وليگارح پەن اقيقات
«جاس قازاق» گازەتى - ەركىن ويدىڭ پىكىرسايىس الاڭى. كەز كەلگەن وزەكتى قوعامدىق-ساياسي ماسەلەلەر ۇدايى قىزۋ تالقىعا تۇسەدى. جاڭاوزەن مەن شەتپە وقيعالارىنا قاتىستى سوت پروتسەستەرى اياقتالعانى ءمالىم. «الەۋمەتتىك ارازدىقتى قوزدىردى» دەگەن ايىپ بويىنشا شارتتى تۇردە باس بوستاندىعىنان ايىرىلعان وپپوزيتسيا بەلسەندىسى سەرىك ساپارعالي مەن ساياساتكەر جاسارال قۋانىشالى رەداكتسيامىزدىڭ قوناعى بولىپ، وسى ماسەلەگە قاتىستى ءوز پىكىرلەرىمەن ءبولىستى. قىزۋى كوتەرىلىپ تۇرعان جاعدايدا قاشاندا ەموتسياعا ەرىك بەرىلەتىنى ءسوزسىز. ايتسە دە، جەكە باسقا بارىسپاي، دايەكپەن سويلەي ءبىلۋ، پىكىر جارىستىرۋ مادەنيەتى بىزگە ءالى دە جەتىسپەي جاتقانداي. بۇل ءسوز سايىسى وسىنى كورسەتتى. اقيقات بارىنەن قىمبات. سوندىقتان نازارلارىڭىزعا ۇسىنۋدى ءجون كورىپ وتىرمىز. قورىتىندى جاساۋ، باعا بەرۋ، ءاماندا، وقىرماننىڭ ەنشىسىندە.
«جاس قازاق» گازەتى - ەركىن ويدىڭ پىكىرسايىس الاڭى. كەز كەلگەن وزەكتى قوعامدىق-ساياسي ماسەلەلەر ۇدايى قىزۋ تالقىعا تۇسەدى. جاڭاوزەن مەن شەتپە وقيعالارىنا قاتىستى سوت پروتسەستەرى اياقتالعانى ءمالىم. «الەۋمەتتىك ارازدىقتى قوزدىردى» دەگەن ايىپ بويىنشا شارتتى تۇردە باس بوستاندىعىنان ايىرىلعان وپپوزيتسيا بەلسەندىسى سەرىك ساپارعالي مەن ساياساتكەر جاسارال قۋانىشالى رەداكتسيامىزدىڭ قوناعى بولىپ، وسى ماسەلەگە قاتىستى ءوز پىكىرلەرىمەن ءبولىستى. قىزۋى كوتەرىلىپ تۇرعان جاعدايدا قاشاندا ەموتسياعا ەرىك بەرىلەتىنى ءسوزسىز. ايتسە دە، جەكە باسقا بارىسپاي، دايەكپەن سويلەي ءبىلۋ، پىكىر جارىستىرۋ مادەنيەتى بىزگە ءالى دە جەتىسپەي جاتقانداي. بۇل ءسوز سايىسى وسىنى كورسەتتى. اقيقات بارىنەن قىمبات. سوندىقتان نازارلارىڭىزعا ۇسىنۋدى ءجون كورىپ وتىرمىز. قورىتىندى جاساۋ، باعا بەرۋ، ءاماندا، وقىرماننىڭ ەنشىسىندە.
