جۋىردا ءاسانالى ءاشىموۆ، دۋلات يسابەكوۆ، سماعۇل ەلۋباي، ۇلىقبەك ەسداۋلەت باستاعان ءبىر توپ زيالى قاۋىم وكىلى پرەزيدەنت قاسىم-جومارت توقاەۆتىڭ اتىنا قاراتا جازىلعان ءۇشبۋ حاتتى رەداكتسيامىزعا جولداپتى.

وندا ەسىمدەرى ەلگە سىيلى ەل اعالارى ماڭعىستاۋ وبلىسى اكىمىنىڭ ورىنباسارى عالىمجان نيازوۆقا اراشا سۇراپتى. ءبىز اتالعان اشىق حاتتى Abai.kz اقپاراتتىق پورتالىندا جاريالاپ وتىرمىز.

قر پرەزيدەنتى ق.توقاەۆ مىرزاعا

ءبىر توپ زيالى قاۋىم وكىلدەرىنىڭ اتىنان

اشىق حات

قۇرمەتتى قاسىم-جومارت كەمەلۇلى!

ءسىز حالىقتى جاڭا ءداۋىر – جاڭا قازاقستانعا باستاپ كەلەسىز. قازىرگى جاعدايعا بايلانىستى «ەستيتىن مەملەكەت»، جاڭا كەزەڭ، تازا، ادىلەتتى قوعام قۇرۋعا دەگەن سەنىم ءبىزدىڭ ءۇمىتىمىزدى وياتتى. ەلىمىز بەن جەرىمىز ءۇشىن، مەملەكەتىمىزدىڭ بولاشاعى ءۇشىن جاساپ جاتقان ەڭبەگىڭىزگە ريزاشىلىعىمىزدى بىلدىرەمىز.

جان ساۋعا سۇراۋ قازاق حالقىنىڭ ەجەلدەن كەلە جاتقان اتا سالتى، ەگەر ەل اقساقالدارى، اقىندارى ءوتىنىش جاساعاندا ودان ەشبىر حان اتتاپ كەتپەگەن. ءسىز دە اتا سالتىن ساقتاپ، قازاقستاننىڭ حالىق جازۋشىسى، قازاقستاننىڭ ەڭبەك ەرى، مەملەكەت جانە قوعام قايراتكەرى ءابىش كەكىلباەۆتىڭ ءىنىسى عالىمجان نيازوۆتىڭ تاعدىرىنا اراشا تۇسەدى دەپ سەنەمىز.

ماڭعىستاۋ ءوڭىرىنىڭ بولاشاعىنان زور ءۇمىت كۇتتىرەتىن ءبىر ازاماتى جازىقسىزدان جازىقسىز، قاماۋعا الىندى. قاڭتار وقيعاسى الدىندا جاڭاوزەن قالاسىندا گازعا بايلانىستى حالىق ميتينگكە شىققانىن جاقسى بىلەسىز. سول كەزدە گازدىڭ باعاسىن نەگىزسىز كوتەردىڭ دەگەن جەلەۋمەن ماڭعىستاۋ وبلىسى اكىمىنىڭ ورىنباسارى عالىمجان نيازوۆ قىلمىستىق جاۋاپكەرشىلىككە تارتىلىپ، كۇدىكتى رەتىندە 4 اي ءۇي قاماقتا وتىر. بىراق ول گاز باعاسىن كوتەرمەك تۇگىلى، وعان ارالاسا دا المايدى. ويتكەنى، وسى كۇنگە دەيىن مۇناي، گاز سالاسى بەلگىلى ءبىر توپتىڭ عانا ىقپالىندا بولعان. سوندىقتان بۇل ورىن العان قاڭتار وقيعاسىنا جاۋاپتى ادامداردى قورعاپ قالۋ ءۇشىن بارلىق كىنانى ءبىر ادامعا جابا سالۋدى ماقسات ەتىپ وتىر.

عالىمجان نيازوۆ – ماڭعىستاۋ ءوڭىرىنىڭ ءتول پەرزەنتى. ول اقتاۋ قالاسىنىڭ اكىمى بولىپ تاعايىندالعاندا جىگەرلى جاس وبلىس ورتالىعىن كوركەيتۋگە كوپ ەڭبەك ءسىڭىردى. ۇيىمداستىرۋشىلىق قارىم-قابىلەتىن، كۇش-جىگەرىن اياماي سارپ ەتىپ، ەل ءۇمىتىن اقتادى. قالا كوشەلەرى كورىكتەندىرىلىپ، تۇرعىن ءۇي قۇرىلىسى جەدەل قارقىنمەن دامىدى. اقتاۋ قالاسىنىڭ باسشىلىعىنداعى وسىنداي ورەلى ىستەرى مەن باتىل شەشىمدەرى ەسكەرىلىپ، عالىمجان وبلىس اكىمىنىڭ ورىنباسارى قىزمەتىنە تاعايىندالدى. ول بۇل جاۋاپكەرشىلىگى جوعارى قىزمەتكە دە ءوزىنىڭ جاستىق جىگەرى مەن ۇيىمداستىرۋشىلىق قابىلەت-كارىمىن ايانباي جۇمساپ، بارلىق قىرىنان كورسەتە ءبىلدى. قاڭتار ايىنىڭ باسىندا گاز باعاسىن كۇرت قىمباتتاتۋ تۋرالى شەشىمنىڭ شىعۋىنا وبلىس اكىمىنىڭ ورىنباسارى عالىمجان نيازوۆتىڭ ەشقانداي تىكەلەي دە، جاناما دا قاتىسى بولماعان. جالپى، بولشەك ساۋداداعى باعالاردى رەتتەۋمەن وبلىس اكىمدىگى ەمەس، مونوپولياعا قارسى باسقارما اينالىساتىنىن ەسكەرۋ كەرەك. سوندىقتان وبلىس اكىمىنىڭ ورىنباسارى، ءوسىپ كەلە جاتقان جاس كادر – عالىمجاننىڭ زاڭسىز قاماۋعا الىنۋى، جىگەرلى جاستىڭ ناقاقتان جالالى بولىپ وتىرعانى ەسكەرىلسە ەكەن دەيمىز.

قۇرمەتتى قاسىم-جومارت كەمەلۇلى!

«ەلىم-قازاعىم!»، - دەپ دۇنيەدەن وتكەن زامانىمىزدىڭ زاڭعار تۇلعاسى ءابىش كەكىلباەۆتىڭ ءىنىسىن ەش نەگىزسىز تار زىڭدانعا قاماساق، بۇل ارىمىزعا سىن ەمەس پە؟

Abai.kz