كەمەلدىك پەن كەڭدىك دەپ جاتامىز. ماقسات پەن مىندەت كۇلكى ەمەس، كوركەم بولۋى شارت دەپ جاتامىز. مىنە، وسى ءبىر شارافاتى مول تۇسىنىكتەردى كەيدە مەن ۇلتىما دا تەڭەگىم كەلەدى. ۇلت دەگەنىمىز – حالىقتىڭ جەتىلگەن، پاراساتى جەتىككەن ءتۇرى. ءوزىن-ءوزى ساقتاۋعا، دامىتۋعا، قورعاۋعا، قورلاماۋعا ايرىقشا دەن قويا الاتىن قابىلەتتىڭ ءتۇرى.

دوستاەۆسكي ايتقان ەكەن: «قۇدايلار ۇلتقا بولىنگەندە، ولار ولەدى»،- دەيدى. دەمەك، ۇلتتى ۇيىستىراتىن – دۇنيەتانىم. ال ونى ازدىراتىن، توزدىراتىن – الاۋىزدىق.  اياعى ۇزەڭگىدەن شىقسا دا، تىزەسى جەرگە تيمەگەن الاش جۇرتى ازاپتى عۇمىرىندا ۇزىنا تاريحىندا باسىندا نەبىر ءداۋىر وتكىزدى. اششىسىن دا، تۇششىسىن دا سارقا تاتتى. اششىسى تۇسىندا جاسقانىپ، تۇششىسى تۇسىندا ماستانىپ كورگەن ەمەس. جەڭىپ تە كوردى، جەڭىلىپ تە كوردى. بىراق وسىنى سەزىنۋ – ساياسي ءومىردىڭ ەڭ ءبىر قيىن ساتتەرىندە بىزگە ءبىر بەرىك رۋحاني مەدەت بولعانداي.

بۇگىنگى اق وردالى قازاقستان كەشەگى التىن وردالاردىڭ  تىكەلەي مۇراگەرى. تاۋەلسىزدىك – ىرىس، دامۋدىڭ كەپىلى. ال تىرەگى – بىرلىك. بىراق بۇگىن زامان باسقا. قارۋدىڭ ورنىنا قالام، قالامنىڭ ورنىنا كومپيۋتەر كەلگەن زامان. تەحنولوگيانىڭ ءوزى كۇندە وزگەرىپ، ءوسىپ بارا جاتىر. تولقىندى تولقىن قۋادى، تولقىننان تولقىن تۋادى. الەم اسىعىستا. ءومىردىڭ ءوزى كۇندە وزگەرىپ بارا جاتىر. سوندىقتان، نە ىلگەرى باساسىڭ، كەيىن كەتەسىڭ. باسقا جول جوق.

مىناۋ ساياسات دەگەن تەرميندى ءبىزدىڭ داۋىرىمىزگە دەيىنگى ءتورتىنشى عاسىردا اريستوتەل ەنگىزگەن ەكەن. ول ونى مەملەكەتتى باسقارۋدىڭ ونەرى دەپ اتاپتى. مىنە، وسى جەردە ءبىزدىڭ اينالامىزداعى حالىقارالىق ساياسي احۋالدى، ىشكى ساياسي احۋالدى نەمەسە ۇلتىنىڭ ۇنىمەن جۇرتىنىڭ مۇڭىن تامىرشىداي تاپ باسىپ وتىرعان مەملەكەت باسشىسى قاسىم-جومارت كەمەلۇلى توقاەۆ ۇلتىنىڭ ۇنىنە ءۇن قوسا، وي تاستادى.

2019 جىل... «سىندارلى قوعامدىق ديالوگ قازاقستاننىڭ تۇراقتىلىعى مەن وركەندەۋىنىڭ نەگىزى»،- دەپ ويىن باستادى. 2020 جىل... «جاڭا جاعدايداعى قازاقستان – ءىس پەن قيمىلدىڭ كەزەڭى» دەپ ۇران تاستادى. 2021 جىلى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى»، - دەپ ويىن جالعاستىردى. ال 2022 جىلدىڭ ناۋرىزىندا «جاڭا قازاقستان – جاڭارۋ مەن جاڭعىرۋ جولى»،- دەپ قاداپ كورسەتتى. وسىدان بىرنەشە كۇن بۇرىن، 2022 جىلى قىركۇيەكتە «ادىلەتتى مەملەكەت – ءبىرتۇتاس ۇلت، بەرەكەلى قوعام»، - دەپ ءۇش تاعاندىق قاعيداتتى العا تارتىپ، حالقىن ۇشپاققا شاقىردى. تۇجىرىم – بەس جولداۋى كۋا مەملەكەت باسشىسى حالىق جاعىندا، مەملەكەت جاعىندا ەكەندىگىن كورسەتتى.