جاس قازاق: بۇگىنگى قوزعاپ وتىرعان تاقىرىبىمىز - جاڭاوزەن وقيعاسىنا قاتىستى سوت ءىسى. سىزبەن بىرگە قامالعان جانبولات ماماي مەن بولات اتاباەۆتى وپپوزيتسيا قوسىنى «قاھارمان» رەتىندە قارسى الدى. اباقتىدان بىردەن ۇشاقتىڭ بيزنەس-كلاسس سالونىنا وتىرىپ الماتىعا قايتتى. دۇركىرەتىپ ءباسپاسوز-ءماسليحاتىن وتكىزىپ، ينتەرنەت ارقىلى تىكەلەي حابار تاراتىلدى. بىراق سول وپپوزيتسيا سىزگە قاتتى شۇيلىگىپ وتىر. مۇنىڭ سىرى نەدە؟
سەرىك ساپارعالي: مەن ءتورت جىلعا شارتتى تۇردە سوتتالىپ شىقتىم. ودان كەيىن ءۇش جىل سىناق مەرزىمى تاعى كەسىلدى. ماعان وسىنداي قارىم-قاتىناس بولعانىنا ءوزىم قاتتى تاڭداندىم. جانبولات ماماي مەن بولات اتاباەۆ 65-باپ بويىنشا بوساتىلدى. 65-باپ دەگەنىمىز - قىلمىسىن مويىنداۋ، كۋاگەر رەتىندە كۋالىك بەرىپ، ايىپتاۋ جاعىنا ءوتۋ. دەمەك، ولار سوتقا كەلىپ، ءبىزدى، قىلمىسكەر دەپ تابىلعان ءۇش ادامدى (ۆلاديمير كوزلوۆ، جانات ءامينوۆ جانە مەن) ايىپتاۋى كەرەك ەدى.
65-باپپەن بوساتىلعانداردان وزگەشەلىگى - مەن ءوز ءىسىم ءۇشىن ءوزىم جاۋاپ بەردىم. 23 قاڭتاردا قامالدىم. ونىڭ الدىندا 15 كۇندە پوليتسيانىڭ قابىلداۋ بولىمىندە وتىردىم. شەرۋ ۇيىمداستىردى دەپ ايىپ تاعىلدى. شىنتۋايتىندا، شەرۋ ۇيىمداستىرعان ەمەسپىن. ونى ۇيىمداستىرعان حاسەن قوجاحمەتوۆ ەدى. قاسىندا مەدەت قۇلشىباەۆ بولدى. «نۇر وتان» پارتياسىنىڭ الدىنا بارامىز» - دەپ شىققان سولار. بەينەجازبالاردا مەنىڭ بولەك كەتىپ بارا جاتقانىم انىق كورىنىپ تۇر.
جاس قازاق: تىركەلمەگەن «العا» پارتياسىنىڭ مۇشەسىسىز بە؟
سەرىك ساپارعالي: جوق، ەشقاشان مۇشە بولعان ەمەسپىن. قۇرىلعان كەزدە «ادىلەتسىزدىككە، جەمقورلىققا قارسى كۇرەس بولادى» دەگەن سوڭ «حالىق مايدانىنا» قاتىستىم.
جاسارال قۋانىشالى: جاڭاوزەندە تولقۋ باستالعاندا مەن ءوزىم سوتتى بولدىم. 2006 جىلدان بەرى مەنى قايتا-قايتا سوتقا بەرىپ جۇرگەن ءبىر ادام بار. سوتتا جۇرگەننەن كەيىن جاڭاوزەنگە بارا المادىم. بىراق ءجىتى قاداعالاپ وتىردىم. ءوز باسىم ەشقانداي پارتيادا جوقپىن. بىراق «العا» پارتياسىمەن جۇمىس ىستەگەندى دۇرىس دەپ ەسەپتەدىم. حاسەن قوجاحمەت 17 جەلتوقساندا «نۇر وتاننىڭ» عيماراتىنا دەيىن شەرۋ جاساپ بارۋدى ۇسىنعاندا: «ول جەردە قازىر ەشكىم جوق. قاڭىراپ بوس تۇرعان كەڭسەگە بارىپ، تۇلىپقا موڭىرەگەن سيىرعا ۇقساعىم كەلمەيدى. نەسىنە بارام؟» - دەپ باس تارتتىم. ودان كەيىنگى جاعداي بەلگىلى... 37 ادامنىڭ ءىسى قارالعان العاشقى سوت وتىرىستارىنا بارا المادىم. قاراجات ماسەلەسى شەشىلمەدى... 21 تامىزدا سوتقا بارىپ، باستان-اياق قاتىستىم...
