ارمەنيا بيلىگى «روسسيا سەگودنيا» مەدياگرۋپ جانە RT تەلەارناسىنىڭ باس رەداكتورى مارگاريتا سيمونيان مەن مەملەكەتتىك دۋمانىڭ تمد ىستەرى جونىندەگى كوميتەتىنىڭ ءبىرىنشى ورىنباسارى كونستانتين زاتۋلينگە ەلگە كىرۋگە تىيىم سالدى. بۇل تۋرالى سيمونياننىڭ ءوزى Telegram ارناسىندا جازدى.

كونستانتين زاتۋلين ارمەنيا پارلامەنتىنىڭ ەلگە كىرۋگە تىيىم سالۋىنا ونىڭ ارمەنيا تۋرالى پىكىرى سەبەپ بولعانىن ايتقان.

ارمەنيا تارابى جىبەرگەن حاتتا، ءزاتۋليننىڭ ارمەنيا رەسپۋبليكاسى تۋرالى پىكىرلەرى ەكى مەملەكەت اراسىنداعى دوستىق جانە وداقتاستىق قاتىناستاردىڭ دامۋىنا نۇقسان كەلتىرەتىنى جازىلعان. ارميان بۇقارالىق اقپارات قۇرالدارىنىڭ حابارلاۋىنشا، ءزاتۋليننىڭ نون گراتا بولۋىنا سەبەپ: ونىڭ قاراباقتاعى 44 كۇندىك سوعىستا جەڭىلگەن ارمەنيانى قايتا-قايتا كىنالاۋى.

ال سيمونياننىڭ قاراباق تۋرالى: «ءاربىر ارميان ءبىر نارسەنى ءتۇسىنۋى كەرەك: ەگەر رەسەي بولماسا، كەلەسى اپتادا-اق،  بۇكىل قاراباقتان ايىرىلاتىن ەدى. بارىنەن. سەبەسەڭىز قاراباق باسشىسىنان سۇراڭىز، - دەپ جازعان جازباسى بار.

مىنەكەي، اۋزىنا كەلگەنىن ويلانباي جايىپ سالاتىن رەسەيلىك ۇگىت-ناسيحاتشىلاردى ارمانيا بيلىگى كورگىسى كەلمەيتىنىن مالىمدەدى. سويى ارميان مارگاريتا ءۇشىن بۇل كۇتپەگەن سوققى بولعانى ايدان انىق.

مارگاريتا سيمونيان وتقا ماي قۇيعاندى جانى سۇيەتىندەر قاتارىنان ەكەنىن بىلەمىز. ەلىمىزدە بولعان «قاڭتار وقيعاسىنا» ۇقشۇ اسكەرى ارالاسقانى ءۇشىن دە قازاقستان رەسەيگە قارىز دەگەن بولاتىن.

«رەسەي ۇقشۇ اسكەرىن جىبەرگەنى ءۇشىن قازاقستان بىرنەشە تالاپتاردى ورىنداۋ كەرەك»، - دەگەن ەدى مارگاريتا سيمونيان ءوز جازباسىندا.

«ارينە، مىندەتتى تۇردە كومەكتەسۋ كەرەك. بىراق، بىرنەشە شارت قويۋ قاجەت. قىرىمدى مويىنداسىن، كيريلليتسانى قايتارسىن، ورىس ءتىلىن قىرعىزستانداعىداي ەكىنشى مەملەكەتتىك ءتىل دەپ جاريالاسىن، ورىس ءتىلدى مەكتەپتەردى جايىنا قالدىرسىن، رەسەيگە قارسى كوممەرتسيالىق ەمەس ۇيىمداردى قۋىپ شىقسىن»، - دەپ جازعان ول. ول بۇرىنعى كەڭەس وداعى ەلدەرىنىڭ تاۋەلسىزدىگىن «كۇلكىلى» دەپ اتاعان.

«تاۋەلسىزدىك – مەملەكەتتىڭ ءبىر-ەكى مىڭ «تاسپەن قارۋلانعانداردىڭ» اسكەردى قۋىپ شىعىپ، اەروپورت پەن قويمالاردى باسىپ الىپ جانە ءبىر تاۋلىكتە ەلدى تىپ-تيپىل قىلعانىنا ءوزىن تاۋەلسىزبىن دەپ جۇرگەن ەلدەن تىكەلەي اسكەري كومەك سۇراۋعا ءماجبۇر بولۋى. بۇل – وتە كۇلكىلى تاۋەلسىزدىك»، - دەدى سيمونيان.

ونىڭ بەيپىل اۋىز بايى دا (تيگران كەوسايان), ءوزى دە قازاقستان حالقى مەن بيلىگىنە اۋىر-اۋىر ايىپتاۋ ايتىپ، تىلدەرى جەتكەنشە تىلدەپ، كەرەك بولسا، ءدوڭايبات شەشىپ، شەشەنسىگەن، ءسويتىپ ەلارالىق داۋ شاقىرعان مارگاريتا سيمونيان دەگەن دوڭمۇرىنعا ارمەنيا سياقتى قازاقستانعا دا كىرۋگە تىيىم سالۋ كەرەك-اق!

ايجان تەمىرحان

Abai.kz