ءبىز بۇگىندە جاڭا تەحنولوگيالاردىڭ دامىعان زامانى - ءححى عاسىردا ءومىر ءسۇرىپ وتىرمىز. اللاعا شۇكىر، ۇلتىمىز يمانعا ۇيىسىپ، حالقىمىزدىڭ ءدىني ساۋاتى ارتىپ كەلەدى. سوندىقتان مەملەكەتىمىزگە ساۋاتتى، ىسكەر، ۇيىمداستىرۋشىلىق قابىلەتى جوعارى، كەز-كەلگەن ءدىني ماسەلەنى بايىپپەن، بايسالدىلىقپەن شەشۋگە تىرىساتىن ءبىلىمى مەن بىلىگى تولىسقان يمام-مولدالار قاجەت. ءدىني ءھام ۇلتتىق قۇندىلىقتارىمىزدى ساقتاي وتىرىپ، وركەنيەت كوشىنەن كەش قالۋعا بولمايدى.

قازاقستان مۇسىلماندارى ءدىني باسقارماسىنىڭ توراعاسى ەرجان قاجى مالعاجۇلى باس ءمۇفتي قىزمەتىنە كىرىسكەلى ءدىن سالاسى بويىنشا بىرنەشە باعىتتا جۇمىستاردى جۇيەلى جۇرگىزۋدى قولعا الدى. ءدىني باسقارمانىڭ الدىنا قويعان نەگىزگى جۇمىستارىنىڭ بىرەگەيى - يمام-مولدالاردىڭ ساۋاتىن جەتىلدىرىپ، ولاردى قايتا ساراپتاۋدان وتكىزۋ ارقىلى ءدىني قىزمەتتىڭ ساپاسىن ارتتىرۋ.

وسى ماقساتتا بۇگىن قمدب جانىنان قۇرىلعان ساراپتاۋ كوميسسياسى وڭتۇستىك قازاقستان وبلىسىنا كەلىپ، يمام-مولدالاردى اتتەستاتسيادان وتكىزۋدە. قمدب توراعاسىنىڭ ورىنباسارى، نايب ءمۇفتي سەرىكباي قاجى وراز، اپپارات باسشىسى عىلىمبەك ماجيەۆ، شاريعات جانە ءپاتۋا ءبولىمى مەڭگەرۋشىسىنىڭ ورىنباسارى سانسىزباي شوقانوۆ، وقۋ-اعارتۋ ءبولىمىنىڭ مەڭگەرۋشىسى سمايىل سەيىتبەكوۆ، پسيحولوگ مارگاريتا وسكەنباەۆا، ت.ب. ءدىن ماماندارى ءار يمامنىڭ ءدىني ساۋاتى مەن قابىلەتىن ساراپقا سالۋدا.

ءبىز بۇگىندە جاڭا تەحنولوگيالاردىڭ دامىعان زامانى - ءححى عاسىردا ءومىر ءسۇرىپ وتىرمىز. اللاعا شۇكىر، ۇلتىمىز يمانعا ۇيىسىپ، حالقىمىزدىڭ ءدىني ساۋاتى ارتىپ كەلەدى. سوندىقتان مەملەكەتىمىزگە ساۋاتتى، ىسكەر، ۇيىمداستىرۋشىلىق قابىلەتى جوعارى، كەز-كەلگەن ءدىني ماسەلەنى بايىپپەن، بايسالدىلىقپەن شەشۋگە تىرىساتىن ءبىلىمى مەن بىلىگى تولىسقان يمام-مولدالار قاجەت. ءدىني ءھام ۇلتتىق قۇندىلىقتارىمىزدى ساقتاي وتىرىپ، وركەنيەت كوشىنەن كەش قالۋعا بولمايدى.

قازاقستان مۇسىلماندارى ءدىني باسقارماسىنىڭ توراعاسى ەرجان قاجى مالعاجۇلى باس ءمۇفتي قىزمەتىنە كىرىسكەلى ءدىن سالاسى بويىنشا بىرنەشە باعىتتا جۇمىستاردى جۇيەلى جۇرگىزۋدى قولعا الدى. ءدىني باسقارمانىڭ الدىنا قويعان نەگىزگى جۇمىستارىنىڭ بىرەگەيى - يمام-مولدالاردىڭ ساۋاتىن جەتىلدىرىپ، ولاردى قايتا ساراپتاۋدان وتكىزۋ ارقىلى ءدىني قىزمەتتىڭ ساپاسىن ارتتىرۋ.