جاس قازاق: كوزلوۆ سوتتالدى، قالعاندار بوساپ شىقتى.
جاسارال قۋانىشالى: ءبىر ادامنىڭ سوتتالىپ جاتقان ادامدى الىپ شىعۋى تاريحتا بولماعان جاعداي. ەرمەك تۇرسىنوۆتىڭ بولات اتاباەۆتى، تولەگەن جۇكەەۆتىڭ جانبولات مامايدى الىپ شىعۋى ءبىر ستسەناري بويىنشا جۇزەگە استى. سەرىك ساپارعاليعا دا 65-باپ بويىنشا بوساتۋعا ۇسىنىس بولعانىمەن، وعان رۇقسات بەرىلمەگەن سياقتى. ول جاعىن سەرىكتىڭ ءوزى ايتا جاتار.
كوزلوۆ ءبىر كەزدەرى بولات اتاباەۆتىڭ: «جاڭاوزەندە باسكەسەرلەر بار، ولار دايىن تۇر. سپورتشىلارمەن دە ءسوي لەستىم. كوتەرىلۋگە ولار دا دايىن»، - دەگەن ءسوزىن قولداماعان.
جاس قازاق: ايتەۋىر، ارانداتۋشىلىق ارەكەتتەردىڭ بولعانى كۇمانسىز عوي؟
جاسارال قۋانىشالى: ول ارانداتۋشىلىق پا، جوق پا، وعان مەن باعا بەرمەيمىن. مەن تەك قانا بولعان اڭگىمەنى ايتىپ وتىرمىن.
جاس قازاق: سەرىك اعا، سىزگە ەرمەك تۇرسىنوۆ، تولەگەن جۇكەەۆ سەكىلدى اراشا تۇسكەن ادام بولدى ما؟
سەرىك ساپارعالي: وندا مەن باياعىدا بوستاندىقتا جۇرەر ەدىم. ەشكىم ەرمەك تۇرسىنوۆ، تولەگەن جۇكەەۆ سەكىلدى ارەكەت جاسامادى. جانبولات ماماي مەن بولات اتاباەۆ شىعىپ كەتكەن سوڭ تەرگەۋشىلەر: «حالىققا تانىمال ءبىر ادام سىزگە دە اراشا تۇسسە، بوساتار ەدىك»، - دەپ اعىنان جارىلدى. راس، وتىرىگىن بىلمەيمىن. بالكىم، بۇل سىلتاۋ دا شىعار.
جاسارال قۋانىشالى: ەرمەك تۇرسىنوۆ بولات اتاباەۆتى الىپ شىققاننان كەيىن ءباسپاسوز ءماسليحاتىن وتكىزدىك. سەرىكبولسىن ءابدىلدين، عازيز الدامجاروۆ، پەتر سۆويك جانە مەن بولدىم. سول كەزدە بىزگە دە مۇمكىندىك بەرسە، ءبىز دە ازاماتتاردى الىپ شىعۋعا دايىن ەكەنىمىزدى ايتقانبىز.
جاس قازاق: ءوزىڭىز ايتتىڭىز با؟
جاسارال قۋانىشالى: ءيا، مەن ايتتىم. بىراق ونىڭ ورىندالمايتىنىن بىلدىك. ويتكەنى، ەرمەك تۇرسىنوۆتىڭ ءجونى بولەك، ءبىزدىڭ ءجونىمىز بولەك. ول ساياساتتا جوق، بەيتاراپ ادام. ءبىز ادەيى شىقتىق، بيلىكتىڭ تامىرىن باسىپ كورەيىك دەپ، حات جازدىق. تولەگەن جۇكەەۆ باياعىدان بيلىكتە بولعان ادام.
