ءماجىلىستىڭ ەكس-دەپۋتاتى بەكبولات تىلەۋحان تۇركيا مەملەكەتىنىڭ ازاماتتىعىن الۋعا ءوتىنىش بەردى، دەپ جازادى  Ulysmedia.kz.

باسىلىم دەرەككوزى بەرگەن مالىمەت بويىنشا، بەكبولات تىلەۋحان ستامبۇل قالاسىنان التى بولمەلى پاتەر ساتىپ العان. پاتەردىڭ مەكەن-جايى بويىنشا ەكس-دەپۋتاتتىڭ وزىمەن بىرگە 39 جاستاعى جانار تاپەنوۆا تىركەلگەن. ولاردىڭ التى بالاسى بار. جانار تاپەنوۆا جاقىندا نۇر-سۇلتان قالاسىنداعى جىلجىمايتىن مۇلىكتەرىن ساتقان ەكەن.

بەكبولات تىلەۋحان قازاقستانداعى قاڭتار وقيعالارىنا دەيىن دەپۋتاتتىق وكىلەتىن توقتاتىپ، تۇركياعا كەتىپ قالعان بولاتىن.

بيىلعى ورازا ۋاقىتىندا ونىڭ تۇركيالىق قازاقتارعا اۋىزاشار بەرىپ، داستارحان باسىندا پرەزيدەنت رەجەپ ەردوعاننىڭ ۇلى، كاسىپكەر ءبىلال ەردوعانمەن وتىرعان سۋرەتى جەلىدە جاريالاندى.

قازىر تىلەۋحاننىڭ وتباسى تۇركيادا ىقتيار حاتپەن تۇرىپ جاتىر. ەندى ول تۇرىك ەلىنىڭ ازاماتتىعىن الۋعا ءوتىنىش بەرگەن.

بۇعان دەيىن، بەكبولات تىلەۋحان كۇتپەگەن جەردەن، 2021 جىلدىڭ 29 جەلتوقسانىندا مەرزىمىنەن بۇرىن دەپۋتاتتىق وكىلەتتىگىن توقتاتقان بولاتىن. سودان كەيىن، ءماجىلىستىڭ بۇرىنعى توراعاسى نۇرلان نىعماتۋلين تىلەۋحانوۆتىڭ دۇنيەجۇزىلىك ەتنوسپورت كونفەدەراتسياسىنىڭ ۆيتسە-پرەزيدەنتى بولىپ تاعايىندالعانىن حابارلادى.

بەكبولات تىلەۋحان ساياسي مانسابىن 1996 جىلى پرەزيدەنتتىك وركەستردىڭ كوركەمدىك جەتەكشىسى لاۋازىمىنان باستاعان. كەيىن ول مادەنيەت ۆەدومستۆوسىنداعى كوميتەتتى از ۋاقىت باسقارىپ، دەرەۋ مادەنيەت ۆيتسە-ءمينيسترى بولىپ تاعايىندالادى. ول ەل ىشىندە بۇرىنعى پرەزيدەنت نۇرسۇلتان نازارباەۆتىڭ سوزدەرىنە جازىلعان اندەردىڭ اۆتورى رەتىندە تانىمال.

2004 جىلدان باستاپ كومپوزيتور تىلەۋحان پارلامەنت ءماجىلىسىنىڭ دەپۋتاتى بولىپ سايلاندى. ول «نۇر وتان» پارتياسىنا جان-تانىمەن بەرىلگەن قىزمەتشى بولدى. سونداي-اق، ول 2012-2016 جىلدارى قازاقستاننىڭ ۇلتتىق سپورت تۇرلەرى قاۋىمداستىعىنىڭ پرەزيدەنتى بولىپ قىزمەت ەتكەن.

باسىلىمنىڭ جازۋىنشا، تىلەۋحاننىڭ باسشىلىعى كەزىندە «ۇيىمنىڭ بىلىققا بەلشەسىنەن باستقانىن» سپورتشىلار بىرنەشە مارتە ايتقان. سول كەزدەرى ۇيىمعا «سامۇرىق-قازىنا» قورى بولگەن ميلليارد تەڭگەنى قايرات ساتىبالدى ۇرلانعان.

ايتا كەتەيىك، بەكبولات تىلەۋحان يسلامدىق اعىم – ءسالافيزمدى ۇستاناتىنىن ەشقاشان جاسىرعان ەمەس. ونى ءوزىنىڭ سوزدەرىندە ۇنەمى ءبىلدىرىپ جۇرەتىن.

«بىرنەشە وتباسىندا تاتۋلىقتى ساقتاۋدىڭ ءبىر عانا جولى بار. بۇل قۇدايدان قورقۋ جانە قۇدايعا دەگەن سەنىم. باسقا جول جوق. قازاقتار «بارىڭمەن بولىسكەنشە، جانىڭمەن ءبولىس» دەپ بەكەر ايتپايدى. بۇل وتە قيىن نارسە. وتباسىڭنىڭ قانداي بولۋى سەنىڭ ادامگەرشىلىگىڭە بايلانىستى. مەنى ۇنەمى تاۋەكەلگە باس تىكسىن دەپ، اللاح ۇنەمى تاڭداۋ ۇستىندە قالدىرادى»، - دەگەن بولاتىن تىلەۋحان «قازاقستان» تەلەارناسىنا بەرگەن سۇحباتىندا.

ماقالا بارىسىندا، ونىڭ ىقپالدى تۋىستارى بار ەكەنى ايتىلىپتى. مىسالى، قۇقىقتىق جانە قىلمىستىق ورتادا ۇلكەن بەدەلگە يە رامازان تىلەۋحانوۆ بەكبولات تىلەۋحاننىڭ اعاسى. ۇلكەن تىلەۋحانوۆ – زاڭ عىلىمدارىنىڭ دوكتورى، جاراتىلىستانۋ عىلىمدارى اكادەمياسىنىڭ كوررەسپوندەنت-مۇشەسى، قارجى پوليتسياسى اكادەمياسىنىڭ قۇرمەتتى پروفەسسورى.

Abai.kz