وسى ماقساتتا بۇگىن قمدب جانىنان قۇرىلعان ساراپتاۋ كوميسسياسى وڭتۇستىك قازاقستان وبلىسىنا كەلىپ، يمام-مولدالاردى اتتەستاتسيادان وتكىزۋدە. قمدب توراعاسىنىڭ ورىنباسارى، نايب ءمۇفتي سەرىكباي قاجى وراز، اپپارات باسشىسى عىلىمبەك ماجيەۆ، شاريعات جانە ءپاتۋا ءبولىمى مەڭگەرۋشىسىنىڭ ورىنباسارى سانسىزباي شوقانوۆ، وقۋ-اعارتۋ ءبولىمىنىڭ مەڭگەرۋشىسى سمايىل سەيىتبەكوۆ، پسيحولوگ مارگاريتا وسكەنباەۆا، ت.ب. ءدىن ماماندارى ءار يمامنىڭ ءدىني ساۋاتى مەن قابىلەتىن ساراپقا سالۋدا.

شىمكەنت قالاسىنىڭ 42 يمامى ەكى كۇن بويى اتتەستاتسيادان وتەدى. ودان كەيىن اۋدان، اۋىل مولدالارىنىڭ ءبىلىمى ساراپتالماق. ءدىن قىزمەتكەرلەرىنىڭ ءدىني ساۋاتى تومەندەگى تالاپتار نەگىزىندە انىقتالادى:

-         قاسيەتتى قۇراندى ءتاجۋيد ەرەجەسىنە ساي انىق، جاتقا ءارى مۇدىرمەي وقۋ;

-         يسلامداعى فيقھتاردى (قۇقىقتاردى) ءبىلۋ;

-         اقيدا ءىلىمى دەڭگەيىن انىقتاۋ;

-         اراب ءتىلى ءبىلىمىن انىقتاۋ;

-         ءدىني اعىمداردىڭ پايدا بولۋ تاريحىنا قاتىستى ساۋاتىن ءبىلۋ;

-         ءدىني قىزمەت پەن ءدىني بىرلەستىكتەر تۋرالى زاڭ تالاپتارى جايلى ءبىلىمىن انىقتاۋ;

-         پسيحولوگيالىق تەست جۇرگىزۋ، ت.ب.

بۇدان بولەك مۇسىلماننىڭ كۇندەلىكتى ومىرىندە كەزدەسەتىن ءدىني راسىمدەرگە قاتىستى ءبىلىمى مەن ودان شىعۋدىڭ جولدارى تۋرالى وي-كوزقاراستارى انىقتالۋدا. ءدىني قىزمەت پەن ءدىني بىرلەستىكتەر تۋرالى زاڭدا ءابۋ حانيفا ءمازھابىنا باسىمدىق بەرىلگەنى بەلگىلى. وسىعان وراي قمدب ساراپتاۋ كوميسسياسى مۇشەلەرى تاراپىنان يمام ءابۋ حانيفانىڭ ءومىرى مەن ءدىني ءىلىمى تۋرالى سۋالدار دا قويىلدى.

ءمۇفتيات بۇرىن بولماعان وڭ باستاماعا مۇرىندىق بولدى: يمامدار اراسىندا 71 سۇراق بويىنشا پسيحولوگيالىق تەست جۇرگىزىلىپ جاتىر. ماقسات - ءدىن قىزمەتكەرلەرىنىڭ قارىم-قابىلەتىن، مىنەز-قۇلقىن، پسيحولوگياسىن انىقتاۋ ءارى ولاردىڭ جىگەرىن وياتۋ، قىزمەتكە دەگەن قۇلشىنىسىن ارتتىرۋ.

سەرىكباي قاجى وراز، قازاقستان مۇسىلماندارى ءدىني باسقارماسى توراعاسىنىڭ ورىنباسارى، نايب ءمۇفتي:

ماقساتىمىز - قىزمەتكە قۇلشىنىستى ارتتىرۋ

وزدەرىڭىزگە بەلگىلى، ەلباسىمىز ءدىني باسقارمانىڭ وكىل يمامدارىمەن كەزدەسۋىندە ءدىن قىزمەتكەرلەرىنىڭ ءبىلىمىن كوتەرۋ ماسەلەسىنە ءجىتى كوڭىل ءبولۋ قاجەتتىگىن ايتتى. قازاقستان مۇسىلماندارىنىڭ VII قۇرىلتايىندا ءبىراۋىزدان باس ءمۇفتي قىزمەتىنە سايلانعان ەرجان قاجى مالعاجىۇلىنىڭ جۇمىس جوسپارىنىڭ نەگىزگى باعىتتارىنىڭ بىرەگەيى - يمامداردىڭ ءىلىمىن شىڭداۋ، قابىلەتىن ارتتىرۋ. وسى ماقساتتا ءدىن كادرلارىن اتتەستاتسيادان وتكىزۋ شاراسىن وڭتۇستىك قازاقستان وبلىسىنان باستاۋىمىزدىڭ ءمانى بار. ويتكەنى، وڭتۇستىك ءوڭىر، ەلىمىز بويىنشا، مەشىتى مەن مولداسى مول ايماق. يمامداردىڭ كوپ بولعانى جاقسى. الايدا ءدىن قىزمەتكەرلەرىنىڭ سانى عانا ەمەس، ساپاسىنىڭ جوعارى بولعانى وتە ماڭىزدى.

