىقتاردى جويعان سوڭ قايتا تاپسىرا الادى، – دەدى ادىلەت ءمينيسترى قانات مۋسين 18 ساۋىردەگى بريفينگتە.

16 ناۋرىزدا پارلامەنتتە جاريالاعان جولداۋىندا قازاقستان پرەزيەنتى قاسىم-جومارت توقاەۆ ساياسي پارتيالاردى تىركەۋ پروتسەسى جەڭىلدەيتىنىن مالىمدەگەن. پارتيالار ءۇشىن قاراستىرىلعان تىركەۋ شەگى 20 مىڭنان 5 مىڭ ادامعا دەيىن تومەندەتىلىپ، وڭىرلەردەگى وكىلدەردىڭ سانى 200 ادام بولاتىنىن ايتقان. ال پارتيا قۇرۋ ءۇشىن باستاماشىل توپتىڭ سانى دا ەڭ كەمى 1000 ادامنان 700-گە دەيىن ازايتىلادى دەگەن.

Abai.kz