جاڭا جىلدىڭ العاشقى ونشاقتى كۇنىندە پارلامەنتىمىزدىڭ دەپۋتاتتارى ەلىمىزدىڭ تۇپكىر-تۇپكىرىنە ساپار شەگىپ، مەملەكەت باسشىسىنىڭ «قازاقستان-2050» ستراتەگياسى - قالىپتاسقان مەملەكەتتىڭ جاڭا ساياسي باعىتى» اتتى جاڭا جولداۋىن ناسيحاتتاۋمەن، ونى حالىق اراسىندا كەڭىنەن ءتۇسىندىرۋ جۇمىستارىمەن اينالىسىپ قايتتى. دۇرىس-اق! ويتكەنى ەل باسشىسىنىڭ ءوز حالقىنا ارناعان جولداۋىندا، كوپشىلىكتىڭ كوڭىلىنەن شىعاتىن كوپتەگەن ماسەلەلەر ايتىلعان. جانە ءجاي ايتىلىپ قانا قويماي، ولاردى قالاي شەشۋ ماسەلەلەرى دە «سوقىرعا تاياق ۇستاتقانداي» ناقتىلانىپ كورسەتىلگەن. وسىعان وراي ايتارىمىز - جاقىندا ەلوردامىزدان تاياق تاستام جەردەگى قاراعاندى وبلىسىنا سەناتورلارىمىز كەلىپ قايتتى. سەرىك اقىلباي، يۋري كۋبايچۋك دەگەن. ساپارلارىنىڭ ءمانى مەن ماقساتى ايتپاسا دا بەلگىلى - اڭگىمەمىزدىڭ باسىندا ايتىلىپ كەتكەن ەل باسشىسىنىڭ جولداۋىن حالىققا كەڭىنەن ءتۇسىندىرۋ. مۇنى دا ءجون دەيىك. ناسيحاتتاسىن، ءتۇسىندىرسىن. بىراق ءبىر تۇسىنىكسىز نارسە بار وسى جەردە: وسى ءبىزدىڭ پارلامەنتاريلەرىمىز نە ءۇشىن ەل ارالايدى، نە ءۇشىن ءححى عاسىردىڭ «كوزى اشىق، كوكىرەگى وياۋ» ادامدارىنا جولداۋدى «كەڭىنەن» تۇسىندىرۋمەن اينالىسادى؟ بۇلاي دەپ وتىرعانىمىز - قازىرگى ۇلكەن-كىشى دە، شارۋا مەن جۇمىسشى دا، وقۋ-توقۋ «ءوتىپ كەتكەن» زيالى قاۋىم دا ەلباسىمىزدىڭ جولداۋىن پارلامەنتريلەرىمىزدەن بۇرىن وقىپ، ءتىپتى كەيبىر بۋىن قاجەتتى جەرلەرىن جاتتاپ تا العان. بۇعان شاك كەلتىرمەيمىز، ويتكەنى ەل ارالاپ ءجۇرمىز، ەلدىڭ ەلباسىعا دەگەن، ەلباسىنىڭ جولداۋلارىنا دەگەن ىستىق ىقىلاسىن قۇدايدىڭ قۇتتى كۇنى كورىپ تە ءجۇرمىز. ال ەندى پرەزيدەنت  جولداۋلارىندا كورسەتىلگەن، ءتۇيىنى تارقاتىلماعان كوپتەگەن پروبلەمالار ەلىمىزدىڭ جەر-جەرلەرىندە جەتىپ ارتىلادى. سوندا دەيمىز-اۋ، ەل اراسىنا كەلگەن پارلامەنتاريلەرىمىز جولداۋلارداعى وزەكتى ماسەلەلەردىڭ جەر-جەرلەردە شەشىلمەگەن پروبلەمالارىن كوزگە شۇقىپ تۇرىپ كورسەتىپ، سوعان جاۋاپتى ادامداردى نەگە ەڭىرەتىپ تۇرىپ ەل الدىنا شىعارا المايدى؟ ويتكەنى سەناتورلار مەن ماجىلىسمەندەر كەلدى دەگەندە، ەل ىشىندەگىلەردىڭ اراسىنان ەڭ الدىمەن قاراپايىم حالىق قۋانادى - بىتپەي جاتقان انا شارۋامىزدى دا، بىتپەي جاتقان مىنا شارۋامىزدى دا ءبىتىرىپ كەتەدى دەپ. ءتىپتى بىتىرمەسە دە، بىتىرۋگە تۇرتكى بولىپ كەتەدى دەپ. الايدا ءاي، جوق... جوق... ءبىزدىڭ پارلامەنتاريلەرىمىز ەل اراسىنا «ءوز اياقتارىمەن اياڭداپ» كىرە المايدى. ولار مىندەتتى تۇردە وبلىس ورتالىعىنا كەلەدى. ولار مىندەتتى تۇردە وبلىس ورتالىعىنداعى ادەمى دە ۇلكەن، كەڭ عيماراتتاردىڭ بىرىندە سىقيىپ وتىرىپ جينالىستار مەن «ەشكىمگە كەرەگى جوق» اقىل-كەڭەستەر وتكىزەدى. ەلباسىنىڭ جولداۋلارىنان جاتتاپ العان ۇزىندىلەرىن وقيدى. قازاقتىڭ «وسى جەر دەگەنى - كوش جەر» دەپ بەكەر ايتپاعان عوي، سوندىقتان قاراعاندىلىقتار ءۇشىن ەكى ءجۇز ەلۋ شاقىرىم جەردە جاتقان ەلوردامىز «تاياق تاستام جەر» دەپ ەسەپتەلەدى. وسى «تاياق تاستام جەرگە» استاناداعى حالىق قالاۋلىلارى ءجيى كەلگىش. نە ءۇشىن ەكەنىن وزدەرىنەن باسقا ەشكىم بىلمەيدى. جوعارىدا ايتىپ وتتىك قوي، بۇل جولى سەناتورلار اقىلباي مەن كۋبايچۋك مەملەكەت باسشىسىنىڭ جاڭا جولداۋىن ەل اراسىنا كەڭىنەن ءتۇسىندىرۋ ءۇشىن كەلىپتى دەپ. ال ەندى ول جولداۋدا دا، وعان دەيىنگى جولداۋلاردا دا انا مەن بالا ماسەلەسىنە ايرىقشا كوڭىل بولىنگەن، سەناتور مىرزالارىمىز ۇمىتا قويماعان بولسا. وسىعان وراي ءتىپتى مەديتسينالىق مەكەمەلەردىڭ بىرىڭعاي ستاندارتتارىن ەنگىزۋ، انا مەن بالا دەنساۋلىعىن ساقتاۋ سياقتى نەگىزگى باعىتتار بويىنشا الدىن الۋ شارالارىن جۇرگىزۋ ماسەلەلەرى ناقتىلانا بەلگىلەنگەن. ەندىگى اڭگىمەمىزدىڭ توقەتەرى مىناۋ: قازاق ەلىنىڭ تۇڭعىش پرەزيدەنتىنىڭ «قاناتى قاتايىپ، توماعاسى سىپىرىلعان» تەمىرتاۋ دەگەن ءبىر قالادا بىلتىردان بەرى «توسەك ورىنى» جيىلماي، القا-سالقا بولىپ جاتقان ءبىر «ساقالدى مەكەمە» بار - «بالالار اۋرۋحاناسى» دەگەن. ساقالدى دەيتىن سەبەبىمىز - وتكەن جىلدىڭ مامىرىنان باستالعان كۇردەلى جوندەۋ جۇمىستارى قاراشا ايىنا دەيىن ءبىتىپ، «سۋ جاڭا» بولعان اۋرۋحانا ىشىندە ناۋقاس بالالار «قاتتى-قاتتى» كۇلە الماسا دا، «اجەپتاۋىر ويناپ-كۇلىپ» جۇرۋگە ءتيىس بولاتىن. بىراق مىنە، جاڭا جىل باستالىپ، قاڭتاردىڭ قاق ورتاسى اۋىپ كەتسە دە، ءىشى كىشكەنتاي پاتسينەتتەرىنە تولى قالانىڭ جار دەگەندەگى جالعىز بالالار اۋرۋحاناسى «تالتىرەكتەپ» ارەڭ تۇر. قۇلاپ قالۋى دا عاجاپ ەمەس، ويتكەنى قاراعاندى جاقتا عيماراتتاردىڭ ويدا-جوقتا «قيسايا» قالاتىنى پالەندەي جاڭالىق بولماي قالدى. وعان فۋندامەنتسىز سالىنعان (ادامنىڭ ميىنا سىيمايدى) بەسوباداعى باياعى