بۇگىن ەل حالقى "قاڭتار قىرعىنىنىڭ" ءبىر جىلدىعىن ەسكە الۋدا. 2022 جىلى، 5 قاڭتاردا ەل بويىنشا ءوتىپ جاتقان جاپپاي نارازىلىق اكتسيالارى قاقتىعىسقا ۇلاسىپ، وق اتىلدى، جۇزدەگەن ادام اجال قۇشتى. ءماجىلىس بۇگىن "قاڭتار قىرعىنىنا" بايلانىستى ارنايى تىڭداۋ وتكىزدى. 

ماجىلىسكە باس پروكۋرور كەلىپ، وقيعا بويىنشا تەرگەۋدىڭ قالاي ءجۇرىپ جاتقانىن، ارانداتۋدى كىمدەر جانە قالاي ۇيىمداستىرعانىن، قازا تاپقاندار جايلى جانە ت.ب اقپاراتتاردى ايتتى. ءماجىلىس وتىرىسى قاڭتاردا كوز جۇمعانداردى ەسكە الىپ، ءبىر مينۋتتىق ۇنسىزدىكتەن باستالدى.

باس پروكۋروردىڭ ايتۋىنشا مەملەكەتتىك توڭكەرىسكە دايىندىقتى مۇددەلى توپتار 2021 جىلى باستاعان. ولار قاڭتارداعى قىرعىنعا ءبىر جىل بويى دايىندالعان توپتار، جىلدام ءارى ويلاستىرىلعان جوسپار بويىنشا بيلىكتى باسىپ الۋعا تىرىسقانىن ايتادى.

ء"بىز باسقارىلاتىن حاوس كەزىندە ەلىمىزدىڭ جوعارعى باسشىلىعىن اۋىستىرۋعا باعىتتالعان وپەراتسيا تىڭعىلىقتى جوسپارلانعان دەپ ايتا الامىز. شىن مانىندە، مەملەكەتتىك توڭكەرىس جاساۋعا ارەكەت جاسالدى. وزدەرىڭىز بىلەتىندەي، ۇلتتىق قاۋىپسىزدىك كوميتەتىنىڭ بۇرىنعى باسشىلارىنا قاتىستى مەملەكەتكە وپاسىزدىق جاساۋ جانە باسقا دا اسا اۋىر قىلمىستار تۋرالى ءىس "اسا قۇپيا" رەجيمىندە تەرگەلدى. ماتەريالداردى جاريالاۋعا شەكتەۋ قويىلعان، ويتكەنى ولاردا مەملەكەتتىك قۇپيالار بار. ىستە سىرتقى ساياسي، قارسى بارلاۋ جانە جەدەل-ىزدەستىرۋ قىزمەتىنە قاتىستى مالىمەتتەر بار. ولاردى جاريالاۋ ۇلتتىق قاۋىپسىزدىك مۇددەلەرىنە نۇقسان كەلتىرۋى مۇمكىن", - دەدى باس پروكۋرور بەرىك اسىلوۆ.

باس پروكۋرور ۇقك عيماراتتارىن كىم تاستاپ كەتۋ تۋرالى بۇيرىق بەرگەنىن دە ايتا كەتتى. "تەرگەۋ مالىمەتتەرى بويىنشا، 5 قاڭتاردا ۇقك توراعاسىنىڭ ورىنباسارى ءانۋار سادىقۇلوۆتان جەكە قۇرامنىڭ عيماراتتان شىعۋعا دايىندىعى تۋرالى جازباشا ۇيعارىم كەلىپ تۇسكەن. كارىم ءماسىموۆتىڭ نۇسقاۋىمەن ۇقك-ءنىڭ عيماراتتارى الماتى قالاسى مەن قىزىلوردا وبلىسى قالدى.سونىمەن قاتار باسشىلىقتىڭ بۇيرىعىمەن الماتى جانە جامبىل وبلىستارىنىڭ پوليتسيا باسقارمالارىنىڭ عيماراتتارى قالدىرىلدى.تىكەلەي ايتايىن، بۇل باسشىلار السىزدىك كورسەتتى.بۇل جەكە قۇرامنىڭ رۋحىن جارتىلاي ءتۇسىردى. ناتيجەسىندە تارتىپسىزدىكتى اۋىزدىقتاۋ ءۇشىن دەر كەزىندە شارالار قابىلدانبادى", - دەدڭ ول.

پروكۋرور اسىلوۆتىڭ ايتۋىنشا، توڭكەرىستى ۇيىمداستىرۋ بويىنشا 12 قىلمىستىق توپ ارەكەت ەتىپ، سول كۇندەرى بەلسەندىلىك تانىتقان. ولاردىڭ ىشىندە اتىشۋلى "جابايى ارمان", "قازاقستاندىق", "ايشۋاق-جانتۇگەل" جانە تاعى باسقا ۇيىمداسقان توپتار بولعان. ارينە، ەل اراسىندا كوپ ايتىلىپ جۇرگەن "جابايى ارماننىڭ" ارەكەتىنە قاتىستى دا مالىمەتتەردى ايتا كەتتى. "جابايى ارمان" ۇقك-دەگى كۋراتورى ارقىلى ارنايى نۇسقاۋلىق الىپ وتىرعان.

"ول تارتىپسىزدىكتەردى ۇيىمداستىرىپ، ادامدار توبىن باسقارۋدى ءوز قولىنا الىپ، بيلىككە بۇلتارتپاس تالاپ قويۋ ءۇشىن "حالىق كەڭەسى" دەگەندى قۇرۋى ءتيىس بولعان. وعان الماتى قالالىق ءماسليحاتىنىڭ ەكس-دەپۋتاتى، سونداي-اق قىلمىستىق توپتىڭ بەلسەندى مۇشەسى ماحاتوۆ كومەكتەسكەن، ول الماتىداعى "قازاقستان" قوناق ۇيىنە كەلۋشى بانديتتەردى قارۋلاندىرعان. الايدا ولار جاپپاي نارازىلىقتى باسقارا المادى. حالىق ولارعا ەرمەگەن", - دەدى باس پروكۋرور.

"جابايى ارمان" ۇقك-ءنىڭ بۇرىنعى توراعاسى ۇستالعانى تۋرالى حابار العان ساتتە سەنىمدى اليبي جاساۋ ءۇشىن قاراقشىلارعا توناۋشىلىققا قارسى كۇرەسىپ جاتقان بولىپ قالا تۇرعىندارىنا تاپ بەرۋ تۋرالى تاپسىرما بەرگەنىن ايتتى. بۇگىندە تەرگەۋدە وتىرعان "جابايى ارمان" لاقاپ اتىمەن بەلگىلى قىلمىستىق الەم سەركەسى وسى ۋاقىتقا دەيىن بىرنەشە مالىمدەمە جاساپ، ءوزىن اقتاپ الۋعا تىرىسۋدا. ول قاڭتاردا ەشقانداي قىلمىس جاساماعانىن ايتتى، سونىمەن بىرگە بۇلىك ۇيىمداستىرۋشى ەمەس، كەرىسىنشە بۇلىكتى باسۋعا تىرىسقانىن ايتىپ، ۆيدەوۇندەۋ دە جاريالاعان بولاتىن.

قاسىرەتتى قاڭتار وقيعاسىندا ەل بويىنشا 5149 ادام جارالانىپ، 238 ادام وپات بولدى. ازاماتتاردى ازاپتاۋ، قيناۋ فاكتىلەرى بويىنشا تەرگەۋ جۇمىستارى دا اياقتالدى. ەندىگى كەزەك سوتتا...

Abai.kz