الماتىداعى «راحات» بازارىنىڭ اينالاسىنداعى شۋ ءالى باسىلمادى. بازار كاسىپكەرلەرى 7 اي بويىنا جارىقسىز وتىر. امالدىڭ جوقتىعىنان گەنەراتور قوسقان ازاماتتار وسى ۋاقىتقا دەيىن 12 ميلليون تەڭگە شىعىن كورگەن.

زاڭگەر باقىتجان بازاربەك پەن «راحات» بازارى قارايتىن «تكم» جشس-ءنىڭ وكىلى، زاڭگەر جاميليا تۋلەنوۆا «الماتى قالاسى اكىمدىگى زاڭدى بەلشەسىنەن باسىپ، سوت شىعارعان شەشىمدى ورىنداماي وتىر»، دەيدى. باقىتجان بازاربەك وسىعان بايلانىستى پرەزيدەنت قاسىم-جومارت توقاەۆتىڭ اتىنا ۇندەۋ جولدادى.

Abai.kz پورتالى بۇعان دەيىن «راحات» بازارى تۋرالى بىرنەشە ماتەريال دايىنداعان بولاتىن. بۇل داۋ 2022 جىلى شەشىمىن تاپقانداي بولعان. «راحات بازارى» قارايتىن «تكم» جشس مەن «الماتى CPS» جشس اراسىنداعى جەرگە بايلانىستى تارتىستا سوت «راحات» بازارىنىڭ پايداسىنا شەشىم شىعارعان. بىراق الماتى اكىمدىگى ءالى كۇنگە دەيىن، «راحات» بازارىنىڭ جەرىن تارتىپ الۋ ارەكەتىن جالعاستىرىپ وتىر.

«مەن «جەر اماناتى» رەسپۋبليكالىق جەر كوميسسياسى توراعاسىنىڭ ورىنباسارىمىن. پرەزيدەنتتىڭ سەنىمدى تۇلعاسىمىن. وسىنداي جاعدايدا، ەڭ الدىمەن پرەزيدەنت قاسىم-جومارت كەمەلۇلىنىڭ اتىنا ۇندەۋ جاساعىم كەلەدى.

قاسىم-جومارت كەمەلۇلى، ءبىز ۇلكەن دودا – سايلاۋدىڭ الدىندا تۇرمىز. ءسىزدىڭ سايلاۋعا ارنالعان باعدارلاماڭىز بار. ونى ىسكە اسىراتىن كومانداڭىز بار. مەن دە سول كوماندانىڭ قۇرامىندامىن. باعدارلامانىڭ نەگىزگى ماقساتى – حالىقتىڭ جاعدايىن جاقسارتۋ. ەندەشە «راحات» بازارىندا جۇمىسىن ىستەپ، كۇندەلىكتى ناپاقاسىن تاۋىپ وتىرعان – ءوزىمىزدىڭ قاراپايىم حالىق. ولار مىندەتتى سالىعىن تولەپ، وتباسىن اسىراپ وتىرعان ادامدار.

قۇرمەتتى پرەزيدەنت، ءبىز ۇزاق ۋاقىت سوتتاسۋدىڭ ارقاسىندا ۇلكەن جەڭىسكە جەتتىك. سوعان قاراماستان جەرگىلىكتى اتقارۋ ورگانى، ياعني الماتى قالاسىنىڭ اكىمدىگى سوتتىڭ شەشىمىن بۇرمالاپ، ونى ورىنداماي، كاسىپكەرلەرگە قوقان-لوقى كورسەتىپ وتىر. ءسىزدىڭ باعدارلاماڭىزعا، ساياساتىڭىزعا قايشى ارەكەت جاساپ وتىر. مەن جەر قۇقىقتىق قاتىناستارىندا زاڭدى قامتاماسىز ەتۋگە ۇلەس قوسىپ جۇرگەن ازاماتپىن. ءالى دە ۇلەس قوسۋعا دايىنمىن.