قۇلاپ قالعان كوپقاباتتى ءۇي، ودان كەيىن دە تۇرعىندارى كوشىرىلىپ، انە-مىنە قۇلايىن دەپ تۇرعان باسقا دا كوپقاباتتى ۇيلەر دالەل بولا الادى. قىسقاسى، اقىلباي مەن كۋبايچۋك كەلدى دەگەندى «كوك جاشىكتەن» كورىپ، كوپتەگەن باسىلىمداردان «ءوز كوزدەرىمەن» وقىعان كەزدە جۇرەكتەرى جارىلارداي بولىپ قۋانعانداردىڭ ىشىندە تەمىرتاۋلىقتار دا بار ەدى. بىراق بەكەرگە قۋانىپتى، «تۇڭعىش پرەزيدەنتتىڭ تەمىرتاۋىنا» سەناتورلار سوقپاي كەتتى. ءسويتىپ جولداۋدا كورسەتىلگەن انا مەن بالا ماسەلەلەرى وبلىس ورتالىعىنداعى ۇلكەن-ۇلكەن عيماراتتاردىڭ ىشىنەن شىعا الماي قالدى. ال ەندى سەناتورلار سوقپاي كەتكەن بالالار اۋرۋحاناسىندا وسى كەزدە «قانداي-قانداي كونتسەرتتەر» بولىپ جاتىر ەدى دەگەنگە كەلەتىن بولساق، ەندى وسى ماسەلەنى دە ويىمىزعا تۇسىرە كەتكەنىمىز ارتىق بولماس.

تەمىرتاۋ  كوز  جاسىنا  سەنبەيدى
تەمىرتاۋ قالاسىنداعى جار دەگەندەگى جالعىز بالالار اۋرۋحاناسىنىڭ «ءالدي-ءالدي ءال-بوپەمى» وبلىس اۋماعىنان اسىپ، رەسپۋبليكا دەڭگەيىنە كوتەرىلىپ كەتكەنىن پارلامەنتاريلەر بىلمەسە دە، قاراپايىم كوپشىلىك جاقسى بىلەدى. سونا-ا-اۋ ءبىر جىلدارى... ياعني وتكەن عاسىرىمىزدىڭ سونا-ا-ۋ - الپىس توعىزىنشى جىلى سالىنىپ، سودان بەرى كۇردەلى جوندەۋ دەگەندى ءوڭى تۇگىلى، تۇسىندە دە كورمەگەن تەمىرتاۋ قالاسىنداعى بالالار اۋرۋحاناسىنا وتكەن جىلى وبلىس بيۋدجەتىنەن اقشا ءبولىنىپ، عيماراتتىڭ كورپۋستارىنا كۇردەلى جوندەۋ جۇرگىزىلەدى دەگەندە قالاداعى بالا بىتكەن «جىلاپ-سىقتاۋىن» ساپ تىيعان ەدى. بالالار اۋرۋحاناسىنىڭ ديرەكتورى انيسيا پيا حانىمنىڭ دا، جالپى اۋرۋحانا ۇجىمىنىڭ دا ورىندالماس ارماندارىنا اينالعان پروبلەمالارى - جانساقتاۋ ءبولىمىن ءبىرىنشى قاباتقا كوشىرىپ، وزگە بولىمدەردى جاڭالاۋ، سول سياقتى اۋرۋحانا اۋماعىن اباتتاندىرۋ سياقتى كەزەك كۇتتىرمەيتىن پروبلەمالار ەدى. ال ەندى ەسەپ-قيساپقا نەگىزدەلگەن تيەسىلى اقشا ءبولىنىپ، مەملەكەتتىك ساراپتامادان وتكەن سمەتاعا بايلانىستى تەندەر جاريالانعاندا، شىنىن ايتۋ كەرەك، تەك اۋرۋحانا ۇجىمى عانا ەمەس، قالاداعى بالالى ءۇيدىڭ بارلىعى «بوركىن اسپانعا اتا» قۋانعان بولاتىن. تەندەر دەگەن «تەنتەكتىڭ» قالاي وتەتىنىن وزگەلەر بىلمەسە دە، قازاقستاندىقتار وتە جاقسى بىلەدى. سوندىقتان ءوزىنىڭ وزگە باسەكەلەستەرىنە قاراعاندا اجەپتاۋىر از قارجى