ءتىپتى، كۇنى كەشە ەلىمىزدە ءوتىپ جاتقان الەمدىك جانە ءداستۇرلى دىندەر باسشىلارىنىڭ جەتىنشى سەزىندە وسى تەزيسىن كوتەرىپ، ادىلەتتى الەم ماسەلەسىن قوزعادى. ريم پاپاسىن قارسى العان كەزدە مەملەكەت باسشىسى «ءسىز ءبىزدىڭ ەلگە ادامزاتتىق بەتبۇرىس كەزىندە كەلدىڭىز»،- دەپ پاراساتتى ويىن جالعادى. بەس جولداۋدىڭ ىشىندە حالقىنىڭ بۇكىل مۇڭ-مۇقتاجى اتقارىلدى. بىراق سونىڭ ىشىندە ەڭ سوڭعى جولداۋدىڭ اتاۋىنىڭ ءوزى كوڭىلگە ۇلكەن سەنىم ۇيالاتادى. «ادىلەتتى مەملەكەت – ءبىرتۇتاس ۇلت، بەرەكەلى قوعام». ياكي، ادىلەتتى مەملەكەتتە تۇراتىن ءبىرتۇتاس ۇلت بەرەكەلى قوعامعا كەپىل. ارينە، جولداۋدىڭ ىشىندە شوقتىعى بيىك نەبىر شەشىمدەر بار. سونىڭ ىشىندە – حالىق قورىنان كەلەشەك ۇرپاقتارىمىزعا اشىلاتىن ەسەپشوت. كەشەگى الپاۋىتتار پىشاق ۇستىنەن ۇلەستىرگەن ميلليونداعان گەكتار جەر تەلىمى مەملەكەتكە قايتارىلدى. قاڭتار وقيعاسى كەزىندە اسا اۋىر قىلمىس جاساماعاندارعا كەشىرىم.

سونداي-اق، الداعى جارتى جىل ىشىندە بيلىكتىڭ بار تارماعى – پرەزيدەنت، پارلامەنت، ۇكىمەت تۇگەلدەي سايلاۋدىڭ سۇزگىسىنەن وتەتىن بولدى. ەڭ عاجابى – مەملەكەت باسشىسى ءالى پرەزيدەنتتىك وكىلى بار بيلىگىن سايلاۋعا سالعالى وتىر. ءبىر قاراساڭ، اتالى نار تاۋەكەل. ەكىنشى جاعىنان، قاۋىپتى قادام. شەشىمى – مەملەكەت باسشىسى مەملەكەت قاسىم-جومارت كەمەلۇلى توقاەۆ استىنداعى تاعىن ەمەس، حالقىنىڭ باياندى باعىن ويلاعاندىعى دەپ بىلەمىن. كۇنى كەشە قولىنداعى بيلىگىن ءسۇتتى سيىرداي قاتتاپ ساۋعان زامانمەن سالىستىرعاندا. شاكارىم قاجى ايتپاقشى، بۇل ءان بۇرىنعى اننەن وزگەرەك بوپ شىقپاي ما؟! ءدال سولاي! بارەكەلدى!

پرەزيدەنتىمىزدىڭ جوسپارلارى سان سالالى. ارمان-مۇراتتارىن ساپالى باسپالداقتارمەن اكەلە جاتىر. ارينە، مۇنىڭ بارىنە ۋاقىت كەرەك. ويلانۋعا ۋاقىت كەرەك. دەي تۇرعانمەن، پىسىقتالعان، قورىتىندالعان دۇنيەلەردىڭ بارلىعىن جۇزەگە اسىرۋعابىز مۇمكىندىك بەرۋىمىز كەرەك. ءبىزدىڭ مىندەمىز – ءبىرتۇتاس سانالى ۇلت بولىپ، بەرەكەلى قوعام بولىپ، سوزىندە ءپاتۋا، ىسىندە تياناق بار ەل باسشىسىنا قاسىم-جومارت كەمەلۇلى توقاەۆقا ەڭ يگىلىكتى رەفورمالارىن جۇزەگە اسىرۋىنا ماندات بەرۋىمىز كەرەك.

ءبىزدىڭ پرەزيدەنت ءبىلىمدى دە، بىلىكتى، بايسالدى باسشى. وسىنىڭ بارلىعىن ويلاي كەلە،  سالىستىرا كەلە، سول پرەزيدەنت بيلىگىنىڭ عۇمىرىن جەتى جىلعا اكەلگەنى. بىرىنشىدەن، جەتى جىل، نەگىزى، بۇل قازاقتا جاقسى سان.

قازاق ايتادى، «جەتىگە كەلگەنشە، جەردەن تاياق ءجيسىڭ». بۇل – ءبۇلدىرشىننىڭ اياق باسىپ كەتۋ كەزەڭى. ال ەستى، سانالى پەندەگە جەتى جىل اقىل تولتىرۋ، بار تاجىريبەنى ورتاعا سالۋ، حالىقتىڭ بۇكىل مۇڭ-مۇقتاجىنا تارك ەتۋ، سودان ناتيجە شىعارۋ. مىنە، وسى ويدىڭ بارلىعى مەملەكەت باسشىسىنىڭ قاپەرىندە دەپ ويلايمىن. سوندىقتان، وسى شەشىمدى حالىق بولىپ بارلىعى قولداۋدا. سوندىقتان، بۇل شەشىم تۇبەگەيلى اقيقات شەشىم دەپ ويلايمىن. شەشىمنىڭ ەرتەڭى - حالقىمىزدىڭ ريزىعى.

جوعىمىزدى بارداي ەتۋ، بارىمىزدى دارداي ەتۋ – ەلىمىزگە سىن دەپ ويلايمىن. نايزانىڭ ۇشىن تات باسار، شوقپارلار شوققا تاستالار، تولايىم زامانعا دا جەتەرمىز. تاۋەلسىزدىگىمىز باياندى، ەلدىگىمىز ماڭگىلىك بولعاي! تاريحتىڭ تار وتكەلىنەن سۇرىندىرمەي وتكىزگەن بابالار شاپاعاتى بىزگە دە تيگەي! ەلىمىز امان، جۇرتىمىز تىنىش بولسىن، اعايىن!

دوسقان جولجاقسىنوۆ

Abai.kz