پرەزيدەنتتىڭ اتىنا جولدانعان «ءادىل ءسوز» حالىقارالىق قورى مەن قازاقستان جۋرناليستەر وداعىنىڭ جۋرناليست ايەلدەردى قورعاۋ تۋرالى ءوتىنىشى نازارعا الىندى. بۇل تۋرالى قر پرەزيدەنتىنىڭ ءباسپاسوز قىزمەتى حابارلادى.

«بۇقارالىق اقپارات قۇرالدارىنىڭ وكىلدەرىنە قاتىستى زاڭعا قايشى ارەكەتتەر جاساعان ادامداردى جاۋاپقا تارتۋ ءۇشىن بولعان وقيعالاردى تەرگەۋ ءتيىستى مەملەكەتتىك ورگاندارعا تاپسىرىلدى»، - دەلىنگەن جازبادا.

ارتىنشا، POLISIA.KZ: ««El Media» رەاداكتسياسىنا كىرەتىن تەرەزەلەردى سىندىرعان بۇزاقىلار ۇستالدى.  الماتى قالاسىنىڭ پوليتسيا دەپارتامەنتى، اتالعان زاڭسىز ارەكەتتى جاسادى دەگەن كۇدىكپەن ەكى ادامنىڭ ۇستالعانىن حابارلايدى: الماتى قالاسىنىڭ تۇرعىنى ز.ەسىمدى ازامات جانە تارازدىق گ.ەسىمدى ازامات. ەكەۋى دە 18 جاستا.

كۇدىكتىلەردىڭ ارەكەتتەرى قر اقبك-ءنىڭ 434-بابى – ۇساق بۇزاقىلىق بويىنشا سارالانعان. ءىس ماتەريالدارى شەشىم قابىلداۋ ءۇشىن سوتقا جىبەرىلەتىن بولادى. ۇستالعاندار جاساعان ارەكەتتەرىن مويىندادى. ءىستىڭ باسقا دا ءمان-جايلارى انىقتالۋدا»، - دەپ حابارلادى.

Abai.kz