1-سۋرەتتە: جۇسىپبەك ايماۋىتۇلى. تۇتقىندالعان كەزىندەگى سۋرەتى. بولات ءمۇرسالىمنىڭ "الاشوردا" فوتوالبومىنان الىندى

2-سۋرەتتە: جۇسىپبەك ايتماۋىتۇلىنىڭ بالاسى بەكتۇر ايماۋىتوۆ

1-سۋرەتتە: جۇسىپبەك ايماۋىتۇلى. تۇتقىندالعان كەزىندەگى سۋرەتى. بولات ءمۇرسالىمنىڭ "الاشوردا" فوتوالبومىنان الىندى

2-سۋرەتتە: جۇسىپبەك ايتماۋىتۇلىنىڭ بالاسى بەكتۇر ايماۋىتوۆ

2006 جىلى تامىزدىڭ 9 جۇلدىزى كۇنى  م.اۋەزوۆ اتىنداعى ادەبيەت جانە ونەر ينستيتۋتىنا   رەسەيدىڭ كەمەروۆا وبلىسى پروكوپەۆسك قالاسىنان ەرەكشە ءبىر قوناق سۋىت كەلگەن  ەدى. بۇل بەيساۋات قوناقتىڭ شاشى دۋدىراپ، ساقالى-مۇرتى  ابدەن ءوسىپ كەتكەن، كيىم-كەشەگى كىر-قوجالاق، جاسى بولسا توقساننان اسقان ەدى، باتەڭكەسىنىڭ باۋىن قالايى سىممەن بايلانعانى دا وقشاۋ  ەدى.  بەيتانىس قاريا اكادەميك سەرىك قيراباەۆ، سەيىت قاسقاباسوۆتى ىزدەپ كەلگەنىن ايتادى.  اڭ-تاڭ بولعان جاستار ءتۇر-سىقپىتى كوزگە قوراش كورىنگەنىمەن مىنەز-بولمىسىنان دەگدارلىق پەن  پاڭدىق لەبى ەسكەن جۇمباق شالدى قابىلداۋ بولىمىنە اپارادى. وندا وتىرعان ينستيتۋتتىڭ كادر ءبولىمىنىڭ مەڭگەرۋشىسى  باقىت جۇماعاليەۆا اپاي بۇل  ۇلكەن كىسىنى جىعا تاني كەتەدى. بەيتانىس قوناق الاش ارىسى جۇسىپبەكتىڭ اسىل سىنىعى بەكتۇر ايماۋىتوۆ ەدى. قاريانى قابىلداعان ينستيتۋت ديرەكتورى سەيىت اسقارۇلى دەرەۋ جاستارعا تاپسىرما بەرەدى، قوناقكادە ۇسىنادى، اقساقالدى ورنالاستىرۋ، قۇجاتىن رەتتەۋ شارۋاسىن ۇيىمداستىرادى. بۇل كوزايىم وقيعادان قۇلاعدار بولعان حالىق جازۋشىسى ءابدىجامىل نۇرپەيىسوۆ، اقىن سەرىكباي قوسان، جۇسىپبەكتانۋشى عالىم نۇرجان قۋانتايۇلى باستاعان ىنتال توپتىڭ ارالاسۋىمەن بەكتۇر جۇسىپبەكۇلى ايماۋىتوۆ الماتى قالاسى «ارداگەرلەر» ۇيىندە ءومىرىنىڭ اقىرعى ءدامى تاۋسىلعان 2008 جىلعا دەيىن تىرشىلىك ەتەدى.

