وسى وتكەن اپتانىڭ سوڭىندا عانا قوستانايعا ەلىمىزدىڭ پرەمەر-ءمينيسترى ءاليحان سمايىلوۆ كەلىپ كەتتى. مۇنداعى قالىڭ جۇرت مىنە، 7 جىلدان بەرى ءوز ورىنتاعىندا ەش مىزعىماستان، قاققان قازىقتاي بولىپ وتىرعان «گرەك عالىمى» - ارحيمەدتى وزگە جاققا الىپ كەتەدى عوي دەپ زور ۇمىتتەنگەن.

الايدا ول ءۇمىت اقتالعان جوق. ۇكىمەت باسشىسى ونىڭ ورنىنا وتكەندەگى الاپات ءورت شىققان اۋليەكول اۋدانىنا بارىپ، ءورت سوندىرۋمەن اينالىساتىن جاندارعا ۇزاق-سونار اقىل ايتىپتى. استانادان ارنايى كەلگەن ۇلكەن لاۋازىمدى ادام ءورتتى تەز ءسوندىرۋدىڭ امالدارىن ايتىپ، مۇنداعىلاردىڭ قۇلاقتارىنا قۇيىپ كەتىپتى. سويتسە، ءورتتى تىكۇشاقپەن تەز ءسوندىرۋ ءۇشىن وزەندەردىڭ جيەكتەرىن كەڭەيتىپ، سۋدى كوبىرەك الۋعا جاعداي جاساۋ كەرەك كورىنەدى. نە دەگەن دانىشپاندىق، نە دەگەن كورەگەندىك دەسەڭىزشى. وسى وي توتەنشە جاعداي ءمينيسترى يليننەن باستاپ، وبلىستىق باسقارمالار باسشىلارى مەن ورمان شارۋاشىلىعى ماماندارىنىڭ باسىنا نەگە كەلمەگەن؟

سوندا نە، مۇنداعىلار قاي سالادا دا بەس اسپاپ سمايىلوۆ كەلىپ، كوزگە شۇقىپ كورسەتپەسە، ءورتتى جىلدام ءسوندىرۋ امالدارىنان مۇلدەم ماقۇرىم قالعان با؟ مۇمكىن، بۇل سمايىلوۆتى اناۋ ءيليننىڭ ورنىنا قويۋ كەرەك شىعار؟.. بىلىكتى مامان ءوز ورنىن تابا الماي، حالقىنا پايداسى تيمەي سورلاپ جۇرگەن بولار؟ ايتپاقشى، «وسىنى نەگە ىستەمەدىڭدەر؟» دەپ ارحيمەدكە قاتتى ەسكەرتتى مە ەكەن؟ الدە كەلەشەكتە مۇنداي ءورتتىڭ الدىن الۋعا بولاتىن جاڭا ءادىس-تاسىلدەردى ويلاستىرامىن دەپ ءجۇرىپ، تاعى ۇمىتىپ كەتتى مە ەكەن؟

تاعى ءبىر ويلاندىراتىن جاي مىناۋ. قوستانايداعى ءورتتىڭ سالدارىمەن كۇرەسەمىن دەپ، پرەمەر-ءمينيسترىمىز نەگە قىزىل تاناۋ بولىپ، شاپقىلاپ جۇرەدى؟ پرەزيدەنتىمىزدىڭ ءوزى وسىندا ارنايى ات باسىن تىرەپ، «ءورتتىڭ سالدارىنان ءۇيسىز-كۇيسىز قالعاندار ەكى ايدىڭ ىشىندە جايلى دا جاقسى باسپانامەن قامتاماسىز ەتىلسىن» دەپ ناقتى تاپسىرما بەرىپ كەتتى ەمەس پە؟ ەندى ونى نەگە داپ-دارداي باسىمەن ۇكىمەت باسشىسى قاداعالايدى؟ سوندا ايىنا اناۋ-مىناۋ ەمەس ەكى ميلليون تەڭگە ايلىق الاتىن، ونى از دەسەڭىز جالعىز ءوزى ورمان ىشىندەگى رەزيدەنتسيادا الاڭسىز ۇيقىسىن قاندىرىپ جۇرگەن، قولىنا وبلىستاعى بارلىق بيلىك بەرىلگەن وسى ءوڭىردىڭ باسشىسى ارحيمەد مۇحامبەتوۆ ەشتەڭەگە جاۋاپ بەرمەي مە؟ نەگە سودان ناقتى تالاپ ەتىلمەيدى؟ الدە سەنبەي مە؟ سەنبەسە، ونى نەگە وسى ۇلكەن لاۋازىمدا ۇستاپ وتىر؟ سمايىلوۆتىڭ ءوزى شاپقىلاعانشا مۇنى قاراماعىنداعى ءبىر مينيسترگە تاپسىرىپ، جاي عانا باقىلاپ وتىرماي ما؟

ال اقورداداعى مىقتىلاردىڭ ەلگە جانى اشيتىن بولسا، وندا نەگە ارىستاعى جارىلىستا وسىلايشا ارام تەر بولىپ، شاپقىلامادى؟ الدە بۇل تەك سايلاۋ الدىنداعى حالىقتى الدارقاتۋ ما؟ ايتپەسە، وسىنداي الاپات ءورت بولىپ، جۇزدەگەن ادام زارداپ شەككەندە وبلىس اكىمىنە ەڭ بولماسا ەسكەرتۋ جاريالانباۋى قالاي؟ الدە ول وبلىستاعى ءورت ءسوندىرۋ سالاسىنىڭ ماتەريالدىق-تەحنيكالىق بازاسىنىڭ ابدەن ەسكىرىپ، مامانداردىڭ تىم جەتكىلىكسىزدىگىنە مۇلدەم جاۋاپ بەرمەي مە؟ وندا وبلىس اكىمى بولىپ نەگە وتىر؟

مىنە، پرەمەر-مينيستر كەلىپ كەتكەننەن كەيىنگى كوكەيدە قالعان كوپ سۇراقتاردىڭ ءبىرى وسى ەدى.

جايبەرگەن بولاتوۆ

Abai.kz