وتكەن اپتا سوڭىندا گەرمانيا پرەمەر-ءمينيسترى شولتس قىتايعا قىسقا ۋاقىتقا ساپارلاي باردى. قىتايدىڭ قاتاڭ كارانتينىنە بايلانىستى گەرمانيا ۇشاعى شولتس پەن ارىپتەستەرىن اۋەجايدا قالدىرىپ، وزدەرى كورەياعا ايالداپ، 11 ساعاتتان كەيىن قايتا كەلىپ، دەلەگاتسيا وكىلدەرىن الىپ كەتتەن. نەمىس وكىلدەرى اۋەجايدا پتر تەست تاپسىرعان.

بارشا الەم قىتاي توراعاسىنىڭ ءبىزدىڭ پرەزيدەنت قاسىم-جومارت توقاەۆتىڭ اكەسىنىڭ اتىن شاتاستىرا بەرەتىن ورىس باسشىسى پۋتين سياقتى گەرمانيا پرەمەر-ءمينيسترىنىڭ اتىن ۇمىتىپ قالعانىنا كۋا بولدى. ادەيى ايتقىسى كەلمەدى مە، جوق، شىن ۇمىتىپ قالدى ما، «ءاي، قالايسىڭ؟» دەپ امانداستى.

نەمىس باسشىسى قىتاي ساپارىنىڭ الدىندا ىقپالدى بۇقارالىق اقپارات قۇرالدارىنا سۇقبات بەرىپ، ەكونوميكالىق مۇددەگە بايلانىستى قىتايمەن مۇلدەم ات كەكىلىن كەسىسپەيتىنىن، ىشتەسىپ تە كەتپەيتىنىن ايتىپ، سايلاۋشىلارىمەن وزگە ارىپتەس ەلدەردىڭ الدىندا اقتالعانداي بولىپ ەدى. كوپتەگەن باسىلىمدار گەرمانيا باسشىسىنىڭ ەلدەن ەرەكشە قىتاي ساپارىن مەملەكەتتىك ساپاردان گورى «ەكسپورتى ارتتىرۋ قيمىلىنا» ۇقسايدى دەپ جازعان. شولتس قىتايعا نەمىستىڭ ايگىلى «اديداس»، «BMW»، «Volkswagen» «SIEMENS» «BASF» قاتارلى 12 كومپانياسىنىڭ جەتەكشىلەرىن ەرتىپ بارعانىمەن، قىتاي باسشىسىنىڭ شامىنا تيەتىن شىنجاڭ، تايۋان. ۋكراين ماسەلەسىن دە ءسوز ەتكەن. شي توراعا دا ايىبىن جۋعىسى كەلگەندەي العاش رەت ءپۋتيننىڭ ۋكرايناعا كەز كەلگەن اتوم بومباسىن قولدانۋىنا قارسى ەكەنىن جەتكىزگەن. بۇل جايىندا امەريكانىڭ «The Wall Street Journal» باسىلىمى ارناۋلى ماقالا جاريالادى.

اي مەن كۇننىڭ امانىندا ءتورت قابىرعاعا قامالىپ، ەكى كوزى ءتورت بولىپ، كارانتيننىڭ تەزىرەك ءبىتۋىن كۇتىپ وتىرعان قىتاي جۇرتىنا نەمىس باسشىسىنىڭ بۇل جولعى ساپارى ءۇمىت ۇيالاتقانداي بولدى. ونىڭ ەكى ءتۇرلى نەگىزى بار.

گەرمانيا باسشىسى تىلشىلەرمەن كەزدەسۋىندە وزدەرىنىڭ «BioNTech» كومپانياسى وندىرگەن ۆاكتسينانى قىتاي بيلىگىنىڭ قولدانۋعا ۋادە بەرگەنىن جەتكىزدى. الدىمەن قىتايدا تۇرىپ جاتقان شەتەل ازاماتتارىنا ەگىلمەك. ونىڭ قارىمتاسى رەتىندە گەرمانيا قىتايدىڭ وتاندىق ۆاكتسينالارىنىڭ ەۋروپا نارىعىنا شىعۋىنا جول اشپاق.

قىتايلىقتاردى قۋانتقان ەندىگى ءبىر جاڭالىق: قىتاي تارابى گەرمانيادان 17 ميلليارد دوللارعا 140 دانا جولاۋشىلار ۇشاعىن ساتىپ الۋعا كەلىسىم-شارت جاساسقان. كارانتيندى الۋ ويى بولماسا، ۇشاق ساتىپ الماس ەدى دەگەن ءسوز.

ەسبول ۇسەنۇلى

Abai.kz