سول كەزدە مەن بەكتۇر اتامەن ەتەنە تانىسىپ، ۇيىمە قوناق ەتتىم، پەرزەنت رەتىندە ازدى-كوپتى قىزمەتتەرىنە جارادىم. كەرەمەت تاعدىر يەسى، اسىلدىڭ سىنىعى، الاشتىڭ ۇزىگى  شاڭىراعىمنان ءدام تاتىپ، دۇعا وقىپ،  اق باتاسىن بەرگەنىن بۇگىندەرى ىرىم ەتىپ،  باقىت سانايمىن. اقساقال ورنالاسقان «ارداگەرلەر» ۇيىنە  ايگۇل ىسىماقوۆا، قايرات راي، دۇيسەنگۇل جاھان، ەرمەك قانىكەي، نۇرجان قۋانتاي، ءمادي الجانباي، نۇرتاي لاقان   سەكىلدى تاعى باسقا كوپتەگەن زيالىلار، جۋرناليستەر بارىپ، تۇراقتى حابارلاسىپ، سۇحباتتاسىپ، جاردەمدەسىپ تۇردى.  سول كەزدە اتامەن اڭگىمەلەسىپ، كوپتەگەن ساۋالدارىما جاۋاپ الدىم. قاتيراما ءتۇرتىپ قويعان سۇحبات-اڭگىمەمدى جاريالاۋدىڭ ءساتى ەندى تۋىپ وتىر.

-    توقسانعا كەلگەن جاسىڭىزدا سوناۋ كەمەروۆادان  جالعىز جاياۋدىڭ كۇيىن كەشىپ، قۇر سۇلدەرىڭىزدى سۇيرەتىپ نەگە كەلدىڭىز؟

-   مەن الاش ارىسى جۇسىپبەكتىڭ ۇلىمىن. سۇيەگىم اتاجۇرتتا قالسىن، اتا-بابا توپىراعى باياناۋىلدا ءومىر سۇرگىم كەلەدى.

-   كەمەروۆادا مەكەندەگەن قازاقتاردىڭ كوبى شاحتەر ەكەنىن بىلەمىز. ءسىز ءوزىڭىز دە شاحتىدا جۇمىس ىستەپسىز. ال گۋبەرناتور امانكەلدى تولەەۆ قازاق ەكەنىن  ماقتان ەتەمىز. امانكەلدى تولەەۆپەن كەزدەستىڭىز بە؟

-   امانكەلدىنىڭ قازاق ەكەنىن بىلەمىن، بىراق ول قازاقشا سويلەمەيدى. مەن جۇسىپبەك ايماۋىتوۆتىڭ ۇلىمىن، ماعان ول كەلىپ سالەم بەرۋى ءتيىس. سول سەبەپتەن وعان بارعام جوق.

-    جاستىق شاعىڭىز  قيان يتجەككەندە اقتەڭىزدە ايازدى تۇرمەدە، قالعان ءومىرىڭىز جات ەل رەسەيدە ءوتتى. جان جارىڭىز جاراتقاننىڭ بۇيرىعىمەن  ورىس ۇلتىنان بولدى، بالالارىڭىز قازاقشا بىلمەيدى دەپ سوگە الماسپىز. ءوزىڭىز ناماز وقىپ، قازاقشا تازا سويلەيدى ەكەنسىز. تىلدەن، دىلدەن جاڭىلماۋىڭىزعا نە سەبەپ بولدى؟

-  مەن قازاقتىڭ ۇلى جازۋشىسى جۇسىپبەكتىڭ بالاسىمىن دەگەندى ارقاشان دا ماقتان ەتتىم. ءتىپتى تۇرمەدە وتىرسام دا اكە ارۋاعى ماعان ازىق بولدى،  قۋات-كۇش، دەم بەردى. ەكىنشىدەن مەنىڭ ازامات بولىپ قالىپتاسۋىم باشقۇرتستاندا، تاتارستاندا ءوتتى. اكەم ۇستالىپ كەتكەن سوڭ مەنى باشقۇرت زيالىلارى ۋفاعا اكەلدى، سولاردىڭ قولىندا تاربيەلەندىم، بۇل اعايىندار ءدىندار تاقۋا، ءبىلىمدى،  اتا سالتىنا ادال كەلەدى. وسى اعايىنداردىڭ ءتالىمى مەنىڭ قازاقشىل بولۋىما ىقپال ەتكەندىگى دە شىندىق.