سوندىقتان ءسىزدىڭ باعدارلاماڭىزدىڭ اياسىندا، ءبىر وتىنەرىم، الماتى قالاسى اكىمدىگىنىڭ تاراپىنان «راحات» بازارىنا جاسالىپ جاتقان زاڭسىز ارەكەتكە توقتاۋ قويايىق. ءسىزدىڭ وسى زاڭسىزدىققا  ارالاسۋىڭىزدى وتىنەمىز. زاڭسىز ارەكەتكە جول بەرگەن لاۋازىمدى تۇلعالار جاۋاپكەرشىلىككە تارتىلۋى ءتيىس. «راحات» بازارى «تكم» جشس-ءنىڭ زاڭدى جەر پايدالانۋ قۇقىعى قالپىنا كەلتىرىلۋى كەرەك. ادىلەتتىلىك ورناسىن»، - دەدى زاڭگەر.

باقىتجان بازاربەكتىڭ ايتۋىنشا، «راحات» بازارىنىڭ جەرىن تارتىپ الۋ – الماتى قالاسى اكىمدىگى مەن الماتى قالاسىنىڭ جەر قاتىناستار باسقارماسى، ساۋلەت قالا قۇرىلىسى باسقارماسىنىڭ بىرلەسكەن ارەكەتى.

«2022 جىلى 25 قاڭتار سوت ءبىزدىڭ پايدامىزعا شەشىم شىعارعاننان كەيىن، الماتى قالاسىنىڭ جاڭادان سايلانعان اكىمى دوساەۆ: «راحات بازارىندا» جۇزدەگەن كاسىپكەر ادال جۇمىسىن ىستەپ، سالىعىن تولەپ وتىر. ولارعا جەر پايدالانۋ قۇقىعىن بەرەيىك، دەپ ايتاتىن شىعار»، - دەگەن ويدا بولدىق. بىراق ويىمىز ىسكە اسپادى.

كەرىسىنشە الماتى قالاسىنىڭ جەر قاتىناستار باسقارماسى، ساۋلەت قالا قۇرىلىسى باسقارماسى بىزگە تارپا باس سالدى. بارىمىزگە انىق، ولار الماتى قالاسى اكىمىنىڭ رۇقساتىنسىز ءوز بەتىمەن ارەكەت جاساي المايدى. ولاردى ۇيلەستىرەتىن الماتى قالاسىنىڭ اكىمدىگى.

سوندىقتان، مەنىڭ پايىمىمشا، الماتى قالاسى اكىمدىگى توپ بولىپ جەردى الىپ الماقشى. قىسىم كورسەتۋ ارقىلى تارتىپ الۋدى ويلاستىرىپ وتىر. مەن باسقا امالدى كورىپ تۇرعان جوقپىن. بۇل داۋ بايبەكتىڭ كەزىندە باستالدى. سودان جالعاسىپ كەلەدى. بايبەكتىڭ كەزىندە ءبىر زارلادىق، ساعىنتاەۆتىڭ كەزىندە ەكى زارلادىق. دوساەۆ كەلدى، ءبىز ءالى زار يلەپ وتىرمىز.

«راحات بازارى» ەشقانداي زاڭ نورمالارىن بۇزعان جوق. زاڭدى بۇزسا، سوتتا ءتيىستى ماتەريالدار بولادى. تەكسەرۋدىڭ قورىتىندىسى، پروتوكولدار، ۋاكىلەتتى ورگانداردىڭ بەگىلى ءبىر ماتەريالدارى بولۋ كەرەك. ونداي جوق. سوتتا اكىمدىك تە، جەر قاتىناستارى باسقارماسى دا، ساۋلەت قالا قۇرىلىس باسقارماسى دا ۇسىنا المادى. دەمەك، ءبىز جاقتان زاڭ بۇزۋشىلىق جوق. جەر كودەكسىنىڭ 37-بابىنا سايكەس، جەر پايدالانۋ قۇقىعىن بەرۋدە بىزگە باسىم قۇقىق بەرىلۋى كەرەك. بىراق الماتى قالاسى اكىمدىگى ءۇشىن «جەر پايدالانۋ قۇقىعىن بەرۋدە باسىم قۇقىق» دەگەن نورما جوق. الماتى قالاسىنىڭ اكىمدىگى ءۇشىن زاڭ، جەر كودەكسى دەگەن ۇعىمدار جوق. ولاردىڭ زاڭى تەك قالتالىلاردىڭ قۇقىعىن قورعاۋعا ارنالعان»، - دەيدى زاڭگەر.

