ۋكراينا پرەزيدەنتى ۆلاديمير زەلەنسكي بەينەۇندەۋ جاريالاپ رەسەيلىك باسقىنشىلار دونباستا قىسىمدى كۇشەيتىپ جاتقانىن حابارلادى. 

"ۋكراينانىڭ قارۋلى كۇشتەرى حاركوۆ وبلىسىن ازات ەتۋ ءۇشىن العا جىلجۋىن توقتاتقان جوق. بىراق دونباستا باسقىنشىلار قىسىمدى ودان ءارى كۇشەيتۋگە تىرىسىپ جاتىر. ول جەردە توزاق ورنادى. مەن اسىرەلەپ تۇرعان جوقپىن. سەۆەرودونەتستى اياۋسىز بومبالاۋدا. ءبىر كۇندە 12 ادام قايتىس بولدى، ونداعان ادام جارالاندى. ءبىزدىڭ باسقا قالالارىمىزدى بومبالاۋ مەن اتقىلاۋ، رەسەي ارمياسىنىڭ اۋە جانە زىمىران شابۋىلدارى - بۇل سوعىس كەزىندەگى ۇرىسقا مۇلدە جاتپايدى.  

كوپتەگەن ادام چەرنيگوۆ وبلىسىنداعى رەسەيدىڭ سوققىلارىنىڭ، اسىرەسە دەسناعا جاسالعان اياۋسىز سوققىنىڭ قۇربانى بولدى. ۇيىندىلەر ءالى ارشىلىپ جاتىر. ودەسسا وبلىسىنا، ورتالىق ۋكراينانىڭ قالالارىنا جاسالعان تولاسسىز اتقىلاۋلار دونباستى تولىعىمەن جويدى. مۇنىڭ ءبارىن رەسەي ەشقاشان ءتۇسىندىرىپ بەرە المايدى",- دەدى ۋكراينانىڭ مەملەكەت باسشىسى.

زەلەنسكي بۇل - ۋكراينا حالقىن قىرۋعا باعىتتالعان گەنوتسيد ەكەنىن ايتتى. "وسى ارەكەتتەرى ءۇشىن باسقىنشىلار سوت الدىندا جاۋاپ بەرەدى", - دەدى ول.

ۋكراينا پرەزيدەنتى 19 مامىردا ۇلىبريتانيا پرەمەر-ءمينيسترى بوريس دجونسونمەن جانە ەۋروپالىق كوميسسيا پرەزيدەنتى ۋرسۋلا فون دەر ليايەنمەن قارجىلاي كومەك جانە اۋىل شارۋاشىلىعى ونىمدەرىن ەكسپورتتاۋ جايىندا سويلەستى.

Abai.kz