-   اتا، ءسىزدىڭ قورجىندارىڭىز زىلدەي اۋىر ەكەن. ىشىندە نە بار دەپ،  ءسىزدىڭ رۇقساتىڭىزبەن   اقتارساق، سونىڭ كوبى ەلەكتريك مامانعا قاجەتتى ءتۇرلى قۇرال-سايماندار، تەمىر-تەرسەك، نەبىر اساي-مۇسەيلەر بولىپ شىقتى. بۇل نە ءۇشىن قاجەت؟

-   ە، قاراعىم، ادام ءوز كاسىبىنە ومىردەن وتكەنشە  ادال بولۋى كەرەك. كاسىپ  ادامعا جاراتقان تاراپىنان ءناسىپ ەتىلەدى. مەن كەزىندە سوۆەت وداعىنداعى ەڭ مىقتى دەگەن ءجۇز ەلەكتريكتىڭ ءبىرى بولعام. مەنى ۋفادا ماسكەۋدەن كەلگەن اتاقتى ورىس ينجەنەرى وقىتتى، ەڭبەكقۇمارلىعىمنىڭ ارقاسىندا ءوز كاسىبىمنىڭ شىڭىنا شىقتىم، وسى سالاداعى دارىندى مامانداردىڭ ءبىرى بولدىم. مەنى تۇرمەگە ءتۇسىرىپ، تۇبىمە جەتكەن دە وسى ەلەكتريك ماماندىعى! مەن قابىلەتىمنىڭ ارقاسىندا ارنايى وتكىزىلگەن كونكۋرسقا قاتىسىپ،  قاتارلاستارىمنان وق بويى وزىپ، قازان قالاسىنداعى س.پ.گوربۋنوۆ اتىنداعى  سوعىس ۇشاعىن جاسايتىن جابىق زاۋىتقا 1936 جىلى 12-ءىنشى قازاندا جۇمىسقا قابىلداندىم. بۇل زاۋىت سول كەزدەگى الەمدەگى ەڭ مىقتى ۇشاق وندىرەتىن زاۋىت ەدى.  جالاقىم دا، تۇرمىسىم دا تۇزەلىپ سالا بەردى. اقىرى قىرسىق شالدى، 1937 جىلى ۇستىمنەن ارىز ءتۇسىپ، «كونترەۆوليۋتسيونەر جۇسىپبەك ايماۋىتوۆتىڭ ۇلى جابىق زاۋىتتا شپيوندىق جاساپ، سوۆەت مەملەكەتىنە قاستىق جاساعالى ءجۇر» دەگەن جالامەن وگپۋ تەكسەرىپ،  اقتەڭىزگە اباقتىعا ايدالىپ كەتە بەردىم، 1937 جىلى 30-ىنشى جەلتوقساندا جالامەن 10 جىلعا باس بوستاندىعىمنان ايىردى.

-   باۋىرىڭىز جاناق قالاي ۇستالماي امان قالدى؟

-   مەنىڭ تۇبىمە جەتكەن دە، كوركەيتكەن دە وسى ەلەكتريك ماماندىعى دەدىم. جاناق مەكتەپتە ماتەماتيك بولدى، ول ماسكەۋدە جوعارى ماتەماتيكادان ومىرباقي ساباق بەردى، كوكەسى ءالىمحان ەرمەكوۆتىڭ جولىن قۋدى،  قىزدارى دا وزىنە تارتقان اقىلدى، ماتەماتيكتەر.  ونى اسكەري زاۋىتتا ىستەمەگەندىكتەن ەشكىم تەكسەرە قويماعان بولار. قىزدارى نادەجدا مەن ۆالەنتينا وتە يناباتتى، ۇيلەرىندە وتكەن جىلى قوناقتا بولدىم،  ماسكەۋدە موجايسكوە شوسسەدە تۇرادى، حات الىسىپ تا تۇردىق.

-  ەلدەن ۇيات بولادى دەپ، باتەڭكەڭىزگە جىپتەن باۋ تاعىپ، قالايى سىمدى شەشەيىن دەگەنگە نەگە قارسى بولدىڭىز؟

-  قاراعىم، جالپى ەلەكتريكتەردىڭ ءبارى اياق كيىمىنە قالايى سىمنان باۋ تاعادى،  بۇل ەرسى ەمەس، كاسىبي داعدى، ەكىنشىدەن مەن سەكىلدى كارى ادامعا باۋدى بايلاعانشا، قالايىنى يە سالعانىم دۇرىس، ءارى جەڭىل ەمەس پە؟!

