بۇگىن تاڭەرتەڭ قاراعاندى ماڭىنداعى «قاراباس» وتكەلىندە 14 جۇك ۆاگونى رەلستەن شىعىپ كەتتى. اتالمىش ۋچاسكەدە بارلىق پويىز ۋاقىتشا توقتاتىلدى.

توتەنشە جاعداي بۇگىن تاڭەرتەڭ بولدى. الدىن الا مالىمەت بويىنشا، زارداپ شەككەندەر جوق.

«17 قاراشا كۇنى، تاڭعى ساعات 6.15-تە قاراعاندى وبلىسىنىڭ قاراعاندى – سۇرىپتاۋ – اقادىر ۋچاسكەسىنىڭ 767 قاراباس – وپ ارالىعىندا جۇك پويىزىنىڭ 14 ۆاگونى رەلستەن شىعىپ كەتتى. ۋچاسكەدە جولاۋشىلار جانە جۇك پويىزدارىنىڭ قوزعالىسى ۋاقىتشا توقتاتىلدى. الدىن الا مالىمەتكە سايكەس، رەلستەن شىعىپ كەتۋ جەكە مەنشىك يەلەرىنە تيەسىلى ۆاگونداردىڭ ىستەن شىعۋىنا بايلانىستى بولدى»، - دەلىنگەن «قازاقستان تەمىر جولى» سايتىندا.

اتالمىش فاكتى قاراعاندى وبلىسىنىڭ كولىك پوليتسياسىندا تىركەلدى. كىنالىلەر تەمىرجول كولىگىنىڭ قوزعالىسى مەن پايدالانۋ ەرەجەلەرىن بۇزعانى ءۇشىن جاۋاپقا تارتىلۋى مۇمكىن.

«اتالعان فاكتى قاراعاندى – سۇرىپتاۋ ستانتسياسىنداعى جەلىلىك پوليتسيا ءبولىمىنىڭ سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە قر قىلمىستىق كودەكسىنىڭ 344-بابى 1-بولىگى، ياعني تەمىرجول كولىگىنىڭ قوزعالىس جانە پايدالانۋ قاعيدالارىن بۇزۋ بويىنشا تىركەلدى. وزگە اقپارات قر قىلمىستىق-پروتسەستىك كودەكسiنىڭ 201-بابى تالاپتارىنا سايكەس تەرگەۋ مۇددەسىنە وراي جاريالاۋعا جاتپايدى»، - دەپ حابارلادى كولىكتەگى پوليتسيا دەپارتامەنتىنىڭ ءباسپاسوز قىزمەتىنەن.

اپات سالدارىن جويۋعا قاراعاندى، جاڭاارقا، استانا ستانتسيالارىنىڭ ءۇش قالپىنا كەلتىرۋ پويىزى تارتىلدى.

Abai.kz