قازاق اتى "ەركىندىك" دەگەن ماعىنا بەرەدى. حالىقتىڭ اتى ءوز تىلىندە دۇرىس جازىلعان.

ال ورىس تىلىندە 1936 جىلى ونى بۇرمالاعان. ورىس تىلىندەگى "كازاك" دەگەن اتاۋ ورىس كازاكتارىنا جانە قازاقتارعا ورتاق بولىپ شىقتى. ەكى جاقتىڭ ءبىر اتقا تالاسىندا ۇلىورىستىق كوزقاراس ۇستەم بولىپ، "كازاك" اتى ورىس كازاكتارىنا بەرىلدى.

ال قازاقتاردىڭ ورىس تىلىندەگى جازبا جانە ايتىلۋ اتىنىڭ سوڭعى ءارپى وزگەرىپ، "ك" ءارپىن "ح" ارپىمەن الماستىردى.

ءسويتىپ، قازاق تىلىندە "قازاق", ال ورىس تىلىندە "كازاح" دەگەن جاساندى ات پايدا بولدى.

ورىس تىلىندەگى "كازاح" ءسوزى ەندى "ەركىن" دەگەن ماعىناعا يە بولا الماي قالدى.

كەرىسىنشە، قازاق اتىنا سايكەس "ەركىن" ماعىنانى "كازاك" اتىن يەمدەنگەن ورىس كازاكتارى يەلەندى.

سوندىقتان، ەلىمىز لاتىن ارپىنە كوشىپ، "قازاق" اتىن ارىپتىك نەگىزدە پايدا بولعان ەكىۇدايلىق ماعىنادان ارىلتۋ كەرەك.

ءسويتىپ، ءبىز "قازاق" پەن "ەركىن" سوزدەرىنىڭ بىرماعىنالىق قالپىن قايتادان ورنىنا قويۋىمىز كەرەك.

ال، كەزىندە، يمپەريادان قاشىپ، وزدەرىن قورعاۋ ءۇشىن كەڭ دالادا ەركىن جاتقان حالىقتىڭ اتىن جامىلعاندار ءوز اتىن قالاي اتايتىنىن وزدەرى شەشە جاتادى.

بىراق الەمدە "قازاق" اتتى ءبىر عانا ۇلت بار ەكەنىن، "ورىس كازاكتارى" نە باسقا ءبىر "كازاكتار" دەگەن ۇلت بولمايتىنىن، ونداي ۇلت جوق ەكەنىن ولار بىلۋلەرى كەرەك.

ءابدىراشيت باكىرۇلى

Abai.kz