-   اقتەڭىزدە لاگەردە كىمدەرمەن بىرگە بولدىڭىز؟

-   وندا نەشە ءتۇرلى ۇلتتار-ۇلىستار، زيالىلار بار، تۇرمەدە ناعىز ينتەرناتسيوناليزم جايلاپ تۇر. ونداعىلاردىڭ  كوبى شپيون دەگەن باپپەن جازالانۋعا كەلگەندەر. 21 جاسىمنان تۇتقىندالىپ اقتەڭىزدىڭ  سوليكامسك، نىروب لاگەرىندە  1937-1948 جىلدىڭ قاڭتارىنا دەيىن قاماۋدا بولدىم. وندا اتتارىمىزدى ايتپايدى، ارنايى نومەرمەن شاقىرادى. اقەدىل، ءبىر قىزىعى وندا قىتايدان، موڭعولدان كەلگەن قازاقتىڭ نارداي ازاماتتارى جازا وتەگەن. ولار وزدەرى قازاقشا سۋداي سويلەيدى، سونىمەن بىرگە ولار كادىمگى قىتاي، موڭعولدارمەن سولاردىڭ تىلىندە سويلەسەدى. ءبىز قىتايمەن، موڭعولمەن قارىم-قاتىناس جاساعاندا ولار بىزگە ءتىلماش بولادى. بارلىعى دا «وتانىن ساتقاندار، شپيوندار» دەگەن جالامەن سوتتالعاندار.  ءسىبىر ايازى اقىرىپ تۇرادى، مينۋس 72 گرادۋس سۋىق بولادى، اقپاندا نار قاراعايلار   ايازعا شىداماي تارس-تارس ايىرىلىپ جاتادى. بىراق الاشتىڭ ارۋاعى، رۋحى ءبىزدى سۇيەدى، سۇيرەدى، سىندىرمادى.

-   ءسىزدىڭ بلوكناتىڭىزدا م.اۋەزوۆ اتىنداعى ادەبيەت جانە ونەر ينستيتۋتىنىڭ،  سونىمەن بىرگە اكادەميك سەرىك قيراباەۆتىڭ، باياناۋىلداعى تۋىس-تۋعانداردىڭ، ءتىپتى بەلبۇلاقتا تۇراتىن اقىن تەمىرشە سارىباەۆتىڭ    مەكەن-جايلارى وتە كوركەم جازۋمەن بەزەندىرىلىپ  جازىلعان ەكەن. جازۋ ورنەگىڭىز اسەم-اق؟

-  اكەم جۇسىپبەك ەتىك شەبەرى، سۋرەتشى بولعان. ول كىسى مەنىڭ العاشقى ساۋاتىمدى اشقان. بۇل ناقىش، ۇقىپتىلىق، ىقتياتتىلىق  اكە قانىنان جۇقسا كەرەك. ءبىز لاگەردە نەمىسكە قارسى سوعىسايىق دەپ 1943 جىلى ارىزداندىق، ەشكىم قۇلاق اسپادى،كەرىسىنشە ازاپتاي ءتۇستى. ءبىر كۇنى ءبىر گەنەرال كەلدى، مەن ونىڭ سۋرەتىن اكۆارەل ەتىپ سالدىم. ول تاڭ-تاماشا بولدى، قول استىنداعىلارعا ماعان جىلى قاراۋعا تاپسىرما بەردى. مىنە، اكە ۇيرەتكەن ونەر ءتىپتى اباقتىدا دا  شاپاعاتىن تيگىزدى.

