قر پرەزيدەنتى اكىمشىلىگىنىڭ
باسشىسى م.ءا. نۇرتىلەۋگە

قۇرمەتتى مۇرات ابۋعاليۇلى!

پرەزيدەنتىمىز قاسىم-جومارت توقاەۆ 2021 جىلعى 16 قاراشادا وتكەن ۇلتتىق قوعامدىق سەنىم كەڭەسىنىڭ التىنشى وتىرىسىندا كوشى-قون ماسەلەلەسىنە ارنايى توقتالىپ، 18 قاراشانى «ۇلى كوش كۇنى» دەگەن اتپەن اتاۋلى كۇندەردىڭ تىزبەسىنە ەنگىزۋ تۋرالى ۇكىمەتكە تاپسىرما بەردى.

مەملەكەت باسشىسى اتالعان داتانىڭ ماڭىزىنا ەرەكشە نازار اۋدارىپ،  «بارشاڭىزعا ءمالىم، قانداستارىمىزدىڭ  ءوز  اتاجۇرتىنا  ورالۋ  ماسەلەسى  تۋرالى  تۇڭعىش پرەزيدەنتىمىز بىرقاتار ماڭىزدى تاريحي شەشىم قابىلداعان ەدى. ۇلى كوش 1991 جىلى باستالدى. بۇعان ەلباسىنىڭ تاپسىرماسىمەن قازاق كسر مينيسترلەر كابينەتى قابىلداعان №711 قاۋلى رەسمي تۇردە جول اشتى. بۇل قۇجات 1991 جىلعى 18 قاراشادا قابىلداندى. كوپ ۇزاماي ەلباسى «الىستا جۇرگەن اعايىنعا اق تىلەك» اتتى جولداۋىن جاريالاپ، شەتتەگى قانداستارىمىزدى  ەلگە  شاقىردى.  سونىڭ  ناتيجەسىندەبىر  جارىم ميلليوننان استام قازاق وتانىنا ورالدى. بۇگىندە ولار ەگەمەن ەلىمىزدى وركەندەتۋگە ءوز ۇلەسىن قوسۋدا. سولاردىڭ ىشىندە اۋىت مۇقيبەك جانە تاعى باسقا قوعام قايراتكەرلەرى ۇلى كوشتىڭ تاريحي ءرولىن ەسكەرىپ، ارنايى كۇن بەلگىلەۋ قاجەتتىگىن ايتىپ ءجۇر.ۇكىمەتكە وسى تاريحي داتانى اتاۋلى  كۇندەر  تىزبەسىنە  قوسۋ  ماسەلەسىن جان-جاقتى قاراستىرىپ، ءتيىستى ۇسىنىس ەنگىزۋدى تاپسىرامىن» - دەگەن بولاتىن.

پرەزيدەنتىمىزدىڭ №711 قاۋلىعا ءمان بەرگەنى سونشالىق، 2020 18 قاراشادا ونى ءوزىنىڭ Twitter-ىنە دە جازدى.

بۇل جاڭالىقتى باق-تا جارىسا جازعان بولاتىن. مىسالى، «Abai.kz» اقپاراتتىق پورتالى «"ۇلى كوش كۇنى" بەكىتىلمەك» دەگەن ماقالا جاريالاپ، وسى  جوبانىڭ «ەلەكتروندىق ۇكىمەت» پورتالىندا ورنالاستىرىلعانىن حابارلاعان ەدى.

مىنە، ۇلتتىق قوعامدىق سەنىم كەڭەسىنىڭ التىنشى وتىرىسىنان بەرى ون ايعا تاياۋ ۋاقىت ءوتتى، پرەزيدەنتىمىزدىڭ سول تاپسىرماسى ءالى ورىندالعان جوق. جۇرت بيىلعى 18 قاراشادا سول «ۇلى كوش» كۇنىن اتاپ وتەمىز دەپ، باسىندا قۋانعانىمەن، قازىر الاڭداي باستادى.

ءبىر سوزبەن ايتقاندا، 18  قاراشا تاياپ كەلەدى، پرەزيدەنتىمىز قاسىم-جومارت  توقاەۆتىڭ سول تاپسىرماسىن  ۇكىمەتتىڭ ورىندايتىن  ءتۇرى  دە كورىنبەيدى. سوسىن، سۇراۋ سالىپ كورسەك، ۇكىمەت «ۇلى كوش كۇنىن» اتاۋلى كۇندەردىڭ تىزبەسىنە ەنگىزۋ ماسەلەسىن توقتىپ قويىپتى.

بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنەن «...جاريا تالقىلاۋدىڭ جاعىمسىز پىكىرلەرى مەن كوممەنتاريلەرىن، سونداي-اق حالىق اراسىندا الەۋمەتتىك احۋالدى تۋدىرماۋ ماقساتىندا اتالعان ماسەلە كەيىنگە قالدىرىلدى» دەگەن جاۋاپ الدىق.

دەمەك، ۇكىمەت پرەزيدەنتىمىزدىڭ بۇل تاپسىرماسىن ورىنداعان جوق!

ماسەلە – «ۇلى كوش كۇنىندە» ەمەس، №711 قاۋلىنى ن. نازارباەۆ شىعارتقاندىعىندا بولىپ تۇرسا كەرەك!

قۇرمەتتى مۇرات ابۋعاليۇلى!

پرەزيدەنتىمىزدىڭ كوشى-قون ۇردىسىنە بايلانىستى بەرگەن تاپسىرماسىنىڭ ورىندالماي قالاعانى – ءبىر بۇل ەمەس.

مەن كوتەرگەن قانداستارىمىزدىڭ باسپانا كەزەگىنە تۇرۋدا كەدەرگى بولىپ وتىرعان «تۇرعىن ءۇي قاتىناستارى تۋرالى» زاڭ مەن «حالىقتىڭ كوشى-قونى تۋرالى» زاڭ اراسىنداعى سايكەسسىزدىكتى ەسكەرسە كەرەك، مەملەكەت باسشىسى ۇلتتىق قوعامدىق سەنىم كەڭەسىنىڭ ءتورتىنشى وتىرىسىندا، «...ازاماتتىق العان قانداستارىمىز سولتۇستىك وڭىرگە كوشسە، ۇكىمەت ولاردىڭ ءۇي كەزەگىنىڭ ساقتالۋىن قامتاماسىز ەتۋى كەرەك. بۇل شارا قانداستاردىڭ جۇمىس كۇشى تاپشى ايماقتارعا كوشىپ بارۋىنا قوسىمشا سەرپىن بەرەدى» - دەپ، بۇرىن «قانداس» مارتەبەسىمەن باسپانا كەزەگىنە تۇرىپ العان قانداستارىمىز ۇكىمەت ايقىنداعان وڭىرلەرگە قونىستانعان جاعدايدا، ولاردىڭ اتالعان باسپانا كەزەگىن قازاقستان رەسپۋبليكاسىنىڭ ازاماتتىعىن العاننان كەيىن دە ساقتاۋ تۋرالى تاپسىرما بەرگەنى ەسىمىزدە.

وكىنىشكە وراي، قاسىم-جومارت كەمەلۇلىنىڭ وسىناۋ كەرەمەت تاپسىرماسى ايتىلعان جەرىندە قالدى.

نە، ونى پرەزيدەنت اكىمشىلىگى قاداعالاپ، ورىندالۋىنا تۇتكى بولمايتىن كورىنەدى...

ال، پرەزيدەنتىمىزدىڭ ايتقان سوزدەرى مەن ۇكىمەتتىڭ جاساعان شارۋاسى تىپتەن باسقاشا بولىپ شىعۋدا.

مىسالى، پرەزيدەنت قاسىم-جومارت توقاەۆ «شەتەلدەگى قانداستارىمىزدى ەلگە قايتارۋ ءىسى ەشقاشان نازاردان تىس قالعان ەمەس، قالمايدى دا. دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز» - دەدى.

بۇل ءسوزىن قاسەكەڭ 2019 جىلعى 12 ساۋىردە ايتىپ، Twitter-ىنە جازدى.

ول از دەسەڭىز، پرەزيدەنت كەشە عانا – ءبىرىنشى قىركۇيەكتە حالىققا جاساعان جولداۋىندا، «قانداستاردىڭ كوشىپ كەلۋىنە جانە ىشكى ميگراتسياعا قاتىستى ساياسات تۇبەگەيلى وزگەرەدى. بۇل ورايدا، دەموگرافيالىق جانە ەكونوميكالىق ۇردىستەردى ەسكەرۋ كەرەك. سونداي-اق، جالپىۇلتتىق مۇددەنى باسشىلىققا الۋ وتە ماڭىزدى» - دەدى, شەگەلەپ تۇرىپ.