سەرىك ساپارعالي: ول ءوزىن وپپوزيتسيا رەتىندە كورسەتىپ ءجۇر ەمەس پە؟
جاسارال قۋانىشالى: مەن ونىڭ قانداي «وپپوزيتسيا» ەكەنىن جاقسى بىلەمىن. مەن ءبارىن اشىق ايتىپ، اشىق جازامىن. سوندىقتان كوپ ادامدارعا جەككورىنىشتى بولىپ ءجۇرمىن. بولات ابىلەۆ، تولەگەن جۇكەەۆ جالعان «ازات» پارتياسىندا بولدى. ولاردى جالعان «ازات» دەپ اتايمىن، «ازات» دەپ اتاۋعا اۋزىم بارمايدى. «ازات» دەگەن اتتى ۇرلاپ الدى.
التىنبەك (التىنبەك سارسەنباەۆ - رەد.) قازا بولعان سوڭ، بۇلار بىت-شىت بولدى. ەشقانداي جۇمىس جۇرگىزبەدى. اتىن «ازات» دەپ وزگەرتىپ، تۋرالاپ العاننان كەيىن، پەتر سۆويكتى ورىنباسار ەتىپ العاننان كەيىن: «بۇل - ماسقارا! اقىلعا سىيمايتىن جاعداي! بۇدان كەيىن پارتيادا بولا المايمىن!» دەپ ەسىگىن تارس جاۋىپ كەتتىم. جالعان وپپوزيتسيا!
جاس قازاق: قاراشا ايىندا مۇنايشىلاردىڭ ءىس-ارەكەتى مەن تالاپتارى زاڭ شەڭبەرىنەن شىعىپ كەتتى دەپ كورسەتتىڭىز. ءسىز ول كەزدە جاڭاوزەندە بولدىڭىز، ءبارىن كوزىڭىزبەن كوردىڭىز. وسى جاعىن دا تارقاتىپ ايتىپ بەرسەڭىز؟
سەرىك ساپارعالي: نەگىزىنەن، مۇنايشىلاردىڭ تالاپ-تىلەگىنىڭ نەگىزى بار. جۇمىسشىلاردىڭ جالاقىسىنان كەم دەگەندە 13 ميلليارد تەڭگە جەلىنگەن. 80 پايىز سىياقىنىڭ 42 پايىزىن كەسىپ تاستاعان. بۇل جەردە ۇلكەن جەمقورلىق جاتىر...
بىراق باستاپقىدا-اق زاڭدى جولمەن جۇرمەدى. ەڭبەك كودەكسىندە ەڭبەك داۋى باستالار الدىندا ۇجىمنىڭ جينالىسى بولۋى كەرەك. سول جينالىسقا كەلگەن ادامداردىڭ جارتىسىنان كوبى تالاپ-تىلەكتى قولداپ قول كوتەرۋى كەرەك ەدى. 23 قاراشادا جينالىسقا قاتىستىم. «قازمۇنايگازدىڭ» بارلاۋ ءوندىرۋ» اق-نىڭ باس ديرەكتورىنىڭ ءبىرىنشى ورىنباسارى ۆلاديمير ميروشنيكوۆ پەن ك.ەشمانوۆ ەكەۋى: «بىتىمگەرشىلىك كوميسسيا قۇرايىق، سىزدەر جۇمىسقا شىعىڭىزدار»، - دەپ ۇسىنىس جاسادى. سول كەزدە ناتاليا اجىعاليەۆا: «بىزگە سوكولوۆانى الىپ كەلىڭدەر. تولەماقى ماسەلەسى شەشىلگەنشە وسىندا وتىرامىز»، - دەپ كەلىسسوزدەن باس تارتقان. مۇنايشىلار الدىنا شىعارعان ادامداردىڭ كەلىسسوزگە يكەمى بولماعان. ولاردىڭ قۇقىقتىق شەڭبەرگە تۇسۋگە مۇمكىندىگى بولدى. بەس ادامدى بىتىمگەرلىك كوميسسياعا كىرگىزىپ، ولاردىڭ تالاپتارى بويىنشا جۇمىس ىستەتتىرىپ، قالعانى جۇمىسقا شىققانى ءجون بولار ەدى. ارتىق تالاپتاردى الىپ تاستاۋ كەرەك ەدى. اۋداندىق كوميتەتتىڭ 60 پايىزىن بەرۋ، جەكەشەلەندىرىلگەن كاسىپورىنداردى قايتارۋ - ەڭبەك داۋىنا كىرمەيتىن ماسەلەلەر...
جاسارال قۋانىشالى: مۇنايشىلاردىڭ ەرەۋىلى جالعىز جالاقىعا كەلىپ تىرەلىپ تۇرعان جوق. جالپى، بۇرىننان كەلە جاتقان داۋ-داماي. 2008 جىلى، ودان كەيىن دە ەرەۋىلدەر بولعان. ول كەزدە مۇنايشىلاردىڭ تالاپتارى ورىندالىپ، بەيبىت تۇردە شەشىلىپ وتىردى. ءتىپتى، بىرنەشە باستىقتى ورىندارىنان الىپ تاستاعان. 2011 جىلعا دەيىن سولاي بولىپ كەلدى.
سوسىن، جوعارعى جاق: «قاشانعى بۇلاردىڭ تالاپتارىن ورىنداي بەرەمىز؟» - دەپ، شەگىنبەۋگە بەكىنگەن بولۋى كەرەك... مۇنايشىلار تاراپىنان قاتەلىك كەتسە، ول - فورمالدى تۇردەگى قاتەلىك.
جاس قازاق: جاڭاوزەندە نەگە تەك قانا «العا» پارتياسى ۇرانداتىپ ءجۇردى؟ شىن مانىندە، ارانداتۋشىلىق بولعان جوق پا؟ ماسەلەن، اتاباەۆتىڭ جاڭاعى ءسوزى تۋرالى نە ايتۋعا بولادى؟
جاسارال قۋانىشالى: ارانداتۋشىلىق بولعان جوق. ەڭ العاشقىدا «العاعا» باقىتجان دەگەن ءبىر مۇنايشى كەلىپ، زاڭگەرلىك جاعىنان كومەك سۇرادى. ەستاي قاراشاەۆ تا كەلىپ كومەك سۇرادى. بۇل - فاكت. سودان كەيىن «العا» پارتياسى كومەك كورسەتە باستادى. بىراق بار ماسەلەسىن شەشىپ بەرەتىندەي، «العا» ۇكىمەت باسىندا وتىرعان جوق.
جاس قازاق: ساياسي رەڭك بەرۋگە تىرىسۋشىلار بولدى ەمەس پە؟ ونى نەگە جاسىرامىز؟ ءتىپتى، بۋما-بۋما دوللارمەن ۇستالىپ جاتقاندار بولعان جوق پا، سول كەزدە؟
جاسارال قۋانىشالى: اقشا الىپ جۇرۋگە بولمايدى دەپ كىم ايتتى؟ ولاردى ۇستاپ الۋعا كىمنىڭ حاقىسى بار؟ جانبولات مامايدىڭ قالتاسىنداعى اقشانى نەگە تۇگەندەيدى؟ اقشا الىپ ءجۇرۋ - قىلمىس ەمەس!
جاس قازاق: ءبىز 70 جىل بويى بولشەۆيكتەردى بيلىككە اكەلگەن حالىق دەپ وقىپ، سوعان سەنىپ كەلدىك. قازىر ول رەۆوليۋتسيانىڭ قالاي جاسالعانىن جاقسى بىلەمىز. شەتەلدەن، ناقتىراق ايتقاندا، گەرمانيادان ۆاگون-ۆاگون اقشا كەلگەن. رەۆوليۋتسيا سول اقشانىڭ كۇشىمەن جاسالعان. كەز كەلگەن توڭكەرىس قارجىمەن جاسالادى. مۇنى قازىر ەڭكەيگەن قاريادان، ەڭبەكتەگەن بالاعا دەيىن بىلەدى.