-    ءسىز  كىمنەن قورقاسىز؟

-   اكەم جۇسىپبەك «پسيحولوگيا» دەگەن وقۋلىق جازعان. ول كىتاپتى اتامىز احمەت بايتۇرسىنۇلى ۇستەلىنە ۇنەمى قويىپ قويىپ وقيتىن، اكەمدى ءبىلىمدى دەپ ەرەكشە قادىرلەيتىن. سول كىتاپتا ادام جانىنا تۇسىرىلگەن جاراقات، جۇرەككە تۇسىرىلگەن سىزات، سودان تۋعان ۇرەي تۋرالى دا كوپ ايتىلعان. مەن اكەمە جالا جاپقان، كۇيەلەگەن،  اتقىزىپ جىبەرگەن عابباس توعجانوۆ دەگەن بالشابەك سىنشىدان ومىرباقي قورقىپ ءوتتىم. ونى جاسىرا المايمىن، مەنىڭ قاسىرەتىم وسى. ول اكەمدى كورە الماي، قىزعانىشپەن ۇستىنەن ارىز جازدى، قىر سوڭىنان ءتۇستى. اكەم اشتىققا جاردەمدەسكەلى قارجى جيناعان، ونى ەلگە ادال  تاراتقان. الدىمەن وسىنى دا جالا قىلىپ جاپپاق بولدى. بىراق ونىڭ ەسەپ-قيسابى تۇگەل بولعان سوڭ اكەم  سوت الدىندا اقتالدى. اقىرى «كر»، ياعني «كونترەۆوليۋتسيونەر» دەپ كۇيە جاعىپ، تۇبىنە جەتتى. ول قۋتۇياق ءوزى دارىنسىز، ال اكەم شىن دانىشپان ەدى عوي، سوندىقتان ىشتارلىق قىلدى، كورە المادى.

ءبىر كۇنى قىزىلوردادا اكەم احمەت اتانىڭ ۇيىنە باردى. وندا مىرجاقىپ،     عابباس توعجانوۆ بار ءبىراز ادامدار باس قوستى. اكەم كۇي تارتتى، جاقاڭ ءان سالدى. ءبىرازدان سوڭ سىراعا قىزىپ العان عابباس توعجانوۆ «سەنى قۇرتام، سەن «كر-سىڭ» دەپ اكەمنىڭ جاعاسىنان الدى. مەن ول كەزدە توعىز جاسار بالامىن. اكەمنىڭ جاعاسىنان الماق تۇگىل ۇلكەن-كىشى ءبىر كورۋگە زار بوپ، ءيىلىپ سالەم بەرەتىن، تاعزىم قىلاتىن. شوشىپ كەتىپ، باقىرىپ جىلاپ جىبەردىم. اشۋلانعان الپامساداي دەنەلى بالۋان  اتام احمەت ونى جاعادان ۇستاپ اپ، الىپ سوعىپ، ءۇيدىڭ ەسىگىنەن بىراق لاقتىرىپ، قۋىپ جىبەردى. ءبىز تۇندە مىرجاقىپتىڭ كيىز ۇيىنە بارىپ قوندىق. بىراق توعجانوۆ وشپەندىلىگىن، قاستىعىن قويمادى. ول جالعان جالا مەن وتىرىك ارىزعا، تاسادان تىعىلىپ تاس اتۋعا، لاس قيمىلعا سونشاما شەبەر بولعانىمەن، قولىنان تۇك ونبەيتىن، وزىنە ءوزى عاشىق  بولعان پاسىق سورلى ەدى. ال، مەنىڭ اكەم رومان، پوۆەست جازادى، پسيحولوگ عالىم، ەلىن، تۇركى جۇرتىن، ادامزاتتى  شەكسىز سۇيەتىن بيىك تۇلعا ەدى. سوعان ىزالانعان، قورلانعان  عابباس اكەمنىڭ وبالىنا قالدى. ءتىپتى سول عابباستاردىڭ، ساپباستاردىڭ ۇرەيلى ەلەسى ازىردە الەمدى كەزىپ ءجۇر دەپ سانايمىن، تۇندە تۇسىمە كىرەدى، مازالايدى.  رەسەيدە جۇرسەم دە، قازاقستانعا كەلسەم دە  بىزدەردى عابباس جاۋىز اڭدىپ جۇرگەندەي سەزىنەم، قورقام، سول جاۋىز ماڭگى ولمەيتىندەي، جەر بەتىنەن قۇرىمايتىنداي شوشىنا بەرەم.