ايتىڭىزشى، ەڭبەك جانە حالىقتى الەۋمەتتىك قورعاۋ مينيسترلىگى مەن ءسىز باسقارىپ وتىرعان قر پرەزيدەنت اكىمشىلىگى اقىلداسىپ وتىرىپ دايىنداعان «كوشى-قون ساياساتىنىڭ 2023-2027 جىلدارعا ارنالعان تۇجىرىمداماسى»، ونداعى «قۇجاتتاردى قابىلداۋ كەزەڭىندە كەلۋ ورنىن ايقىنداۋ تەتىگىن ەنگىزۋ جانە 5 جىلدىق بولۋ مەرزىمىنەن كەيىن ازاماتتىق بەرە وتىرىپ، ەڭبەك كۇشى تاپشى وڭىرلەرگە كوشۋدى رەتتەۋ جانە ىنتالاندىرۋ جونىندە شارالار قابىلداۋ...» دەگەن تۇجىرىمىن پرەزيدەنتىمىز ايتقان «قاسيەتتى پارىز» بەن «جالپىۇلتتىق مۇددەگە» ساي كەلىپ تۇر ما؟!!

ارينە، جوق!

ەكەۋى وت پەن سۋ سەكىلدى مۇلدە وتاسپايتىن دۇنيەلەر!

كەرىسىنشە، ۇلى كوشتى توقتاتۋعا، حالىقتى پرەزيدەنتكە قارسى قويۋعا، ادام قۇقىعىن ساياساتتىڭ تابانىنا سالىپ تاپتاتۋعا باعىتتالعان اركەت بۇل!

قۇرمەتتى مۇرات باۋىرىم!

قازاقستان رەسپۋبليكاسى ۇكىمەتىنىڭ 2016 جىلعى 18 اقپانداعى №83 قاۋلىسىمەن بەكىتىپ، قانداستار مەن قونىس اۋدارۋشىلاردى قونىستاندىرۋ ءۇشىن ايقىنداعان وڭىرلەرگە شەتتەن كەلگەن اعايىنداردى تارتۋ ماسەلەسى مەملەكەتتىڭ كۇن تارتىبىندەگى ماسەلە بولىپ تۇر.

مەن بۇل جوبانى قوس قولداپ قولدايمىن!

بىراق، سول قانداستارىمىزدى اتالعان وڭىرلەرگە تارتۋ ءۇشىن الەۋمەتتىك جەڭىلدىكتەردەن وزگە، رۋحاني جاقتان دا ىنتالاندىراتىن بىردەڭە بولۋ كەرەك قوي.

وكىنىشكە وراي، قازىر ۇكىمەت پەن پرەزيدەنت اكىمشىلىگىندە الىستان ورالعان اعايىنعا جاسالعان قياناتتان وزگە ەشتەڭە بولماي تۇر!

مەن «ۇلى كوش كۇنى» مەرەكەسىنىڭ جوباسىن سىزدەرگە قانداستارىمىزدىڭ الدىنان الىپ شىعاتىن بەتجۇزدىك بولسىن دەپ ۇسىنعام. قاسىم-جومارت كەمەلۇلى دا ونىڭ وسىنداي ماڭىزىن ءتۇسىنىپ، مەنىڭ ۇسىنىسىمدى بىردەن قابىلداعان ەدى.

قۇرمەتتى مۇرات ءىنىم!

سىزگە ءوتىنىش، ۇكىمەت باسى ءاليحان سمايىلوۆ تەزدەتىپ، «ۇلى كوش كۇنىن» اتاۋلى كۇندەر تىزبەسىنە ەنگىزۋ تۋرالى شەشىم شىعارسىن دا، ءبىرىنشى مەرەكەنى سول ۇكىمەت ايقىنداعان وبلىس ورتالىقتارىنىڭ بىرەۋىندە سالتاناتتى تۇردە اتاپ ءوتسىن. ءسويتىپ، سولتۇستىككە كوشۋ تۋرالى حالىققا ۇران تاستاسىن. سونداي-اق، ولارعا ۇكىمەت ۇسىناتىن جەڭىلدىك پاكەتىن جاريالاسىن.

ءسويتىپ، حالىقتى ارنايى وڭىرلەرگە قونىستاندىرۋعا ارنالعان ىنتالاندىرۋ شاراسىن باستاسىن...

سىزدەن وتىنەرىم، وسى ماسەلەنى ءوز نازارىڭىزعا الىپ، اتالعان ۇسىنىسىمنىڭ جۇزەگە اسۋىنا ىقپال ەتۋىڭىزدى سۇرايمىن.

قر پرەزيدەنتى اكىمشىلىگىنىڭ باسشىسى مۇرات نۇرتىلەۋگە جالبارىنۋ: