قازاقستاننىڭ تۇڭعىش پرەزيدەنتى كۇنى مەملەكەتتىك مەرەكەلەر قاتارىنان الىنىپ تاستالادى.

دەپۋتاتتار جىل سايىن ءبىرىنشى جەلتوقساندا اتالىپ وتەتىن داتالى كۇندى قاراپايىم كۇنگە اينالدىرۋدى ءجون كورىپتى.

بۇگىن قر پارلامەنتى ءماجىلىسىنىڭ پلەنارلىق وتىرىسىندا "قر كەيبىر زاڭنامالىق اكتىلەرىنە كينەماتوگرافيا جانە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىنا تۇزەتۋلەر ەنگىزۋگە ۇسىنىس ايتىلدى. ءماجىلىستىڭ بەيىندى كوميتەتىنىڭ قورىتىندىسىندا انىقتالعانداي، قۇجاتتا دەپۋتاتتار مەملەكەت باسشىسىنىڭ 2022 جىلعى 16 ماۋسىمداعى ۇلتتىق قۇرىلتاي وتىرىسىندا بەرگەن تاپسىرماسىن ورىنداۋ ءۇشىن "قر-داعى مەرەكەلەر تۋرالى" قر زاڭىنا بىرقاتار تۇزەتۋلەر ەنگىزگەن.

ولار مەملەكەت باسشىسىنىڭ 2022 جىلعى 16 ماۋسىمدا وتكەن ۇلتتىق قۇرىلتاي وتىرىسىندا بەرگەن تاپسىرماسىن ورىنداۋ ءۇشىن "قر - داعى مەرەكەلەر تۋرالى" قر زاڭىنا مىناداي تۇزەتۋلەر ەنگىزدى: 25 قازان ۇلتتىق مەرەكە – رەسپۋبليكا كۇنى بولىپ بەلگىلەنسىن; 16 جەلتوقسان - تاۋەلسىزدىك كۇنى مەملەكەتتىك مەرەكە رەتىندە بەلگىلەنسىن، - دەپ جازىلعان قۇجاتتا.

بۇدان باسقا، 1 جەلتوقسان – تۇڭعىش پرەزيدەنت كۇنىن مەرەكەلەۋدى مەملەكەتتىك رامىزدەر كۇنى، العىس ايتۋ كۇنى جانە باسقا دا قوعامدىق ماڭىزى جوعارى وزگە دە كۇندەر سياقتى، ونى مەملەكەتتىك مەرەكەلەر قاتارىنان الىپ تاستاۋ ۇسىنىلعان.

تۇڭعىش پرەزيدەنت كۇنىن قازاقستاندا 2012 جىلدان باستاپ مەملەكەتتىك مەرەكە رەتىندە اتاپ وتەدى.

2011 جىلى 10 جەلتوقساندا قر پارلامەنتى سەناتىنىڭ پلەنارلىق وتىرىسىندا "قازاقستان رەسپۋبليكاسىنداعى مەرەكەلەر تۋرالى" قر زاڭىنا تولىقتىرۋلار ەنگىزۋ تۋرالى" زاڭ قابىلداندى.

"1-باپ. "قازاقستان رەسپۋبليكاسىنداعى مەرەكەلەر تۋرالى" 2001 جىلعى 13 جەلتوقسانداعى قازاقستان رەسپۋبليكاسىنىڭ زاڭىنا مىناداي تولىقتىرۋ ەنگىزىلسىن: 3 – باپ مىناداي مازمۇنداعى توعىزىنشى ابزاتسپەن تولىقتىرىلسىن: "قازاقستان رەسپۋبليكاسىنىڭ تۇڭعىش پرەزيدەنتى كۇنى-1 جەلتوقسان".

2 باپ. وسى زاڭ قول قويىلعان كۇنىنەن باستاپ قولدانىسقا ەنگىزىلەدى",-دەلىنگەن قۇجاتتا.

جىلدا قازاقستاندىقتار مەرەكەگە وراي ءبىر كۇن دەمالىس الادى. تەلەارنالار نازارباەۆتىڭ ءومىرى مەن ونىڭ پرەزيدەنتتىك ۋاقىتى تۋرالى فيلمدەردى كورسەتەدى. كۇنى بويى بۇكىل ەل بويىنشا قازاقستاننىڭ ۇلتتىق-مادەني قۇندىلىقتارىنا ارنالعان ءىس-شارالار وتەدى. اتاۋلى كۇنى تۋعان سابيلەرگە سىيلىقتار تاراتىلادى.

وسىدان تۋرا 31 جىل بۇرىن - 1991 جىلعى 1 جەلتوقساندا قازاقستاندا العاشقى پرەزيدەنتتىك سايلاۋ ءوتىپ، مەملەكەت باسشىسى بولىپ نۇرسۇلتان نازارباەۆ سايلانعان بولاتىن.

Abai.kz