حالىق جازۋشىسى ءابدىجامىل نۇرپەيىسوۆتىڭ كومەگىمەن «الماتى» قوناقۇيىنە ليۋكس بولمەسىنە ورنالاستىم، بارىنە ءتاۋبا. سول كەزدە تۇندە كوشەدە بىردەڭە تارسىلدادى. مەن ەرتەڭىندە ازاندا كەلگەن اقىن ءىنىم سەرىكباي قوسانعا «تۇندە بىردەڭە تارسىلدادى. عابباس توعجانوۆتار مەنى ولتىرگەلى جۇرگەن جوق پا؟» دەپ الاڭداۋشىلىق ءبىلدىردىم. ول عابباس توعجانوۆ قايتىس بولعانىن، ونىڭ ەندى تىرىلمەيتىنىن ايتتى. جۇرەگىم شايلىققان، ابدەن زاتتە بولعان مەن سول عابباستىڭ قۇرىعانىنا مۇلدە سەنبەدىم، سەنبەيمىن دە!   شىندىق - وسى.

-  اكەڭىزدىڭ ەركىندىكتەگى ءومىرىنىڭ سوڭعى ساتىنەن سىر شەرتسەڭىز؟

-    سەن بۇل تۋرالى ۇمىتپاي  جاز. قازىر ەسىمە ءتۇسىپ وتىر. ءبىر كۇنى اكەم قاتتى قۋانىپ كەلدى. ول قازاقتىڭ قاھارماندىق تاريحى تۋرالى ۇلكەن رومان جازۋعا دەرەك تاپقانىن ايتتى. سىر بويىندا ءبىر كەدەي قازاقتىڭ اتىن جولبارىس جارىپ كەتەدى. جالعىز بۇت ارتار كولىگىنەن ايىرىلعان اشۋلى جىگىت شەرىگە قارسى نايزا ۇستاپ، جەكپە-جەككە شىعادى.  جولبارىستى جاياۋ بارىپ، مىلتىقسىز اق نايزامەن جارىپ ولتىرەدى. ال، قازاقتىڭ ءبىر بايى وسى حاس باتىردىڭ كوزسىز ەرلىگىنە ءسۇيىنىپ، قالىڭسىز سۇلۋ قىزىن بەرەدى. مۇنى اكەم شاتتانا ايتىپ، «تىرناقتى، ءتىستى جولبارىستى قىزىل قولمەن جەكپە-جەكتە ولتىرۋگە جۇرەگى داۋالاعان قازاق جىگىتىندەي باتىر دۇنيەدە جوق، ءسىرا. مەن قازەكەڭنىڭ  باتىرلىعىن ماڭگى جىر ەتەم» دەپ شابىتتاندى. سۇمەلەك، جالاقور، مىلجىڭ عابباس توعجانوۆ  اكەمنىڭ تۇبىنە جەتپەگەندە بۇل رومان دۇنيەگە كەلەر ەدى دەپ وكىنەم.  ومىرىمدەگى ءبىر وكىنىش وسى بولىپ قالدى!

القيسسا...

دانىشپان ءماشھۇر ءجۇسىپ كوپەي  «جۇسىپبەك ايماۋىتۇلىنا حات» دەگەن ولەڭىندە بىلايشا تولعايدى:

جۇسىپبەك امانبىسىڭ، ساۋ سالامات،

جىگىتسىڭ جاقسىعا - قات، جامانعا -جات.

جالعىزدىق جاراسقان-دى ءبىر قۇدايعا،

امان با بەكتۇر، جاناق ەكى ازامات؟

...امان بول ، امان بولساڭ سەن امان بول،

سەن امان تۇرساڭ ماعان دۇنيە مول.

جۇسىپبەك، بەكتۇر ، جاناق ۇشەۋىڭە،

تۇرايىن تىلەۋلەس بوپ كوتەرىپ قول!