جاسارال قۋانىشالى: ءيا، ول كەزدە توڭكەرىسشىلەر اقشا تابۋ ءۇشىن توناۋمەن اينالىسقان. ءستاليننىڭ ءوزى بانك توناعان. ونىڭ ءجونى بولەك دەگەنىم سول. بۇل جەردە ونداي اقشا كەلىپ جاتقان جوق.
جاس قازاق: ءابىلازتىڭ بتا-دان توناپ كەتكەن ميللياردتارى شە، ول قايدا جۇمسالىپ جاتىر، سوندا؟
سەرىك ساپارعالي: جاكەڭدى كىشكەنە تۇزەيتىن جەر بار. بۇل جەردە كوزلوۆتىڭ ار جاعىندا ءابىلازوۆ تۇر.
جاسارال قۋانىشالى: ونى ايتىپ وتىرمىن.
سەرىك ساپارعالي: ول تۋرالى ءبىر مارتە دە ايتقان جوقسىز. ال مەن كوزلوۆ ءۇشىن وتىردىم دەپ ايتقان جوقپىن. ماسەلە وندا ەمەس.
جاسارال قۋانىشالى: سەن سولاي ايتتىڭ عوي، ءوز اۋزىڭمەن ايتىلدى.
سەرىك ساپارعالي: مەن «ناۋرىز ايىنان بەرى قاراي» دەدىم. «مەن ءۇش رەت كوزلوۆتىڭ نۇسقاۋىمەن باردىم» دەسەم، سول جەتەر ەدى، جارتى جىل بۇرىن - ناۋرىز ايىندا بوستاندىققا شىعار ەدىم. مەن ونى مويىندامادىم.
جاسارال قۋانىشالى: مويىنداساڭ، وتىرىك ايتقان بولاسىڭ عوي.
سەرىك ساپارعالي: ەسەسىنە، بولات اتاباەۆ پەن جانبولات ماماي سياقتى سىتىلىپ كەتەر ەدىم.
جاسارال قۋانىشالى: وندا وتىرىك ايتقان بولار ەدىڭ! جالا جاپقاندار ونسىز دا كوپ بولدى.
سەرىك ساپارعالي: مەن كىمگە جالا جاۋىپپىن، جاكە!
جاسارال قۋانىشالى: جالا جاپساڭ، كىم بولار ەدىڭ؟!
سەرىك ساپارعالي: مەن سىزگە سۇراق قويىپ تۇرمىن. ايتىڭىزشى، كىمگە جالا جاپتىم؟
جاسارال قۋانىشالى: جاپقان جوقسىڭ.
سەرىك ساپارعالي: وندا نەگە ماعان شابۋىلداپ جاتىرسىزدار؟
جاسارال قۋانىشالى: ەشقانداي دا شابۋىل بولعان جوق. ءباسپاسوز ءماسليحاتىندا تۇرمەدە وتىرعان كوزلوۆقا كىنا تاقتىڭ.
سەرىك ساپارعالي: قانداي كىنا تاعىپپىن؟
جاسارال قۋانىشالى: اقشا جونىندە بىردەڭەلەر ايتتىڭ. 75 مىڭ دوللار قالتاسىندا ءجۇر دەپ...
سەرىك ساپارعالي: ايسۇلۋ ەكەۋىڭىز شابۋىلداڭىزدار عوي. بۇل ۇيات بولدى!
جاسارال قۋانىشالى: ۇيات نارسە جاساعان - سەن. ءباسپاسوز ءماسليحاتىڭ ماسقارا بولدى!
سەرىك ساپارعالي: نەلىكتەن؟
جاسارال قۋانىشالى: ءباسپاسوز قۇرالدارىن كىنالادىڭ. قاسىڭدا وتىرعان كوزلوۆتى كىنالادىڭ. بىراق بيلىك تۋرالى ءبىر ءتۇيىر نارسە ايتپادىڭ.