زاڭگەر جاميليا تۋلەنوۆا اكىمدەردىڭ بازاردى جابۋ جانە «تكم» جشس-نەن جەر الۋ ارەكەتتەرىن جالعاستىرىپ جاتقانىن ايتادى.

«30.03.2022 جىلى ەشقانداي ەسكەرتۋسىز بازاردا ەلەكتر جارىعى ءوشىرىلدى. وعان سەبەپ بولعان الماتى قالاسى جەتىسۋ اۋدانىنىڭ اكىمى گ.قوقاباەۆانىڭ بازارعا كەلىپ، كاسىپكەرلەردىڭ الدىندا ءوز  بيلىگىن كورسەتۋ ءۇشىن جاساعان ارەكەتى. الماتى قالاسى جەتىسۋ اۋدانىنىڭ اكىمى گۇلنارا احمەتجانقىزى قوقاباەۆا «راحات» بازارىن 1 اي مەرزىم ىشىندە بوساتۋ تالاپ ەتتى. ءسوزى سەنىمدى بولۋ ءۇشىن جەر كوميسسياسى «تكم» جشس-نە جەردى جالعا الۋ قۇقىعىن بەرمەيتىنىن مالىمدەدى! مۇنداي مالىمدەمەنى 2018 جىلى قالا اكىمى ب.بايبەك جاساپ ەدى. اۋدان اكىمى نەگە سۇيەنىپ ءوز قۇزىرىنان شىعىپ اتالعان مالىمدەمە جاساعانى بەيمالىم. بىراق، ءوتىنىش جەر كوميسسياسىنا جەتپەي اق جەر قاتىناستارى باسقارماسىنان قايتارىلدى. بۇل ىمىرانىڭ باسىندا كىم تۇر؟

15.04.2022 جىلى بازار اۋماعىندا ەكولوگيا ءبولىمىنىڭ مامانى نىسانبەكوۆ ەراسىل قوعامدىق دارەتحانانىڭ سەپتيگىن اۋدان اكىمى گ. ا. قوقاباەۆانىڭ «حاتتاما-تاپسىرماسىنا» سىلتەمە جاساي وتىرىپ تەكسەرۋگە كەلدى. اۋدان اكىمىنىڭ ورىنباسارى د.ن. اكەجانوۆ ءوز كەزەگىندە «راحات» بازارىنا ەلەكتر قۋاتىن جالعاۋ ءۇشىن تپ-عا قوسىلۋعا كەلىسىم بەرمەۋ جايلى كورشى بازار باسشىلارىنا نۇسقاۋ تاراتىپ وتىر. «راحات» كاسىپكەرلەرى الدارىنا ءيىلىپ بارۋىن ماجبۇرلەپ وتىرعانى انىق. اعىمداعى جىلدىڭ 1 ساۋىرىنەن 29 قازانىنا دەيىن رەق-1 قىزمەتكەرلەرى «راحات» بازارىنىڭ ترانسفورماتوردان اجىراتىلعانىن راستايتىن فوتوسۋرەتتەردى اۋدان اكىمىنىڭ ورىنباسارى دامير نۇرسۇلتانۇلى اكەجانوۆتىڭ تاپسىرماسى بويىنشا تەلەفون ارقىلى جەتىسۋ اۋدانى اكىمدىگىنىڭ قىزمەتكەرىنە جىبەرىپ كەلەتىنىنەن حاباردار بولىپ وتىرمىز. 2022 جىلدىڭ 29 قازانىندا جىبەرىلگەن فوتو ەسەپ + 77074143231 نومىرىنە جولدانعان. وتكەن كەزەڭ ىقپالىنان شىعا الماي مەملەكەتتىك قىزمەتتى ساۋىندى سيىردىڭ جەلىنىندەي كورگەن مۇنداي اكىمدەرمەن مەملەكەتتىك بيلىككە وزگەرىس ەنگىزۋ ولارعا تاعزىم ەتۋدەن اسپايتىن سەكىلدى.

