وندا حالىقارالىق قۇقىق جاعىنان العاندا، رەسەي قولدانىپ كەلە جاتقان "بۇۇ-عا مۇشە مەملەكەت" مارتەبەسى جونىندەگى ماسەلە 1991 جىلدىڭ جەلتوقسانىندا سسسر تاراعاننان بەرى جونگە سالىنباي كەلەدى.
"رەسەي بۇۇ-نىڭ قاۋىپسىزدىك كەڭەسىنىڭ تۇراقتى مۇشەسى دەگەن مارتەبەنى ۇلتتار ۇيىمىنىڭ بەلگىلەنگەن جارعىسىنان ايلانىپ ءوتىپ العان. ولكە بۇل مارتەبەنى پرەزيدەنت بوريس ەلتسيننىڭ بۇۇ-نىڭ باس حاتشىسىنا جونەلتكەن ءجاي حاتى نەگىزىندە يە بولىپ قالعان. بۇۇ جارعىسىندا، ونىڭ ىشىندە قاۋىپسىزدىك كەڭەسىنىڭ تۇراقتى مۇشەلەرى بار باپتا رەسەي اتالماعان", - دەپ جازىلعان ۋكراين ءسىم مالىمدەمەسىندە.
سونىمەن بىرگە مالىمدەمەدە بۇۇ جارعىسىنا سايكەس، ۇيىمعا بەيبىتشىلىكتى جاقتاعان ەلدەر عانا قاتىسا الاتىنى ايتىلىپ، رەسەيدىڭ ۋكرايناعا اگرەسسيالىق سوعىس جۇرگىزىپ جاتقانى جازىلعان.
ازىرگە رەسەي جانە بۇۇ-ع مۇشە ەلدەر ۋكراينانىڭ مالىمدەمەسىنە پىكىر بىلدىرمەدى. وسىعان دەيىن باتىس ەلدەرىنىڭ ونىڭ ىشىندە اقش وكىلدەرى رەسەيدى قاۋىپسىزدىك كەڭەسىنەن شىعارۋدىڭ زاڭدىق مەحانيزمدەرى جوق ەكەنىن بىرنەشە رەت بىلدىرگەن.
بۇۇ-عا ۋكراينا مەن بەلارۋس سسسر قۇرامىنداعى ۋسسر جانە بسسر رەسپۋبليكالارى رەتىندە كىرگەن. رەسەيدەن باسقا بۇرىنعى سوۆەتتىك رەسپۋبليكالار بۇۇ-نىڭ قۇرامىنا ونىڭ جارعىسىندا قارالعان ەرەجەلەر بويىنشا قابىلدانعان.
"تاۋەلسىز مەملەكەتتەر دوستاستىعىنىڭ (تمد) قولداۋىمەن سسسر-ءدىڭ بۇۇ-داعى، ونىڭ ىشىندە قاۋىپسىزدىك كەڭەسىندەگى مۇشەلىگىن رەسەي فەدەراتسياسى جالعاستىرادى. وسىعان بايلانىستى بۇۇ-داعى سسسر دەگەن اتاۋدى رەسەي فەدەراتسياسى دەپ وزگەرتۋىڭىزدى وتىنەمىن", - دەپ جازىلعان ەلتسيننىڭ 1991 جىلى جەلتوقساندا بۇۇ-نىڭ باس حاتشىسىنا جولداعان حاتىندا. بۇۇ-دا بۇل ۇسىنىسقا ەشقانداي قارسىلىق بولعان ەمەس. سونىمەن بىرگە رەسەيدى ۇيىمعا قابىلداۋدا فورمالدى داۋىسقا دا سالىنعان ەمەس.
بۇۇ جارعىسىنا سايكەس، "جارعى مىندەتتەرىن بۇزعان ەل قاۋىپسىزدىك كەڭەسىنىڭ ۇسىنىسىمەن ۇيىمنىڭ باس اسسامبلەياسىنان شىعارىلۋى مۇمكىن". بىراق ءىس جۇزىندە مۇنداي سەبەپپەن بىردە ءبىر ەل بۇۇ-دان شىعارىلعان ەمەس.
سسسر فينلياندياعا باسىپ كىرگەنى ءۇشىن 1939 جىلى ۇلتتار ليگاسىنىڭ قۇرامىنان شىعارىلعان. بىراق ول ۇيىمنىڭ ەرەجەلەرى باسقا بولعان.
Abai.kz