سەرىك ساپارعالي: سوندا مەن نە ءۇشىن سوتتالدىم؟ جاكەڭ «جاڭاوزەنگە جەتى اي بويى بارا الماي ءجۇردىم» - دەيدى. بۇل ءوزى - كۇلكىلى جاعداي. ال باستىعىن قاماپ قويىپ ەدى، اپتا سايىن بارىپ ءجۇردى.
جاسارال قۋانىشالى: نە دەپ تۇرسىڭ؟! مەن ءبىر-اق رەت باردىم.
سەرىك ساپارعالي: اقتاۋدا نەشە كۇن بولدىڭىز؟
جاسارال قۋانىشالى: سوتتىڭ اياعىنا دەيىن بولدىم.
سەرىك ساپارعالي: مىنە، كوردىڭىز بە؟ سوندا بارىپ جاتقانسىز. ال مۇنايشىلار قيىندىققا تاپ بولعاندا بارۋعا جارامادىڭىز!
جاسارال قۋانىشالى: جاڭا ايتتىم عوي، ءوزىم سوتتالىپ جاتتىم دەپ. سەن كىناڭدى ماعان قاراي بۇرما! ءوزىڭنىڭ نە بۇلدىرگەنىڭدى ءبىل!
سەرىك ساپارعالي: ۇلتتىق مۇددەنى وليگارحتىڭ - ءابىلازوۆتىڭ ماي شەلپەگىنە ايىرباستاپ جىبەردىڭىز!
جاسارال قۋانىشالى: بەرگەن انتىڭنان تايدىڭ! «ولسەم دە، تايمايمىن»، - دەپ انت بەرگەن بۇل!
سەرىك ساپارعالي: مەن كىمدى كورسەتىپ بەرىپپىن؟
جاسارال قۋانىشالى: ەشكىمدى كورسەتپەي-اق قوي، سەن ءوزىڭدى ءوزىڭ ساتتىڭ!
سەرىك ساپارعالي: وندا نە شارۋاڭ بار؟
جاسارال قۋانىشالى: ابىلازوۆتەن اقشا العانىمدى دالەلدەشى، قانە! جالا جاۋىپ وتىرسىڭ ماعان! كوك تيىن جۇمسالعان جوق! اقشاعا جۇمىس ىستەگەن جوقپىز. سەن سەكىلدى «قىرام-جويام» دەگەنىم جوق. «العادا» نە دەگەنىڭ ەسىڭدە بار ما؟
سەرىك ساپارعالي: قازاقتار قينالىپ جاتقاندا اياق باسقان جوقسىڭ! كوزلوۆتى ۇستاعاندا شاڭدارىڭ شىعىپ كەتتى!
جاسارال قۋانىشالى: شاڭىم شىعادى...
سەرىك ساپارعالي: سەندەر مۇنايشىلاردىڭ ماسەلەسىن ءالى كۇنگە دەيىن تۇسىنبەي جۇرسىڭدەر! ەگەر ماعان شابۋىلدايتىن بولساڭدار، 61 تومنىڭ ءبارىن ينتەرنەتكە شىعارامىن. قازىر ءابىلازوۆتىڭ اقشاسى بولعان سوڭ شاشباۋىن كوتەرىپ ءجۇر. اقشاسى بىتكەن كۇنى وليگارح بۇلاردىڭ بىرەۋىن دە تابا الماي قالادى.
جاسارال قۋانىشالى: مەن ابىلازوۆتەن ءبىر تيىن العان ەمەسپىن. ەش ۋاقىتتا ەشكىمگە ساتىلعان ەمەسپىن. ءبىر جارىم قابات ءۇيىم بار. سوندا تۇرىپ جاتىرمىن. زەينەتاقىممەن كۇن كورىپ ءجۇرمىن. سوندىقتان اياعىم تۇساۋلى. باراتىن جەرگە بارا الماي قالامىن.
سەرىك ساپارعالي: حالىق مەنىڭ جاعىمدا. حالىقتىڭ مەنى قالاي قارسى العانىن كوردىڭ؟ سەنىڭ قاسىڭدا كىم بار؟ ءبىر ادامنىڭ اتىن ايتىپ بەرشى؟
جاسارال قۋانىشالى: كوزلوۆتان «ءبىر كەلى كۇرىش، ەكى كەلى تاعى بىردەڭە» سۇرادىم دەيسىڭ...