وسىلايشا، اعىمداعى جىلدىڭ 1 ساۋىرىنەن باستاپ قازىرگى ۋاقىتقا دەيىن بازار گەنەراتوردىڭ كومەگىمەن جارىقپەن قامتاماسىز ەتىپ وتىر.ءتيىستى ورگانداردىڭ تابالدىرىعىن توزدىرىپ بىتىردىك. ماسەلە شەشىمىن تاپقان جوق. ءوز قوتىرىن ءوزى قاسىپ، ناپاقاسىن ايىرىپ وتىرعان كاسىپكەرلەر جەتىسۋ اۋدانىنىڭ اكىمى گ. ا. قوقاباەۆا مەن ونىڭ ورىنباسارى د.اكەجانوۆ قولدان جاساپ وتىرعان اكىمشىلىك توسقاۋىل كاسىپكەرلەرگە 12 ملن. تەڭگەدەن استام شىعىن كەلتىرىپ وتىر. بۇل توسقاۋىل قازاقستان رەسپۋبليكاسىنىڭ كونستيتۋتسياسى نورمالارىنا  «مەملەكەتتىك قىزمەت تۋرالى» جانە «سىبايلاس جەمقورلىق تۋرالى» زاڭدارىنىڭ تالاپتارىنان جوعارى اكىمدەردىڭ جەكە امبيتسيالارىنىڭ سالدارى! ال قالا اكىمى ە. دوساەۆ بۇل پروبلەمالاردان تىسقارى قالۋدى ءجون ساناعان سەكىلدى»، - دەيدى ول.

ونىڭ ايتۋىنشا، وسى وقيعادان كەيىن «راحات» بازارىنىڭ وكىلدەرى قالا اكىمى ە.ا. دوساەۆقا جەكە قابىلداۋ تۋرالى بىرنەشە رەت جۇگىنگەن. بىراق قالا اكىمىنىڭ جەكە قابىلداۋىنا كىرۋ مۇمكىن ەمەس.

«قالا اكىمى اپپاراتىنىڭ قىزمەتكەرى اديحانوۆ اسىلحان «رەگلامەنت بويىنشا ورىنباسارلار نە باسقارما باسشىلارى نە ورىنباسارلار قابىلداۋ كەرەك» دەيدى. رەگلامەنت تالاپتارىنا ساي ول ساتىلاردان وتتىك. بازار جارىقسىز دەگەن ماسەلەگە قۇلاق اسقىلارى كەلمەيدى.

«اجك» اق-دا ەلەكتر قۋاتىن قوسۋ تالاپتارى بويىنشا «تكم» جشس-دە قۇقىق بەلگىلەيتىن قۇجاتى جوق، سوندىقتان، ماسەلە شەشىمىن تاپپاي وتىر.

ءبىزدىڭ الدىمىزدا جەرگىلىكتى اتقارۋ ورگاندارىنىڭ بار ەسىگى جابىق، وسى زاڭسىزدىققا جول بەرگەن شەنەۋنىكتەردىڭ زاڭسىز ارەكەتتەرىنە قاتىستى بارلىق شاعىمدار ورىنداۋ ءۇشىن سولاردىڭ وزدەرىنە جىبەرىلەدى!» - دەدى تۋلەنوۆا.

Abai.kz