مارقۇم، يماندى بولعىر بەكتۇر ايماۋىتۇلى الماتىعا العاش 1994 جىلى كەلگەن بولاتىن. وندا دا ونى پروكوپەۆسك تەمىرجول بەكەتىنەن كەزدەيسوق الماتىلىق دومبىراشى شەبەر ناربەك وقانوۆ دەگەن ازامات «تاۋىپ الىپ» ەلگە اكەلىپ، ءسۇيىنشى سۇراعان. زيالى قاۋىم بەكەڭدى باسىنا كوتەرىپ، ەلباسى قازاقستان ازاماتتىعىنا قابىلدايدى، اقتاۋ كۋالىگىن ۇسىنادى، الماتىنىڭ «كوكتەم» شاعىن اۋدانىنان ءۇي بەرەدى (اكادەميك سەراعاڭ، سەرىك سمايىلۇلى وعان ەكى بولمەلى باسپانا العانىڭ دۇرىس دەيدى، بالا-شاعاڭ، نەمەرەڭ بار، اكەڭ تۋرالى جازىپ-سىزۋىڭا قولايلى بولادى دەپ  قامقورلىق نيەتىن بىلدىرەدى،  بىراق بەكەڭ ءبىر بولمە جەتەدى دەپ قاناعات ەتەدى). سودان كەيىن بەكەڭ ومىرلىك سەرىگى كەمپىرىنىڭ ايتقانىنا كونىپ رەسەيدە ءومىر سۇرگىسى كەلەدى دە ەلدەن تاعى دا ساياق كەتەدى. اقىرى، كەمپىرى قايتىس بولعان سوڭ اسىل سۇيەگىن دامىلداتۋعا اتامەكەنىنە امان-ساۋ كۇيىندە ورالادى. بۇل جولى دا بەكەڭە كەزدەيسوق جاعدايدا مەيىربان ازاماتتار جاردەم ەتەدى. كوپتەگەن سەبەپتەرگە بايلانىستى مارقۇممەن قوشتاسۋعا مۇمكىندىك تۋمادى. بەكەڭ  و دۇنيەگە دە سۋىت اتتانا بەرگەندەي. سۇيەگى بورولداي زيراتىنا قويىلىپتى. ال، بەكەڭنىڭ يەسىمىن دەپ ەسكەرتۋ جاساپ وتىرعان م.اۋەزوۆ اتىنداعى ادەبيەت جانە ونەر ينستيتۋتىنا، ونداعى عالىمدارعا «ارداگەرلەر» ۇيىنەن ەشقانداي قارالى حابار ەستىرتىلمەگەن. بىراق ەشتەن كەش جاقسى دەگەندەي 2009 جىلى ۇلتجاندى ازامات بەرىك ابدiعاليەۆ باسقارىپ وتىرعان مەملەكەت ءتىلدى دامىتۋ پرەزيدەنت قورى تاراپىنان مارقۇمنىڭ باسىنا ەسكەرتكىش تاقتا قويىلدى،  زيراتى قورشالدى، قۇلپىتاستا: «قازاق جازۋشىسى، الاش وردا قايراتكەرi جۇسiپبەك ايماۋىتوۆتىڭ بالاسى - بەكتۇر ايماۋىتوۆ 1916-2008» دەگەن جازۋ بادiزدەلگەن. ەتەگىنە: «ەسكەرتكiشتi قويعان - قازاق جاستارى» دەگەن جازۋ ويمىشتالىپتى. وسى ساۋاپتى ءىستى ۇيىمداستىرۋعا ساياساتتانۋشى ەرلان سايىروۆ، ساۋلەتشى جالالەدين شايكەن، جۋرناليست ەرەنعايىپ قۋاتايۇلى، جۇسiپبەكتانۋشى نۇرجان قۋانتايۇلى باستاعان بىرشوعىر ازاماتتار تەگەۋرىندى ارەكەت ەتكەن. قوڭىراۋلى بەكەڭ  تۇرمەدە دە اتى ءوشىرىلىپ ءنومىرلى بولعان دەدىك، و دۇنيەلىك تۇراعىنا دا  جەتىم داراق شانشىلىپ، وعان  «92675» دەگەن  ءنومiر جازىلعان ەكەن. ونىڭ ماڭگىلىك بەسىگىنە ازان شاقىرىپ قويعان عازيز ەسىمىن قازاق جاستارى  قايتارىپ بەرگەنىنە مىڭ ءبىر ءتاۋبا، جانىڭىز جاناتتا، يمانىڭىز جولداس بولسىن بەكتۇر اتا!

اقەدىل تويشانۇلى،

فيلولوگيا عىلىمدارىنىڭ كانديداتى.

masa.kz