سەرىك ساپارعالي: مەن حالىققا كومەك سۇرادىم.
جاسارال قۋانىشالى: حالىق ءۇشىن ولاي سۇرامايدى. ەركەك بولساڭ، ءوز قالتاڭنان بەر. مەن اقشا ءۇشىن جۇرگەن جوقپىن.
سەرىك ساپارعالي: وندا نەگە ءابىلازوۆتىڭ ادۆوكاتى بولىپ تۇرسىڭ! زاڭدى تۇردە ەشكىم ميللياردەر بولا المايدى. سوعان ميىڭ جەتپەي تۇر ما؟ ءابىلازوۆتى نەگە داتتامايسىڭ؟
جاسارال قۋانىشالى: داتتامايمىن.
سەرىك ساپارعالي: مەن 61 تومدى تۇگەل وقىپ شىقتىم، بىراق ءابىلازوۆتىڭ حالىق ءۇشىن ىستەگەن ءبىر نارسەسىن كورگەنىم جوق، حالىققا جانى اشىعان ءبىر ءسوزىن ەستىگەنىم جوق. كوزلوۆقا سەنىڭ ىستەرىڭ تۋرالى جەتكىزەمىن. ول سەندەردى ورىندارىڭا قويادى. سەندەردى ەرتەڭ-اق قۋىپ جىبەرەدى... الدىڭعى كۇنى - اسلان مۋسين، سوسىن عالىمجان جاقيانوۆ، كەشە - بولات ابىلەۆ، ەندى بۇگىن - كوزلوۆ پەن ءابىلازوۆ پايعامبار!
جاسارال قۋانىشالى: راس، مەنى قىزمەتكە اسلان مۋسين شاقىردى. «مەن oپپوزيتسيادا جۇرگەن اداممىن، قىزمەتكە كەلىپ، سەنىڭ بۇيرىعىڭدى ورىنداپ وتىرامىن با؟» - دەپ ساۋال تاستادىم. «ەشقانداي بۇيرىق بولمايدى، «ءوز قالاۋىڭشا جۇمىس ىستەڭىز»، - دەدى ول. كارت-بلانش بەردى. سودان كەيىن باردىم. اقپارات جانە قوعامدىق كەلىسىم باسقارماسىنىڭ باستىعى بولدىم. سول كەزدە ءتىل ءۇشىن قىتاي كومپانيالارىمەن، باسقالارمەن دە كۇرەستىم...
سەرىك ساپارعالي ءوزى عايباتتاپ وتىرعان ءابىلازوۆتىڭ اقشاسىمەن ءجۇردى. جاڭاوزەنگە باردى، ۇشاقپەن ۇشتى. اقشانى كىمنەن الدى؟ سولاردان الدى. سويتە تۇرا، ماعان كيلىگىپ وتىر. وزگەرە قالىپتى...
سەرىك ساپارعالي: ءابىلازوۆتىڭ مەديا-رەسۋرستارى ماعان قاتىستى دۇرىس اقپارات تاراتىپ جاتقان جوق... «حالىق مايدانى» ءابىلازوۆتىڭ جوباسى ەكەنىن بىلمەگەن ەدىم... كونستيتۋتسيادان ورىس ءتىلىنىڭ مارتەبەسىن الىپ تاستاۋ تۋرالى 138-ءدىڭ حاتىنا قول قويعان ادامنىڭ ءبىرى - مەنمىن. قول قويعانداردىڭ كوبى باس تارتقان كەزدە، ءوز پىكىرىمدە قالدىم. سوندىقتان ولار («العالىقتار» - رەد.) مەنى جاقتىرمايتىن بولار.
ر.S. اڭگىمە وسىلاي اياقسىز قالدى.
شاديار وستەمىرۇلى
"جاس قازاق" گازەتى