بۇل - اتتەستاتسيادان وتپەي قالعان يمام قىزمەتتەن بوساتىلادى دەگەن ءسوز تەمەس. بىرىنشىدەن، ولاردىڭ ءدىني ءبىلىم دەڭگەيىن انىقتاي وتىرىپ، ساۋاتىن جەتىلدىرۋگە جاعداي جاساۋ، مۇمكىندىكتەر تۋعىزۋ.

ءدىن وكىلدەرى اراسىندا وتەتىن اتتەستاتسيالاۋ جۇمىسى باسقا دا وبلىس، ايماق، وڭىرلەردە جۇزەگە اسادى. ساراپتاۋ كوميسسياسىنىڭ شەشىمىن باس ءمۇفتي قاراستىرىپ، بەكىتەدى.

قازاقستان مۇسىلماندارى ءدىني باسقارماسى جانىنان قۇرىلعان ساراپتاۋ كوميسسياسىنىڭ بۇل جۇمىسى يمامدارىمىزدىڭ جۇمىسىنا دەگەن جاۋاپكەرشىلىگىن سەزىندىرىپ، يسلامي ءبىلىمىن جەتىلدىرۋگە جىگەرلەندىرىپ، ءدىني قىزمەتكە دەگەن قۇلشىنىسىنىڭ ارتۋىنا سەپ بولارىنا سەنىمدىمىز.

مارگاريتا وسكەنباەۆا، پسيحولوگ:

يمامداردا كوشباسشىلىق قاسيەت بار

پسيحولوگيالىق تەستكە يمامدارعا ارنالعان 71 سۇراق ەنگىزدىك. سۇراقتار نەگىزىندە يمامنىڭ ءوز قىزمەتىنە دەگەن جاۋاپكەرشىلىگى، ادامدارمەن قارىم-قاتىناس دەڭگەيى، كوڭىل-كۇيى، وتباسىلىق جاعدايى مەن مىنەز-قۇلقىنا سيپاتتاما بەرىلەدى. ءبىز وسى ارقىلى ءدىن قىزمەتكەرلەرىنىڭ جۇمىسقا دەگەن جىگەرىن وياتىپ، قۇلشىنىسىن ارتتىرۋعا ىقپال ەتەمىز. كەيبىر وتباسىلىق، قوعامدىق، ءدىني ماسەلەلەردى شەشۋدە بايسالدىلىق، بايىپتىلىق تانىتۋعا جانە تىعىرىقتان شىعۋدىڭ پسيحولوگيالىق جولدارىن ۇسىنامىز، جان-دۇنيەسىندەگى قايشىلىقتاردى جەڭۋگە جاردەم بەرەمىز.

يمامداردىڭ بەرگەن جاۋابى ارقىلى باللدىق كورسەتكىش نەگىزىندە ولاردىڭ پسيحولوگياسىن انىقتاۋعا بولادى. پسيحولوگيالىق تەستىڭ تاعى ءبىر پايداسى - ادامنىڭ ءوز بويىنداعى جامان قاسيەتتەردى جەڭۋگە، ومىرگە دەگەن قۇشتارلىعىن ارتتىرۋعا كومەكتەسەدى.

بىزدەر، پسيحولوگيا سالاسىنىڭ ماماندارى كوپتەگەن مەكەمە قىزمەتكەرلەرى اراسىندا پسيحولوگيالىق ساراپتاۋ جۇمىستارىن جۇرگىزەمىز. الايدا ءبىز مۇنداي شارانى ءبىرىنشى رەت ءدىن ماماندارى اراسىندا وتكىزىپ وتىرمىز. بۇعان دەيىن بىزدە مۇنداي تاجىريبە بولماعان. تەست جۇرگىزۋ كەزىندە بايقاعانىم، يمامدار وزىنە سەنىممەن قارايدى، ۇستامدىلىق تانىتادى. ولاردىڭ باسىم كوپشىلىگىندە كوشباسشىلىق، تۇلعالىق قاسيەتتەر بايقالادى. ءدىني باسقارماسىنىڭ بۇل باستاماسى وڭ ناتيجەسىن بەرەدى دەگەن ويدامىز.

اعابەك قوناربايۇلى،

قمدب-نىڭ ءباسپاسوز حاتشىسى

شىمكەنت قالاسى