«ەلگە قايتارۋ» قوعامدىق قورىنىڭ قۇرىلتايشىسى بولات ءابىلوۆ، قوردىڭ قۇرىلتايشىسى ءارى ديرەكتورى ورازالى ەرجانوۆ جانە ساراپشى ەسكەندىر بەيسەمبەتوۆ ERG توبىنىڭ قىزمەتىنە بايلانىستى قر باس پروكۋرورى بەرىك اسىلوۆ پەن قر سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى ولجاس بەكتەنوۆتىڭ اتىنا ءوتىنىش بەردى. بۇل تۋرالى ولار وتكەن سەنبى، 26 قاڭتاردا وتكىزگەن ءباسپاسوز ءماسليحاتىندا جاريالادى.

«وليگارح الەكساندر ماشكەۆيچتىڭ ەۋرازيالىق توبى ديرەكتورلارىنا قويار 3 سۇراعىمىز بار»، - دەيدى قوعامدىق قوردىڭ وكىلدەرى.

ولاردىڭ ايتۋىنشا، ەۋرازيالىق توپتىڭ ديرەكتورلار كەڭەسىندە قازاقستان اتىنان وكىلدىك ەتكەن ۇكىمەت مۇشەلەرىنىڭ «ارەكەتى نە ارەكەتسىزدىگى» رەسپۋبليكانىڭ مۇددەسىنە ايتارلىقتاي زيانىن تيگىزگەن.

«2022 جىلعى 27 قازاندا ءبىز ەل پرەزيدەنتىنە، ۇكىمەت پەن قۇقىق قورعاۋ ورگاندارىنىڭ باسشىلىعىنا ارىزىمىزدى جولدادىق. 15 جەلتوقساندا قارجى مينيسترلىگىنەن جاۋاپ الدىق، وندا 2021 جىلدىڭ قورىتىندىسى بويىنشا ەۋرازيالىق توپتىڭ قارىزى شامامەن 7 7 ملرد قۇرايتىنىن كورسەتكەن. بىراق بۇل مالىمەت قارجى مينيسترلىگىن ەش الاڭداتپادى. ولار تازا قارىزدىڭ EBITDA-عا اراقاتىناسى شامامەن 1,5 قۇرايتىنىن ايتتى. بىراق ءبىزدىڭ پايىمداۋىمىزشا، بۇل شىندىققا جاناسپايدى»، - دەدى ورازالى ەرجانوۆ.

ERG تۋرالى ەكىنشى ۇلكەن ماسەلە – قازاقستاننىڭ ەۋرازيالىق توپتان بەس جىل ىشىندە العان ديۆيدەندتەر سوماسى از. 2017-2021 جىلدارى ەۋرازيالىق توپ قازاقستان بيۋدجەتىنە تاپقان تابىسىنىڭ 40 پايىزىن ديۆيدەنت رەتىندە تولەۋگە مىندەتتەلگەن. ول شامامەن 4-5 ملرد دوللاردى قۇرايدى.

ERG-ءدىڭ كورپوراتيۆتى ەسەبىنە قاراعاندا ەۋرازيالىق توپ:

2017 جىلى 2,09 ملرد دوللار;

2018 جىلى 1,913 ملرد دوللار;

2019 جىلى 1,538 ملرد دوللار;

2020 جىلى 2,23 ملرد دوللار;

2021 جىلى 4,210 ملرد دوللار پايدا تاپقان.

«Dala inside» تەلەگرام ارناسىنىڭ جازۋىنشا، 5 جىلدا ماشكەۆيچكە تيەسىلى ەۋرازيالىق توپ جيىن-تەرىمى 11,774 ملرد اقش دوللاردى قالتاعا باسقان. سۇيتە تۇرا، ماشكەۆيچ مەملەكەتكە بار بولعانى 365 ملن اقش دوللارىن اۋدارعان. قالعان اقشا قايدا كەتتى؟ بۇل سۇراق قور وكىلدەرىن الاڭداتىپ وتىرعانىمەن، ۇكىمەتتى الاڭداتا قويماعان سەكىلدى.

«قارجى مينيسترلىگى ماسەلەنى ماڭىزدى دەپ ساناپ وتىرعان جوق. تاڭعالدىق. بۇل اقشا قازاقستاننىڭ تابيعي رەسۋرستارىن ساتۋ ەسەبىنەن ءتۇستى. قاراجات ەلدىڭ ەكونوميكاسىن كوتەرۋگە جۇمسالۋى كەرەك بولاتىن، بىراق، ونىڭ ورنىنا شەتەل اسىپ كەتىپ جاتىر»، - دەدى ورازالى ەرجانوۆ.

«ەلگە قايتارۋدىڭ» قۇرىلتايشىلارى سول تۇستاعى ۇكىمەت مۇشەلەرى مارات بەكەتاەۆ، باقىت سۇلتانوۆ، بەيبىت اتامقۇلوۆتاردىڭ سالعىرتتىعىنان ەل قازىناسى ميللياردتاعان قارجىدان قاعىلعانىن ايتادى.

«Dala inside» تەلەگرام ارناسىنىڭ دەرەگىنشە، بىلتىر قاڭتارداعى ابىر-سابىردا دا ماشكەۆيچ قۇر وتىرماي، ەۋروپادا تىركەلگەن ەنشىلەس كومپانياعا قارىز كەرەك دەگەندى جەلەۋ ەتىپ، ەلدەگى 1,1 ملرد دوللاردى شەتەل اسىرىپ جىبەرگەن

«قاڭتاردا ەل قان-جوسا بولىپ، قارا جامىلعان ساتتە مايشەكەنىڭ كومپانياسى قازاقتىڭ جەر استى بايلىعىن ساتىپ تاپقان قاراجاتتى شەتەل اسىرۋدان قولى بوساماعان. ءابىلوۆتىڭ ءمالىم ەتكەنىندەي قاڭتاردىڭ قارساڭىندا  ەۋرازيالىق توپ تاعى 500 ملن دوللاردى شەتەلگە شىعارعان. وسىلايشا ماشكەۆيچتىڭ كومپانياسى ءبىر ايدىڭ ارالىعىندا 1,6 ملرد دوللاردى ەلدەن جىلىستاتقان»، - دەپ جازادى ارنا.

قور وكىلدەرى ماشكەۆيچتىڭ ۇرلاعان اقشاسىن قايتارۋدى كوزدەپ وتىرعانىن ايتتى، سونداي-اق «شەتەلگە كەتكەن اكتيۆتەردى ەلگە قايتارۋ تۋرالى پرەزيدەنت تاپسىرماسىنا ۇكىمەت باسشىسى ءاليحان سمايىلوۆ جىلدام كىرىسپەي وتىر»، - دەيدى ولار.

Abai.kz