سۇراعان... نەبارى 231-اق (؟) ميلليون تەڭگە سۇراعان «مانادا» دەگەن جاۋاپكەرشىلىگى شەكتەۋلى سەرىكتەستىك تەندەردى ۇتىپ الىپ، اپاق-ساپاقتا الىپ-ۇشىپ اۋرۋحاناعا باسشىلىعىمەن كەلىسىمشارتقا وتىرا قالادى. «ۇرىستا تۇرىس بار ما»، اۋرۋحانا باسشىلىعى مەن مەردىگەر فيرما اراسىنداعى كەلىسىمشارت وتكەن جىلدىڭ جەتىنشى مامىرى كۇنى ءتۇزىلىپ، «ەكى جاقتى بەيبىت» كەلىسىمشارتقا قول دا قويىلىپ كەتەدى. ارادا تۇپ-تۋرا ەكى اپتا وتكەننەن كەيىن اۋرۋحانانىڭ سول جاق قاناتى، «ەكى جاقتى كەلىسىمشارتتىڭ» نەگىزىنە سايكەس، مەردىگەر فيرماعا بوساتىلىپ بەرىلەدى دە. الايدا جاۋاپكەرشىلىگى شەكتەۋلى سەرىكتەستىكتىڭ «جاۋاپكەرشىلىگى» جۇمىس ماسەلەسىنە كەلگەندە شىنىندا دا «شەكتەۋلى» بولىپ شىققانعا ۇقسايدى. نەگە دەسەڭىز، اۋرۋحانا ديرەكتورى انيسيا پيا حانىمنىڭ ايتۋىنا قاراعاندا، 69 ميلليون تەڭگە «ءاپ، ءبىسسىمىللا!» دەگەندە قۇرىلىس ماتەريالدارىن ساتىپ الۋ ءۇشىن بىردەن مەردىگەرگە ءبولىنىپ بەرىلىپتى. بىراق نەگە ەكەنى بەلگىسىز، جوندەۋ جۇمىستارىن جۇرگىزۋگە جازدىڭ ەڭ قولايلى دەگەن ماۋسىم، شىلدە، تامىز ايلارىندا قۇرىلىسشىلار مۇلدە جۇمىس ىستەمەگەن كورىنەدى. جالپاق تىلمەن ايتقاندا، قاشىپ-پىسىپ ءجۇرىپ ايتەۋىر عيماراتتىڭ انا جەرىن ءبىر، مىنا جەرىن ءبىر اقتاپ، سىرلاعان بولىپ، كوز بوياۋشىلىق جاساعانعا ۇقسايدى. وسى جەردە ەسكەرە كەتەتىن تاعى ءبىر قىزىق ماسەلە - اۋرۋحانا باسشىلىعى عانا ەمەس، بالالار اۋرۋحاناسىنىڭ كۇردەلى جوندەۋى تەزىرەك بىتسە ەكەن دەپ جاتپاي-تۇرماي جاراتقاننان جالىنىپ سۇراپ جۇرگەن جالپى تەمىرتاۋلىقتاردىڭ ءبىر تاڭعالاتىنى - وسىنداي ماڭىزدى وبەكتىگە كۇردەلى جوندەۋ جۇمىستارىن جۇرگىزۋ ءۇشىن تەندەردى ۇتىپ العان قۇرىلىس فيرماسىنىڭ، باسقالارىن ايتپاعاننىڭ وزىندە، قاراپايىم عانا بەتون ارالاستىراتىن ارنايى قۇرىلعىلارى دا (بەتونومەشالكا دەيدى عوي ەل اراسىندا) جوق كورىنەدى. جۇمىسشىلار بەتوندى «قىرىق جىل بۇرىنعى كۇرەكتەرمەن» ارالاستىرادى ەكەن. ارينە، مۇنداي تاسباقا تىرلىكتەن كەيىن كۇردەلى جوندەۋدىڭ بەلگىلەنگەن ۋاقىتتا بىتە قويۋى ەكىتالاي. ماسەلەن، اۋرۋحانا عيماراتىنىڭ سول جاق قاناتىنىڭ جوندەۋ جۇمىستارى شىلدە ايىندا بىتۋگە ءتيىس بولسا، ول قاراشا ايىنا دەيىن سوزىلعان. ال «جاپ-جاقسى» جاسالعان جوسپار بويىنشا قاراشا ايىندا عيماراتتىڭ سول قاناتى عانا ەمەس، جالپى اۋرۋحانانىڭ كۇردەلى جوندەۋى تولىقتاي بىتۋگە ءتيىس ەكەن. حوش دەيىك، «جارتاسقا باردىم، كۇندە ايقاي سالدىم - ودان دا شىقتى جاڭعىرىق» دەپ اباي جارىقتىق ايتقانداي، «باس بىلگەن بۇقاعا - «وك!» دەگەن ءولىم» دەگەننىڭ كەرى تۇپ-تۋرا «مانادانىڭ» ديرەكتورىنا ارنايى اتالىپ ايتىلعانعا ۇقسايدى. دەگەنمەن، «جاۋاپكەرشىلىگى» كوپشىلىكتىڭ كوڭىلىنەن شىقپاي وتىرعان جاۋاپكەرشىلىگى شەكتەۋلى سەرىكتەستىكتىڭ ديرەكتورى سالامات احمەتوۆ دەگەن مىرزانىڭ اۋرۋحانانىڭ جوندەۋ جۇمىستارىنا قاتىستى وي-پىكىرلەرى پيا حانىمنىڭ ايتقاندارىنا مۇلدە كەرەعار كەلەدى. ونىڭ ايتۋىنشا، اتالىپ وتىرعان وبەكتىدە پروبلەمالار دەگەنىڭىز ولاردىڭ ويلاعاندارىنان الدەقايدا كوپ بولىپ شىققان كورىنەدى. ماسەلەن، كۇردەلى جوندەۋ جۇمىستارىنا بايلانىستى جوبالىق-سمەتالىق قۇجاتتاردى تىكەلەي اۋرۋحانا اكىمشىلىگىنىڭ ءوزى تۇزۋگە ءتيىس بولسا، ولار ونى جەرگىلىكتى ءبىر كاسىپكەرگە تاپسىرعان ءتارىزدى. ال ول بولسا «تاريحى ەلۋ جىلدان» اسىپ كەتكەن عيماراتتىڭ ەسكى جوباسىنا سۇيەنە وتىرىپ نەگىزگى قۇجاتتاردى بىرنەشە (؟) كۇننىڭ ىشىندە دايىنداي سالىپتى. ناتيجەسىندە بۇرىنعى جوبا قۇجاتتارى مەن قازىرگى جوندەۋ جۇمىستارىنا قاتىستى قۇجاتتار ءوزارا سايكەس كەلمەيتىن كورىنەدى. مىسالى، سمەتا بويىنشا تۇپ-تۋرا ەكى مىڭ رادياتوردى اۋىستىرۋ قاجەت بولسا، مۇندا ونىڭ ناقتى سانى ەكى جۇزگە دە جەتپەيتىنگە ۇقسايدى. سونداي-اق، بۇكىل عيمارات بويىنشا 300 مەترگە جۋىق ەلەكتر جەلىلەرى اۋىستىرىلۋ كەرەك دەپ ەسەپتەلگەن بولسا، قۇرىلىسشىلار قازىردىڭ وزىندە 3000 مەتردەن استام ەلەكتر جەلىسىن اۋىستىرىپ تاستاپتى. احمەتوۆتىڭ ايتۋىنا قاراعاندا، مۇنداي قاراما-قايشىلىقتار ءۇش قاباتتى عيماراتتىڭ ىشىندەگى شاعىن ىلمە شامدار (سۆەتيلنيكتەر) مەن دابىل جۇيەلەرىنە دە قاتىستى ەكەن. سونىمەن بىرگە، «مانادا» ديرەكتورىنىڭ پىكىرىنشە، عيماراتتىڭ ىشىنە كۇردەلى جوندەۋ جۇمىستارىن جۇرگىزگەن كەزدە ابدەن ءشىرىپ كەتكەن جىلۋمەن قامتاماسىز ەتەتىن جىلۋ قۇبىرلارىن اۋىستىرۋ ماسەلەسى دە جوبادا مۇلدە كورسەتىلمەپتى. سوندا شىرىگەن قۇبىرلاردى اۋىستىرۋ ماسەلەسى سمەتالىق جوبادا كورسەتىلمەگەن بولسا، فيرما جۇمىسشىلارى ونى قالاي اۋىستىرادى؟ اينالىپ كەلگەندە، مەردىگەر فيرمانىڭ پىكىرىنشە، جۇمىستىڭ توقتاپ تۇرعان سەبەبى - قاجەتتى قارجىنىڭ تولەنبەۋىندە بولىپ وتىرعان كورىنەدى.
