قازاقستاندا قاڭتار وقيعاسىنان كەيىن قوزعالعان ىستەر بويىنشا 214 ادام سوتتالعان. ولاردىڭ 20-سىنا تۇرمە جازاسى كەسىلگەن. بۇل تۋرالى 19 ساۋىردە باس پروكۋراتۋرا مەن ىشكى ىستەر مينيسترلىگى ورتالىق كوممۋنيكاتسيا قىزمەتىندە وتكەن بريفينگتە جاريالادى. شاراعا باق وكىلدەرىن قاتىستىرمادى.

ءساۋىردىڭ ايدىڭ باسىندا بيلىك 152 ادام سوتتالىپ، ولاردىڭ 17-ىنە تۇرمە جازاسى بەرىلگەنىن حابارلاعان.

ىشكى ىستەر مينيسترلىگى تەرگەۋ دەپارتامەنتىنىڭ باستىعى سانجار ءادىلوۆ قارالعان قىلمىستىق ىستەردىڭ كوبى بويىنشا سوت ايىپتى دەپ تانىعاندارعا بوستاندىعىن شەكتەۋ جازاسىن شىعارعانىن ايتتى. ەڭ كوبى الماتى قالاسىندا – 145 ادام. الماتى وبلىسىندا 38 ادامعا ايىپتاۋ ۇكىمى شىققان. قالعاندارى تۇركىستان، جامبىل جانە اقمولا وبلىستارىندا.

بۇدان بولەك الماتىدا التى ادامنىڭ ۇستىنەن قوزعالعان قىلمىستىق ءىس "تاراپتاردىڭ تاتۋلاسۋىنا بايلانىستى" دوعارىلعان. ءادىلوۆ "بارلىعىن مەيلىنشە قاتاڭ جازالاۋ" ماقساتى بولماعانىن ايتادى. "كۇدىكتىلەردىڭ كوبى پاراساتتى ازاماتتار بولا تۇرا، وقيعا كەزىندە وڭاي ولجاعا قىزىعىپ نەمەسە وزگەنىڭ سوزىنە ەرىپ قىلمىسقا بارعان" دەپ مالىمدەدى ءادىلوۆ.

323 كۇدىكتى اباقتىدان بوساتىلعان: 78 ادام كەپىلگە مۇلكىن قويىپ، 67 ادام ەشقايدا كەتپەيتىنى جايلى قولحات جازىپ، 11 ادام وزگە بىرەۋ كەپىلدىك بەرۋىمەن جانە 71 ادام – سوت ۇكىمىمەن قاماۋدان شىققان.

تەرگەۋ وندىرىسىندە 1260 قىلمىستىق ءىس بار. ولاردىڭ اراسىندا 204 ءىس "ۇرلىق" بابىمەن، 180 – "قارۋدى زاڭسىز ساتىپ الۋ، وزگەگە بەرۋ، ساتۋ، ساقتاۋ، تاسىمالداۋ نەمەسە وزىمەن بىرگە الىپ ءجۇرۋ" بابىمەن، 21 – "وزگەنىڭ مۇلكىن قاساقانا جويۋ نەمەسە ءبۇلدىرۋ" بابىمەن قوزعالعان.

باس پروكۋراتۋرا دەرەگىنشە، قازىر تەرگەۋ ورگاندارى وسى ساناتقا جاتاتىن بارلىعى 4849 ءىستى قاراپ جاتىر، سوت تۇتقىنداۋعا سانكتسيا بەرگەن 627 كۇدىكتى قاماۋدا وتىر.

قاماۋدا بولعان 280 ادام كەپىلگە مۇلكىن قويىپ نەمەسە وزگە بىرەۋ كەپىلدىك بەرىپ يا ەشقايدا كەتپەيتىنى جايلى قولحات جازىپ اباقتىدان شىققان.

بۇعان قوسا 19 ساۋىردەگى بريفينگتە كۇدىكتىلەرگە "تىيىم سالىنعان تەرگەۋ ءادىسىن قولدانعانى" جايلى ارىز-شاعىم بويىنشا سوتقا دەيىنگى 11 تەرگەۋ ءىسى تىركەلگەنى ايتىلدى. باس پروكۋراتۋرانىڭ دەرەگىنشە، ءبىر قىلمىستىق ءىس سوتقا جولدانعان.

قاڭتار وقيعاسى كەزىندە جانە ودان كەيىن مىڭداعان ازامات ۇستالىپ، جۇزدەگەن ادامعا "تەرروريزم", "جاپپاي تارتىپسىزدىك ۇيىمداستىرۋ", "زاڭسىز قارۋ-جاراق ساقتاۋ" سەكىلدى ايىپتار تاعىلدى. قاماۋدا بولعانداردىڭ اراسىندا ازاپتالعانىن ايتىپ شاعىمدانعاندار كوپ، بىراق ولاردى ازاپتاۋ فاكتىسى بويىنشا ۇستالعاندار نەكەن-ساياق.

Abai.kz