بۇگىن الماتىداعى Intercontinental قوناق ۇيىندە  ۇلىبريتانيالىق تاۋەلسىز كوميسسيا وكىلدەرىنىڭ قاتىسۋىمەن ءباسپاسوز كونفەرەنتسياسى ءوتتى. جيىنعا قاڭتار وقيعاسى جانە جانبولات مامايدىڭ ءىسىن زەرتتەۋمەن اينالىسىپ جاتقان ۇلىبريتانيا لوردتار پالاتاسىنىڭ مۇشەسى كەن ماكدونالد (Lord Macdonald KT KC of River Glaven), حالىقارالىق قۇقىقتىق كومەك كورسەتۋ كومپانياسى Bindmans LLP جەتەكشىسى تاياب الي، ۇلىبريتانيا پارلامەنت دەپۋتاتى روبەرت باكلەند شاقىرىلعان. سونداي-اق بىرقاتار جۋرناليستەر قاتىسىپ، سۇراقتار قويدى.

تىلشىلەر تاراپىنان قويىلعان «قاڭتار وقيعاسىن زەرتتەۋگە كىم قارجى ءبولىپ وتىر؟» دەگەن سۇراققا Bindmans LLP فيرماسىنىڭ جەتەكشىسى تاياب الي قارجىنىڭ كىم بەرىپ وتىرعانىن ايتا المايتىنىن جەتكىزدى.

«ءبىزدىڭ قىزمەتىمىزگە كىمنىڭ قارجى قۇيىپ وتىرعانىن ءدال قازىرگى ۋاقىتتا جاريالاي المايمىن. نەگە ەكەنىن تۇسىندىرەيىن. وسى زەرتتەۋمەن اينالىسا باستاعان ۋاقىتتا بۇل ءىستىڭ وتە «نازىك» تاقىرىپ ەكەنىن ءبىلدىم. زەرتتەۋگە قاتىسىپ جاتقان ادامدارعا ايتارلىقتاي تونەر قاۋىپ-قاتەر بار. سوندىقتان ولاردىڭ باس اماندىقتارىن ويلاپ، اتى-جوندەرىن ءمالىم ەتپەيمىز دەگەن كەلىسىم جاسالدى»،-دەدى ول.

ونىڭ ايتۋىنشا Bindmans LLP فيرماسى كوپشىلىكتىڭ سەنىمىنە يە بولعان، ابىرويلى كومپانيا.

«قارجىلاندىرۋ كوزىنە كەلسەك، ۇلىبريتانيا مەملەكەتى اقشانى جىلىستاتۋ قىلمىسىنا وتە قاتاڭ تارتىپپەن قارايدى»،-دەدى ول ءجۋرناليستىڭ سۇراعىنا جاۋاپ بەرىپ.

سونداي-اق تاياب الي زەرتتەۋدىڭ ناتيجەلەرى تولىقتاي اشىق جاريالاناتىن ايتتى.

Abai.kz