- جاسىراتىنى جوق، ءبىز وزىمىزگە تيەسىلى اقشانىڭ 30 پايىزىن كەلىسىمشارت بويىنشا الدىن-الا العان بولاتىنبىز، - دەيدى «مانادانىڭ» ديرەكتورى سالامات احمەتوۆ، - بۇل شامامەن 70 ميلليون تەڭگەدەي بولىپ قالادى. بۇعان بىزدەر بىردەن قۇرىلىس ماتەريالدارىن، ونىڭ ىشىندە اباتتاندىرۋعا قاجەتتى دۇنيەلەردى دە، سونىمەن بىرگە جاپ-جاڭا ءليفتىنى دە ساتىپ الدىق. ال شىلدەنىڭ 28-ءى كۇنى سول كەزگە دەيىن ىستەلگەن جۇمىستىڭ اكتىسىن جاپتىق. تەحنيكالىق باقىلاۋ قىزمەتكەرلەرى مەن اۋرۋحانا ديرەكتورى قول قويعاننان كەيىن وبلىستىق دەنساۋلىق ساقتاۋ دەپارتامەنتى اقىمىزدى تولەۋگە ءتيىس ەدى. الايدا ءدال سول كەزدە ولاردىڭ باسشىلارى اۋىسىپ كەتتى دە، ي ۆسەم بىلو نە دو ناس. مەن سوعان قاراماستان ون ميلليون تەڭگەنىڭ شاماسىنداعى قۇرىلىس ماتەريالدارىن قارىزعا الىپ قويدىم، ەندى مىنە، سونى دا تولەي الماي وتىرمىن. جاقىندا مەنى مۇلدە ولتىرەتىن شىعار؟!
ۇزىن ءسوزدىڭ قىسقاسى، مەردىگەر فيرمانىڭ ديرەكتورى «باس» دەسە، اۋرۋحانا ديرەكتورى «قۇلاق» دەيدى. اركىم ءوزىنىڭ ايتقانىن دۇرىس دەپ ەسەپتەيدى. انيسيا پيا حانىم ايتادى، الدىن-الا بولىنگەن اقشا قۇرىلىس ماتەريالدارىنا دا، قۇرىلىسشىلاردىڭ ەڭبەكاقىلارىن تولەۋگە دە جەتۋگە ءتيىس دەپ. ال احمەتوۆ مىرزا ايتادى، قۇرىلىسشىلارىم ەڭبەكاقىسىز قالدى، جاقىندا ولار «زاباستوۆكاعا» شىعادى دەپ. ال ءبىزدىڭ تۇسىنگەنىمىز - «بۇگىنگە دەيىن اتقارىلعان جۇمىس كولەمىنىڭ اقشاسىن سەندەرگە وبلىستىق دەنساۋلىق ساقتاۋ دەپارتامەنتى تولەۋگە ءتيىس» دەپ اۋرۋحانا باسشىلىعى احمەتوۆتى قاراعاندىعا «قۋالاسا»، ولار ونى قايتادان تەمىرتاۋعا قاراي شىعارىپ سالادى. ال ايازى مەن بورانى القىمنان العان بيىلعى ەرەكشە قىس القا-سالقا بولعان اۋرۋحانا ىشىندەگى كوزدەرى جاۋتەڭدەگەن بۇلدىرشىندەردى باسىنان سيپاي قويمايتىنى جانە دە ايداي اقيقات. مىنە، وسىنداي ماسەلەلەردىڭ شەشىمى كەزەك كۇتتىرمەيتىن كۇندەلىكتى پروبلەماعا اينالىپ وتىرعان قىسىلتاياڭ ساتتەردە ەلباسىنىڭ جولداۋىنداعى انا مەن بالا ماسەلەسىنە باسا نازار اۋدارماي، ۇلكەن-ۇلكەن عيماراتتار ىشىندە جاتتاپ العان جولداۋ جولدارىن سىدىرتىپ ايتىپ شىعىپ، بىردەڭەنى ءبىتىرىپ تاستاعانداي قايتادان استاناعا اسىعۋ پارلامەنتاريلەر ءۇشىن نەگە قاجەت بولدى ەكەن، ءا؟ بۇلاي دەيتىن سەبەبىمىز، سەناتورلارعا دەيىن ماجىلىسمەندەر دە قايران دا قايران كومىرلى قاراعاندىعا اسىعىس كەلىپ، اسىعىس كەتىپ قالعان بولاتىن. تەمىرتاۋلىقتار قازىر پارلامەنتاريلەردەن كۇدەرلەرىن ۇزە باستادى. ولاردىڭ ەندىگى ۇمىتتەرى - وبلىس اكىمى ابىلعازى قۇسايىنوۆ مىرزادا. نەگە؟
ويتكەنى ەلباسىنىڭ «قازاقستان-2050» ستراتەگياسى - قالىپتاسقان مەملەكەتتىڭ جاڭا ساياسي باعىتى» اتتى جاڭا جولداۋىنان كەيىن ىلە-شالا وبلىس اكتيۆىن وتكىزگەن ابىلعازى قۇسايىنوۆ مىرزا تۇپ-تۋرا بىلاي دەگەن بولاتىن: «...انا مەن بالا ماسەلەسىنە جاۋاپتى قۇرىلىمداردىڭ بىرلەسكەن جۇمىسىنىڭ ناتيجەسىمەن ءبىزدىڭ وبلىس ماقتانا الادى. وبلىسىمىزدا رەسپۋبليكا بويىنشا العاشقىلاردىڭ ءبىرى بولىپ «بالالارعا مەيىرىمدى قالا» جوباسى قولعا الىندى...»
راس، وبلىس باسشىسىنىڭ ايتىپ وتىرعانى كوڭىل قۋانتارلىق ماسەلە، الايدا ىرىڭ-جىرىڭى كوبەيىپ، ءالى كۇنگە دەيىن «اۋى مەن باۋى سالاقتاعان» بالالار اۋرۋحاناسى ورنالاسقان تەمىرتاۋ قالاسى «بالالارعا مەيىرىمدى قالا» دەگەن اتقا لايىق ەمەس پە؟ مۇنى قالاي تۇسىنۋگە بولادى؟ پارلامەنتاريلەر كەلدى...كەتتى. اكىم ايتتى...قويدى. سولاي ما سوندا؟ وسىعان دەنى دۇرىس جاۋاپ قايتاراتىن مەملەكەتتىك مەكەمە بار ما ءوزى بىزدە؟ بۇعان پارلامەنتىمىز نە دەيدى؟ بۇعان وبلىسىمىزدىڭ اكىمدىگى نە دەيدى؟ بۇعان، ءتىپتى، تەندەردىڭ «تەگىن» اقشاسىنا بالالار اۋرۋحاناسىن «اياعىنان تۇرعىزا» الماي وتىرعان وبلىستىق دەنساۋلىق ساقتاۋ دەپارتامەنتى نە دەيدى؟ الدە تەمىرتاۋ بالالارىنىڭ كوز جاسىنا ەشكىم سەنبەي مە؟ ءبىز جاۋاپ كۇتەمىز؟

"حالىق ءسوزى" گازەتى