رەسەيدە جارتىلاي موبيليزاتسيا جاريالانعان سوڭ، رەسەيلىكتەر ەلدەن جاپپاي قاشا باستادى. الەۋمەتتىك جەلىلەردە رەسەيدەن وزگە مەملەكەتتەرگە جاقىن كۇندەرى ۇشاتىن ۇشاقتارعا بيلەتتەر قالماعانى، بيلەتتەردىڭ باعاسى شارىقتاپ كەتكەنى ايتىلىپ جاتىر. ۆلاديمير ءپۋتيننىڭ ۇندەۋى جولدانعان العاشقى ساعاتتاردا ۇشاق بيلەتتەرىن ىزدەپ، ساتىپ الاتىن پلاتفورمالاردىڭ جۇمىسى ارتىق جۇكتەمەدەن باياۋلاعان.

ماسكەۋ، سانكت-پەتەربۋرگتەن تمد ەلدەرى مەن تۇركياعا جاقىن كۇندەردەگى بيلەتتەر وتە قىمبات باعامەن ساتىلىپ جاتىر، قازاقستانعا ۇشاق بيلەتتەرى ميلليون تەڭگەگە دەيىن كوتەرىلگەن. قازاقستاندىقتارعا ارنالعان تەلەگرام چاتتارىندا رەسەيلىكتەرگە ارنالىپ ەلدەگى پاسپورت الۋ، شەكاراداعى جاعداي، پوەزد ارقىلى قالاي كەلۋگە بولاتىنى تۋرالى ءتۇرلى نۇسقاۋلىقتار بەرىلىپ جاتىر. تەلەگرام توپتارى اشىلىپ، مىڭداعان رەسەي تۇرعىندارى قوسىلىپ جاتىر.

رەسەيدەگى Google ىزدەۋ پلاتفورماسىندا اسكەردە قىزمەت ەتۋدى كەيىنگە قالدىرۋ جولى، موبيليزاتسيا، ەلدەن كەتۋدىڭ جولدارى دەگەن سۇراۋلار كوپ بولدى. سونىڭ ىشىندە «قولدى قالاي سىندىرۋ كەرەك؟» دەگەن سۇراق كوش باستاعان.

رەسەي فەدەراتسياسىنىڭ «موبيليزاتسياعا دايىندىق تۋرالى» زاڭىنا سايكەس، سوعىسقا جارامدى ازاماتتارعا اسكەري كوميسسارياتتاردىڭ رۇقساتىنسىز تۇرعىلىقتى جەرىنەن كەتۋگە تىيىم سالىنعان. بىراق قورعانىس كوميتەتىنىڭ باسشىسى اندرەي كارتاپولوۆتىڭ ايتۋىنشا، ەلدە تولىق ەمەس، جارتىلاي موبيليزاتسيا جاريالاندى، سوندىقتان سوعىسقا جارامدى ازاماتتارعا شاقىرۋ قاعازى كەلگەنگە دەيىن شەتەلگە شىعۋىنا بولادى. دەگەنمەن قورعانىس كوميتەتى تۇرعىندارعا شەتەلگە كەتۋگە كەڭەس بەرمەيدى.

«كراسنودارعا نەمەسە ومبىعا ىسساپارعا بارا بەرىڭىز، بىراق مەن تۇركيانىڭ  كۋرورتتارىنا بارۋعا كەڭەس بەرمەيمىن، قىرىم مەن كراسنودار ولكەسىنىڭ كۋرورتتارىندا دەمالىڭىزدار",-دەدى كارتاپولوۆ.

ەندى قازاقستانداعى سوعىستان قاشقان رەسەيلىكتەردىڭ اعىنى بيىلعى قاڭتار-اقپان ايلارىنداعىدان دا كوپ بولماق.

سەنات توراعاسى ماۋلەن اشىمباەۆتىڭ ايتۋىنشا، ەلىمىز رەسەي ازاماتتارىنىڭ كەلۋىنە شەكتەۋ قويا المايدى، سەبەبى، قازاقستان دا، رەسەي دە ەۋرازيالىق ەكونوميكالىق وداققا كىرەدى. كەلىسىم بويىنشا رەسەي ازاماتتارى قازاقستان اۋماعىنا كەلەتىن بولسا، ولارعا شەكتەۋ قويىلمايدى ەكەن.

بۇعان دەيىن ىشكى ىستەر مينيسترلىگى قازاقستاندا 2022 جىلدىڭ باسىنان بەرى شەتەل ازاماتتارىنىڭ  198 806 جەكە سايكەستەندىرۋ ءنومىرىن العانىن مالىمدەگەن بولاتىن. سونىڭ ىشىندە 74 371 رەسەي ازاماتى قازاقستاندىق جسن العان.

قازاقستاندا شەتەلدىكتەر جۇمىسقا ورنالاسۋ، قازاقستاندا ەسەپ ايىرىسۋ شوتىن تىركەۋ، مۇلىكتى رەسىمدەۋ، مەملەكەتتىك قىزمەتتەردى الۋ جانە باسقا دا كوپتەگەن وپەراتسيالاردى جۇزەگە اسىرۋ ءۇشىن جسن الادى.

ءساۋىر ايىنىڭ ورتاسىندا  ىشكى ىستەر مينيسترلىگى ەلگە كەلگەن رەسەي ازاماتتارىنىڭ سانى وسكەنىن حابارلاعان. 2022 جىلدىڭ باسىنان بەرى قازاقستانعا 130 مىڭعا جۋىق رەسەيلىك كوشىپ كەلگەنى جانە وسى جىلى 1 مىڭعا جۋىق رەسەيلىك قازاقستاندا تۇرۋعا ىقتيارحات سۇراعانى حابارلانعان بولاتىن.

ال، بالتىق جاعالاۋى ەلدەرى 19 قىركۇيەكتەن باستاپ رەسەي ازاماتتارى ءۇشىن شەكاراسىن جاپتى. ءوز ازاماتتارىنىڭ دا رەسەيگە ساياحاتتاۋىنا شەكتەۋ قويدى.

ليتۆانىڭ ىشكى ىستەر ءمينيسترى اگنە بيلوتايتە رەسەي ازاماتتارىنا باعىتتالعان شەكتەۋلەرىنە تۇسىنىك بەردى.

«رەسەيدىڭ نە ىستەيتىنى بەلگىسىز جانە ول – شابۋىلداۋشى مەملەكەت. رەسەي ازاماتتارىنىڭ تورتتەن ءۇش بولەگى ۋكرايناداعى سوعىستى قولدايدى. سوعىس جاقتاستارىنىڭ بۇكىل الەم بويىنشا جانە ليتۆا مەن ەۋروپا وداعى ەلدەرىنە ەركىن ساياحاتتاۋى قابىلدانبايدى»،-دەدى ول. اگنە بيلوتايتە «ورىس ازاماتتارىنىڭ سوعىسقا قولداۋ ءبىلدىرۋى» ليتۆاعا جانە ەۋروپا وداعىنا قاۋىپتى ەكەنىن ايتتى.

Abai.kz